Ukusuka Ekubeni Iqhawe Lempi Kuya Ekubeni Isosha LikaKristu

NJENGOBA ILANDISWA NGULOUIS LOLLIOT

Ngo-August 16, 1944, ngangisebuthweni Lemibuso Esizanayo elafika ogwini lwaseningizimu yeFrance phakathi neMpi Yezwe II. Ngemva kokulwa isonto lonke oGwini LweMediterranean, ibutho lethu lezempi langena ethekwini laseMarseilles futhi lalwa likhuphuka negquma ukuya eThempelini laseNotre-Dame-de-la-Garde Basilica. Kwakumelwe sithumbe izinqaba zamaJalimane lapho.

IMPI yayishubile. Inqola yezempi yeqembu engangikulo yadutshulwa, futhi abangane bami abathathu bafa. Kamuva ibhomu eligqitshwayo lonakalisa amasondo ensimbi enqola yethu yezempi. Sizimisele ukuyibamba ishisa, saqhubeka silwa amahora ambalwa alandela.

Ngibambe isibhamu ngesinye isandla kanye nefulege laseFrance ngesinye, ngasebenzisa ithuba lapho impi isathé gozololo ngaqhubeka ngezinyawo nelinye isosha leqembu lamaFree French. Ngikhathele futhi ngimnyama ngenxa yomsizi wesibhamu, ngahloma ifulege laseFrance emnyango wethempeli.

Inkululeko

Phakathi namasonto alandela, saqhubekela enyakatho silandela amasosha aseJalimane ayebaleka. Abadubuli abacashile kanye nezintambo ezifika ekhanda ezaziboshwe zavundla umgwaqo zasiphoqelela ukuba sidlule sivale izivalo zenqola yethu.

Ngo-October iqembu lethu lafika eRamonchamp, idolobhana eliseziNtabeni zaseVosges enyakatho-mpumalanga yeFrance. Leli dolobhana lalibonakala sengathi lilahliwe. Njengoba embhoshongweni wenqola yethu ngihlola indawo, ngokungazelele, ibhomu elicitshwayo elalidutshulwe ngefasitela langena enqoleni, labulala amadoda amathathu ujuqu lapho liqhuma. Mina nelinye isosha salimala kabi, futhi inqola yaphuka. Nakuba nganginezingcezu zebhomu ezingu-17 emlenzeni wami, ngangiqondisa inqola yethu lapho sidonswa enye.

Ngathola umbiko owawungincoma ngalesi senzakalo. Ezinsukwini ezimbalwa kamuva, lapho uJenene de Lattre de Tassigny, umkhuzi weButho Eliyinhloko LaseFrance, engihlomulisa ngemendlela ngenxa yalokho engangikwenzile eMarseilles, waphawula: “Sizobonana futhi maduzane.”

Ngokushesha ngemva kwalokho, ngabelwa ukuba ngibe umsizi kajenene kwezokubonisana kwamazwe. Ngokuhamba kwesikhathi, ngahamba naye saya eBerlin, eyomelela iFrance lapho elaseJalimane libeka phansi izikhali ngo-May 8, 1945. Eminyakeni emine eyalandela, ngakhonza njengesithunywa sakhe.

Nokho, kwenzeka kanjani ukuba ngingene ngithi shí ezenzakalweni ezivelele zeMpi Yezwe II?

Ukuqeqeshwa Kwezenkolo Nakwezempi

Ngakhula ngingumRoma Katolika ozinikele, owayenesifiso sokukhonza uNkulunkulu nezwe lakithi. Ngo-August 29, 1939, ezinsukwini ezimbalwa nje ngaphambi kokuba elaseFrance lingenele iMpi Yezwe II, ngabuthelwa ebuthweni labahamba ngezinqola. Ngangineminyaka engu-18 kuphela ubudala. Ngemva kokuqeqeshwa izinyanga ezinhlanu e-École Militaire eParis, ngathunyelwa ebuthweni laseFrance elalisempumalanga njengesikhulu esibuthelwe empini.

Lena kwakuyinkathi eyaziwa ngokuthi eyempi-mbumbulu, ibizwa kanjalo ngoba esasikwenza nje kwakuwukulinda amasosha aseJalimane ayebambeke empini kwezinye izindawo. Khona-ke, lapho amaJalimane ehlasela ekugcineni, ngathunjwa njengesiboshwa, ngo-June 1940. Ezinyangeni ezimbili kamuva ngeqa, futhi ekugcineni ngakwazi ukujoyina amabutho aseFrance ayeseNyakatho Afrika.

Lapho silwa namabutho aseJalimane eTunisia ngaphansi kukaJenene Erwin Rommel, uDesert Fox, ngasha ingxenye yomzimba engamaphesenti angu-70 futhi ngangiqulekile izinsuku ezingu-9. Ngachitha izinyanga ezintathu esibhedlela eSidi-bel-Abbès, enyakatho-ntshonalanga ye-Algeria, lapho indlunkulu yeButho Langaphandle LaseFrance yayikhona. Lapho ngiseNyakatho Afrika, ngathola i-Croix de Guerre, iSiphambano Sempi.

Abefundisi bamaKatolika babesikhuthaza ukuba senze imisebenzi yethu “yobuKristu.” Ngokuvumelana nesikhuthazo sabo, ngangizimisele ukudela ukuphila kwami ngenxa yeFrance. Uma kuvela ithuba, ngangidla iSakramente ngaphambi kokuya empini. Futhi lapho ibambene ngezihluthu, ngangithandaza kuNkulunkulu naseNcasakazini uMariya.

Ngangiwahlonipha amasosha ayizitha, amaningi awo ayengamaRoma Katolika azinikele. Amanye ayebopha amabhande ayenekhongco elinombhalo othi Gott mit uns (UNkulunkulu unathi). Akuyona yini into eyinqaba ukucabanga ukuthi uNkulunkulu wayengaphendula imithandazo yamasosha alwayo ebe esenkolweni efanayo?

Izinguquko Zangemva Kwempi

Ngemva kwempi, ngo-April 10, 1947, ngashada noReine, intombi yasedolobhaneni uJenene de Lattre de Tassigny akhulela kulo eMouilleron-en-Pareds, eVendée. Ujenene waba ufakazi wami emshadweni. Ngemva kokushona kwakhe, ngo-January 1952, ngaphathiswa ifulege lakhe lobuqhawe emngcwabeni wakhe.

Khona-ke, ngolunye usuku ekuseni ngeSonto ngo-1952, lapho mina nomkami silungiselela ukuya eMiseni nendodakazi yethu encane, kwangqongqoza oFakazi BakaJehova ababili. Lokho abakusho ngeBhayibheli kwasivusela ilukuluku lokufuna ukwazi. Nakuba mina nomkami sasiyithanda kakhulu inkolo, sasingalazi iBhayibheli, njengoba isonto lalingasivumeli ukuba silifunde. UFakazi owacela ukufunda nathi iBhayibheli kwakunguLéopold Jontès, ngaleso sikhathi owayengumbonisi wehhovisi legatsha loFakazi BakaJehova eFrance. Esifundweni sethu seBhayibheli, ngagcina ngikwazile ukuthola izimpendulo zemibuzo eyayingaphendulwanga kusukela ebuntwaneni.

Ngokwesibonelo, wawungidida njalo umthandazo othi Baba Wethu, noma uMthandazo WeNkosi. NjengomKatolika, ngangikholelwa ukuthi bonke abantu abalungile baya ezulwini lapho befa, ngakho ngangingaqondi ukuthi kungani sithandaza kuNkulunkulu sithi: “Mayenziwe intando yakho emhlabeni.” (Mathewu 6:9, 10, Douay Version; omalukeke sizenzele.) Abapristi engangixoxe nabo babewubalekela lo mbuzo noma bathi lo mthandazo uyophendulwa lapho bonke abantu sebengamaRoma Katolika. Kodwa leyo mpendulo yayinganganelisi.

Abapristi bahluleka nokunginikeza izimpendulo ezanelisayo zemibuzo yami ngoZiqu-zintathu. Ngokwamazwi esivumo sokholo sesonto, imfundiso yamaKatolika ithi ‘uBaba unguNkulunkulu, iNdodana inguNkulunkulu, noMoya Ongcwele unguNkulunkulu, kodwa ababona oNkulunkulu abathathu kodwa banguNkulunkulu oyedwa.’ Ngakho ukuthola imfundiso yeBhayibheli ecacile yokuthi uJesu uyiNdodana kaNkulunkulu hhayi uNkulunkulu uMninimandla onke kwasijabulisa kakhulu mina nomkami.—Marku 12:30, 32; Luka 22:42; Johane 14:28; IzEnzo 2:32; 1 Korinte 11:3.

Sobabili saba nomuzwa wokuthi amehlo ethu ayeqala ngqá ukuvuleka nokuthi sasithole iparele lenani eliphakeme, elalikufanele noma ikuphi ukuzidela. (Mathewu 13:46) Saqaphela ukuthi kwakuzodingeka sikhethe ukuze sizuze le ngcebo. Ngokushesha saba nombono onjengowomphostoli uPawulu, owathi ‘zonke izinto wayezishaya indiva ngenxa yenzuzo edlula zonke izinto yolwazi ngoKristu Jesu.’ Ngakho senza izinguquko ekuphileni kwethu ukuze sikhonze uNkulunkulu.—Filipi 3:8.

Ukuthatha Isinyathelo

Ngo-April 1953, ngemva nje kwezinyanga ezimbalwa siqalé ukufunda iBhayibheli noFakazi, ngabizelwa ebuthweni laseFrance elalizothunyelwa ukuyolwa e-Indochina. Ngaleso sikhathi, ngangingumsizi womkhuzi wempi eSigeleni saseParis. Njengoba ngaleso sikhathi ngase ngisiqonda isimiso seBhayibheli sokungathathi-hlangothi, ngaqaphela ukuthi kwakudingeka ngenze isinqumo. (Johane 17:16) Ngatshela abangiphethe ukuthi ngiyenqaba ukulalela iziqondiso zokuyolwa e-Indochina, ngaveza nesifiso sami sokuthi ngangingasafuni ukuphinde ngihlanganyele empini.—Isaya 2:4.

Abangiphethe babuza: “Uyaqaphela yini ukuthi uzoba umuntu ongelutho nokuthi uzolahlekelwa amathuba?” Kusukela ngaleso sikhathi kuqhubeke, ngabekwa eceleni. Kodwa lokhu kwaba isivikelo, ngoba ngangingasabizelwa ukuya empini. Izihlobo nabangane abaningi babengaqondi ukuthi ngangingasilahla kanjani isikhundla esasibhekwa njengesihle emphakathini.

Ngenxa yomlando wami wezempi, iziphathimandla zazingiphatha ngenhlonipho, zingihlonipha naphezu kwezinkolelo zami. Eminyakeni emibili eyalandela, nganikwa izinsuku ezengeziwe zokuphumula ngenxa yempilo, futhi akuzange kudingeke ngiphindele emsebenzini. Ngaleso sikhathi, mina nomkami sasiya emihlanganweni yebandla loFakazi BakaJehova lendawo futhi sihlanganyela ngisho nezinkolelo zethu ezintsha nabanye.

Ukuba Isosha LikaKristu—Ekugcineni!

Ekugcineni, ekuqaleni kuka-1955, ngakhululwa ngokuphelele kwezempi. Ezinsukwini ezingu-15 kamuva, ngo-March 12, mina nomkami sabonakalisa ukuzinikezela kwethu kuJehova uNkulunkulu ngobhapathizo lwamanzi emhlanganweni owawuseVersailles. Njengoba isimo sami somsebenzi wokuziphilisa sasesishintshile, kwadingeka ukuba ngithole umsebenzi ohlukile ukuze nginakekele izidingo zomkhaya wami. Eminyakeni emine eyalandela, ngasebenza njengomthuthi wezimpahla eHalles (imakethe eyinhloko), eParis. Nakuba kwakungelula ukwenza ushintsho olunjalo, uJehova wayibusisa imizamo yami.

Kuyo yonke le minyaka, mina nomkami siye sasiza abantu abaningi ukuba bamukele isigijimi seBhayibheli. Ngiye ngaba nethuba lokuchaza umbono wamaKristu wokungathathi-hlangothi ezikhulwini eziningi zempi nezezwe. Umsebenzi engangiwenza njengesosha uye waba usizo ekunqobeni ukubandlululwa koFakazi BakaJehova abantu abaningi. Kuye kwanginikeza ithuba lokuchaza ukuma kwethu kobuKristu kokungathathi-hlangothi ezimpini zamazwe, ngibonisa ukuthi abalandeli bakaKristu bokuqala bathatha ukuma okufanayo. Ngokwesibonelo, encwadini yakhe ethi The Early Church and the World, uProfesa C. J. Cadoux wabhala: “Okungenani kuze kube isikhathi sokubusa kukaMarcus Aurelius [ngo-161 kuya ku-180 C.E.], akekho umKristu owayengaba isosha ngemva kokubhapathizwa.”

Ukuvivinywa okukhulu engabhekana nakho kwakuwukushona komkami ngo-1977. Washona ngemva kokugula unyaka wonke, emelela ukholo lwakhe ngesibindi kwaze kwaba sekufeni. Ithemba elimangalisayo lovuko langiqinisa. (Johane 5:28, 29) Okunye okwangisiza ukuba nginqobe usizi lwami kwaba ukubhalisa njengephayona elivamile, njengoba zibizwa kanjalo izikhonzi zesikhathi esigcwele zoFakazi BakaJehova. Lokhu ngakwenza ngo-1982 ngemva kokuthatha umhlalaphansi. Kamuva, ngo-1988, yeka ukuthi ngakujabulela kangakanani ukukhonza njengothisha esikoleni sokuqeqesha amaphayona!

Selokhu umkami ashona, ukucindezeleka kufika kudlule. Kodwa abangane abaseduze, abaqinile ngokomoya baye bangisiza ukuba ngisimame. Phakathi nakho konke ukuvivinywa okunjalo, ngiye ngezwa amandla nomusa kaJehova wothando, onakekela bonke ababeka ithemba kuye. (IHubo 18:2) Futhi nginomuzwa wokuthi ukuvivinywa esibhekana nakho kusiqeqeshela ukuba siqhubeke empini yethu engokomoya. (1 Petru 1:6, 7) Njengomdala ebandleni, nami ngiye ngakwazi ukusiza abanye abacindezelekile.—1 Thesalonika 5:14.

Lapho ngisengumfana, nganginesifiso sokuba isosha, futhi ngandlela-thile ngiye ngaqhubeka ngiyilo kuze kube manje. Ngashiya ibutho ukuze ngingene kwelinye, ngaba ‘isosha likaKristu Jesu.’ (2 Thimothewu 2:3) Namuhla, nakuba impilo yami ingasavumi, ngilwa ngokusemandleni ami ukuba ngiqhubeke ngilwa njengesosha likaKristu ‘empini enhle’ eyophumela ekunqobeni ekugcineni, kube udumo nenkazimulo kuNkulunkulu wethu, uJehova.—1 Thimothewu 1:18.

ULouis Lolliot washona ngo-March 1, 1998, lapho lesi sihloko sisalungiselelwa ukunyatheliswa.

[Isithombe ekhasini 13]

Umshado wethu, okwakukhona kuwo uJenene de Lattre de Tassigny

[Isithombe ekhasini 15]

ULouis Lolliot nomkakhe, uReine, ngo-1976