Uyamenywa EMhlanganweni Wesigodi ‘Wabamemezeli BoMbuso Abashisekayo’

ENINGIZIMU AFRIKA, kuhlelwa imihlangano yesigodi engu-42. Owokuqala uyoba ngo-November 22-24, kanti owokugcina uyoba sekupheleni kuka-December. Omunye wale mihlangano yezinsuku ezintathu—evame ukuqhutshwa ngoLwesihlanu kuze kube ngeSonto—cishe uyoba sedolobheni eliseduze nakini.

Ezindaweni eziningi, isimiso siyoqala ngomculo ngo-9:00 ekuseni. Ngosuku lokuqala, inkulumo yokuqala iyolandelwa yinkulumo equkethe izingxoxo nabamemezeli boMbuso. Khona-ke, ngemva kwenkulumo ethi “Zithokozise NgoJehova” nethi “Ziboniseni Ninokubonga,” isimiso sasekuseni siyophetha ngenkulumo eyisihluthulelo ethi “Abamemezeli BoMbuso Abanentshiseko Evuthayo.”

Isimiso sangoLwesihlanu ntambama siyohlanganisa nochungechunge olunezingxenye ezintathu, oluthi “Isiprofetho SikaMika Sisiqinisela Ukuhamba Ngegama LikaJehova,” kanye nenkulumo ethi “Londoloza Ubumsulwa Ngokulonda Inhliziyo Yakho” nethi “Qaphela Inkohliso.” Ekugcineni, siyonikezwa usizo oluhle ngokuphathelene nenkonzo yobuKristu enkulumweni yokugcina yosuku ethi “Khulekela Okuwukuphela KukaNkulunkulu Weqiniso.”

Isimiso sangoMgqibelo ekuseni siyohlanganisa uchungechunge olunezingxenye ezintathu oluthi “Abamemezeli BoMbuso Abakhazimulisa Inkonzo Yabo.” Luyolandelwa yinkulumo ekhuthazayo ethi “Isizathu Sokuba ‘Sithandaze Singaphezi’” nethi “Ukuxoxa Ngezinto Ezingokomoya Kuyakha.” Isimiso sasekuseni siyophetha ngenkulumo yokuzinikezela nobhapathizo, okuyothi ngemva kwayo abafanelekayo bathole ithuba lokubhapathizwa.

Isimiso sangoMgqibelo ntambama siyoba nochungechunge lokugcina lomhlangano olunezingxenye ezintathu oluthi “Ukuqina Kokholo Lwethu Kuvivinywa Ngezindlela Eziningi.” Lezi zinkulumo ziyosiza amaKristu ukuba abhekane nenselele yokungathathi hlangothi. Isimiso sangoMgqibelo siyophetha ngenkulumo ethinta inhliziyo evelele kulo mhlangano ethi “Sondela KuJehova.”

Isimiso sangeSonto ekuseni siyogxila kakhulu entsheni, siyovula ngenkulumo ethi “Ingabe Ithemba Lakho LikuJehova?” nethi “Basha—Yakhani Ikusasa Nenhlangano KaJehova.” Ingxenye yokugcina iyoba nezingxoxo eziyothatha imizuzu engu-20. Yona iyolandelwa yidrama yasendulo ekhuluma ngoJeremiya, owathi lapho emiswa njengomprofethi wakhala wathi “Ngingumntwana.” (Jeremiya 1:6) Ngemva kwayo kuyoba nenkulumo eqokomisa umyalezo oqukethwe yidrama. Isimiso santambama siyoba nenkulumo yeningi ethi “Isimo Saleli Zwe Siyashintsha.”

Ngokuqinisekile uyozuza ngokomoya ngokuba khona ngazo zontathu izinsuku. Ukuze uthole indawo yomhlangano eseduze nawe, thintana neHholo LoMbuso LoFakazi BakaJehova lasendaweni yakini noma ubhalele abanyathelisi balo magazini.