Ingabe Laklanywa?
Iso Lebhu
● Amabhu amaningi andiza kakhulu ebusuku. Nakuba izilwane eziningi ezihamba ebusuku zibonakala lapho ukukhanya kuhlaba amehlo azo, ibhu linendlela elizifihla ngayo—i-cornea yalo ayikubambi ukukhanya.
Cabanga ngalokhu: Iso lebhu line-cornea engavamile—yakhiwa amaqoqo amaningi amaqhuqhuvana amancane anezinhlangothi ezingu-8. La maqhuqhuvana “mancane kunemisebe yokukhanya ebonakalayo,” kusho uPeng Jiang, oyisekela likaprofesa wobunjiniyela bamakhemikhali e-University of Florida, e-U.S.A. Ukuma kwala maqhuqhuvana nobukhulu bawo kwenza iso lebhu likwazi ukubamba ukukhanya okuvela ezinhlangothini ezihlukahlukene. Ukuphakama kwala maqhuqhuvana kungama-nanometer angu-200 kuya kwangu-300 kuphela. Uma siqhathanisa, ubukhulu bonwele lomuntu bucishe bube ama-nanometer angu-80 000!
Onjiniyela banethemba lokuthi ukuyiqonda kangcono i-cornea yebhu kuyobasiza bathuthukise indlela abaklama ngayo ama-light-emitting diode (ama-LED) kanye nama-liquid crystal display (ama-LCD) avame ukusetshenziswa ezintweni ezisebenza ngogesi. Indlela iso lebhu eliklanywe ngayo ingase isetshenziswe nakugesi okhiqizwa ngemisebe yelanga. Izibuko ze-silicon ezidonsa imisebe yelanga zibuyisela emuva ukukhanya okungaba amaphesenti angu-35—okuwukulahleka kwamandla abengase asetshenziselwe okuthile. Kodwa, ngokulingisa amaqhuqhuvana eso lebhu ahlelwe kahle, uJiang nethimba lakhe bakha ucwecwe lwe-silicon olubuyisela emuva amandla okukhanya angaphansi kwamaphesenti amathathu. UJiang uphetha ngokuthi, “Singafunda okuningi ezintweni zemvelo.”
Ucabangani? Ingabe iso elincane lebhu elibamba amandla okukhanya lavela ngengozi? Noma ingabe laklanywa?
[Isithombe ekhasini 30]
Iso lebhu line-“cornea” eyakhiwa amaqoqo amaningi amaqhuqhuvana amancane anezinhlangothi ezingu-8
[Izithombe ekhasini 30]
Ucwecwe lwe-“silicon” olubamba amandla elanga okwenziwa ngalo izibuko ezibamba amandla okukhanya
[Imithombo Yesithombe ekhasini 30]
Moth eye close-up: Courtesy of Dartmouth Electron Microscope Facility; silicon close-up: Courtesy Peng Jiang