Umbono WeBhayibheli

Ingabe Ukuthobeka Kubonisa Ubuthaka Noma Amandla?

IZWE livame ukuveza abantu abaqhoshayo nabazikhukhumezayo njengabantu okufanele balingiswe. Abathobekile nabamnene bavame ukubhekwa njengababuthaka, amavaka, noma abantu abathenga ubuso babantu. Kodwa ingabe ukuthobeka kusho ukuba buthaka ngempela? Ingabe ukuqhosha kubonisa amandla ngempela? Lithini iBhayibheli?

Zisuka nje, masisho ukuthi iBhayibheli liyazincoma ezinye izinhlobo zokuqhosha. Ngokwesibonelo, amaKristu kufanele aziqhenye ngokuthi uJehova unguNkulunkulu wawo nokuthi uyawazi. (IHubo 47:4; Jeremiya 9:24; 2 Thesalonika 1:3, 4) Abazali bangaziqhayisa ngezingane zabo lapho zibeka isibonelo esihle sokuziphatha kobuKristu futhi zimelela ukukhulekela kweqiniso ngesibindi. (IzAga 27:11) Kodwa kukhona nokuqhosha okuyingozi.

Ukuhlolisisa Ukuqhosha Nokuthobeka

Enye incazelo yokuqhosha ithi kuwukuzazisa ngokweqile. Lolo hlobo lokuqhosha lwenza umuntu azibone ebalulekile futhi ephakeme kunabanye, mhlawumbe ngenxa yobuhle, uhlanga, isikhundla, amakhono noma ingcebo. (Jakobe 4:13-15) IBhayibheli likhuluma ngabantu “abakhukhumele.” (2 Thimothewu 3:4) Ngamanye amazwi, banombono oweqisayo, nongenasisekelo ngalokho abayikho.

Abathobekile bazama ukuba qotho futhi babonise ukuhluzeka kwengqondo endleleni abazibheka ngayo, beqaphela ukuthi abaphelele futhi abalutho phambi kukaNkulunkulu. (1 Petru 5:6) Ngaphezu kwalokho, bayabazisa—baze babajabulele nokubajabulela—abantu abanezimfanelo ezinhle kunezabo. (Filipi 2:3) Ngenxa yalokho, ababi nomhawu obabayo noma babuswe umona. (Galathiya 5:26) Ngakho, kunengqondo ukuphetha ngokuthi ukuthobeka kwangempela kuthuthukisa ubuhlobo obuhle nabanye futhi kuletha ukulondeka nokuzinza ngokomzwelo.

Cabangela isibonelo sikaJesu. Ngaphambi kokuba eze emhlabeni, wayeyisidalwa somoya esinamandla ezulwini. Kanti nalapho esemhlabeni, wayengumuntu ophelele, ongenasono. (Johane 17:5; 1 Petru 2:21, 22) Wayenekhono, ehlakaniphile, futhi enolwazi olungenakuqhathaniswa. Noma kunjalo, wayengabukisi kodwa wayehlala ethobekile njalo. (Filipi 2:6) Ngesinye isikhathi waze wageza ngisho nezinyawo zabaphostoli bakhe; futhi wayezithanda kakhulu izingane. (Luka 18:15, 16; Johane 13:4, 5) Empeleni, ebeke umntwana eceleni kwakhe, uJesu wathi: “Noma ubani oyozithoba njengalo mntwana nguye omkhulu kunabo bonke embusweni wamazulu.” (Mathewu 18:2-4) Yebo, emehlweni kaJesu—nakaYise—umuntu uba mkhulu ngempela ngenxa yokuthobeka, hhayi ukuqhosha.—Jakobe 4:10.

Ukuthobeka Kuwukubonisa Amandla

Nakuba eyisibonelo sokuthobeka, uJesu wayengathengi buso bamuntu, engelona nevaka elibuthaka. Wayekhuluma iqiniso ngesibindi futhi engabesabi nakancane abantu. (Mathewu 23:1-33; Johane 8:13, 44-47; 19:10, 11) Ngenxa yalokho, ngisho nabanye babaphikisi bakhe babemhlonipha. (Marku 12:13, 17; 15:5) Kodwa uJesu wayengazenzi ingqongqo. Kunalokho, ngokuthobeka, umusa nothando, wayebanxusa ngesisa abantu, okwenza ukuba bamthande ngendlela abantu abaqhoshayo abangasoze bakwazi ukuzenza bathandeke ngayo. (Mathewu 11:28-30; Johane 13:1; 2 Korinte 5:14, 15) Ngisho nanamuhla, izigidi zizithoba kuKristu ngobuqotho ngenxa yokuthi zimthanda kakhulu futhi zimhlonipha ngokujulile.—IsAmbulo 7:9, 10.

IZwi likaNkulunkulu likhuthaza ukuthobeka ngoba abamnene ngenhliziyo basamukela kalula iseluleko futhi kuyajabulisa ukubafundisa. (Luka 10:21; Kolose 3:10, 12) Njengo-Apholo, umfundisi wasendulo ongumKristu owayeyiqaphuqaphu, bayakujabulela ukulungisa umbono wabo lapho beboniswa ukwaziswa okusha okunembile. (IzEnzo 18:24-26) Abesabi nokubuza imibuzo, kanti abaqhoshayo bavame ukukugwema lokho, ngoba besaba ukuziveza njengabantu abangenalwazi.

Phawula isibonelo somthenwa waseTopiya wangekhulu lokuqala, owayexakwe indima ethile emiBhalweni. Umfundi ongumKristu uFiliphu wambuza: “Empeleni, ingabe uyakwazi lokho okufundayo?” Lo mTopiya waphendula: “Ngingakwazi kanjani nje nempela, ngaphandle kokuba othile angiqondise?” Yeka ukuthobeka—ikakhulukazi uma ucabangela ukuthi lo mthenwa cishe wayeyisicukuthwane ezweni lakubo! Ngenxa yokuthobeka kwakhe, wathola ukuqonda okujulile ngemiBhalo.—IzEnzo 8:26-38.

Lo mTopiya uhluke ngokuphelele kubabhali bamaJuda nabaFarisi, ababezibheka njengezazi zenkolo zosuku lwabo. (Mathewu 23:5-7) Esikhundleni sokulalela uJesu nabalandeli bakhe ngokuthobeka, babaklolodela futhi bazama ukubagxeka. Ngenxa yokuqhosha kwabo, bahlala besebumnyameni obungokomoya.—Johane 7:32, 47-49; IzEnzo 5:29-33.

Ingabe Unjengobumba Oluthambile Noma Oluqinile?

IBhayibheli lifanisa uJehova nombumbi, abantu libafanise nobumba. (Isaya 64:8) Ukuthobeka kusiza umuntu ukuba abe njengobumba oluthambile ezandleni zikaNkulunkulu, abe umuntu uNkulunkulu angamlolonga abe isitsha esihle; kanti abaqhoshayo banjengobumba olomile noluqinile okufanele luphahlazwe. Isibonelo esivelele sabaqhoshayo nguFaro ozazisayo waseGibhithe lasendulo owadelela uJehova, kwaphumela ekufeni kwakhe. (Eksodusi 5:2; 9:17; IHubo 136:15) Okwehlela uFaro kusifakazela kahle lesi saga: “Ukuziqhenya kwandulela ukuphahlazeka, nomoya ozidlayo wandulela ukukhubeka.”—IzAga 16:18.

Okushiwo ngenhla akusho ukuthi abantu bakaNkulunkulu ababi nayo inkinga yokuqhosha. Ngokwesibonelo, abaphostoli bakaJesu babevame ukuphikisana ngokuthi ubani omkhulu phakathi kwabo. (Luka 22:24-27) Noma kunjalo, babengabuswa ukuqhosha kodwa bamlalela uJesu futhi ekugcineni bashintsha isimo sabo sengqondo.

USolomoni wabhala: “Umphumela wokuthobeka nokwesaba uJehova yingcebo nodumo nokuphila.” (IzAga 22:4) Yeka ukuthi sinezizathu ezinengqondo kangakanani zokuhlakulela ukuthobeka! Akuyona nje imfanelo enamandla neyenza umuntu athandeke kodwa futhi kusisiza ukuba samukeleke kuNkulunkulu futhi sithole umvuzo wokuphila okuphakade.—2 Samuweli 22:28; Jakobe 4:10.

WAKE WAZIBUZA?

◼ Ingabe zonke izinhlobo zokuqhosha zimbi?—2 Thesalonika 1:3, 4.

◼ Ukuthobeka kumsiza kanjani umuntu endabeni yokufunda?—IzEnzo 8:26-38.

◼ Ingabe kuyadingeka ukuba izinceku zikaNkulunkulu zihlakulele ukuthobeka?—Luka 22:24-27.

◼ Iliphi ikusasa eligcinelwe abathobekile?—IzAga 22:4.

[Isithombe ekhasini 20, 21]

Izingane zazikhangwa uJesu ngoba wayeyindoda ethobekile