Ingabe Ufuna Ukufunda Olunye Ulimi?

Ngumlobeli we-Phaphama! eBrithani

“Ayingangamlomo!” Yilokho abaningi abakushoyo ngokufunda olunye ulimi, ikakhulukazi uma sebeke bazama. Kuyavunywa, ukufunda olunye ulimi kuyinselele ngempela. Kodwa labo abaye baphumelela bathi kuwufanele umzamo.

ZININGI izizathu ezingakwenza ufunde olunye ulimi. Ngokwesibonelo, u-Andrew wahlela ukuchitha iholide eFrance, futhi wayefuna ukukwazi ukukhuluma nabantu bendawo ngolimi lwabo. UGuido wazalelwa eNgilandi, kodwa umkhaya wakubo udabuka e-Italy. Uthi: “Ngangazi nje ulimi lwesigodi kuphela, ngakho ngangifuna ukufunda ukusikhuluma kahle isiNtaliyane.” Umfowabo kaJonathan usanda kuthuthela phesheya kwezilwandle futhi washada nentombazane yaseSpain. UJonathan uthi: “Ngangifuna ukukhuluma nezihlobo zami ezintsha ngolimi lwazo lomdabu lapho ngivakashele umfowethu.”

Kodwa ukufunda olunye ulimi kungaba nezinye izinzuzo. ULouise uthi: “Kwangifundisa ukuba nozwela. Manje sengiyazi ukuthi abantu bakwamanye amazwe bazizwa kanjani uma befika ezweni okukhulunywa kulo ulimi oluhlukile kolwabo.” UPamela wakubona kuye ngokwakhe lokhu. Njengoba akhulela eNgilandi, wayengasazi isiShayina—ulimi lomkhaya wakubo. Ngenxa yalokho, uPamela nonina babengasondelene. UPamela uyavuma: “Sasingakhulumisani kangako. Kodwa manje njengoba sengikwazi ukukhuluma isiShayina, sesisondelene futhi ubuhlobo bethu buye bathuthuka.”

Okungakusiza Uphumelele

Yini ozoyidinga ukuze uphumelele ekufundeni olunye ulimi? Abaningi abaye baphumelela bagcizelela lokhu okulandelayo.

● Umdlandla. Kudingeka ube nogqozi—isizathu sokuba ufune ukufinyelela umgomo wakho. Abafundi abanomdlandla ngokuvamile benza kahle.

● Ukuthobeka. Ungalindeli izimanga—uyowenza amaphutha, ikakhulu uma usaqala. U-Alison uthi: “Abantu bazokuhleka, ngakho hleka nawe!” UValerie uyavuma: “Ufana nengane esacathula. Kaningi uyakhubeka, kodwa kumelwe uvuke uzicoshe.”

● Ukubekezela. UDavid uyavuma: “Iminyaka emibili yokuqala yayinzima kimi, futhi ngezinye izikhathi kwakuvele kuthi angiyeke.” Noma kunjalo, uqaphela ukuthi: “Kuya kuba lula!” UJill uzizwa ngendlela efanayo. Uthi: “Awucabangi ukuthi uyathuthuka kuze kube yilapho ubheka emuva.”

● Ukuprakthiza. Ukulukhuluma njalo ulimi olusha kuyokusiza ukuba ulukhulume kahle. Zama ukuprakthiza nsuku zonke, ngisho noma kuyimizuzu embalwa nje. Njengoba enye incwadi isho, “kungcono [ukuprakthiza] njalo isikhashana kunokuprakthiza isikhathi eside okuqabukelayo.”

Amathuluzi Awusizo

Ingabe ukulungele ukubhekana nenselele yokufunda olunye ulimi? Uma kunjalo, la mathuluzi alandelayo angase asheshise intuthuko yakho.

● Amakhadi ayizinsiza-kufunda (flash cards). Ngalinye linamagama noma umusho ngaphambili bese kuba incazelo ngemuva. Uma engekho lapho uhlala khona, ungazenzela awakho, uwagcine ndawonye ngokuhleleka.

● Amakhasethi alalelwayo namakhasethi e-video okufundisa. Angakusiza ukuba uluzwe lukhulunywa kahle lolo limi. Ngokwesibonelo, uDavid wafunda izinto eziyisisekelo olimini lwesiJapane ngokuthi lapho eshayela alalele ikhasethi yencwadi enemisho esetshenziswa ababuki bamazwe.

● Imidlalo yokuxhumana ngama-computer. Eminye ikuvumela ukuba uziqophe bese uqhathanisa indlela ophimisa ngayo amagama naleyo abanikazi bolimi abawaphimisa ngayo.

● Umsakazo nethelevishini. Uma endaweni yakini kunezinhlelo zomsakazo noma zethelevishini ezisakazwa ngalolu limi olufundayo, kungani ungazilaleli ubone ukuthi kungakanani ongakuzwa?

● Omagazini nezincwadi. Zama ukufunda indaba ebhalwe ngalolu limi olufundayo, uqiniseke ukuthi ulimi ebhalwe ngalo alukho ezingeni eliphezulu kakhulu noma eliphansi kakhulu.a

Ukwazi Ulimi

Yiqiniso, ngesinye isikhathi kuyodingeka ukhulume nabantu abakhuluma lolo limi. Lokhu akudingi ukuba uhambe uye kwelinye izwe. Kunalokho, mhlawumbe ungavakashela ibandla loFakazi BakaJehova lolunye ulimi ezweni lakini.

Kunoma yikuphi, umgomo wakho kufanele kube ukufunda ukucabanga ngolimi olusha, kunokuba kumane kube ukuhumusha amagama nemisho uyisusa olimini lwakho. Cishe kuyokusiza nokuzama ukufunda okuthile ngamasiko nemikhuba yabantu abakhuluma ulimi olufundayo. Uchwepheshe wolimi uRobert Lado uthi: “Ngeke ulufunde ngempela olunye ulimi ngaphandle kokuqonda okuthile ngemikhuba nezimiso zesiko oluyingxenye yalo.”

Umbono wokugcina: Ungadumali uma kubonakala sengathi uthuthuka kancane. Phela, ukufunda ulimi olusha yinqubo eqhubekayo. UJill, owafunda ulimi lwezandla eminyakeni engu-20 edlule uthi: “Angilokothi ngiyeke ukufunda. Ulimi luhlale luthuthuka.”

Khona-ke ingabe ufuna ukufunda ulimi olusha? Uma kunjalo, kulungele ukuqala umsebenzi oyinselele—kodwa onomvuzo ocebile.

[Umbhalo waphansi]

[Izithombe ekhasini 12, 13]

Ungathuthukisa ulwazi lolimi . . . 

. . . ngokuqhathanisa ulimi lwakho nalolo olufundayo