Abesifazane Baye Bafeza Lukhulu
INDIMA ebalulekile eyafezwa abesifazane abangamaKristu ekwakhiweni kwegatsha loFakazi BakaJehova laseZimbabwe yagcizelelwa lapho linikezelwa, ngo-December 12, 1998. Phakathi neminyaka emine yokwakhiwa kwalo, izisebenzi zokuzithandela zasemazweni amaningi—kuhlanganise nezingamakhulu zaseZimbabwe—zanikela ngesikhathi sazo, amandla, amakhono nengcebo ukuze kwakhiwe izakhiwo ezinhle ozibona esithombeni esihambisana nalesi sihloko.
Uzophawula ukuthi kunezakhiwo zokuhlala eziyisithupha ezilinganayo ngemuva. Isakhiwo esikhulu esiseduze kwazo sinendlu yokudlela, ikhishi nelondolo. Izakhiwo zokuhlala zinamakamelo okulala angu-61, kanti indlu yokudlela izohlalisa cishe abantu abangu-200. Ngaphambili, kwesobunxele, kunesakhiwo samahhovisi. Phakathi nendawo kukhona indawo yokwamukela izihambi, kanti ngakwesokudla kunendlu yokugcina izimpahla, lapho kwaqhutshelwa khona isimiso sokunikezela leli gatsha.
Lesi sakhiwo esihle segatsha laseZimbabwe, eningizimu ye-Afrika, simane nje singesinye sezakhiwo eziningi eziye zaqedwa kusukela oFakazi BakaJehova baqala isimiso sokwakha emhlabeni wonke ngo-November 1985. I-Phaphama! ka-August 22, 1991, yachaza lesi simiso esihlokweni esithi “Okuthile Okusha Ekwakheni Komhlaba Wonke.”
Ikhuluma ngendima yabesifazane kulesi simiso, i-Phaphama! yabika: ‘Abaningi baye baqeqeshelwa ukubopha izinsimbi zokuqinisa ukhonkolo bazihlanganise ngocingo, ukufaka ama-tile, kanye nokwenza bushelelezi udonga nokulupenda. Abanye banakekela imisebenzi edingekayo yasendlini. Bonke ngokwenza kanjalo banikela ngendlela enhle emsebenzini ezindaweni zokwakha emhlabeni wonke.’
Muva nje, phakathi nesimiso sokunikezela igatsha eZimbabwe, uGeorge Evans noJames Paulson, ababengamele umsebenzi wokwakha, bafanisa indima eyafezwa abesifazane ekwakhiweni kwegatsha laseZimbabwe kanye nendima eyafezwa abesifazane ekwakheni itabernakele lakwa-Israyeli wasendulo. “Bafika, kwaba yilowo nalowo owavuswa yinhliziyo yakhe,” kusho iBhayibheli ngama-Israyeli, “beza abesilisa nabesifazane.” (Omalukeke sizenzele.)—Eksodusi 35:21, 22.
Besebenzisa loku kulandisa kweBhayibheli, uMfoweth’ u-Evans noPaulson bagcizelela inzuzo yokubamba iqhaza kwabesifazane. Bacaphuna ukulandisa kweBhayibheli, okuthi: “Bonke abesifazane abahlakaniphile ngenhliziyo baphotha ngezandla zabo, . . . bonke abesifazane abavuselwa yizinhliziyo zabo ukuhlakanipha.” Ngempela, abesifazane babephakathi kwalabo abazinikela ngokuzithandela ekwenzeni umsebenzi. ‘Bawuletha umnikelo bonke abesilisa nabesifazane, abanhliziyo yabo ibavusele ukulethela yonke imisebenzi ayale ngayo uJehova ukuba yenziwe ngesandla sikaMose.’ (Omalukeke sizenzele.)—Eksodusi 35:25, 26, 29.
Ekhuluma ngomsebenzi wokwakhiwa kwegatsha laseZimbabwe, umbonisi owengamele ezokwakha wathi: ‘Abesifazane babenza yonke imisebenzi eyayenziwa amadoda.’ Loku kwakuhlanganisa ukubopha izinsimbi nokusebenzisa imishini emikhulu. UMfoweth’ uPaulson wathi abesifazane babegcina amaloli abo kakhonkolo neminye imishini emikhulu kucwebezela, kungahlalwa mpukane, okuyinto aphawula ukuthi abesilisa abavamile ukuyenza.
Ngokuqinisekile, sizibonga kakhulu izinkulungwane zabesifazane eziye zahlanganyela kanye nabesilisa emsebenzini womhlaba wonke wokwakhiwa kwamahhovisi egatsha namaHholo OMbuso oFakazi BakaJehova!
[Isithombe ekhasini 26]
Igatsha laseZimbabwe