Umphumela Wama-video Anikeza Ubufakazi
1 “Indodana yethu yaqala ukubuka le-video ingakakwazi nokuhamba. Ayideli ukuyibuka. Akuve kukuhle ukuba namathuluzi akha uthando ngoJehova ebantwaneni bethu!” Wayekhuluma ngayiphi i-video lo mzali ongumKristu? Wayekhuluma ngale ethi Noah—He Walked With God. Umama othile ongeyena uFakazi onendodana eyabona le video ethi Noah komunye umuzi wathumela ehhovisi legatsha umnikelo ka-R670 wabuza ukuthi sinawo yini amanye ama-video abantwana. Ama-video enziwa inhlangano kaJehova anethonya elikhulu kwabasha nabadala.
2 Emkhayeni: Ngemva kokuba umkhaya ongoFakazi ubukele i-video ethi Jehovah’s Witnesses Stand Firm Against Nazi Assault, umama wakhona wathi: “Bengizindla usuku lonke ngendlela uJehova enza ngayo abantu abavamile bakwazi ukukhuthazelela izinto ezingavamile! Ukucabanga ngakho kungikhumbuze ukuthi ezami izinkinga ziwubala kangakanani uma ziqhathaniswa nezabo. Ukubuka le video nabantwana bethu kubasizile ukuba basibone ngokucace kakhudlwana isidingo sokuthembela kuJehova. Ngokuxoxa ngayo kamuva namadodakazi ethu, siye sawasiza ukuba azihlomele kangcono noma iziphi izingcindezi noshushiso olungawehlela.”
3 Esikoleni: UFakazi osanda kweva eminyakeni eyishumi nambili wakwazi ukubukisa ikilasi lakhe i-video ethi Stand Firm njengengxenye yombiko wakhe. Ngaphambili uthisha wayethe akabathandi oFakazi. Ngemva kokubuka le video, wathi: “Lokhu kuyishintshe ngokuphelele indlela engibabheka ngayo oFakazi BakaJehova. Ngiyathembisa ukuthi ngokuzayo lapho befika kwami, ngizobalalela futhi ngiqale ukufunda nabo iBhayibheli!” Yini eyashintsha umbono wakhe ngathi? Wathi washintshwa “uthando lwethu lweqiniso nobuqotho.”
4 Enkonzweni: Udade wahlangana nowesifazane owangabaza ukwamukela izincwadi, nakuba ayenemibuzo ngathi nangezinkolelo zethu. Udade wabuyela kuye ne-video ethi Jehovah’s Witnesses—The Organization Behind the Name wayibukisa lona wesifazane nomyeni wakhe. Bobabili bahlabeka umxhwele kakhulu bavuma ukutadisha iBhayibheli. Ngenxa yobufakazi obuhle abanikezwa bona, baqala ukuvumelanisa ukuphila kwabo nentando kaNkulunkulu.
5 Singawasebenzisa kanjani ngokugcwele ama-video ethu? Njengoba kubiza ukwenza la ma-video, amanye amabandla agcina iqoqo lawo eMtatsheni Wezincwadi WaseHholo LoMbuso bese abamemezeli bewaboleka. Akukhuthazwa ukuba abamemezeli bawa-ode la ma-video uma bengenawo umshini odlala ama-video noma bengeke bawasebenzise ngokugcwele.