Kudingeka Sibekezele Enkonzweni Yethu
1. UJehova usibekezelele kanjani isintu?
1 Ukubekezela kuwuphawu oluvelele endleleni uNkulunkulu asebenzelana ngayo nesintu. (Eks. 34:6; IHu. 106:41-45; 2 Pet. 3:9) Esinye sezibonelo ezivelele sokubekezela nothando lwakhe sibonakala emsebenzini womhlaba wonke wokushumayela ngoMbuso. Sekuyiminyaka ecishe ibe ngu-2 000 uNkulunkulu esebenzelana nesintu, kodwa usaqhubeka edonsela abanhliziyo ziqotho kuye. (Joh. 6:44) Singakulingisa kanjani ukubekezela kukaNkulunkulu enkonzweni yethu?
2. Singakubonisa kanjani ukubekezela lapho sisebenza ensimini yakithi?
2 Inkonzo Yendlu Ngendlu: Silingisa ukubekezela kukaJehova ngokushumayela “ngaphandle kokuyekethisa” ensimini enabantu abangakasibonisi isithakazelo. (IzE. 5:42) Sibekezelela ukunganakwa, ukwenziwa inhlekisa nokuphikiswa kwenkonzo yethu. (Marku 13:12, 13) Sibonisa ukubekezela nangokuphikelela emizamweni yethu yokunisela imbewu yeqiniso ngisho nalapho kunzima ukubathola besemakhaya abanesithakazelo.
3. Kungani kudingeka ukubekezela lapho senza izimpindelo nalapho siqhuba izifundo zeBhayibheli?
3 Izifundo ZeBhayibheli: Ukukhulisa isitshalo kudinga isineke. Singasinakekela kodwa ngeke sikwazi ukusenza sikhule ngokushesha. (Jak. 5:7) Ngokufanayo, ukukhula okungokomoya kwenzeka kancane kancane futhi kunezigaba. (Marku 4:28) Labo esibafundelayo bangakuthola kunzima ukushiya izinkolelo zamanga noma amasiko angqubuzana nemiBhalo. Akufanele sizame ukusheshisa intuthuko ngokubacindezela ukuba benze izinguquko. Kudingeka ukubekezela ukuze sivumele isikhathi esanele sokuba umoya kaNkulunkulu usebenze enhliziyweni yomfundi.—1 Kor. 3:6, 7.
4. Ukubekezela kungasisiza kanjani ukuba sifakaze ngempumelelo ezihlotsheni ezingakholwa?
4 Izihlobo Ezingakholwa: Nakuba sinesifiso esijulile sokuba izihlobo zethu ezingakholwa zifunde iqiniso, sibonisa ukubekezela ngokulinda kuze kube yisikhathi esikahle sokuhlanganyela nazo ukholo lwethu, sibe siqaphela ukuba singazixaki ngokwaziswa okuningi kakhulu. (UmSh. 3:1, 7) Ngesikhathi esifanayo, sibeka isibonelo ngokuziphatha kwethu futhi sihlala sikulungele ukuzwakalisa ukholo lwethu ngomoya omnene nangenhlonipho ejulile. (1 Pet. 3:1, 15) Ngempela, inkonzo eyenziwa ngokubekezela iyophumelela kakhudlwana futhi iyomjabulisa uBaba wethu osezulwini.