Ububi Nokuhlupheka—Kuzophela Kanjani?

IZEHLAKALO ezibuhlungu ngokuvamile zizwisa ubuhlungu, Nokho, kuthiwani uma kunesizathu esingokomthetho sokuhlupheka komuntu? Unalokho engqondweni, asiqhubeke nendaba ephathelene noJobe. Ngemva kokuba imizuliswano emithathu yenkulumo-mpikiswano evuth’ uphondo isidlulile, insizwa egama layo linguElihu iyakhuluma. Ithi kuJobe: “Uthi, ‘ukulunga kwami kudlula kukaNkulunkulu.’” Yebo, uJobe wayenobugovu futhi ezithethelela. UElihu uthi: “Bheka, ngiyakuphendula ukuthi awuthethanga kahle lokho, ngokuba uNkulunkulu mkhulu kunomuntu.”—Jobe 35:2, NW; 33:8-12.

uNkulunkulu uye washiya ubufakazi obuningi bokuthi ulungile. (IzEnzo 14:17; Roma 1:20) Ngakho ingabe ukuba khona kobubi kuyisizathu sokungabaza ukulunga kukaNkulunkulu? UElihu uyaphendula: “Makube-kude noNkulunkulu ukuba enze okubi, nakuSomandla ukuba enze ukona.”—Jobe 34:10.

UNkulunkulu—Ingabe Akanamandla Okumelana Nobubi?

Khona-ke, ingabe kungaba ukuthi uNkulunkulu wayemane nje engenamandla anele okungenela kulendaba kaJobe noma endabeni kanoma ubani omunye? Akunjalo! Manje uNkulunkulu uyazikhulumela esivunguvungwini esesabekayo, eqinisekisa ngokunamandla ukuba onamandla onke kwakhe! “Wawukuphi, lapho ngasekela umhlaba, na?” ebuza uJobe. Phela, kungabonisi neze ukuba namandla alinganiselwe, ukhuluma ngaye ngokwakhe njengaLowo ongalawula izilwandle abuse amazulu kanye nezidalwa eziphila kuwo.—Jobe 38:4, 8-10, 33; 39:9; 40: 15; 41:1.

Kuyiqiniso, uNkulunkulu akamchazeli uJobe ukuthi kungani emvumele ukuba ahlupheke. Kodwa “osolayo uyakuphikisana noSomandla na?” kubuza uJehova. “Imbala uyachitha ukwahlulela kwami, ungilahle ukuba ubengolungileyo, na?” (Jobe 40:2, 8) Khona-ke, yeka ukugabadela okuyikho, ukusola uNkulunkulu ngobubi obusezweni noma ukwakha izindlela zokuhlakanipha zokumvikela! Njengoba manje uJobe eshukunyiselwa ukuba enze, abanjalo bayobe benza kahle uma ‘bezinenga’ ngezimfundiso zabo eziphikisanayo.—Jobe 42:6.

Izimpikiswano Okumelwe Zixazululwe

UJobe akazange aqaphele ukuthi ukuhlupheka kwakhe kwakuhlanganisa izimpikiswano ezinkulu ezaziphakame ngokushesha ngemva kokudalwa komuntu. Ngalesosikhathi isidalwa esingumoya esiyimbuka esithiwa uSathane (“uMphikisi”) sasiholele abantu esonweni. uNkulunkulu wayeyale uAdamu noEva ukuba bangadli kuwo “umuthi wokwazi okuhle nokubi.” Kwakumelwe bahloniphe ilungelo likaNkulunkulu lokunquma lokho okwakulungile noma kukubi ngabo. Nokho, uMphikisi, watshala ukungabaza engqondweni kaEva, ethi: “Ngempela uNkulunkulu ushilo yini ukuthi: Ningadli emithini yasensimini na?” Kamuva waphikisa uNkulunkulu: “Aniyikufa nokufa kepha uNkulunkulu uyazi ukuthi mhla nizidla, kuyakuvuleka amehlo enu, nibe njengoNkulunkulu.”—Genesise 2: 17; 3:1-5.

Amazwi kaSathane okunyundela aphakamisa izimpikiswano ezinkulu: Ingabe uNkulunkulu wayeqamba amanga lapho ekhipha isijeziso sokufa ngokudla isithelo esenqatshelwe? Ngisho noma kunjalo, yiliphi ilungelo ayenalo lokwephuca izidalwa zakhe inkululeko yokuzibusa futhi abeke kuzo izindinganiso zakhe? Ingabe wayengeyena uNkulunkulu onobugovu, egodlela izidalwa zakhe lokho okwakukuhle? Ingabe ukukhululeka ekubusweni uNkulunkulu kwakudingeka?

Ukubulala izihlubuki kwakuyophakamisa imibuzo eminingi. Kwakungokuvumela kuphela ukuba ukukhululeka ekubusweni uNkulunkulu kuqhubeke ngokungaphazanyiswa isikhathi esanele okwakungabonisa—ngokuphelele—ukuthi isithembiso sikaSathane sokuzibusa siyisimemo esiholela enhlekeleleni. Yebo, “izwe lonke lisemandleni omubi,” uSathane uDeveli, hhayi emandleni kaNkulunkulu. (1 Johane 5:19, NW) Izifo, ukwahlulela ngokungalungi, ukugqila-zwa ezomnotho, ubuhlungu benhliziyo—konke lokhu kuye kwaba umphumela wokukhetha komuntu ukukhululeka ekubusweni uNkulunkulu nokuba ngaphansi kokubusa kukaSathane! Futhi naphezu kwanoma iyiphi intuthuko yezobuchwepheshe kwezemisebenzi, izimo zezwe ziyaqhubeka ziba zimbi—ngokuvamile ngenxa yezobuchwepheshe banamuhla kwezemisebenzi.

Nokho, ukubekezelela kukaNkulunkulu lonke lolusizi olungachazeki, akumenzi abe ongalungile. Ngokuphambene, ukungalungi komuntu kuye ‘kwabonakalisa ukulunga kukaNkulunkulu.’ (Roma 3:5) Kanjani?

Ukuqedwa Kokuhlupheka—Phakade!

Umphostoli uPawulu wathi: “Konke okudaliweyo kuyabubula kanyekanye kunezinseka kuze kube-manje.” (Roma 8:22) Yebo, iminyaka eyizi-6 000 egcwele ukuhlupheka yokuzibusa komuntu iye yabonisa amazwi kaJeremiya 10:23 eyiqiniso: “Akukuyo indoda ukuba ihambe, iqondise izinyathelo zayo.” Nokho, ngokushesha, uNkulunkulu uzongenela ngokulunga futhi aqale ukuqondisa izindaba zesintu.

Njengoba imiphumela egcwele ukuhlupheka yokuzibusa komuntu isiyembulwe ngokuphelele, khona-ke uNkulunkulu angaziqeda zonke izinto eziye zabangela ukuhlupheka: izimpi, izifo, ubugebengu, ubudlova—ngisho nokufa ngokwakho! (IHubo 46:8,9; Isaya35: 5, 6; IHubo 37:10,11; Johane 5:28, 29; 1 Korinte 15:26) Kunjengoba umphostoli uJohane ezwa embonweni wasezulwini: “uNkulunkulu . . . azesule izinyembezi zonke emehlweni abo; ukufa akusayikuba-khona; no-kudabuka, nokukhala, nobuhlungu akusayi-kubakhona; ngokuba okokuqala kudlulile.”—isAmbulo 21:3, 4.

Ngokuthakazelisayo, uNkulunkulu waqeda izinhlupheko zikaJobe ngokubuyisela impilo yakhe nengcebo nangokumbusisa ngomkhaya omkhulu. (Jobe 42:10-17) Ngokufanayo, iBhayibheli liyasithembisa: “Izinhlupheko zesikhathi samanje azinakulinganiswa nenkazimulo eyakwambulwa . . . okudaliweyo kuyakukhululwa ebugqileni bokubhubha, kube ngukukhululeka kwenkazimulo yabantwana bakaNkulunkulu.” (Roma 8:18, 21) Khona-ke ububi buyosulwa ngokuphelele ezingqondweni zethu!—Qhathanisa noIsaya 65:17.

Ukuphila Nobubi

Kuze kube yilapho leyonkululeko ifika, simelwe sibekezelele ukuphila ezweni elibi, si-ngalindeli uNkulunkulu ukuba asivikele ezinhlekeleleni ezingasehlela ngokomuntu siqu. uSathane uDeveli waletha ithemba elingamanga lapho elinga uJesu Kristu esethempelini ukuba aziphonse phansi, esonta umbhalo weBhayibheli okumaHubo 91:10-12, othi: “Awuyikwehlelwa ngokubi . . . Ngokuba uyakuyaleza izingelosi zakhe ngawe, zikulondoloze.” Nokho, uJesu, wawenqaba noma yimuphi umqondo wokwamukela isivikelo esingokomzimba esiyisimangaliso. (Mathewu 4:5-7) uNkulunkulu uthembisa ukulondoloza kuphela inhlala-kahle yethu engokomoya.

Ngakho-ke amaKristu eqiniso ‘awamthukutheleli uJehova’ ngisho nalapho usizi lugadla. (izAga 19:3) Ngenxa yokuthi namaKristu ngokufanayo ‘ahlangabezana nesikhathi nesehlakalo esingalindelekile.’ (Umshumayeli 9:11, NW) Nokho, asisibo abangenakuluthola usizo. Sinethemba lokuphila phakade emhlabeni omusha wokulunga, lapho ububi bungeke busaba khona. Ngaso sonke isikhathi singaya kuJehova uNkulunkulu ngomthandazo, ngoba uthembisa ukusinikeza ukuhlakanipha esikudingayo ukuze sikhuthazelele noma yikuphi ukuhlupheka! (Jakobe 1:5) Sijabulela futhi ukusekela kwamaKristu esikanye nawo. (1 Johane 3:17, 18) Futhi sinolwazi lokuthi ukwethembeka kwethu ngaphansi kovivinyo kwenza inhliziyo kaJehova ijabule!—IzAga 27:11.

Nokho, ukukhuthazelela ububi akulula neze. Ngakho, lapho siduduza othile osekuhluphekeni, kuhle ’ukukhala nabakhalayo—nokunikeza usizo olungokoqobo. (Roma 12:15) UAna, okukhulunywe ngaye ekuqaleni, wasizwa ukuba asimame ngemva kwenhlekelele. Ungomunye woFakazi BakaJehova futhi wathola ukuthi amaKristu ayekanye nawo ayezimisele ngempela ukusiza, amnikeza indawo yokuhlala yesikhashana. Ngisho nakuba ngezinye izikhathi ezizwa ecindezelekile, uthola isiphephelo ethembeni eliseBhayibhelini. UAna uthi: “Ngiyazi ukuthi izingane zami zizobuya ngovuko.” Khona-ke ukholo lwakhe kuNkulunkulu onokulunga luqine kakhulu kunanini ngaphambiii.

Uma ubhekene nesikhathi sokuhlupheka, cela oFakazi BakaJehova ukuba bakusize ngemibuzo yakho nokungabaza. Ungathola futhi kubo incwadi ethi Ungaphila Phakade Epharadesi Emhlabeni, enezihloko eziwusizo ezinjengesithi “Kungani uNkulunkulu Evumele Ububi?” nesithi “Uhilelekile Empikiswaneni Ebalulekile.” Kuyiqiniso, njengamanje izinto ezimbi ziyenzeka kubantu abalungile, kodwa ngokushesha konke lokho kuzoshintsha. Zitholele ngokwakho imininingwane eyengeziwe ngokuthintana noFakazi BakaJehova abasendaweni yakini noma ubhalele abanyathelisi balomagazini.

[Izithombe ekhasini 8]

Emhlabeni omusha KaNkulunkulu onokulunga, ububi buyokhohlakala