Izixhobo Zama-coral Ezimibalabala
NGUMLOBELI WE-PHAPHAMA! EPAPUA NEW GUINEA
IZIXHOBO zama-coral cishe zigcwele kulo lonke ugu lwasePapua New Guinea. Emandulo amatilosi ayezibheka njengeziyingozi kuphela. Kodwa labo abaye bahlola amanzi ezikuwo, izixhobo zama-coral ziyindlela eholela ebuhleni obuyisimangaliso, imibala nokuthula okukhulu—ubuhle obumibalabala obungaphansi kwamanzi!
Ukuzama ukuthwebula isithombe salezi zixhobo ezingaphansi kwamanzi kuyinselele ngempela. Phakathi kokunye, izinto ezingaphansi kwamanzi zibonakala zisebangeni eliyizingxenye ezintathu kwezine zebanga elikuzo ngempela; ngakho-ke kunzima ukuthwebula kahle isithombe. Amanzi amunca, ahlakaze, futhi agobe imisebe yokukhanya. Imibala futhi iyahlukahluka kakhulu kuye ngesimo sezulu, ukuma kwelanga, ukuba khona kolwelwe nezitshalo ezincanyana, ukujula kwamanzi nohlobo nombala wangaphansi kolwandle. Ngaphezu kwalokho, amanzi, okuyiyonanto ethwetshulwayo, kanye nomthwebuli wesithombe ngokwakhe kunyakaza ngokuqhubekayo!
Noma kunjalo, abanye abathwebuli bezithombe baye baphumelela ngokwezinga elithile kulokhu. Lezi zithombe ozibona lapha ziye zathathwa ngaphansi kwamanzi. Ake sikubonise izinhlobo ezine zezidalwa ezithakazelisayo ezathwetshulwa ngaphansi kwamanzi.
Isithombe 1 sibonisa isakhamuzi esihle sasolwandle okuthiwa i-tiger cowry (Cypraea tigris). Leli gama liyinqaba uma ucabangela iqiniso lokuthi igobolondo layo elihle limabhadubhadu, alinayo imithende. I-tiger cowry itholakala lapha, njengoba idla ama-coral neziponji. AmaShayina asendulo ahlatshwa umxhwele yiyo kangangokuba asebenzisa igobolondo layo njengemali. Lapha ePapua New Guinea, amagobolondo e-cowry asasetshenziswa njengemali ewuhlweza kwezinye izitolo zendawo. Nokho, ngokuvamile, izakhamuzi zendawo ziyawaqoqa ngenxa yobuhle bawo obubushelelezi.
Isithombe 2 yi-tube worm (Spirobranchus giganteus) enombala omuhle. Ingase iphile ngama-coral afile noma imbe umgodi kuyi-coral ephilayo. Lapho ingenzi lutho, ibukeka njengembali. Kodwa lapho ilambile, isonga izingalo zayo ukuze yakhe “inetha” lokubamba ngokushesha izingcezwana zokudla ezidlulayo. Njengoba izingalo zayo ezinezinsiba zinyakaza, ibukeka njengemigqa yabadansi abancane abaphakamisela abalandeli babo izandla. Lesi silwanyana sasingamamilimitha ayishumi kuphela ububanzi. Kodwa umthwebuli wesithombe kumelwe aqikelele anganyakazi ngokuzumayo. Lapho ziqala ukubona ingozi, lezi zixhotshana zingena ngokuphazima kweso egobolondweni ezihlala kulo.
Isithombe 3 yisiponji. Asifani nalesi sokuzenzela esintanta kubhavu wakho wokugeza. Eqinisweni isiponji yisilwane esiphilayo, hhayi isitshalo. Singamangqamuzana amaningi asebenza ndawonye ngendlela eyinqaba. Incwadi ethi The Undersea ithi amangqamuzana esiponji awahlelekile futhi awaxhomekile kwamanye. Ngakho, uma isiponji esiphilayo sihlukana sibe izicucu, ingxenye ngayinye ekugcineni yenza isiponji esisha. Ngisho noma amangqamuzana ngamanye ehlukaniswa, ahamba njengama-amoeba kuze kube yilapho ehlangana eba isiponji esiphelele futhi.
Ngokungafani nesitshalo, esizenzela ukudla, isiponji “siyazingela” ukuze sithole ukudla. Simunca amanzi aseduze bese siwacwenga ukuze sithole ukudla. Njenganoma yisiphi esinye isilwane, sigaya ukudla kwaso bese sikhipha imfucumfucu. Iziponji zinamathela emadwaleni noma emagobolondweni phansi olwandle.
Ekugcineni, esithombeni 4 kunembaza encane. Ihlala ndawonye futhi kulula ukuyithola emadwaleni noma izilalele nje phansi olwandle. Eziningi zithola ukudla ngokuhlunga izitshalo ezincanyana emanzini. Imbaza ibizwa ngokuthi i-mollusk enama-valve amabili ngoba inamagobolondo noma ama-valve amabili. Ahlanganiswe umsipha futhi avulwa aphinde avalwe eminye imisipha emibili. Lapho imbaza kudingeka ihambe, iyavuleka bese unyawo lwayo luphumela ngaphandle kancane. Kodwa lapho kuqhamuka isitha, ingena egobolondweni layo!
Lezi zithombe zibonisa nje ingxenye encane yezinto ezinhle ezingabonakala olwandle olunama-coral—okungenye indawo lapho ukuhlakanipha kwendalo kaJehova kubonakala khona.—Roma 1:20.
[Izithombe ekhasini 16, 17]
1. I-“tiger cowry” isasetshenziswa njengemali
2. Lezi “zimbali” empeleni ama-“tube worm”
3. Isiponji yisilwane, hhayi isitshalo
4. Imbaza idla izitshalo ezincanyana (kuvezwe umlomo)