Umbono WeBhayibheli

Ingabe Akulungile Ukushintsha Inkolo Yakho?

Lapho u-Avtar eqala ukufunda iBhayibheli, umndeni wakubo ongamaSikh wathukuthela. Uthi: “Kwelakithi ukushintsha inkolo yakho kwenza ukuba umphakathi ukukhiphe inyumbazana. Ngisho namagama ethu ahlobene nenkolo. Ukushintsha inkolo kubhekwa njengokulahla lokho oyikho nokungawuhloniphi umndeni wakini.”

U-AVTAR wagcina esenguFakazi KaJehova. Ingabe wenza iphutha ngokwenza kanjalo? Mhlawumbe uyayiqonda indlela umndeni wakubo ozizwa ngayo. Ungase ube nomuzwa wokuthi inkolo yakho ayinakuhlukaniswa nomlando nesiko lomndeni wakini futhi akufanele ishintshwe.

Ukuhlonipha umndeni wakini kubaluleke kakhulu. IBhayibheli lithi: “Lalela uyihlo owakuzala.” (IzAga 23:22) Kodwa kubaluleke kakhulu ukufuna ukwazi iqiniso ngoMdali wethu nezinjongo zakhe. (Isaya 55:6) Ungakwazi yini ukulifuna iqiniso? Uma kunjalo, kubaluleke kangakanani ukulifuna kuwe?

Ukufuna Iqiniso Elingokwenkolo

Izinkolo zomhlaba zifundisa imibono ephikisanayo. Kunengqondo ukuthi ayinakuba yiqiniso yonke. Ngenxa yalokho, njengoba iBhayibheli lisho kufanele ukuba baningi abantu, ‘abanentshiseko ngoNkulunkulu; kodwa hhayi ngokolwazi olunembile.’ (Roma 10:2) Kodwa, njengoba kulotshwe kweyoku-1 Thimothewu 2:4, umphostoli uPawulu uthi intando kaNkulunkulu “iwukuba zonke izinhlobo zabantu . . . zifinyelele olwazini olunembile lweqiniso.” Lungatholakala kanjani lolu lwazi olunembile?

Ake ucabange ngezizathu zokuhlola iBhayibheli. UPawulu owayengumlobi weBhayibheli ophefumulelwe wathi: “Yonke imiBhalo iphefumulelwe uNkulunkulu futhi inenzuzo yokufundisa.” (2 Thimothewu 3:16) Njengoba ufuna iqiniso, hlola ubufakazi bokuthi lokhu okushiwo yiBhayibheli kuyiqiniso yini. Zihlolele ngokwakho ukuhlakanipha kwalo okungenakuqhathaniswa, ukunemba kwalo ngokomlando neziprofetho zalo esezigcwalisekile.

Kunokuba liveze zonke izinkolo njengezindlela ezingafani zokuya kuNkulunkulu, iBhayibheli litshela abafundi balo ukuthi bangakukholelwa konke abakuzwayo kodwa ‘bavivinye izinkulumo eziphefumulelwe ukuze babone ukuthi zivela kuNkulunkulu yini.’ (1 Johane 4:1) Ngokwesibonelo, noma iyiphi imfundiso evela kuNkulunkulu ngempela kufanele ivumelane nezimfanelo zakhe, kuhlanganise nemfanelo yakhe evelele yothando.—1 Johane 4:8.

IBhayibheli liyasiqinisekisa ukuthi uNkulunkulu ufuna ‘simthole ngempela.’ (IzEnzo 17:26, 27) Njengoba uMdali wethu efuna silifune iqiniso, ngeke kube okungafaneleki ukwenza ngokuvumelana nobufakazi esibutholayo, ngisho noma lokho kusho ukushintsha inkolo yethu. Kodwa kuthiwani ngezinkinga ezingase zibangelwe ukwenza kanjalo?

Ukulinganisela Ukuthembeka Kwakho Emndenini

Lapho abantu beshintsha izinkolelo zabo, bangase banqume ukuthi ngeke besahlanganyela ezicini ezithile ezingokwenkolo noma amaholide. Kuyaqondakala ukuthi lokhu kungase kungabaphathi kahle abomndeni. UJesu wakuphawula lokho. Watshela abafundi bakhe ukuthi: “Ngize ukubangela ukuhlukana, umuntu amelane noyise, nendodakazi imelane nonina, nomalokazana amelane noninazala.” (Mathewu 10:35) Ingabe uJesu wayesho ukuthi izimfundiso zeBhayibheli zihloselwe ukubangela izingxabano ezingenakugwemeka? Akunjalo. Wayemane nje ebona lokho okwakungase kwenzeke lapho elinye ilungu lithatha isinyathelo esingokwenkolo esiphambene nesamanye amalungu omndeni.

Ingabe ikhona indlela yokugwema izingxabano emndenini? IBhayibheli lifundisa ukuthi abantwana kumelwe balalele abazali babo nokuthi abesifazane kufanele bazithobe kubayeni babo. (Efesu 5:22; 6:1) Noma kunjalo, leluleka labo abathanda uNkulunkulu ukuba ‘balalele yena njengombusi kunabantu.’ (IzEnzo 5:29) Ngakho-ke ngezinye izikhathi ukwethembeka kuNkulunkulu kungase kwenze ukuba uthathe isinqumo esingathandeki kwamanye amalungu omndeni.

Nakuba iBhayibheli lenza kube nomehluko ocacile phakathi kwezimfundiso eziyiqiniso nezingamanga, uNkulunkulu unikeze umuntu ngamunye inkululeko yokuzikhethela ukuthi uzosabela kanjani. (Duteronomi 30:19, 20) Akekho okufanele aphoqwe ukuba akhulekele ngendlela ayithola ingamukeleki kuye noma enziwe akhethe phakathi kwezinkolelo zakhe nomndeni. Ingabe ukufunda iBhayibheli kuholela ekuhlukaneni komndeni? Akunjalo. Empeleni iBhayibheli likhuthaza amadoda namakhosikazi abasezinkolweni ezingefani ukuba bahlale ndawonye njengomkhaya.—1 Korinte 7:12, 13.

Ukunqoba Ukwesaba

Ungase uyesabe indlela umphakathi ozosabela ngayo lapho usufunda iBhayibheli noFakazi BakaJehova. UMariamma uthi: “Umndeni wami wakhathazeka ngokuthi ngangingeke ngisakwazi ukuthola umyeni ofanele owayezongondla. Ngakho wamelana nokufunda kwami iBhayibheli.” UMariamma wathembela kuJehova uNkulunkulu waqhubeka nokufunda. (IHubo 37:3, 4) Nawe ungenza okufanayo. Kunokuba wesabe imiphumela, cabanga ngezinzuso. Isigijimi seBhayibheli sishintsha ukuphila nobuntu kube ngcono. Abantu bafunda ukubonisa uthando olungenabugovu emikhayeni yabo. Imikhuba emibi enjengokuhlukumeza abanye ngamazwi nangokoqobo, ukusebenzisa kabi utshwala nezidakamizwa kunganqotshwa. (2 Korinte 7:1) IBhayibheli likhuthaza ukuziphatha okuhle njengokwethembeka, ubuqotho nokukhuthala. (IzAga 31:10-31; Efesu 4:24, 28) Kungani ungalitadishi iBhayibheli ukuze ubone izinzuzo zokusebenzisa izimfundiso zalo ekuphileni kwakho?

WAKE WAZIBUZA?

◼ Kungani kufanele uhlole izinkolelo zakho?—IzAga 23:23; 1 Thimothewu 2:3, 4.

◼ Ungazibona kanjani izimfundiso eziyiqiniso?—2 Thimothewu 3:16; 1 Johane 4:1.

◼ Ingabe ukuphikiswa umndeni kufanele kukuvimbele ekufundeni iBhayibheli?—IzEnzo 5:29.

[Amazwi acashunwe esihlokweni ekhasini 29]

Isigijimi seBhayibheli sishintsha ukuphila nobuntu kube ngcono

[Isithombe ekhasini 29]

UMariamma nomyeni wakhe