Izibikezelo Zokuphela Kwezwe
“Sekuyizinkulungwane zeminyaka abaprofethi bobumnyama bebikezela ukuthi izwe selizophela.”—Premonitions: A Leap Into the Future.
NGO-1033, eminyakeni nje engu-1 000 ngemva kokufa kukaKristu, izakhamuzi zaseBurgundy, eFrance, zazinokwesaba okukhulu ngoba kwakubikezelwe ukuthi izwe lalizophela ngalowonyaka. Amathemba embubhiso aqina lapho kuvela inani elingavamile leziphepho ezibhubhisayo ezihambisana nemibani nokuduma nendlala embi. Izixuku ezinkulu zabonisa ukuphenduka obala.
Emashumini ambalwa eminyaka ngaphambi kwalokho, njengoba kwakusondela unyaka wenkulungwane uKristu ezelwe (ngokwendlela yokubala isikhathi eyayamukelwa ngaleso sikhathi), abaningi babekholelwa ukuthi ukuphela kwezwe kwakuseduze. Kuthiwa imisebenzi yobuciko nempucuko emizini yezindela eYurophu yacishe yaphela. U-Eric Russell waphawula encwadini yakhe ethi Astrology and Prediction: “Amazwi athi ‘njengoba ukuphela kwezwe sekusondele’ ayevamile ezincwadini zokwaba ifa ezagcwaliswa phakathi nengxenye yesibili yekhulu leshumi.”
UMartin Luther, owaqala iNguquko YobuProthestani ekhulwini le-16, wabikezela ukuthi ukuphela kwezwe kwakuseduze esikhathini sakhe. Ngokwencwadi ethile, wathi: “Ngokombono wami, ngiyaqiniseka ukuthi usuku lokwahlulela luseduze kakhulu.” Omunye umlobi wachaza: “Ngokuqhathanisa izenzakalo ezingokomlando neziprofetho zeBhayibheli uLuther wakwazi ukumemezela ukusondela kwenhlekelele yokugcina.”
Ekhulwini le-19, uWilliam Miller, ngokuvamile owaziwa ngokusungula iSonto LamaSabatha, wabikezela ukuthi uKristu wayeyobuya esikhathini esithile phakathi kuka-March 1843 no-March 1844. Ngenxa yalokho, abanye ngaleso sikhathi babelindele ukuyiswa ezulwini.
Ezikhathini zamuva, inkolo ezinze e-Ukraine ebizwa ngokuthi i-Great White Brotherhood yabikezela ukuthi izwe laliyophela ngo-November 14, 1993. E-U.S.A., umshumayeli wasemsakazweni, uHarold Camping, wathi ukuphela kwezwe kwakuyofika ngo-September 1994. Ngokusobala, lezi zibikezelo zesikhathi sokuphela kwezwe ziye zaba iphutha.
Ingabe lokhu kuye kwenza abantu bangabe besakholelwa ukuthi izwe lizophela? Ngokuphambene. “Ukusondela kwenkulungwane entsha yeminyaka ngonyaka ka-2000,” kuphawula i-U.S.News and World Report ka-December 19, 1994, “kubangela iziprofetho eziyinqwaba zosuku lwembubhiso.” Lomagazini wabika ukuthi “cishe amaMelika angamaphesenti angu-60 acabanga ukuthi izwe lizophela esikhathini esithile esizayo; cishe ingxenye eyodwa kwezintathu yalawo icabanga ukuthi lizophela phakathi namashumi ambalwa eminyaka.”
Kungani kuye kwaba nezibikezelo eziningi kangaka ngokuqondene nokuphela kwezwe? Ingabe sikhona isizathu esinengqondo sokukholelwa ukuthi lizophela?