Luyophela Nini Lolusizi?

KUYOPHELA nini ukuba izingane zibe izisulu zokuthunjwa, ukuxhashazwa, ukunukubezwa, kanye nokuba izisulu zethonya elibi lontanga yazo? Ingabe ukuqiniswa komthetho nezijeziso eziqinile zobugebengu obenziwa ezinganeni kungazivikela? Ingabe izimiso zezenhlalakahle zokunikeza ukudla, izindlu, nemfundo zingakunqanda ukuxhashazwa kwezingane nokubaleka kwazo emakhaya? Ingabe ukufundisa abazali abakhathalela izingane zabo amakhono angcono okukhulumisana kungabasiza ukuba balwe nokukhohlisa kwenjabulo eyengela izingane zabo ezimweni ezilimazayo?

Nakuba izinyathelo ezinjalo zingase zibe usizo, izingane ziyoqhubeka ziyizisulu zokuhlupheka okukhulu kuze kube yilapho isiqediwe imbangela eyinhloko yalolusizi. Ngokomunye osemusha, noma yisiphi isinyathelo esithathwayo sokusingatha inkinga yezingane ezibaleka emakhaya esingakuvimbeli ukuxhashazwa noma ukunganakwa ekhaya cishe ngeke siphumelele kakhulu, njengoba usuke sewenziwe umonakalo.

Imbangela Eyinhloko

Uyini umsuka wazo zonke lezizinkinga? Ziyoqedwa kanjani? IBhayibheli lichaza ukuthi umkhaya uhlaselwa izidalwa zomoya ezimbi ezingabonakali, uSathane namademoni akhe, ezijabulela unya, ukunukubeza ngokobulili, nezinkanuko zobulili eziphendukezelwe. (Genesise 6:1-6; Efesu 6:12) Lapho uJesu esemhlabeni, izingane zazihlaselwa yilamademoni. Omunye umfanyana amhlukumeza ngokumdlikiza nokumphonsa emlilweni.—Marku 9:20-22.

Ngisho nasemakhulwini eminyaka amaningi ngaphambi kokuba uJesu eze emhlabeni, amademoni ayaneliswa ukuhlushwa nokushiswa kwezingane ezincane ezazinikelwa konkulunkulu abesabekayo bobuqaba, abanjengoBali, uKemoshi, noMoloki. (1 AmaKhosi 11:7; 2 AmaKhosi 3:26, 27; IHubo 106:37, 38; Jeremiya 19:5; 32:35) Ngakho-ke, namuhla, kulelizwe eliba libi ngokuqhubekayo, akufanele kusimangaze ukuthi amademoni ahlasela izingane ngamanxusa angabantu afisa ukuthela ngehlazo, ukubangela ubuhlungu, nokufa kwezingane. Ngokuvamile izigilamkhuba zamacala ayinqaba kanjalo zondla izingqondo zazo ngezithombe zobulili ezingcolile, eziqhubezela izinkanuko zazo zobulili eziphendukezelwe.

Ithonya lamademoni ohlangeni lwesintu liye landa esikhathini sethu, ngoba iBhayibheli libiza lenkathi yomlando ngokuthi ‘izinsuku zokugcina’ zalesisimiso esibi sezinto samanje. Labikezela ukuthi lezi kuyoba “izikhathi ezinzima.” Manje kunanini ngaphambili, ithonya lamademoni lenza abantu babonakalise ukonakala kwalezizidalwa ezimbi zomoya. IBhayibheli labikezela ukuthi abantu osukwini lwethu babeyoba abangenabumnene, abangazithibi, abangenalo uthando, abangakuthandi okuhle.—2 Thimothewu 3:1-5, 13.

Lokho kubachaza kahle abantu abanobugovu abakhiqiza izithombe zamabhayisikobho, amarekhodi, omagazini, nezincwadi ezikhazimulisa ukuphinga, izidakamizwa, ukuzibulala, ukubulala, ukudlwengula, ubuhlobo bobulili nesihlobo, ubugqila, nokuhlukumeza. Ngalezizindlela nezinye, amademoni aye abhebhethekisa umkhuba onjengomoya omubi, ongcolise izingqondo nezinhliziyo zabasha nabadala, wagugula izindinganiso zokuziphatha zomkhaya zokwesaba uNkulunkulu.

Ukwanda kokuthunjwa kwezingane, ukunukubezwa ngokobulili, nokubulala kuyingxenye yesibonakaliso sezinsuku zokugcina. Ngaphezu kwalokho, iBhayibheli lathi ‘abantu babeyoba abazithandayo, abangafuni sivumelwano, abangathembekile, abakhapheli.’ Yingakho namuhla izibopho zomshado zephulwa ngokushesha ngemva kokwenziwa. Njengoba izehlukaniso zanda, kuyanda nokuthunjwa kwezingane abazali. Futhi ukushaywa nokubulawa kwabangane bomshado bamanje nabangaphambili kuyadlondlobala, futhi iningi lezisulu abesifazane. Ngakho, sibona isizukulwane sezingane abazali bazo abazikhuthaza ukuba zibaleke ngokungazinaki nangokuzixhaphaza. Ngaphezu kwalokho, isikhathi sethu siphawuleka ngezingane ‘ezingabalaleli abazali, ezinenkani,’ futhi ezikhetha ukubaleka nontanga yazo kunokuhlonipha izindinganiso zokwesaba uNkulunkulu.—2 Thimothewu 3:2-4, qhathanisa ne-NW.

Lolusizi Luzophela Masinyane

Nokho, ithonya likaSathane namademoni akhe lizophela masinyane. (IsAmbulo 12:12) Isiprofetho sesAmbulo 20:1-3 sithi uNkulunkulu uyoqeda uSathane namademoni akhe. Ngemva kwalokho, uMbuso kaNkulunkulu wasezulwini, ophethwe uJesu Kristu, uyobusa lomhlaba ngokulunga, ulethe ubulungisa futhi uqinisekise ukulondeka kubo bonke. (IHubo 72:7, 8; Daniyeli 2:44; Mathewu 6:9, 10) Ziyobe zingasekho izimiso zezentengiselwano ezinobugovu ezicindezela abampofu futhi zixhaphaze ubuthakathaka babantu ukuze zithole inzuzo, ngoba “izwe liyadlula kanye nenkanuko yalo.” (1 Johane 2:17) Bonke abenza ububi bayoqedwa, njengoba izAga 2:22 zibikezela: “Ababi bayakunqunywa ezweni.”

UMika 4:4 uchaza ukuthi ezweni elisha likaNkulunkulu kuyobakhona ukulondeka nokuthula kubo bonke: “Akakho oyakubesabisa.” Kuyokwenzeka kanjani lokho? Ngomthetho wobukhosi wothando. Lowomthetho ophakeme uyobusa yonke imicabango nezenzo. Labo abayophila ngalesosikhathi bayobe befunde ukubonakalisa ubuntu bukaJesu nobukaYise, uJehova uNkulunkulu, ngoba ngeke bavunyelwe ukuba baqhubeke bephila uma bengenzi kanjalo. Ngokwembatha “ububele benhliziyo, nesisa, nokuzithoba, nobumnene,” ubugovu buyosishulwa kumuntu. (Kolose 3:12) Ukuphila kuyogcwala injabulo; amakhaya emhlabeni wonke ayoba nokufudumala nothando.

U-Isaya 65:21-23 uthembisa wonke umuntu inala yokudla namakhaya amahle: “Bayakwakha izindlu, bahlale kuzo; bayakutshala izivini, badle izithelo zazo. . . . Abayikushikashikela ize, bazalele izinhlupheko.” Kuyobe kungasekho ukuxhashazwa. Kuyobe kungasekho ukuhlupheka kwezingane noma kwabazali.

Ukuzuza Manje

Ngisho namanje, esikhathini sokugcina salesisimiso esibi, ulwazi ngoJehova nangenjongo yakhe yokubuyisela lomhlaba ekubeni ipharadesi luletha izinzuzo. Luye lwanikeza izingane eziningi nabazali ithemba nesizathu sokujabula, ngisho noma beye baba izisulu zezikhathi zethu. Ngokwesibonelo, uTamara, okukhulunywe ngaye esihlokweni esandulele, uchaza okwenzeka ekuphileni kwakhe.

“Lapho ngineminyaka engu-18, ngashada futhi ngalishiya cishe lonke iqembu ‘labangane’ bami, abanye babo abagcina begqunywe ejele, beluthwe izidakamizwa, noma beyizifebe. Kodwa ubuntu bami babungakashintshi, ngakho saqala ukuphikisana nomyeni wami. Nokho, ngokushesha ngemva kokuzalwa kwendodana yethu, kwenzeka okuthile okwashintsha ukuphila kwami ngokuphelele. Ngathola iBhayibheli futhi ngaqala ukulifunda. Ngobunye ubusuku ngafunda isahluko sezAga esithi ‘ukuthola ukuhlakanipha kunjengokuthola amagugu afihliweyo.’ (IzAga 2:1-6) Ngaphambi kokuba ngiyolala ngalobobusuku, ngathandazela lokho kuhlakanipha. Ngakusasa ekuseni, kwangqongqoza oFakazi BakaJehova. Ngaqala ukufunda nabo iBhayibheli, kodwa kwangithatha isikhathi eside ukusebenzisa engangikufunda eBhayibhelini. Ekugcineni, ngazimisela ukulandela indlela yokuphila kobuKristu futhi ngabhapathizwa. Manje, ngikanye nomyeni wami, ngisiza abanye ukuba bathole impumuzo evela kuNkulunkulu.”

Yebo, uTamara wathola uMthombo wayo yonke impumuzo, uJehova uNkulunkulu. UnguBaba wasezulwini ongasoze abashiye labo abanamathela kuye. IHubo 27:10 liyasitshela: “Ngokuba ubaba nomame bangishiyile, kodwa uJehova uzakungamukela.”

UDomingos, okukhulunywe ngaye ekuqaleni, naye wathola umkhaya wangempela oye wamnikeza induduzo, isikhuthazo, nokusekela. Uyalandisa: “Ngolunye usuku ngathola ikhophi yencwadi ethi Ukulalela UMfundisi Omkhulu futhi ngamangala lapho ngifunda ukuthi uNkulunkulu unegama, uJehova.a Ngaya komunye wemihlangano yoFakazi BakaJehova futhi ngamangala lapho ngibona ukuthi kwakungekho ukwehlukana ngokwezigaba. OFakazi baqala ukufunda nami iBhayibheli naphezu kokuthi ngangimanikiniki, ngiyisidlwangudlwangu, futhi ngingathembi muntu. Kancane kancane bangisiza ukuba ngilahle indlela yami yokuphila yangaphambili. Bangisiza ngathola ngisho nomsebenzi. Ekugcineni bangisiza ukuba ngithuthukele ekubhapathizweni.”

Amabandla oFakazi BakaJehova anjengesivikelo sentsha. OFakazi bayakujabulela ukusiza noma ubani ofuna ukufunda ngethemba elimangalisayo elizayo. Labo abafuna ubuhlobo noYise wasezulwini bathola induduzo enkulu, njengoba oFakazi beqeqeshwa ukuze banikeze iseluleko nesiqondiso esivela eZwini likaNkulunkulu iBhayibheli. Omunye uFakazi uchaza ukuthi intsha kudingeka iboniswe ukuthi isimo esinyanyekayo engase izithole ikuso siyenyanyeka nakuJehova. LoFakazi uthi: “UJehova akafuni ukuba izingane zixhashazwe. Akafuni ukuba zingajabuli. Kodwa akafuni ukuba zithi zibalekela olunye uhlobo lokuxhashazwa zizithele kolunye—ukuxhashazwa ezikuthola emigwaqweni. Zingakhuluma nabantu abavuthiwe enhlanganweni kaJehova zibatshele izinkinga zazo futhi bazibonise nendlela ezingazixazulula ngayo.”

Ezinganeni ezilalelayo, iZwi likaNkulunkulu linikeza isikhuthazo esinamandla sokugwema ugibe lokucindezela kontanga. UFrances, intombazane eneminyaka engu-17 ubudala, wakhuthazwa umngane wakhe afunda naye ukuba aphuthe esikoleni kaningi ngaphandle kokutshela abazali bakhe. Ekugcineni, wabaleka ekhaya. Ngemva kokukhathaza abazali bakhe isikhathi eside, wabuya. Kamuva, oFakazi ababili basebandleni lakubo bamvakashela. Bathola ukuthi isimo sasekhaya sasingeyona imbangela yalenkinga, base benikeza iseluleko ngothando. Bachaza isibopho sobuKristu sentsha sokuba ihloniphe abazali bayo (Efesu 6:1, 2); isidingo sokugwema ukungathembeki, njengoba ayephuthe esikoleni ngaphandle kokutshela abazali bakhe (Efesu 4:25); nokubaluleka kokugwema ukujwayelana nababi. (1 Korinte 15:33) Wasabela kahle.

Usizo Lwaphezulu

UCheryl naye waluthola usizo kuJehova ekusingatheni indaba yokuthunjwa kwezingane zakhe umngane wakhe womshado wangaphambili.b Lapho ebuzwa ukuthi yini eyamsiza ukuba abhekane nalesisenzakalo esihlasimulisayo, wathi: “Okokuqala engakwenza kwakuwukufunda amaHubo, ikakhulukazi iHubo 35. Kwakududuza ukwazi ukuthi uJehova wayekubona ukungabi nabulungisa engangibhekene nakho.” IHubo 35:22, 23 lithi: “Uyakubona, Jehova; mawungathuli; Nkosi, mawungabi-kude nami. Vuka, usukumele ukwahlulelwa kwami, . . . umele icala lami.”

Ngemva kweminyaka emibili, esekelwa uJehova futhi esizwa oFakazi, uCheryl wabonana mathupha nomyeni wakhe wangaphambili, futhi wazivakashela izingane zakhe. Wakwazi ukuzinikeza izimpendulo eziduduzayo nesizathu sokuthi kungani lokhu kwakwenzeke kuzo futhi waziqinisekisa ukuthi wayengazishiyile. Ngenxa yokuthi uCheryl waqeqesha izingane zakhe ukuba zidumise uJehova, wakwazi ukuzitshela ukuthi wayezethemba kangakanani. Wachaza: “Ngiyazi ukuthi izingane zami ziyamthanda uJehova, futhi ngeke avume ukuba zihlupheke njalo.”

Yileyondlela lenkinga eyaxazululwa ngayo. Ngenxa yokuzama kukaCheryl ngokuphikelelayo ukukhulumisana nezikhulu ezisingatha izindaba zabantu abathuthele kwamanye amazwe nokuthembela kwakhe kuJehova ngomthandazo oqotho, izingane zakhe zabuyela kuye. UCheryl uthi: “Ngingasho ngempela ukuthi kwakunguJehova kuphela owenza ukuba zibuyele kimi.”

Yeka ukuthi kubaluleke kangakanani ukufundisa izingane zethu manje ukuba zazi ukuthi uJehova ungubani futhi zimkhulekele! Kweyoku-1 Petru 3:12 iBhayibheli lithi amehlo kaJehova “aphezu kwabalungileyo, izindlebe [zakhe] zisekunxuseni kwabo.” Ngempela uJehova uyisiphephelo sezingane zethu. Igama lakhe “lingumbhoshongo onamandla; olungileyo ugijimela kuwo, alondeke.”—IzAga 18:10.

Nakuba siphila ezikhathini eziyingozi kakhulu futhi singakwazi ngaso sonke isikhathi okungehlela izingane zethu, abazali abakhulekela uJehova bayazi ukuthi akukho ukulimala okuhlala njalo okungehlela izingane zabo ezithembekile. Uthembisa nokuzibuyisa kwabafileyo eziye zaba izisulu zezikhathi zethu nokususa ubuhlungu nokuhlupheka eziye zakuzwa.—Isaya 65:17, 18; Johane 5:28, 29.

Ithemba lezwe elisha likaNkulunkulu liyamangalisa. Futhi kuyamangalisa ukuqaphela ukuthi ngokushesha uNkulunkulu uzosusa emhlabeni uSathane nesimiso sakhe esibi. Kuyobe kungasekho noma yikuphi ukusongelwa kwezingane zethu. Enye yezingoma eziculwa oFakazi BakaJehova emihlanganweni yabo yebandla ichaza lesosimiso esisha ngalendlela: “Lapho injabulo nokuthula sekugcwele wonke umhlaba,/wobona abafile ngovuko,/uma ubheka njalo umvuzo”!

Esikhathini esizayo lapho uhlangana nabanye boFakazi BakaJehova, bacele ukuba bakubonise indlela ongafunda ngayo okwengeziwe ngenjabulo engaphambili ezweni elisha likaNkulunkulu lokulunga elizayo. Bayokujabulela ukukusiza ukuba ubone indlela iZwi likaNkulunkulu elinganikeza ngayo induduzo manje nokuphila okuphakade kamuva.—IHubo 37:29; IsAmbulo 21:4, 5.

[Imibhalo yaphansi]

[Amazwi acashunwe esihlokweni ekhasini 12]

“UJehova akafuni ukuba izingane zixhashazwe”