Inkinga Abalimi Ababhekene Nayo
URICHARD ulima amasimu ayelinywa ukhokho wakhe eminyakeni engaba yikhulu edlule. Nokho, ngo-2001, lo mlimi waseCanada waba ngowokuqala ezizukulwaneni ezine zomndeni wakubo ukungavuni lutho emasimini. Izilimo zakhe zabhujiswa yisomiso. Ukudayisa kwesivuno sakhe ngemali encane eminyakeni edlule nokwenyuka kwezindleko zokulima kuye kwanezela osizini lwakhe. URichard wabalisa: “Isimo siya ngokuya siba sibi, futhi akubonakali kunekhambi.”
EsiFundeni Esilima Ummbila sase-United States, uLarry wayenepulazi okwase kuyiminyaka engu-115 lilinywa umndeni wakubo. Uthi: “Nganginomuzwa wokuthi nganginesibopho sokugcina leli pulazi lisebenza, lingenisa inzuzo . . . , kodwa ngahluleka ukukwenza.” Ipulazi likaLarry nomkakhe ladliwa.
ULarry noRichard ababodwa. EBrithani ukugqashuka kwesifo samatele ezilwaneni ezifuyiwe kwaba yizindleko ezinkulu kubalimi kwabalimaza nangokomzwelo. Umbiko othile wezindaba wathi: “Nsuku zonke ukuphila epulazini laseBrithani—ngisho nakulelo lesi sifo esingakafiki kulo—kugcwele ukukhathazeka, umzwangedwa, ngapha ube ushikashikeka uphebeza abagqobha izikweletu.” Kwamanye amazwe asathuthuka, impi, isomiso, ukwanda ngokushesha kwenani labantu, nendathane yezinye izinkinga kuye kwayishafisa imizamo yabalimi. Ohulumeni bayaphoqeleka ukuba bathenge ukudla kwamanye amazwe—ukudla imindeni eminingi engeke yakwazi ukukuthenga.
Ngakho, izinkinga zabalimi zithinta wonke umhlaba. Yize kunjalo, bambalwa abantu abahlala emadolobheni abake bacabange ngezinselele zezolimo. Eminyakeni engaba ngu-50 edlule, uMongameli wase-United States uDwight D. Eisenhower washo kufanele: “Ukulima kubonakala kulula kakhulu uma igeja lakho kuyipeni, futhi ukude le namasimu ommbila.” Abalimi namuhla nabo banomuzwa wokuthi ingxenye enkulu yomhlaba ayijwayelene nezolimo nendima ebalulekile efezwa abalimi. “Asinandaba nokuthi ukudla kwethu kuvelaphi,” kubalisa omunye umlimi waseCanada. “Ngaphambi kokuba kufakwe epulasitikini bese kubekwa emashalofini asesitolo, kusuke sekudlule ezandleni zabantu abaningi.”
Njengoba sonke sixhomeke embonini yezolimo, asikwazi ukuzishalazela izinkinga zabalimi. Izazi zezenhlalakahle oDon A. Dillman noDaryl J. Hobbs ziyaxwayisa: “Emphakathini wethu oxhomeke kakhulu komunye nomunye, izinkinga zasemaphandleni ziyashesha ukuba izinkinga zabantu basemadolobheni, kwenzeka okufanayo nangezabo. Ayikho ingxenye yomphakathi wethu kungaba eyasemaphandleni noma emadolobheni engachuma isikhathi eside enye ingxenye ibe idonsa kanzima.” Ngaphezu kwalokho, emphakathini wanamuhla wembulunga yonke, ukuwa komnotho wezwe elilodwa kungakuthinta kakhulu ukudayiswa kwezilimo nezindleko zokuzikhiqiza kwamanye amazwe.
Akumangalisi ukuthi kungani-ke iNew York Center for Agricultural Medicine and Health yabika: “Ukulima kungomunye wemisebenzi eyishumi ecindezela kakhulu e-United States.” Yiziphi ezinye zezimbangela zale nkinga yabalimi? Abalimi bangabhekana kanjani nazo? Sikhona yini isizathu sokukholelwa ukuthi le nkinga ingaxazululeka?
[Amazwi acashunwe esihlokweni ekhasini 4]
“Ukulima kubonakala kulula kakhulu uma igeja lakho kuyipeni, futhi ukude le namasimu ommbila”