“Ziboniseni Ningababongayo”

◼ Ngokuphindaphindiwe, iBhayibheli likhuthaza abakhulekeli bakaNkulunkulu ukuba babonge. IHubo 92:1, lithi: “Kuhle ukumbonga uJehova.” Nomphostoli uPawulu wayala: “Ziboniseni ningababongayo.”—Kolose 3:15.

Kunesizathu esihle sokubonga. UProfesa Robert Emmons, wase-University of California eDavis, uthi: “Imiphumela yocwaningo endabeni yokubonga isiqala ukubonisa ukuthi imizwa yokubonga inethonya elihle ekusizeni abantu ukuba babhekane nezinkinga zansuku zonke, ikakhulukazi ukucindezeleka, nokuba bazethembe.”

Umagazini i-Time uveza okunye: “Abantu abazichaze njengabantu ababongayo . . . bavame ukuba nobungqabavu nesimo esihle sokuba nethemba, abacindezeleki kakhulu njengabantu ngokuvamile.”

Kodwa, ngokudabukisayo iBhayibheli labikezela ukuthi “ezinsukwini zokugcina,” abantu abaningi babeyozibonakalisa ‘bengabazithandayo nabangabongiyo.’ (2 Thimothewu 3:1-5) AmaKristu eqiniso angakugwema kanjani ukuthonywa yilo moya? UMlobi weBhayibheli uthi: “Mina, Jehova, nginguNkulunkulu wakho, Lowo okufundisayo ukuze uzuze, Lowo okubangela ukuba unyathele endleleni okufanele uhambe ngayo.” (Isaya 48:17) Ngokulalela imithetho kaNkulunkulu, sivikeleka osizini olwehlela labo abaphishekela iminako yobugovu. Ngaphezu kwalokho, siyaqiniseka ukuthi uJehova uyayibona imizamo yethu futhi uyosivuza ngokufanele. (Hebheru 6:10) Izinzuzo ezinjalo zisishukumisela ukuba ‘simbonge uJehova.’—IHubo 107:8.