Igama LikaNkulunkulu Livusa Impikiswano

NGUMLOBELI WE-PHAPHAMA! ENETHERLANDS

A BAHUMUSHI beBhayibheli elisha lesiDashi bavuse impikiswano phakathi kwezazi zeBhayibheli naphakathi kwabantu abavamile. Iyini imbangela? Yisinqumo sabo sokuhumusha igama likaNkulunkulu ngelithi Heer, noma “iNkosi.”

Ngo-December 1998, ngemva nje kwamasonto ambalwa laba bahumushi bekhiphe isampula yomsebenzi wabo, iqembu labesifazane benhlangano yamaProthestani i-Kerk en Wereld (ISonto Nezwe), basungula umkhankaso wokubhikisha ngeposi. Sasiyini isizathu? Bathi igama elithi “iNkosi” “limelela kakhulu umuntu wesilisa.” Ngokushesha namanye amaqembu—amaKatolika namaProthestani—ayesehlanganyela kulo mkhankaso wokubhikisha. Ngo-February 1999, izazi ezintathu nazo zaveza umbono wazo zithi zisekela ukuguqulelwa kwezinhlamvu ezine zesiHeberu zegama likaNkulunkulu ngokuthi YHWH. Ngokushesha, izazi zeBhayibheli, abahumushi nezazi zemfundiso yenkolo zahlangana e-Amsterdam ukuzodingida lolu daba. Ekupheleni kwengxoxo, bonke ababekhona bacelwa ukuba bavote ukuthi bakhetha ukuba lihunyushwe kanjani.

Ngaphansi kwesihloko esithi “Makuhlonishwe UNkulunkulu, Kungalwiwa Ngegama Lakhe,” iphephandaba i-Nieuwsblad van het Noorden labika ngomphumela: “Elithi NKOSI linamavoti angu-7 kuphela. Kodwa namanye amaningi awavotelwanga kakhulu: iGama (1), Yena (3), Onomusa (6), Ongaphathwa Ngegama (7), Ophilayo (10) nelithi Ongunaphakade (15). Elinqobayo lithi . . . YHWH!” Ngo-March 15, 2001, iKomiti Eyengamele le nguqulo entsha yeBhayibheli yanquma ukusebenzisa elithi HEER (INKOSI) ngosonhlamvukazi ukuze limelele igama laphezulu.

Le mpikiswano eqhubekayo iqokomisa ukuthi naphezu kokungavumelani ngendlela efanele yokuhumusha igama likaNkulunkulu ngesiDashi, izazi ziyavuma ukuthi uNkulunkulu unalo igama. NgesiHeberu leli gama linezinhlamvu ezine zesiHeberu, okuwuthi יהוה, noma YHWH. Ezinye izinguqulo zeBhayibheli zesiDashi, zesikhathi esidlule nezamanje, ziye zamhumusha kanjani u-YHWH?

Indoda engumDashi okuthiwa uNicolaas Goetzee yanyathelisa uhlelo lwencwadi lwenguqulo yeBhayibheli i-Staten ngo-1762. Ekhasini lesihloko lwathi: “Ngenxa yezizathu ezibalulekile nezaziwayo, siye sashiya neGama likaNkulunkulu eliyiSikhumbuzo elithi JEHOVA lingahunyushiwe.” Ezinye izazi zesiDashi ezaziwayo—njengoProfesa Nicolaas Beets noPetrus Augustus de Genestet—nazo ziye zasebenzisa igama elithi Jehova.

Ngokuthakazelisayo, i-New World Translation of the Holy Scripturesa isebenzisa igama elithi Jehova ngokungaguquki. Isithasiselo se-New World Translation yesiDashi sithi “iyaqhubeka isebenzisa elithi ‘Jehova’ ngoba sekungamakhulu eminyaka abantu bejwayelene nalo. Ngaphezu kwalokho, ilondoloza . . . izinhlamvu ezine zegama laphezulu, elithi YHWH.” Ngakho, i-New World Translation iye yasiza izigidi ukuba zazi iqiniso ngegama likaNkulunkulu.

[Umbhalo waphansi]