Okuphawulwa Abafundi Balo Magazini
Ukusiza Intsha Ukuba Ibhekane Nenselele (March 2007) Njengosemusha oneminyaka engu-18 ubudala, ngakwazi ukubona indlela angithinta ngayo amaphuzu amaningi aphathelene nomakhalekhukhwini nokusebenzisa i-Internet. Ngangizihlanganisa nabantu engingabazi ezingosini zengevu. Ngokushesha ngawela ogibeni labo bangane ababi ababengibekele lona. Ngokushesha ingokomoya lami laqala ukuba buthaka. Ngaze ngavuma ngisho nokuhlangana ngokoqobo nedlanzana lalaba bantu. Ngeshwa, lokhu kwaholela ekuziphatheni okubi. Ngithandazela ukuba lesi sihloko sisize abanye bagweme ubuhlungu nosizi engiphila nalo. Ukungalali ebusuku nezinkumbulo ezibeleselayo kwenza usuku ngalunye lube nzima, kodwa ngimelana noSathane ngokuqinile.
B. R., United States
Kungani Ngiquleka? (April 2007) Kwakukhuthaza ukwazi ukuthi akumina ngedwa onenkinga yokuquleka. Lesi sihloko sangenza ngaba nomuzwa wokuthi uJehova ukhuluma nami ngokuqondile, engitshela ukuthi, “Ngiyakubona okukwehlelayo, ngakho ngiyakukhuthaza.”
I. R., Madagascar
Okuthile Okuhlala Njalo Kunobuciko (April 2007) Ngiswele amazwi okuchaza indlela engibonga ngayo ngalesi sihloko. Ngaphatha izindawo ezimbili zokuthwebula izithombe iminyaka eyisithupha. Bengiwuthanda umsebenzi wami nethuba owawunginika lona lokuveza ubuciko bami. Kodwa ngaqaphela ukuthi njengoba impumelelo nedumela lami emsebenzini likhula, inkonzo yami kuJehova yayibonakala incipha. Ngangigxile kakhulu ebucikweni bami kangangokuba ngangingenasikhathi sokwenza noma yini enye. Ngangazi ukuthi kufanele ngishintshe okuthile. Ngakho ngawushiya umsebenzi futhi ngahileleka kakhudlwana ekukhulekeleni kwami. Umuzwa wokwaneliseka nenjabulo engangiwuthola ngokudweba imifanekiso emihle awulutho uma uqhathaniswa nenjabulo engiyithola enkonzweni yobuKristu.
A. P., United States
Intsha Iyabuza . . . Ingabe Siyafanelana Nalo Muntu? (May 2007) Muva nje ngizithole ngiba nemizwa yothando ekhulayo ngothile ebengicabanga ukuthi singafanelana naye. Kodwa ngemva kokufunda lesi sihloko, ngathola ukuthi izimfanelo ebengizithanda kuye kwakungezona izimfanelo ezibaluleke ngempela. Lesi sihloko sangisiza ukuba ngiqaphele ukuthi izimfanelo ezingokomoya nendlela umuntu ocabangela ukushada naye abaphatha ngayo abanye yikona okubalulekile. Ngiyambonga uJehova ngezihloko ezinjengalesi, ezisivikelayo futhi zisiqondise thina basha.
E. P., United States
Ake Ngikwethule Kubantu BaseMpumalanga Timor (May 2007) Ngasifunda ngesithakazelo esikhulu lesi sihloko. Ngaqala ukuzwa ngaleli zwe lapho kubikwa ngezibhelu zakhona ezindabeni. Kusukela ngaleso sikhathi bengizibuza ukuthi abantu baseMpumalanga Timor baphila kanjani nokuthi umsebenzi woFakazi BakaJehova wokushumayela wawuthinteka kanjani. Ngamangazwa umoya walaba bantu, abangadikibaliswa yizimo ezimbi kodwa abaqhubeka nokuphila ngokuzimisela. Ngizowukhumbula umoya ongenakunqotshwa wabantu baseMpumalanga Timor nokumomotheka ngothando kukaJacob nomkhaya wakhe.
Y. M., Japan