Ukuzijabulisa Kwezixuku Ekhulwini Lokuqala
Isidumo esasuka phakathi kwabalandeli bezemidlalo ababangisanayo ababevela emadolobheni angomakhelwane eningizimu ye-Italy sabangela ukulimala nokufa kwezixuku zabantu, kuhlanganise nezingane ezithile. Ngenxa yale nhlekelele, iziphathimandla zayala ukuba kuvalwe inkundla yemidlalo iminyaka eyishumi.
LE MIBIKO yezidumo ivamile emaphephandabeni anamuhla. Kodwa lesi senzekalo senzeka eminyakeni engu-2 000 edlule phakathi nokubusa koMbusi uNero. Isazi-mlando saseRoma uTacitus sakhuluma ngalesi sidumo, esenzeka enkundleni yemidlalo yasePompeii phakathi nomncintiswano wokulwa lapho abasePompeii badumelana khona nabalandeli bezemidlalo basedolobheni laseNuceria elingumakhelwane.
Ngekhulu lokuqala, abantu abaningi babebanjwe ezokuzijabulisa. Amadolobha amakhulu oMbuso WaseRoma ayenezinkundla zaseshashalazini, izinkundla zemidlalo namasekisi, kanti amanye ayenakho kokuthathu. I-Atlas of the Roman World ithi: “Imidlalo yayihilela izingozi nenjabulo yobuhlanya . . . [kanye] nomkhuba wokuchitha igazi.” Abagibeli bezinqola zempi babegqoka izingubo ezinemibala egqamile, futhi iqembu ngalinye lalimelela iqembu elithile emphakathini, kungaba elezombangazwe noma elezenhlalo. Abalandeli babevele bahlanye lapho kuqhamuka iqembu labo abalithandayo. Laba bagibeli baba yizilomo kangangokuthi abantu babehlobisa izindlu zabo ngezithombe zabo, futhi babekhokhelwa imali eningi kakhulu.
Emadolobheni kwakuhlelwa nezimpi ezichitha igazi phakathi kwezilwi, nezimpi zabantu ababelwa nezilwane, ngezinye izikhathi bengahlomile. Ngokwesazi-mlando uWill Durant, “izigelekeqe ezigwetshiwe, ngezinye izikhathi ezazigqokiswa izikhumba ukuze zifane nezilwane, zazilahlwa ezilwaneni ezazincishwa ukudla kulungiselelwa le nkathi; ukufa ezimweni ezinjena kwakuhambisana nesihluku esikhulu.”
Labo ababezijabulisa ngale ndlela yokungamhloniphi uNkulunkulu empeleni ‘babesebumnyameni ngengqondo bengasenawo nhlobo umuzwa wokuziphatha okuhle.’ (Efesu 4:17-19) Ngekhulu lesibili, uTertullian wabhala: “Phakathi [kwamaKristu] akukho nokuncane okukhulunywayo, okubonakalayo, noma okuzwakalayo okufana nobuhlanya basesekisini, ukungabi nasizotha kwaseshashalazini nezenzo zonya zasezinkundleni zemidlalo.” Namuhla, amaKristu eqiniso nawo ayaqaphela ukugwema ukuchayeka ekuzijabuliseni okunobudlova, kungakhathaliseki ukuthi kuvela kumuphi umthombo—izincwadi, ithelevishini, noma imidlalo ye-computer—ekhumbula ukuthi uJehova uyamzonda “umuntu othanda ubudlova.”—IHubo 11:5.
[Isithombe ekhasini 30]
Umfanekiso wamatshe womgibeli wenqola yempi oyiqhawe
[Isithombe ekhasini 30]
Umfanekiso womuntu olwa nebhubesi lensikazi
[Isithombe ekhasini 30]
Inkundla yamaRoma yemidlalo yaseshashalazini ngekhulu lokuqala
[Umthombo]
Ciudad de Mérida
[Umthombo Wesithombe ekhasini 30]
Top and bottom left: Museo Nacional de Arte Romano, Mérida