Intsha Iyabuza . . .

Ingabe Umthandazo Uyasiza Ngempela?

OKUNYE UKUHLOLA kwabonisa ukuthi “kulabo abathandazayo, cishe abayingxenye basebenzisa umthandazo ‘njengocingo oluqonde ngqo ezulwini’ becela usizo oluqondile lwabo ngokwabo, lwemikhaya yabo nabangane.” Kodwa ingabe imithandazo enjalo iyasiza ngempela? Intombazane esencane egama layo linguPeggy yacabanga ukuthi iyasiza. Ngemva kokuthandaza kuNkulunkulu ngezinkinga zayo, yathi: “Ngazizwa ngingcono futhi ngalala ngivuka ngakusasa ekuseni ngingacabangi ngakho. Ngangikhohlwa konke ngakho.”

Mhlawumbe izinkinga ezithile zakho siqu ngokufanayo ziye zakushukumisela ukuba ngezinye izikhathi uye kuNkulunkulu njengesiphephelo sokugcina. NjengoPeggy, kungenzeka uye wazizwa ungcono ngenxa yalokho. Nokho, umthandazo kaPeggy, awuzange umsize ngempela ukuba axazulule inkinga yakhe. Futhi mhlawumbe okufanayo kwakuyiqiniso endabeni yakho. Khona-ke kungenzeka uye wazibuza ukuthi kazi umthandazo umane nje ungokuthile okukwenza uzizwe kangcono. Uyabuza, ‘Ngingazi kanjani ukuthi angikhulumi nje ngedwa? Ingabe ukhona olalele ongikhathalela ngempela futhi ongangisiza?’

‘UNkulunkulu—Ingabe Uyangikhathalela?’

Ngempela kungase kubonakale kunzima ukukholelwa ukuthi uNkulunkulu ezulwini angazikhathaza izinkinga zethu ezincane. Nokho, eNtshumayelweni yakhe yaseNtabeni, uJesu wathi: “Bukani izinyoni zezulu ukuthi azihlwanyeli, azivuni, azibekeleli ezinqolobaneni; nokho uYihlo wasezulwini uyazondla. Nina kanizidluli kakhulu na?” UJesu waqhubeka: “Nikhathazekelani ngesambatho na? Qaphelani iminduze yasendle ukuthi imila kanjani; kayikhandleki, kayiphothi; kepha ngithi kini: NoSolomoni ebukhazikhazini bakhe bonke wayengembathisile okomunye wayo.”—Mathewu 6:26, 28, 29.

Khona-ke, ngokuqinisekile, uma uNkulunkulu ezikhathalela kakhulu izinyoni neminduze—ubengeke yini asikhathalele ngokwanele ukuba alalele imithandazo yethu? Ngakho-ke iBhayibheli libiza uNkulunkulu ngokuthi “unguMuzwi wemikhuleko.” (IHubo 65:2, NW) Uthembisa ukuthi uma sithandaza kuye ngokholo, “sicela utho ngokwentando yakhe, uyasizwa.” (1 Johane 5:14) Futhi intsha eningi inomuzwa wokuthi lokhu kuye kwabonakala kuyiqiniso endabeni yayo.

Intombazane esencane egama layo linguKay ithi: “Umthandazo ungisiza ukuba ngijabule kakhulu. Ngezinye izikhathi uvele nje ube nomuzwa wokufuna ukuveza imizwa yakho engaphakathi kothile, futhi akekho ongcono kunoJehova esingayithululela kuye ngoba uJehova uyaqonda, futhi uyazi ukuthi uwukuphela komuntu ongakusiza ngempela.” UPeggy osemncane (akuyena okukhulunywe ngaye ekuqaleni) ngokufanayo unomuzwa wokuthi imithandazo yakhe iwela ezindlebeni ezizwayo. Phawula indlela ake asingatha ngayo inkinga yakhe siqu: “Ngavele ngakhala kaningi ngayo. Kodwa lapho sengiqedile ukukhala, ngazithola sengikhuluma noJehova, njengokungathi wayekhona lapho, ehlezi eduze kwami futhi elalele lokho engangizokusho.”

Indlela Umthandazo Osiza Ngayo

Lentsha iye yafunda ukulandela iseluleko somhubi: “Phonsa phezu kukaJehova umthwalo wakho.” (IHubo 55:22) Nokho, umthandazo usiza ngezindlela ezidlulela ngale kokukhululeka ngokwemizwelo kuphela. Omusha ogama lakhe linguMaria ukhuluma ngokuhlangenwe nakho kwakhe siqu: “Ngiyazi ukuthi noma nini lapho nginenkinga ngingaphendukela kuJehova ukuze angiqondise futhi uzongisiza.”

UMaria, njengoPeggy noKay, ungomunye woFakazi BakaJehova. Bobathathu baye bakha ubungane bomuntu siqu obuseduze noNkulunkulu esikhathini esithile ngomthandazo nangokutadisha iBhayibheli. Kulentsha uNkulunkulu ngempela ‘uyisiphephelo sayo namandla ayo, ufunyaniswa ewusizo impela ekuhluphekeni.’ (IHubo 46:1) Nokho, phawula ukuthi uMaria akathandazeli ukususwa kwezinkinga zakhe okuyisimangaliso. Kunalokho, uthandazela ‘ukuqondiswa.’ Lokhu kukhomba kwesinye sezimiso zokuthandaza eziyisisekelo.

KuJakobe 1:2-5 iBhayibheli lithi: “Bazalwane bami, nxa nehlelwa yizilingo ngezilingo, anothi kungukuthokoza kodwa, nazi ukuthi ukuvivinywa kokukholwa kwenu kuveza ukukhuthazela . . . Uma-ke kukhona kini oswela ukuhlakanipha, makacele kuNkulunkulu obapha bonke ngobuhle engajakadi, khona uyakuphiwa.” UJakobe akazange asikhuthaze ukuba sithandazele ukuphunyuka ‘ezilingweni.’ Nokho, ‘singacela kuNkulunkulu’ ukuhlakanipha kokubhekana nalesosilingo! UNkulunkulu ‘akajakadi’ njengokungathi kuwubuwula ukucela lokhu kuhlakanipha. Kunalokho usithembisa ngesihle ukuthi ‘uyosipha’ ukuhlakanipha okunjalo.

Khona-ke, ake sithi ubhekene nesimo esinzima—inkinga nothisha, ukungezwani nabazali bakho. Zama ukuthandaza kuNkulunkulu. Ngisho nakokuncane kakhulu, umthandazo ugxilisa inhliziyo nengqondo yakho kulokho okubalulekile emehlweni kaNkulunkulu. Lokhu kusiza ekubekeni inkinga yakho esimweni esifanelekile. UJesu waqhubeka wathembisa ukuthi umoya wakhe ongcwele ‘wawuyosikhumbuza konke ayesitshele khona.’ (Johane 14:26) Ngokufanayo, uma uthandazela ukuqondiswa, uNkulunkulu angakukhumbuza imibhalo noma izimiso zokwesaba uNkulunkulu ezihambisana nendaba. Eqinisweni, uNkulunkulu uyolindela umzamo othile ngasohlangothini lwakho, njengokucwaninga izindaba eBhayibhelini noma ukufuna iseluleko esivuthiwe. UNkulunkulu angayibusisa imizamo yakho, ngezinye izikhathi aze akunike “amandla angaphezu kwavamile” ukuze ukhuthazele.—2 Korinte 4:7, NW.

Indlela Yokuthandaza KuNkulunkulu

Ubungathanda yini ukuba nawe ujabulele ubuhlobo obuseduze noNkulunkulu nokwazi ukuthi uyayiphendula imithandazo yakho? NjengoKay, uPeggy, noMaria, kumelwe uqale ngokutadisha iBhayibheli. Lokhu kuyokusiza ukuba ufunde ngobuntu nangezimfanelo zikaJehova uNkulunkulu. Njengoba ufunda ukuthi unguNkulunkulu onomusa nonothando kanjani, uyozizwa usesimweni esingcono kakhulu ngokusondela kuye ngomthandazo.

‘Kodwa yini engiyishoyo kuye?’ ungase ubuze. Ukuthandaza kuNkulunkulu kungafana kakhulu nokuxoxa nomngane oseduze. Uma ubunenkinga enzima engqondweni yakho, ubungeke yini ukhulume ukhiphe konke kumngane onjalo, uveza imicabango esenhliziyweni nokukhathazeka kwakho? UNkulunkulu ungumngane ongathululela kuye imicabango yakho ejule kakhulu, wazi ukuthi uyokuzwa ngokuqondiie lokho okushoyo. Kodwa njengoba enokuhlakanipha namandla amakhulu kakhulu kunanoma imuphi umuntu, angakusiza ngempela!

Nokho, ingabe izinkinga zakho siqu kumelwe ngaso sonke isikhathi zibuse imithandazo yakho? UJesu wasinika umthandazo oyisibonelo owaziwa njengoMthandazo WeNkosi, noma umthandazo kaBaba Wethu, otholakala eBhayibhelini kuMathewu 6:9-13. Phawula ukuthi okokuqala okubalulekile kwakuwukungcweliswa (noma ukuphathwa ngobungcwele) kwegama likaNkulunkulu, uJehova. Okulandelayo kwakuwukuthi uMbuso kaNkulunkulu (noma uhulumeni ongokwasezulwini) ufike nokuthi intando kaNkulunkulu yenziwe kokubili ezulwini nasemhlabeni. Kwakungemva kuphela kokuxoxa ngalezindaba ezinkulu lapho uJesu waguqulela ukunaka ezinkathazweni zomuntu siqu, njengokudla, ukuzuza intethelelo, nokukhuthazelela ukulingwa kokwenza okungalungile. Imithandazo yakho ingabonisa okuza kuqala okufanayo, ubonise uNkulunkulu ukuthi awukhathazekile nje ngobugovu ngezinkinga zakho siqu.

Nokho, uJesu waxwayisa: “Kodwa nxa nikhuleka, ningathemelezi njengabezizwe, ngokuba bathi bayakuzwiwa ngokukhuluma kwabo okuningi.” (Mathewu 6:7) Imithandazo emide, eyinkimbinkimbi ayimhlabi umxhwele uNkulunkulu; ngokufanayo nemithandazo efundwa encwadini noma eshiwo ngekhanda njengenkondlo, njengokungathi okubalulekile kuwukukhethwa kwamagama. Umhubi wathi: “Nithulule inhliziyo yenu phambi kwakhe.” (IHubo 62:8) Ingabe unohlobo oluthile lobuthakathaka oye wasebenza kanzima ukuba ulunqobe kodwa luqhubeka luvela? Ingabe kukhona inkinga ethile yomkhaya ekwenza ungajabuli neze? Lezi izinto “ongathulula inhliziyo yakho” ngazo kuNkulunkulu ukuze uthole usizo lwaphezulu.

Nokho, khumbula ukuthi kumelwe futhi uzimisele ukwemukela impendulo kaNkulunkulu. UJehova, ngokuhlakanipha kwakhe, angase abone izinto ongaziboni. Ngakho-ke uma ucela okuthile futhi ungakutholi, lokhu akusho ukuthi uJehova ubengalalele. Kungamane nje kusho ukuthi uye wacela okuthile okungekho ezithakazelweni zakho ezingcono kakhulu. Kunjengoba isaga sithi: “Themba kuJehova ngayo yonke inhliziyo yakho, ungenciki kokwakho ukuqonda.” (IzAga 3:5) Qhubeka uthandaza ngakho, futhi ekugcineni uyothola ukuqondisa kukaNkulunkulu.

Uma umthandazo uba yingxenye evamile yokuphila kwakho, ungakuletha ebuhlotsheni obuseduze nobujabulisayo noJehova uNkulunkulu, okuthile okumelwe kubhekwe njengokuyigugu. Uma ungakawuqali umkhuba wokuthandaza, manje isikhathi esihle sokuqala. Kungani ungathandazi kuNkulunkulu ngesifiso sakho sokwakha ubuhlobo obuhle naye? Ngokuqinisekile uyokusiza.—Jakobe 4:8.

[Isithombe ekhasini 18]

“Ngiyazi ukuthi noma nini lapho nginenkinga ngingaphendukela kuJehova ukuze angiqondise futhi uzongisiza.”