Okuphawulwa Abafundi Balomagazini
Abantwana Besehlukaniso Sekuphele iminyaka emithathu sihlukene nomkami, futhi ngiyikhumbula kakhulu ingane yami. Kodwa izingane ezihluphekayo, futhi thina bazali kufanele sicabange kakhulu ngalokhu. Ukube ngangifunde loluchungechunge lwezihloko oluthi “Usizo Ngabantwana Besehlukaniso” (April 22, 1991) lapho sisahlala ndawonye, ngiyaqiniseka ukuthi ngangiyocabangisisa ngokwehlukana.
S. C. M. F., Brazil
IBarrier Reef Esikoleni ngabelwa ukuba ngenze ukucwaninga ngamacoral. Nokho, ngangingazi ukuthi ngingakufuna kuphi ukwaziswa okunemininingwane nokucacile. Kwangimangalisa kakhulu ukubona isihloko esithi “Ukuvakashela IGreat Barrier Reef.” (June 8, 1991) Sasinalokho ngempela engangikudinga! Ngasebenzisa lokho kwaziswa futhi ngathola amamaki aphakeme kunabo bonke. Ngibonga ngiyanconcoza ngosizo lwenu oluyigugu.
M. M. T., Argentina
Ukukhulisa Imikhaya Isihloko esithi “Ukukhulisa Imikhaya Emhlabeni Wonke—Ukuba Umzali Ngothando, Ukuyala, Isibonelo, Nezindinganiso Ezingokomoya” (September 22, 1991) sasiyisikhuthazo esikhulu kimi njengomfundi omusha weBhayibheli. Lapho siqala ukuya emihlanganweni yobuKristu, indodana yami yayishaya sengathi iyagula futhi iqandule ikhale njengohlanya. Kodwa ngosizo lowesifazane ongumKristu ofunda nathi, kanye nesikhuthazo esikomagazini enibanyathelisayo, manje ngivuna izithelo. Manje indodana yami eneminyaka emibili nengxenye ihlala ithule cwaka emihlanganweni ize inikeze ngisho nezimpendulo ezimfushane.
M. T., Japan
Ukuhleba Ngangiyinhlebi embi. Kodwa ngolunye usuku ngafika ekhaya ngivela esikoleni futhi ngafunda uchungechunge oluthi “Ukuhleba—Indlela Yokugwema Ukulimala.” (June 8, 1991) Ngosizo lwenu ngakwazi ukugqashula kulowomkhuba omubi. Ngangingazi ngempela ukuthi ukuhleba kungokungathi sína kangako nanokuthi kungonakalisa idumela lomuntu. Ngiyabonga kakhulu ngalokhu kwaziswa.
F. B., United States
Lezihloko zangilondolozela umsebenzi wami ngokuqondile. Ngokuphindaphindiwe ngasakaza amahlebezi okuthi imboni engangiyisebenzela yayizovalwa. Lingakashoni, ngabizelwa ehhovisi lomphathi wami. Wangitshela ukuthi ngangihleba nanokuthi ukusakaza izinto ezinjalo kungesabisa abantu ngenxa yokuthi imisebenzi iyindlala. Abantu babedilizwa lapho engisebenza khona, futhi ngacabanga ukuthi lezi kwakuyizaba zokungixosha. Lapho ngithola iPhaphama! ekhuluma ngokuhleba, ngayithatha njengeseluleko esivela phezulu. Ngayibonisa umphathi wami futhi ngamtshela lokho engangikufundile nanokuthi ngangizokwenza konke okusemandleni ami ukuba ngingaphindi ngihlebe. Wangibonga—futhi ngisasebenza.
L. G., United States
Ukubuyisela Iestrogen Ngiyanibonga ngesihloko esithi “Ukwelapha Ngokubuyisela Iestrogen—Ingabe Kukulungele?” (September 22, 1991) Ngamangazwa indlela esasicace ngayo. Manje ngelashelwa iosteoporosis futhi iminyaka emine bengelashwa ngokubuyisela iestrogen. Kodwa manje sengikwazi kangcono ukuxoxa nodokotela wami ngezinto futhi ngingabhekana nezinkinga ngethemba elengeziwe. Nginibonga kakhulu.
R. C. S. M., Brazil
Ukufunda Ukushaya Izimfijoli Zomculo Ngithanda ukunibonga ngempela ngesihloko esithi “Ukube Nje Bengingakwazi Ukudlala Ngalendlela!” kumagazini kaSeptember 8, 1991. Manje ngisonyakeni wokuqala esekhondali futhi ngifunda ukushaya uogani oludlala ngogesi. Sekuphele iminyaka emibili kakade, futhi nakuba sekuyisikhathi sokuba ngibonise intuthuko ethile, angikathuthuki. Ekudlaleni umculo kwalonyaka, ngenza amaphutha amaningi. Kwakukubi ngempela. Lesihloko sasibonisa ukucabangela futhi sineseluleko esifike ngesikhathi kimi.
M. O., Japan