Ingxenye 6

Isayensi—Ukufuna Kwesintu Iqiniso Okuqhubekayo

Ukuhlangabezana Nezinselele Zekhulu Lama-21

ISISHIYAGALOLUNYE, isishiyagalombili, isikhombisa, futhi ukubala kuyahlehla! Ingabe ukubala okuhlehlayo ukuze kudedelwe isiqhumane? Cha, kunalokho ukubala uhlehle inani leminyaka esasele ngaphambi kokuba isintu singene shí ezenzakalweni ezingaqinisekile zekhulu lama-21.a

Ngokusekelwe entuthukweni engokwesayensi yekhulu leminyaka elidlule, abaningi bangase ngobuqotho bakholelwe ukuthi isayensi ingabhekana nanoma iyiphi inselele engase ilethwe ikhulu lama-21.b Bangase bazizwe njengoba umlobi othile ongumFulentshi azizwa ekuqaleni kwekhulu lama-20. Wabhala: “Namuhla isayensi imiselwe ukuba ibuse izwe. Kusukela manje kuqhubeke ukubusa kwezwe akukhona okukankulunkulu, kodwa kungokwesayensi njengomsizi wabantu nomkhululi wesintu.”

Ukuze isayensi igcwalise lamathemba, kuyodingeka ukuba isuse zonke izinkinga eye yaba nesandla ekuzidaleni.

Ukubhujiswa kwendawo ezungezile okuye kwabangelwa isayensi kukhulu kakhulu. Incwadi ethi 5000 Days to Save the Planet iyaphawula: “Uma siqhubeka enkambweni yethu yamanje yokusebenzisa kabi indawo ezungezile, umbuzo awukona ukuthi ingabe umphakathi wanamuhla uyosinda yini ekhulwini leminyaka elilandelayo kodwa uwukuthi ingabe uyonyamalala ngokuqhuma okukhulu noma buthule?”

Lokhu akubonakali neze kuwukukhetha okwamukelekayo.

Ukulinganiselwa Kwesayensi

“Ososayensi abaningi bekhulu le-19 . . . ngokuvamile babenomuzwa wokuthi ngolunye usuku babeyofinyelela iqiniso langempela nokuqonda okuphelele,” kusho incwadi ethi The Scientist. “Abalandeli babo,” lencwadi iyaqhubeka, “bakhuluma kuphela ngokufinyelela ‘ukuqonda okuyingxenye’, kokusondela eqinisweni ngokuqhubekayo kodwa bengaliqondi neze ngokuphelele.” Lokhu kuntuleka kolwazi oluphelele kukulinganisela ngokungathi sína lokho isayensi engakwenza.

Amaqiniso angokwesayensi awazange neze aguquke eminyakeni edlule, kuyilapho imibono engokwesayensi iye yaguquka—futhi lokhu kuye kwenzeka ngokuphindaphindiwe. Eqinisweni, ngezinye izikhathi imibono iye yeqisa ngokuphikelelayo. Ngokwesibonelo, ososayensi bezokwelapha bake bacabanga ukuthi ukukhipha igazi emzimbeni womuntu ogulela ukufa kwakuyinto eyayingenziwa ngokwesayensi. Kamuva bacabanga ukuthi ikhambi laliwukumpompela igazi. Manje abanye baqala ukubona ukuhlakanipha kokungenzi nokukodwa kwalokhu nokokufuna izindlela ezihlukile zokwelapha ezingenangozi.

Ngokusobala, lokho ososayensi abakwaziyo kuncane kakhulu kunalokho abangakwazi. I-World Book Encyclopedia ithi: “Izazi zesayensi yezitshalo namanje azikazi ngempela ukuthi inqubo ye-photosynthesis isebenza kanjani. Izazi zesayensi yezinto eziphilayo nezazi zenhlanganisela yamakhemikhali nokusabela kwezinto eziphilayo azikayitholi namanje incazelo yombuzo wokuthi ukuphila kwaqala kanjani. Izazi zesayensi yezinkanyezi zisahluleka namanje ukunikeza incazelo eyanelisayo yemvelaphi yendawo yonke. Ososayensi bezokwelapha nezazi zokuma komzimba womuntu abayazi imbangela noma ikhambi lomdlavuza noma indlela yokwelapha izifo ezihlukahlukene ezibangelwa amagciwane. . . . Izazi zezifo zengqondo azizazi zonke izimbangela zokugula okungokwengqondo.”

Isayensi futhi ilinganiselwe ngomqondo wokuthi incike kubantu abayiphishekelayo. Ngamanye amazwi, ukuntula ulwazi kukasosayensi kwenezelwa ukungapheleli kwakhe. Abalobi bencwadi ethi 5000 Days to Save the Planet bathola ukuthi “ngokuphindaphindiwe . . . izinhlangano ezakhiwe ngenjongo ekhethekile ziye zasebenzisa kabi ukucwaninga, zaphendukezela ukuhlaziywa kwezinzuzo zamanani futhi zagodla ukwaziswa ukuze zithengise imikhiqizo eyingozi noma ziqhubeke ngemisebenzi eyingozi endaweni ezungezile.”

Ngisho nakuba ososayensi abaningi bethembekile, nalesi akusona isizathu sokunikeza bona noma umsebenzi wabo udumo olungabafanele. “Bafana nawo wonke umuntu,” kusho u-Edward Bowen owazalelwa eBrithani, naye ongusosayensi. “Bonke banokushiyeka kwabo. Abanye bazinikezele, abanye abacopheleli, abanye bahlakaniphe isibili, abanye bahlakaniphele nganxanye. Ngiye ngazi abanye abavelele kwezesayensi, amadoda aye enzela izwe izinto ezinhle kakhulu. Futhi nakuba ngingazange ngazi sosayensi oke waboshwa, ngazi abanye abakufanelekele ngempela.”

Ngokusobala, ngenxa yokulinganiselwa kwayo okuningi, isayensi yosuku lwanamuhla ayikwazi ukusingatha ngokwanelisayo izinselele zekhulu lama-21. Iye yahluleka ikakhulukazi ukuvikela indawo ezungezile, futhi kunokuba isize ukususa impi emhlabeni, iye yasiza ekwakheni izikhali zokubulala abantu abaningi.

Kudingeka Isinyathelo Esiphuthumayo

Wonke umuntu uyavuma ukuthi kumelwe kwenziwe okuthile ngokushesha. Ngo-November odlule iqembu lososayensi abangu-1 575, kuhlanganise nabangu-99 abawina umklomelo kaNobel, lakhipha inkulumo eyayinesihloko esithi “Isixwayiso Sososayensi Bomhlaba Kubantu” elabhala kuyo ukuthi: “Sekusele isikhathi esingaphansi kweshumi leminyaka noma amashumi ambalwa ngaphambi kokuba ithuba lokugwema izinsongo esibhekene nazo manje lisilahlekele namathemba esintu anyamalale ngokungenakulinganiswa.” Lagomela: “Abantu nezwe elingokwemvelo kubhekene nenhlekelele.”

Izixwayiso ezifanayo ziye zamenyezelwa ngaphambili. Eqinisweni, ngo-1952, uBertrand Russell, isazi sefilosofi saseBrithani sekhulu lama-20 nesiwumsekeli wesayensi ngokwaso, sathi: “Uma ukuphila komuntu kuzoqhubeka naphezu kwesayensi, isintu kuzodingeka sifunde ukulawula imizwelo, lokho okwakungadingeki esikhathini esidlule. Abantu kuzodingeka bathobele umthetho, ngisho nakuba becabanga ukuthi umthetho awunabo ubulungisa futhi uyakhetha. . . . Uma kungenzeki uhlanga lwesintu luzobhubha, futhi luzobhubha ngenxa yesayensi. Kumelwe kwenziwe ukukhetha okusobala phakathi neminyaka engamashumi amahlanu, ukukhetha phakathi kokuHlakanipha noKufa. Futhi ‘ngokuHlakanipha’ ngisho ukuzimisela ukuzithoba emthethweni njengoba umiswe igunya lomhlaba wonke. Ngesaba ukuthi isintu singase sikhethe uKufa. Ngithemba ukuthi ngenza iphutha.”

Iqiniso liwukuthi, abantu abazimisele ukuvumelana nezindinganiso ezilungile bambalwa namuhla. Owayelwela amalungelo omphakathi uMartin Luther King ongasekho washo ngokunembile: “Amandla ethu angokwesayensi aye ahlula amandla ethu angokomoya. Sinemicibisholo eqondisiwe nabantu abaphambukisiwe.” Nokho, eqinisweni uRussell ngokungazi wathola ikhambi lezinkinga zezwe lapho ethi isintu kuyomelwe ‘sizithobe emthethweni njengoba umiswe igunya lomhlaba wonke.’

Ubani Ongaxazulula Lenkinga?

Yiqiniso, uBertrand Russell wayengabhekiseli egunyeni laphezulu lapho ekhuluma ngomthetho njengoba umiswe igunya lomhlaba wonke. Nokho, ukulalela imithetho yegunya elinjalo yilokho kanye okudingekayo. Imithetho yabantu neziphathimandla ezingabantu ngokuqinisekile akulona ikhambi. Akusoze kwaliguqula izwe futhi ngaleyondlela kuvimbele inhlekelele. Umbhalo ogciniwe owesabekayo womlando ubonisa ukuthi abantu badinga ubukhosi baphezulu.c

Ngempela, uNkulunkulu uMninimandla onke kuphela, ogama lakhe linguJehova, onganikeza igunya lomhlaba wonke elinamandla nekhono lokuhlangabezana nezinselele zekhulu lama-21. (IHubo 83:18) Igunya bonke okumelwe bazithobe kulo uma bezothola ukuphila uMbuso kaNkulunkulu, okuwuhulumeni wezwe wasezulwini omiswe uMdali, uJehova uNkulunkulu.

Kudala, iBhayibheli labikezela ngokuphathelene nalohulumeni: “Ngokuba sizalelwa umntwana, siphiwa indodana, umbuso uyakuba-semahlombe akhe, negama lakhe liyakuthiwa . . . iNkosi yokuthula. Umbuso uyakuba-mkhulu, ukuthula kungabi-nakuphela.” (Isaya 9:6, 7) Lomntwana owabikezelwa, uJesu Kristu, wazalwa ngokuyisimangaliso incasakazi uMariya futhi wazalelwa eBetlehema laseJudiya.—Luka 1:30-33.

Lapho esemhlabeni uJesu wafundisa abalandeli bakhe ukuthandaza ngohulumeni kaNkulunkulu lapho ethi: “Ngakho-ke anokhuleka kanje, nithi: . . . mawufike umbuso wakho; mayenziwe intando yakho emhlabeni njengasezulwini.” (Mathewu 6:9, 10) Umoya ongcwele onamandla kaJehova uNkulunkulu kuphela, noma amandla ayisiphekupheku, ongasiza abantu abazimisele ukwenza izinguquko ezidingekile ekuphileni kwabo ngokuvumelana nemithetho yokulunga kahulumeni wakhe. Isayensi ayinakukwazi ukwenza lokho. Izinkulungwane zeminyaka yokungezwani nokudideka ziyisiqinisekiso sokuthi ayinakukwazi.

UJehova uNkulunkulu, ongalinganiselwe olwazini olungokwesayensi olunembile, uyoqikelela ukuthi umhlaba ujabulela izimo zePharadesi, ngisho nanjengoba zazikhona ensimini yase-Edene, lapho edala umbhangqwana wokuqala ongabantu. Ngalesosikhathi wabayala: “Zalani, nande, nigcwalise umhlaba, niwunqobe.” (Genesise 1:28) Nakuba bahluleka ukulalela futhi bengazange basifeze lesosabelo, uJehova uNkulunkulu uyoqikelela ukuthi injongo yakhe yokuqala yokuba lomhlaba ube ipharadesi iyagcwaliseka. “Ngikhulumile, ngiyakukufikisa,” uyasho. (Isaya 46:11) Kodwa iyogcwaliseka nini injongo yokuqala kaNkulunkulu ngomhlaba?

UJesu Kristu nabaphostoli bakhe bachaza izimo ezaziyoba khona emhlabeni “ezinsukwini zokugcina,” ngokushesha nje ngaphambi kokuba uMbuso kaNkulunkulu uthathe indawo yabo bonke ohulumeni babantu. (2 Thimothewu 3:1-5; Mathewu 24:3-14, 37-39; 2 Petru 3:3, 4) Lapho umuntu efunda iziprofetho zeBhayibheli ezikhonjwe lapha futhi aziqhathanise nezenzakalo zezwe, kuba sobala ukuthi siphila esikhathini lapho uMbuso kaNkulunkulu uzothatha khona isinyathelo esichazwe eBhayibhelini encwadini kaDaniyeli 2:44: “Ezinsukwini zalawomakhosi [ohulumeni babantu ababusayo manje] uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade.”

Ukuphila Esikhathini Esizayo Esiseduze

Ake ucabange nje ukuthi lokho kuyosho ukuthini ngesikhathi esizayo esiseduze! Yeka izinto ezimangalisayo ezigcinelwe isintu phakathi nekhulu leminyaka elizayo, uma kungekhona ngisho nangaphambi kwalokho! Imiphumela emibi yezinkulungwane zeminyaka zokubusa komuntu ongaphelele, inkolo enobuzenzisi, ezentengiselwano ezihahayo, nesayensi yalelizwe kuyothathelwa indawo ukubusa kwaphezulu, okuyobusisa abantu ngaphezu kwalokho abakulindele.

IBhayibheli lichaza izenzakalo okuqinisekile ukuthi ziyokwenzeka ezweni elisha likaNkulunkulu lokulunga ngalendlela: “Bheka‚ itabernakele likaNkulunkulu likubantu; uyakuhlala nabo‚ babe-ngabantu bakhe‚ yena uNkulunkulu abe-nabo‚ azesule izinyembezi zonke emehlweni abo; ukufa akusayikuba-khona; nokudabuka‚ nokukhala‚ nobuhlungu akusayikuba-khona; ngokuba okokuqala kudlulile.”—IsAmbulo 21:3, 4.

Ngakho-ke, okubaluleke kakhulu kuwe ukuqaphela ukubala okuhlehlela emuva ngokushesha okuyophelela ekubhujisweni kwalesimiso sezwe esingaphansi kokulawula kombusi wezwe onamandla, ongabonakali, uSathane uDeveli. (Johane 12:31; 2 Korinte 4:3, 4) Kubalulekile ukuba wazi intando kaNkulunkulu futhi uyenze, ngoba iBhayibheli liyathembisa: “Izwe liyadlula kanye nenkanuko yalo; kepha owenza intando kaNkulunkulu uhlala kuze kube-phakade.”—1 Johane 2:17.

Ngakho-ke, uma isikhathi sisavuma, sengathi ungawasebenzisa ngokuhlakanipha amalungiselelo kaJehova okusinda. Khona-ke uyoba nelungelo lokujabulela ukuphila esikhathini esizayo, yebo, phakathi nekhulu lama-21 elizayo—kanye naphakathi kwekhulu lama-22, elama-23, namanye amakhulu angenakubalwa kamuva.

[Imibhalo yaphansi]

[Ibhokisi ekhasini 23]

Phakathi Kwezindaba Ezimbi, Kuvela Izindaba Ezinhle

Naphezu kwentuthuko engokwesayensi kusatholakala uquqaba lwezingane ezilambayo nabantu abadala abawohlokayo. Kodwa ngokushesha ngaphansi koMbuso kaNkulunkulu wobuMesiya, “kuyakuba-khona inala kakolweni ezweni esiqongweni sezintaba; ukudla kwalo kuyakuhashazela.”—IHubo 72:16.

Naphezu kwentuthuko engokwesayensi izigidi zisabhekana nokucindezelwa nobudlova. Kodwa ngokushesha iNkosi yoMbuso kaNkulunkulu wobuMesiya “iyakukhulula ompofu ozikhalela kuyo, nohluphekayo ongenamsizi. . . . Iyakukhulula umphefumulo wabo okhahlweni nasendluzuleni.”—IHubo 72:12-14.

Naphezu kwentuthuko engokwesayensi inani labantu abangenamakhaya, abantula izindlu nokudla okwanele, liyaqhubeka landa emhlabeni wonke. Kodwa ngokushesha ngaphansi koMbuso kaNkulunkulu wobuMesiya, abantu “bayakwakha izindlu, bahlale kuzo; . . . Abayikwakha, kuhlale omunye; abayikutshala, kudle omunye.”—Isaya 65:21, 22.

Naphezu kwentuthuko yezokwelapha izifo ezingase zivinjelwe ziyaqhubeka nokubulala izigidi. Kodwa ngokushesha ngaphansi koMbuso kaNkulunkulu wobuMesiya, “abakhé khona abayikusho ukuthi: Ngiyagula.”—Isaya 33:24.

[Isithombe ekhasini 24]

Kuyo yonke indawo emhlabeni ukuphila kuyoba injabulo

[Umthombo]

Courtesy Hartebeespoortdam Snake and Animal Park