Umbono WeBhayibheli
Ingabe Zonke Izinkolo Ziyizindlela Ezingafani Eziya KuNkulunkulu?
“NGIKUTHOLA cishe kuyisimanga ukuthi uNkulunkulu wendawo yonke uye wakhetha ukuba aziwe ngenkolo eyodwa kuphela,” kusho umlobi uMarcus Borg. Umzuzi woMklomelo KaNobel Wokuthula uDesmond Tutu wathi: “Ayikho inkolo engazisho ukuthi ineqiniso lonke ngemfihlakalo” yokholo. Umbono othandwa amaHindu uwukuthi “Jotto moth, totto poth,” okuthi uma uhunyushwa kalula usho ukuthi zonke izinkolo zimane ziyizindlela ezingafani eziya ndawonye. AmaBuddha nawo analo mbono. Empeleni, izigidi zabantu zikholelwa ukuthi zonke izinkolo ziyizindlela ezingafani eziya kuNkulunkulu.
Isazi-mlando uGeoffrey Parrinder sathi: “Ngezinye izikhathi kuthiwa zonke izinkolo zinomgomo ofanayo, noma ziyizindlela ezilinganayo eziya eqinisweni, noma ngisho nokuthi zizonke zifundisa izimfundiso ezifanayo.” Izimfundiso, amasiko nawonkulunkulu bezinkolo ngempela kuyafana. Izinkolo eziningi zikhuluma ngothando futhi zifundisa ukuthi ukubulala, ukweba nokuqamba amanga kubi. Emaqenjini amaningi enkolo, abantu abathile benza umzamo oqotho wokusiza abanye. Ngakho-ke, uma umuntu eqotho ezinkolelweni zakhe futhi ezama ukuphila ukuphila okuhle, ingabe kunendaba ukuthi ukuyiphi inkolo? Noma ingabe zonke izinkolo zimane ziyizindlela ezingafani eziya kuNkulunkulu?
Ubuqotho Bubodwa—Ingabe Banele?
Cabangela indaba yendoda engumJuda yekhulu lokuqala okuthiwa uSawulu, eyaba umphostoli ongumKristu okuthiwa uPawulu. Yayingumshisekeli omkhulu wobuJuda futhi lokhu kwayenza yazama ukuqeda ukukhulekela kwabalandeli bakaKristu, ukukhulekela eyayinomuzwa wokuthi akufanelekile. (IzEnzo 8:1-3; 9:1, 2) Kodwa ngesihe sikaNkulunkulu uSawulu waqaphela ukuthi abantu abashisekela inkolo njengaye bangase bamshisekele uNkulunkulu, kodwa ngenxa yokuntula wonke amaqiniso, bangase babe nephutha. (Roma 10:2) Lapho uSawulu efunda okwengeziwe ngentando kaNkulunkulu nemisebenzi yakhe, waguquka futhi waqala ukukhulekela nabo kanye abantu ayebashushisa—abalandeli bakaJesu Kristu.—1 Thimothewu 1:12-16.
Ingabe iBhayibheli lithi kunamakhulu ezinkolo esingakhetha kuzo nokuthi kungakhathaliseki ukuthi sikhetha yiphi, iyobe ilungile kuNkulunkulu? Umphostoli uPawulu wathola iziyalezo ezivela kuJesu Kristu ovusiwe ezazisho okuphambene nalokho. UJesu wamthuma kubantu bezizwe ‘ukuba ayovula amehlo abo, abaphendule ebumnyameni abayise ekukhanyeni abaphendule nasegunyeni likaSathane abayise kuNkulunkulu.’ (IzEnzo 26:17, 18) Ngokusobala, kunendaba ukuthi sikhetha yiphi inkolo. Iningi labantu uPawulu athunywa kubo lase linayo kakade inkolo. Kodwa ‘lalisebumnyameni.’ Ngempela, ukube zonke izinkolo zazimane ziyizindlela ezingafani eziholela ekuphileni okuphakade nasekwamukelweni uNkulunkulu, sasingeke sibe khona isidingo sokuba uJesu aqeqeshele abalandeli bakhe umsebenzi wokwenza abafundi abayala ukuba bawenze.—Mathewu 28:19, 20.
ENtshumayelweni yakhe edumile yaseNtabeni, uJesu wathi: “Ngenani ngesango eliwumngcingo; ngoba ubanzi futhi uvulekile umgwaqo oholela ekubhujisweni, futhi baningi abangena ngawo; kanti liwumngcingo isango futhi unyinyekile umgwaqo oholela ekuphileni, futhi bambalwa abawutholayo.” (Mathewu 7:13, 14) IBhayibheli lisho ngokucacile ukuthi “ukholo lunye.” (Efesu 4:5) Ngokusobala, abaningi abasendleleni ‘ebanzi’ banenkolo. Kodwa abanalo “ukholo lunye.” Njengoba kunendlela eyodwa kuphela yokukhulekela yeqiniso, labo abafisa ukuthola lolo kholo lweqiniso kuyofanele balufune.
Funa UNkulunkulu Weqiniso
Kusukela ekuqaleni komlando womuntu, uNkulunkulu uye wabatshela abantu ukuthi ufuna benzeni. (Genesise 1:28; 2:15-17; 4:3-5) Namuhla lokho akufunayo kuchazwe ngokucacile eBhayibhelini. Lokhu kusivulela ithuba lokuhlukanisa phakathi kokukhulekela okwamukelekayo nokungamukeleki. (Mathewu 15:3-9) Abanye abantu baye bakhuliselwa enkolweni yabo, kuyilapho abanye belandela lokho okwenziwa yiningi emphakathini. Kwabaningi, inkolo inqunywa ukuthi bazalelwa kuphi futhi nini. Kodwa, ingabe kufanele kuzenzakalele ukuthi ukhetha yiphi inkolo noma uvumele abanye bakwenzele leso sinqumo?
Ukukhetha kwakho inkolo kufanele kwenziwe ngolwazi olusekelwe ekuhloleni imiBhalo ngokucophelela. Ekhulwini lokuqala, abantu abathile abafundile abazange nje bamukele amazwi omphostoli uPawulu ngaphandle kokuzikhathaza. ‘Bahlola ngokucophelela imiBhalo nsuku zonke ukuthi zinjalo yini lezi zinto.’ (IzEnzo 17:11; 1 Johane 4:1) Kungani nawe ungenzi okufanayo?
IBhayibheli lichaza ukuthi uNkulunkulu wendawo yonke ufuna abantu abazomkhulekela ngeqiniso. Njengoba kulotshwe kuJohane 4:23, 24, uJesu wachaza: “Noma kunjalo, ihora liyeza futhi kuyilo manje lapho abakhulekeli beqiniso beyokhulekela khona uBaba ngomoya nangeqiniso, ngoba ngempela uBaba ufuna abanjalo ukuba bamkhulekele. UNkulunkulu uwuMoya, futhi labo abamkhulekelayo kumelwe bakhulekele ngomoya nangeqiniso.” ‘Ukukhulekela okuhlanzekile nokungangcolile ngokombono kaNkulunkulu noBaba wethu’ kuphela okwamukelekayo kuye. (Jakobe 1:27) UNkulunkulu uye wabusisa imizamo yezigidi yokufuna indlela ewumngcingo eholela ekuphileni. Ngeke abaphe ukuphila okuphakade labo abanganaki, kodwa uyokupha labo abenza umzamo oqotho wokuthola indlela ewumngcingo ayibekile bese beyilandela.—Malaki 3:18.