Isihlahla Se-cashew Esikhulu Kunazo Zonke Emhlabeni

NGUMLOBELI WE-PHAPHAMA! EBRAZIL

SIKHULU kunazo zonke emhlabeni? Ngokwe-Guinness O Livro dos Recordes 1994, kungenzeka kunjalo. Njengoba sitholakala ngasogwini lwaseRio Grande do Norte, isihlahla se-cashew esiboniswe lapha kulesi sithombe ngokuqinisekile sikhulu kunazo zonke eBrazil. Ngempela, lesi sihlahla esisodwa njengamanje sihlanganisa indawo yedolobha elikhulu—silingana nezihlahla ze-cashew ezivamile ezingu-70!

Lesi sihlahla se-cashew esihlala siluhlaza, ngokuvamile sinobukhulu obusuka ekubeni isihlahlana kuya ekubeni isihlahla esingamamitha angu-20 ukuphakama. Izimbali ezincane zalesi sihlahla se-cashew zihluke kakhulu emaqabungeni aso amakhulu asasikhumba. Inhlamvu yaso edliwayo iyintongomane elehla esiphundu lohlobo lwe-cashew, elibukeka sengathi lifakwe ngenkani esithelweni esinjengegonandoda esibizwa ngokuthi i-cashew apple. Ngokumangalisayo, lesi sihlahla se-cashew sihlobene ne-poison ivy, futhi labo abasithintayo kufanele bagawule babheke. Leli ntongomane linamagobolondo amabili, futhi phakathi kwalamagobolondo kunamafutha angabangela amashashazi esikhunjeni. Ngokujabulisayo, ukuwagazinga kuyawususa ushevu waleli ntongomane.

Ngokumangalisayo, leli ntongomane elinjengenso libonakala limila ngaphandle kwalesi sithelo, sengathi uMdali walo walikhohlwa wabe eselinamathelisa kamuva. Lesi sithelo sisekela leli ntongomane. Ngakho-ke, abanye babiza leli ntongomane ngokuthi yisona sithelo salesi sihlahla. Kungakhathaliseki ukuthi ikuphi, esikhathini esizayo lapho udla amantongomane ohlobo lwe-cashew, cabanga, kungenzeka udla umkhiqizo wesihlahla se-cashew esikhulu kunazo zonke emhlabeni!