Umhlangano Wasebusuku ETanzania

NGEMVA komhlangano wezizwe woFakazi BakaJehova eKenya, ngenjabulo sathatha uhambo lokuya eTanzania.

Indawo yokuqala esama kuyo iLake Manyara National Park. Samangaliswa izilwane zasendle ezinhlobonhlobo—izinsimango, izimpala, izinyathi, amadube, nezinye. Ake ucabange ubuka ichibi eligcwele izimvubu. Ubuka indlulamithi iklaba ngaphesheya, ingonyama isotshanini buqamama, kanye nomhlambi wezinkonkoni ngalé kwayo.

Ngemva kokufika eNgorongoro Crater, saqasha umqondisi wezivakashi nemoto edonsa ngawo wonke amasondo ukuze sithathe uhambo losuku lonke lokuya emlonyeni wentabamlilo. Lendlela enezikhisi yasithatha amamitha angaba ngu-600 ukusuka ondini kuya phansi emlonyeni wentabamlilo. Yeka umbukwane! Kwakugcwele izilwane zasendle kulo lonke ithafa. Imihlambi yezinkonkoni yayihamba ngamaqoqo. Amadube, izinkolongwane (hartebeest), nezinsephe zohlobo lweThomson nolweGrant zazisabalele nezwe. Kwenye indawo esama kuyo, ingonyama yeduna yaphumula ethunzini lemoto yethu, ingenandaba nokuthi sasingenhla nje kwayo. Kamuva sama ukuze sibuke ubhejane buqamama nezindlovu eduze ezazidla izihlahla. Njengoba sibuyela emuva ondini, sakhumbula izilwane eziningi kakhulu ezihlaba umxhwele. Ingabe sikhona esasingasibonanga?

Yebo, ingwe. Kodwa ithemba lokuyibona endle cishe liyiphupho. Umthwebuli wezithombe u-Erwin Bauer waphawula: “Izivakashi ezibuka amazwe zifuna izingwe ngentshiseko nokuzimisela okungavamile, okungenani ngokwengxenye ngenxa yokuthi lezizilwane kunzima kakhulu ukuzithola, ingasaphathwa eyokuzithwebula. Izihambi eziningi ezisohambweni aziyiboni ngisho nangephutha. Phakathi nohambo engaluthatha izikhathi ezingu-15, ngiye ngabona izingwe eziyisishiyagalombili, kanti yinye kuphela engayithwebula isithombe.”—International Wildlife.

Kusihlwa sasikhathazeke ngenye indaba. Izicelo zendawo yokulala zazisuliwe, ngakho kwakudingeka sifune indawo yokulala. Lokhu kwasenza sabamba indlela ewubhuqu ebusuku obumnyama bhuqe. Ngokungazelele sobabili esasihlezi ngaphambili samangala. Umbala onsundu wama phambi kwezibani zemoto yethu. Sama ngokushesha sibambe ongezansi!

Phambi nje kwethu kwakunengwe esikhulile! Uma labo abasezihlalweni ezingemuva bazizwa bephuthelwe, lokho kwaphela ngokuphazima kweso. Lengwe yagijimela eceleni komgwaqo ngakwesokudla—yase ima phuhle. Kwabonakala sengathi iyazindla njengoba imile isibuka sonke ukuthi ‘Ngenzeni? Ngihlasele, noma ngifulathele “lesisitha” engingasazi ngizame ukubalekela ehlathini?’

U-Adrian, omunye wabangane bethu, wayeseduze kakhulu, cishe ibanga elingaba imitha ukusuka kulesisidalwa esinamandla esihle. “Shesha, nginike i-flash,” wanyenyeza lapho egxavula ikhamera yakhe ezishintshayo. Kwezwakala izixwayiso ezinyenyezayo ngemuva, “Ningabangi umsindo.” Kwalungiswa ikhamera ngokushesha kwathwetshulwa isithombe, kodwa kwabonakala singeke silunge ngoba i-flash yaphelela ngaphakathi emotweni. Njengoba amabhethri eshintsha, u-Adrian wehlisa ifasitela lakhe ngokucophelela. Lengwe yayiqhele nje ngobude bengalo, umsila wayo utshikiza, amehlo ayo ecwebezela.

Ngemva nje kokuthatha isithombe sesibili, yenza isinqumo. Lengwe enhle yagxumela ehlathini yanyamalala. Yeka injabulo esasinayo emotweni! Okuhlangenwe nakho okungasoze kwalibaleka, abaqondisi abasitshela kamuva ukuthi kuyivelakancane ngempela. Lapho lesosithombe sesibili siphuma sisihle, sasigcina ukuze sikhumbule lowomhlangano wasebusuku ovusa amadlingozi eTanzania.