Umbono WeBhayibheli

Ungamelana Kanjani Nezifiso Ezimbi?

“Lapho ngifisa ukwenza okuhle, kukhona okubi kimi.”—ROMA 7:21.

MHLAWUMBE ngaphezu kwanoma yimuphi omunye umphostoli, uPawulu wazikhandla ukuze akhuthaze izimiso eziphakeme zobuKristu. (1 Korinte 15:9, 10) Yize kunjalo, wavuma ngobuqotho njengoba kuboniswe ngenhla. Kwakunempi eqhubekayo phakathi kwengqondo yakhe nezifiso zakhe ezimbi. Ingabe wake wazizwa ngendlela umphostoli uPawulu azizwa ngayo? Ngempela, njengezidalwa ezingaphelele, ukhona yini kithi ongathi akakaze alwe impi yangaphakathi?

Kwabaningi, ukulwa nezifiso ezimbi kunzima kakhulu. Abanye balwa nokunxanela ukwanelisa izifiso zobulili ezingafanele. Abanye bayizigqila zokugembula, ugwayi, izidakamizwa ezingafanele, noma utshwala. Lapho sihlushwa yizifiso eziyingozi nezingcolile, singakwazi kanjani ukumelana nazo? Yiluphi usizo olutholakalayo? Ingabe le mpi yokulwa nezifiso ezimbi iyoke iphele?

Uthando—Isihluthulelo Sokumelana Nezifiso Ezimbi

UJesu waveza imiyalo emibili emikhulu kunayo yonke eMthethweni KaMose. Owokuqala kwakuyilo: “Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho.” (Mathewu 22:37) Uma uNkulunkulu simthanda ngendlela uJesu athi kumelwe simthande ngayo, akufanele yini isifiso sethu esikhulu kunazo zonke kube ukuthokozisa Yena? Uma kunjalo, leso sifiso esilungile singasisiza ekulweni ngisho nanoma yiziphi izifiso kungakhathaliseki ukuthi zinamandla kangakanani! Lokhu akuwona nje umbono ocatshangelwayo. Izigidi zamaKristu ziyaphumelela ekulweni nezifiso ezimbi nsuku zonke. Wena-ke ungabuhlakulela kanjani ubuhlobo obuqinile noNkulunkulu? Ngokuzindla ngokwazisa ngobuhle bakhe njengoba sibubona endalweni, eBhayibhelini, nasekusebenzelaneni kwakhe nathi njengabantu ngabanye.—IHubo 116:12, 14; 119:7, 9; Roma 1:20.

Umyalo wesibili omkhulu uJesu awuphawula kwakuyilo: “Kumelwe uthande umakhelwane wakho njengoba uzithanda wena.” (Mathewu 22:39) Umphostoli uPawulu wathi uthando “aluziphathi ngokuhlazisayo” futhi “aluzifuneli izinzuzo zalo siqu.” Ngakho uthando olunjalo olungenabugovu luyasisiza ukuba sigweme noma yikuphi ukuziphatha okungabaphatha kabi abanye. (1 Korinte 13:4-8) Lungahlakulelwa kanjani? Ngokuzibeka esimweni sabanye futhi ngobuqotho sikhathalele imizwa yabo nenhlalakahle yabo yaphakade.—Filipi 2:4.

Yiluphi Usizo Olutholakalayo?

Ngenxa yokuthi uNkulunkulu uyaqonda ukuthi kunzima kangakanani ngathi ukuba senze okulungile, uye wanikeza usizo ngezindlela eziningana. NgeZwi lakhe elilotshiwe, iBhayibheli, usifundisa ukuba sizonde okubi futhi sihlakulele inhlonipho efanele ngaye. (IHubo 86:11; 97:10) IBhayibheli liqukethe ukulandisa okwenzeka ngokoqobo ekuphileni okubonisa inhlekelele eba khona lapho umuntu ezinikela ezifisweni ezimbi. Ngaphezu kwalokho, uJesu wathi uma sicela, uNkulunkulu uyosinikeza umoya waKhe ongcwele, amandla amakhulu endaweni yonke, uma siwucela. (Luka 11:13) Ungaqinisa ukuzimisela kwethu ukwenza okulungile. Elinye ilungiselelo esinalo ukusekelana nokukhuthazana esingakuthola kwamanye amaKristu nawo alwa nezifiso ezimbi. (Hebheru 10:24, 25) Njengoba lezi zici ezinhle zithatha indawo yezifiso ezimbi, ziyasisiza ekulweleni kwethu ukwenza okulungile. (Filipi 4:8) Ingabe le ndlela iyasebenza ngempela?

Cabanga ngoFidel, owayekade aziwa njengesidakwa endaweni yakubo. Wayebhema, egembula futhi elwa nabanye lapho esephuzile. Ukufunda kwakhe iBhayibheli nokuba nobudlelwane noFakazi BakaJehova kwamsiza ukuba ayinqobe leyo mikhuba. Manje uphila ukuphila okungcono okujabulisayo nomkakhe nezingane zabo ezimbili.

Omunye angase abuze, ‘Kodwa kuthiwani uma kwenzeka ngilingeka futhi?’ Umphostoli uJohane wakhuluma ngaleso simo esingase sivele. Wabhala: “Bantwanyana bami, nginilobela lezi zinto ukuze ningasenzi isono. Kodwa nokho, uma-ke umuntu enza isono, sinomsizi kuBaba, uJesu Kristu, olungileyo. Ungumhlatshelo oyisihlawulelo wezono zethu, nokho kungezona ezethu kuphela kodwa nezalo lonke izwe.” (1 Johane 2:1, 2) Yebo, umhlatshelo kaJesu uyawamboza amaphutha omuntu ophendukayo abese ekulwela ngobuqotho ukwenza izinguquko ukuze athokozise uNkulunkulu. Ngenxa yalelo lungiselelo, sisekhona yini isizathu esizwakalayo esingenza umuntu ayeke ukulwela ukwenza okulungile?

Izifiso Ezimbi Zizonqotshwa

Uma sihlakulela ukuthanda uNkulunkulu nomakhelwane futhi sisebenzisa usizo lukaNkulunkulu, ngisho kwamanje singaphumelela ekulweni kwethu nezifiso ezimbi. Ngaphezu kwalokho, iZwi likaNkulunkulu lisiqinisekisa ukuthi le mpi ngeke iqhubeke phakade. Esikhathini esizayo esiseduze, labo abasebenzisa amalungiselelo kaNkulunkulu angokomoya bazophulukiswa ngokuphelele, ngokwenyama nangokomoya. (IsAmbulo 21:3-5; 22:1, 2) Bayothulwa umthwalo wesono nokufa esikubangelayo. (Roma 6:23) Ngakolunye uhlangothi, labo abazimisele ukwanelisa izifiso ezingcolile nezilimazayo ngeke bavunyelwe ukuba bahlanganyele kulezo zibusiso.—IsAmbulo 22:15.

Yeka ukuthi kududuza kangakanani ukwazi ukuthi ngeke silwe nezifiso ezimbi njalo. Zizosuswa ngokuphelele futhi phakade. Yeka impumuzo okuzoyiletha!