Umbono WeBhayibheli

Ingabe Ubunye BobuKristu Budinga Ukuba Sifane?

NAMUHLA kubonakala inkolo ihlukene phakathi. Ngisho nabantu besonto elilodwa bangase babe nezinkolelo ezihlukahlukene ezingqubuzanayo ezindabeni zemfundiso nokuziphatha. Umlobi othile wakubeka ngale ndlela: “Kunzima ngisho nokuthola abantu ababili abanombono ofana nse ngoNkulunkulu. Kubonakala sengathi kulezi zinsuku, wonke umuntu unombono wakhe wenkolo.”

Ngokuphambene nalokhu, umphostoli uPawulu wayala amaKristu ekhulu lokuqala eKorinte ukuba ‘akhulume ngokuvumelana’ futhi ‘ahlangane ngokufanele emqondweni ofanayo nasendleleni efanayo yokucabanga.’ (1 Korinte 1:10) Abanye namuhla bayasigxeka isiyalo sikaPawulu. Bathi: ‘Abantu abafani, futhi akulungile ukuphikelela ngokuthi wonke amaKristu kumelwe acabange noma enze ngendlela efanayo.’ Kodwa ingabe ngempela uPawulu wayetusa ukufana njengamarobhothi? Ingabe iBhayibheli liyayinikeza inkululeko yomuntu siqu?

Ubunye, Hhayi Ukufana

Kwenye yezincwadi zakhe, uPawulu wanxusa amaKristu ukuba akhonze uNkulunkulu “ngamandla [awo] okucabanga.” (Roma 12:1) Khona-ke, ngokuqinisekile wayengazami ukwenza amalungu ebandla laseKorinte abe amarobhothi angacabangi. Kodwa kungani awatshela ukuba ‘ahlangane ngokufanele emqondweni ofanayo nasendleleni efanayo yokucabanga’? UPawulu wanikeza lesi seluleko ngoba ibandla laseKorinte lalinenkinga engathí sina. Kwakunamaqembu, ngakho abanye babebheka u-Apholo njengomholi wabo kuyilapho abanye babethanda uPawulu noma uPetru noma babenamathele kuKristu kuphela. Ukuhlukana okunjalo kwakungeyona into encane, ngoba kwakusongela ukuthula kwebandla.

UPawulu wayefuna ukuba abaseKorinte ‘bagcine ubunye bomoya esibophweni esihlanganisayo sokuthula,’ njengoba nje kamuva eluleka namaKristu ase-Efesu. (Efesu 4:3) Wayekhuthaza laba bazalwane ukuba balandele uJesu Kristu ngobunye, bangabi amaqembu ahlukene noma amahlelo axabanayo. Kanjalo, babeyojabulela injongo enobunye ngokuthula. (Johane 17:22) Ngakho-ke, iseluleko uPawulu asinika abaseKorinte salungisa ukucabanga kwabo sakhuthaza ukuba babe nobunye, hhayi ukuba bafane.—2 Korinte 13:9, 11.

Ubunye bubalulekile nasezindabeni zemfundiso. Abalandela ezinyathelweni zikaJesu bayaqaphela ukuthi ngempela ‘kunokholo olulodwa,’ njengoba nje ‘kunoNkulunkulu oyedwa onguYise.’ (Efesu 4:1-6) Ngakho, amaKristu aqinisekisa ukuthi lokho akukholelwayo kuvumelana neqiniso uNkulunkulu alembule eZwini lakhe ngaye ngokwakhe nangezinjongo zakhe. Ayavumelana enkolelweni yawo yokuthi uNkulunkulu ungubani nokuthi yini ayifunayo. Futhi aphila ngokuvumelana nezindinganiso zokuziphatha ezicacile eziseZwini likaNkulunkulu. (1 Korinte 6:9-11) Ngale ndlela amaKristu ahlala enobunye, ezimfundisweni nasekuziphatheni.

Ukusingatha Ukungaboni Ngaso Linye

Nokho, lokhu akusho ukuthi umKristu ngamunye utshelwa ngokuthe ngqo ukuthi kumelwe acabange kanjani futhi enzeni kuzo zonke izimo zokuphila. Izindaba eziningi zifuna ukuba umuntu azenzele isinqumo. Cabangela isibonelo. AmaKristu amaningi ekhulu lokuqala eKorinte ayethandabuza ukudla inyama okungenzeka yayivela ethempelini lezithombe. Amanye ayekholelwa ngokuqinile ekutheni ukudla leyo nyama kwakufana nesenzo sokukhulekela kwamanga, kanti amanye ayenomuzwa wokuthi kwakungenandaba ukuthi inyama ivelaphi. Lapho esingatha le ndaba ebucayi, uPawulu akazange ashaye umthetho wokuthi yini okwakufanele amaKristu ayenze. Kunalokho, waqaphela ukuthi abantu bangase bangaboni ngaso linye kule ndaba.a—1 Korinte 8:4-13.

Namuhla, amaKristu angase enze izinqumo ezihlukile kwezamanye amaKristu ezindabeni zomsebenzi, zempilo, ukuzijabulisa, noma esinye isici esihilela ukuzikhethela komuntu. Abanye kungase kubaphazamise ukuhlukahluka okunjalo. Bangase bazibuze ukuthi ukuba nombono ongafani ngeke yini kuholele ezingxabanweni noma ekwahlukaneni ebandleni. Nokho, umphumela onjalo ungagwemeka. Ngokwesibonelo: Abaqambi bomculo banesibalo esilinganiselwe samanothi abangawasebenzisa, kodwa amathuba okwenza umculo omnandi awanamkhawulo. Ngokufanayo, amaKristu akhetha ngokuvumelana nemingcele yezimiso zikaNkulunkulu. Noma kunjalo, anenkululeko ethile lapho enza izinqumo ezithile zomuntu siqu.

Bungalondolozwa kanjani ubunye bobuKristu kuyilapho kuhlonishwa ilungelo lomuntu ngamunye lokuzikhethela? Isihluthulelo uthando. Ukuthanda uNkulunkulu kusishukumisela ukuba sithobele imiyalo yakhe ngokuzithandela. (1 Johane 5:3) Ukuthanda umakhelwane kusishukumisela ukuba sihloniphe amalungelo abanye okwenza izinqumo eziqondiswa unembeza ezindabeni zabo. (Roma 14:3, 4; Galathiya 5:13) UPawulu wabeka isibonelo esihle kule ndaba lapho ethobela igunya lendikimba ebusayo yekhulu lokuqala endabeni ehilela imfundiso. (Mathewu 24:45-47; IzEnzo 15:1, 2) Ngesikhathi esifanayo, wakhuthaza wonke umuntu ukuba ahloniphe unembeza wamanye amaKristu ezindabeni ezishiyelwe kumuntu siqu.—1 Korinte 10:25-33.

Ngokusobala, akekho umuntu okufanele asolwe ngokwenza isinqumo esiqondiswa unembeza esingangqubuzani nezimiso zeBhayibheli. (Jakobe 4:12) Ngakolunye uhlangothi, amaKristu aqotho ngeke alwele amalungelo awo uma kulimaza onembeza babanye noma kusongela ubunye bebandla. Futhi akufanele athi anenkululeko yokwenza okuthile iZwi likaNkulunkulu elikunqabela ngokuqondile. (Roma 15:1; 2 Petru 2:1, 19) Ukuthanda uNkulunkulu kufanele kusishukumisele ukuba sivumelanise onembeza bethu nokucabanga kukaNkulunkulu. Lokhu kuyosigcina sinobunye namanye amakholwa.—Hebheru 5:14.

[Umbhalo waphansi]