Ukuhlolisisa Ingwenya
NGUMLOBELI WE-PHAPHAMA! EKENYA
ISIVAKASHI saseMelika esibuka amazwe sasithwebula izimvubu ngentshiseko eMfuleni iMara lapho sishelela emadwaleni siwela phakathi. Lokhu kwadonsa ukunakekela kwesilwane esithile esasithamele ilanga ngalesosikhathi, ingwenya. Nakuba lesisilwane esihuquzelayo sivame ukudla izinhlanzi, lapho sibona lokhu kudla okuconsisa amathe sehluleka ukuzibamba. Ngokuphazima kweso sangena emanzini siyohlola. Ngenhlanhla, lesisivakashi esibuka amazwe sayibona lengwenya iza sase siphuma emfuleni—ngokushesha kangangokuba kwaba sengathi sihamba phezu kwamanzi!
Abavakashela emifuleni, emachibini, nasemaxhaphozini ase-Afrika ngokuvamile babona izingwenya, nakuba lesisivakashi esasethukile okukhulunywe ngaso ngenhla sacishe sabhekana bukhoma nalesisilwane. IKenya iyikhaya lengwenya yaseNayile. Ngolimi lwendawo lwesiSwahili, imane yaziwa ngokuthi i-mamba. Njengoba zifinyelela kumamitha angu-7 ubude, izingwenya ziyizilwane ezihuquzelayo, ezinesivinini ezweni nasemanzini. Emanzini zingafinyelela ijubane eliphakeme ngenxa yemisila yazo eyisicaba, enjengesigwedlo. Zingabhukuda ngejubane elingafinyelela kumakhilomitha angu-40 ngehora! Futhi kuvamile ukuba zihlale ngaphansi kwamanzi amahora amabili, ngisho namathathu. Ezweni zikwazi ukugijima ngamagxathu amafushane, ashesha kakhulu.
Khona-ke, akumangalisi ukuthi iBhayibheli likhuluma ngengwenya njengesibonelo sesidalwa esisabekayo sikaNkulunkulu esibizwa ngokuthi uLeviyathani. UJobe 41:8, 10 uthi: “Beka isandla sakho [kuLeviyathani]; khumbula ukulwa; awusayikukuphinda. . . . Akakho onesibindi sokumvusa.” Yeka izixwayiso ezihlakaniphile! Ngokwencwadi ethi The Fascination of Reptiles, kaMaurice Richardson, izingwenya zaziwa ngisho nangokuhlasela izikebhe ezinenjini! Ngokufanelekile uJobe 41:25 uthi: “Ekuvukeni kwakhe abanamandla bayesaba; ngenxa yevuso baphela amandla.”
Kungani abantu bethi galo yephuka lapho bebona lesisilwane esimaholoholo? Ivesi 14 lichaza esinye isizathu: “Izicabha zobuso bakhe ngubani ongazivula na? Amazinyo akhe ayesabeka nxazonke.” Umhlathi ngamunye wengwenya, ongenhla nongezansi, unamazinyo afinyelela ku-24 anobukhulu obuhlukahlukene, wonke ayakhumuka kuvele amanye phakathi nesikhathi sokuphila kwayo. Ngokuthakazelisayo, izinyo lesine lomhlathi wengwenya ongezansi lingena esikhoxeni somhlathi ongenhla futhi lingabonakala kalula lapho imihlathi ivaliwe. Lokhu kusiza ekuyahlukaniseni nesilwane esifana nayo, i-alligator. Inkinga iwukuthi, uma usondela kakhulu lapho uhlolahlola amazinyo, ungase uzithole isikushwabadele ingwenya!
Kungakho ungase ukhethe ukuhlolisisa ingwenya usendaweni ephephile, futhi kunezindawo eziningi eKenya lapho ungakwenza khona lokho. Ngokwesibonelo, iMamba Village iyindawo yaseMombasa okukhuliselwa kuyo izingwenya.
Ungase ubuze, ‘Kodwa kungani umuntu engasukela ukufuya izingwenya?’ Phakathi kokunye, ukuze zivikelwe ekuqothulweni. Endle, izingwenya zisethubeni lokufa elingamaphesenti angu-99 phakathi nonyaka wokuqala zizelwe. Kubonakala sengathi oxamu, onogolantethe, ngisho nabanye abantu bayawathanda amaqanda namazinyane engwenya. Nokho, ithuba lokufa kwengwenya enakekelwe ngokufanele endaweni yokuzifuya lehla ngamaphesenti angaphansi kwayishumi. Phakathi nesikhathi esingangonyaka, amazinyane ezingwenya afinyelela ubude obuyimitha nengxenye—ngokuqinisekile makhulu ngokwanele ukuba axoshe okuningi okuwasongelayo. Kungawathatha iminyaka emithathu amazinyane ezingwenya asendle ukufinyelela ubude obufanayo.
Izindawo zokufuya izingwenya zibuye zifuye lezizilwane ukuze zizidayise. Endaweni yezohwebo, ungathola izicathulo, amabhande, izikhwama ezilengiswayo, nezinye izimpahla eziyimfashini ezenziwe ngesikhumba esithambile sezisu zezingwenya. Ngonyaka iMamba Village ithumela izikhumba ezingaba ngu-2 000 kwamanye amazwe, anjenge-Italy neFrance, ukuze ziyoshukwa. Kwenzekani ngengxenye esele yalesisilwane? EKenya, inyama yengwenya isetshenziswa ezindaweni zezivakashi ezibuka amazwe njengokudla kwekhethelo.
Ngo-October kuya ku-April isikhathi sokuba izingwenya zibekele amaqanda. Endle insikazi ingabeka amaqanda asukela kwangu-20 kuya kwangu-80. Phakathi nalesosikhathi, izinsikazi ezivalelwe zizobekela amaqanda angaba ngu-36 ezindaweni zokubekela ngasemachibini ahlukahlukene. Khona-ke lamaqanda ayaqoqwa bese efakwa emishinini yokuwachamusela. Lokhu kuthatha isikhathi esiyizinyanga ezintathu.
EMamba Village ukwazi kahle ukuzibona ngokuphephile lezizilwane ezihlaba umxhwele. Yakhiwe enkwalini engamahektare angu-8 eklanywe kabusha ukuze ibe yindawo yokufuya izingwenya, indawo yokutshala izimbali zombukiso, indawo yokufuya izilwane zasemanzini, nesikhungo sezokuzijabulisa. Lapha kutholakala lezizilwane ezihuquzelayo ezingaphezu kuka-10 000. Yiqiniso, ngeke uzibone zonke. Kodwa ezindaweni ezimbili ezizalela kuzo, ungabona ezindala ezingaphezu kwekhulu, futhi kwezinye izindawo, kunamakhulukhulu amazinyane ezingwenya anobudala obuhlukahlukene.
Ngesikhathi sokudla izingwenya zenza umbukiso wangempela. Ezinye zize zigxume emanzini ukuze zithole inyama elengiswe ngaphezu kwechibi. Lapha ungabona ingwenya edumile okuthiwa uBig Daddy eyayisabisa abantu ngaseMfuleni iTana, yabulala okungenani abahlanu ngaphambi kokuba ibanjwe iyovalelwa kulendawo yokuzifuya. Uma ukubonela izingwenya eduze kukushayisa uvalo, ungazibona kahle kakhulu endaweni yokubuka ama-video.
Ukuhlolisisa kwakho ingwenya kungase kukuhlabe umxhwele noma mhlawumbe kukwesabise. Kodwa uyoqonda kangcono ukuthi kungani iBhayibheli kuJobe 41:34, (NW), lathi ngengwenya: ‘Iyinkosi phezu kwazo zonke izilo zasendle ezibabazekayo.’
[Isithombe ekhasini 17]
Kwesokudla: Umfanekiso weMamba Village
[Isithombe ekhasini 17]
Kude kwesokudla: Ingwenya igxuma emanzini ngesikhathi sokudla ukuze ithole inyama