Ingabe Yaklanywa?

Ingcina Yomsundu

● Odokotela abahlinzayo balungisa amathambo aphukile besebenzisa izinsinjana noma izingcwecwe nezikulufu, kodwa kunzima ukusebenzisa la mathuluzi uma kuphuke amathambo amancane. Kuze kube muva nje, abacwaningi bebehluleka ukwakha ingcina engaqina nakuba isemzimbeni womuntu onamanzi. Bathole into engase iyixazulule le nkinga emsundwini okuthiwa i-sandcastle worm!

Cabanga: Lo msundu wenza indlwana esashubhu ngaphansi kwamanzi, usebenzisa izinhlayiya zesihlabathi namagobolondo. Lezi zinhlayiya zihlanganiswa yingcina ekhiqizwa indlala etholakala esifubeni sawo. Le ngcina ingcono kakhulu uma iqhathaniswa nezinye izingcina ezisetshenziswa abantu namuhla. Inamaprotheni ayingqayizivele, okuthi lapho ehlangana abangele ukuba iqine ngaphansi kwamanzi ngokukhulu ukushesha! Lo msundu uye wabizwa kufanele ngokuthi umakhi oyingcweti. URussell Stewart, eYunivesithi yase-Utah, uthi lesi silwanyana sixazulule “izinkinga eziyinkimbinkimbi zokwakhiwa kwengcina.”

Abacwaningi baye bazakhela ingcina engcono kakhulu ukudlula eyomsundu. Ingcina eyogcina isisetshenziswa uma kuhlinzwa ukuze kuhlanganiswe amathambo aphukile, kuyodingeka ikwazi ukuncibilika ngokuhamba kwesikhathi njengoba ithambo liphola. Uma le ngcina iyokwazi ukusebenziseka kubantu, iyoba ingqopha-mlando kwezokwelapha.

Ucabangani? Ingabe ingcina eyingqayizivele yomsundu okuthiwa i-sandcastle worm yaba khona ngengozi, noma ingabe yaklanywa?

[Isithombe ekhasini 26]

Abacwaningi banethemba lokulungisa amathambo aphukile ngaphandle kokusebenzisa izinsimbi

[Umthombo Wesithombe ekhasini 26]

Sandcastle worm: © Peter J. Bryant, University of California, Irvine