Umbono WeBhayibheli
Sasiyini Isono Sokuqala?
LO MBUZO ubalulekile kithina. Ngani? Ngoba ukungamlaleli uNkulunkulu kuka-Adamu no-Eva kwathinta zonke izizukulwane ezazizolandela kwehle njalo kuze kufike osukwini lwethu. IBhayibheli lithi: “Ngomuntu oyedwa isono sangena ezweni nokufa kwangena ngesono, futhi kanjalo ukufa kwasakazekela kubantu bonke ngenxa yokuthi bonke bonile.” (Roma 5:12) Kodwa kwenzeka kanjani ukuba isenzo esiwubala nje sokudla isithelo sesihlahla sibe nemiphumela edabukisa kangaka?
Lapho uNkulunkulu edala u-Adamu no-Eva, wababeka ensimini enhle egcwele uhlaza oludliwayo nezihlahla zezithelo. Isihlahla esisodwa kuphela okwakungafanele badle kuso—‘umuthi wokwazi okuhle nokubi.’ Njengoba babenenkululeko yokuzikhethela, u-Adamu no-Eva babengakhetha ukulalela uNkulunkulu noma ukungamlaleli. Nokho, u-Adamu waxwayiswa ngokuthi ‘ngosuku adla ngalo [emthini wolwazi] uyokufa nokufa.’—Genesise 1:29; 2:17.
Umngcele Onengqondo
Lo mngcele owodwa wawungenzima; u-Adamu no-Eva babengadla kuzo zonke ezinye izihlahla ezisensimini. (Genesise 2:16) Ngaphezu kwalokho, ukwenqatshelwa ukudla kulesi sihlahla kwakungasho ukuthi kukhona okungalungile ngalo mbhangqwana, futhi kwakungasithunazi isithunzi sawo. Ukube uNkulunkulu wayenqabele izinto ezinyanyekayo njengokulala nezilwane noma ukubulala, abanye babengase bathi abantu abaphelele babenokuthambekela okuthile okubi okwakufanele kuvinjelwe. Nokho, ukudla kwakuyinto eyimvelo futhi kufaneleka.
Ingabe isithelo okwakungafanele basidle kwakuwukuya ocansini, njengoba abanye besho kanjalo? ImiBhalo ayiwusekeli lo mbono. Okokuqala, lapho uNkulunkulu ebeka lo mngcele, u-Adamu wayeyedwa futhi wahlala eyedwa isakhashana ngemva kwalokho. (Genesise 2:23) Okwesibili, uNkulunkulu watshela u-Adamu no-Eva ukuba ‘bazale bande bagcwalise umhlaba.’ (Genesise 1:28) Ngokuqinisekile, wayengeke abayale ukuba baphule umthetho wakhe abese ebagwebela ukufa ngokwenza kanjalo! (1 Johane 4:8) Okwesithathu, u-Eva wasidla kuqala isithelo kwathi ngemva kwalokho wabe esenika umyeni wakhe u-Adamu. (Genesise 3:6) Kuyacaca ukuthi lesi sithelo sasingekhona ukuya ocansini.
Umzamo Wokuthola Inkululeko Yokuziphatha
Umuthi wolwazi wawuyisihlahla sangempela. Nokho, sasimelela ilungelo likaNkulunkulu njengoMbusi lokunqumela izidalwa zakhe ezingabantu ukuthi ikuphi okuhle nokubi. Ngakho-ke ukudla emthini kwakungesona nje isenzo sokweba—ukuthatha okuthile kukaNkulunkulu—kodwa futhi kwakuwumzamo wokugabadela wokuthola inkululeko yokuziphatha, noma ukuzinqumela okuhle nokubi. Qaphela ukuthi ngemva kokukhohlisa u-Eva ngokuthi uma yena nomyeni wakhe bedla isithelo, ‘ngokuqinisekile babengeke bafe,’ uSathane wagomela: “[Ngoba] uNkulunkulu uyazi ukuthi ngalo kanye usuku enidla ngalo kuwo nakanjani amehlo enu ayovuleka futhi nakanjani niyoba njengoNkulunkulu, nazi okuhle nokubi.”—Genesise 3:4, 5.
Nokho, lapho bedla isithelo, u-Adamu no-Eva abakutholanga ukuqonda okufana nokukaNkulunkulu mayelana nokuhle nokubi. Empeleni, u-Eva wathi kuNkulunkulu: “Inyoka—ingikhohlisile.” (Genesise 3:13) Noma kunjalo, wayewazi umyalo kaNkulunkulu, waze wawutshela ngisho nenyoka, uSathane ayekhuluma ngayo. (IsAmbulo 12:9) Ngakho, isenzo sakhe sasiwukungalaleli ngenhloso. (Genesise 3:1-3) Nokho, u-Adamu akakhohliswanga. (1 Thimothewu 2:14) Esikhundleni sokulalela uMdali wakhe ngokwethembeka, walalela umkakhe futhi walandela inkambo yakhe yokuzibusa.—Genesise 3:6, 17.
Ngokuzibusa, u-Adamu no-Eva balimaza ubuhlobo babo noJehova ngendlela engenakulungiswa futhi bafaka isono emizimbeni yabo, kwaze kwafinyelela ngisho nasezakhini zofuzo. Kuyiqiniso, baphila amakhulu eminyaka, kodwa baqala ukufa kancane kancane kusukela “ngosuku” abona ngalo, njengoba kungaba njalo egatsheni elinqunywe esihlahleni. (Genesise 5:5) Ngaphezu kwalokho, ngokokuqala ngqa ekuphileni kwabo, baba nomuzwa wokuphelelwa ukuthula kwangaphakathi. Bazizwa beze futhi bazama ukucashela uNkulunkulu. (Genesise 3:7, 8) Babenomuzwa wecala, bengalondekile futhi benamahloni. Isono sabo sababangela isiyaluyalu ngaphakathi, belahlwa onembeza babo ngobubi ababenzile.
Ukuze afeze amazwi akhe futhi agcine izindinganiso zakhe ezingcwele, uNkulunkulu wabagweba kufanele u-Adamu no-Eva ukuba bafe wabaxosha nasensimini yase-Edene. (Genesise 3:19, 23, 24) Ngakho-ke, iPharadesi, injabulo, nokuphila okuphakade kwalahleka, ngesikhathi esifanayo kwaba nomphumela wesono, ukuhlupheka nokufa. Yeka isehlakalo esidabukisayo ngesintu! Nokho, ngokushesha ngemva kokugweba lo mbhangqwana, uNkulunkulu wathembisa ukuqeda yonke inhlupheko eyabangelwa ukona kwawo kodwa ngesikhathi esifanayo egcina izindinganiso zakhe zokulunga.
UJehova wahlosa ukuba inzalo ka-Adamu no-Eva ikhululwe ekuxhakathisweni yisono. Wakufeza lokhu ngoJesu Kristu. (Genesise 3:15; Mathewu 20:28; Galathiya 3:16) NgoJesu, uNkulunkulu uyoqeda isono nayo yonke imiphumela yaso futhi uyokwenza umhlaba ube yipharadesi lembulunga yonke, njengoba ayehlosile ekuqaleni.—Luka 23:43; Johane 3:16.
WAKE WAZIBUZA?
◼ Sazi kanjani ukuthi isithelo esenqatshelwe kwakungekhona ukuya ocansini?—Genesise1:28.
◼ Kwakusho ukuthini ukudla isithelo esinqatshelwe?—Genesise 3:4, 5.
◼ Yiliphi ilungiselelo uNkulunkulu alenzile ukuze aqede imiphumela yesono?—Mathewu 20:28.
[Amazwi acashunwe esihlokweni ekhasini 29]
Isithelo esenqatshelwe sasingekhona ukuya ocansini
[Isithombe ekhasini 28, 29]
U-Eva wayefuna ukufana noNkulunkulu, azinqumele ukuthi ikuphi okuhle nokubi