Umbono WeBhayibheli

Ingabe UNkulunkulu Uyazisekela Izimpi Namuhla?

MAYELANA nendima yayo njengeqhawe lempi, iNkosi uDavide yakwa-Israyeli wasendulo yathi: “Izandla zami [uNkulunkulu] uzifundisela impi, futhi izingalo zami zicindezelé umnsalo wethusi.”—IHubo 18:34.

Maqondana namaKristu, umphostoli uPawulu wabhala: “Nakuba sihamba enyameni, asilwi impi ngokwalokho esiyikho enyameni. Ngoba izikhali zempi yethu azizona ezenyama.”—2 Korinte 10:3, 4.

Ingabe leyo mibhalo iyaphikisana? Noma, ingabe sikhona isizathu esizwakalayo esenza uNkulunkulu wavumela u-Israyeli wasendulo ukuba aye empini kodwa akangawavumela amaKristu ukuba enze okufanayo? Ingabe umbono kaNkulunkulu ngempi usushintshile? Izimpendulo ziyacaca uma sicabangela izinto ezintathu eziwumehluko omkhulu phakathi kuka-Israyeli nebandla lobuKristu leqiniso.

Izinto Ezintathu Eziphawulekayo Eziwumehluko

1. U-Israyeli wasendulo wayeyisizwe esasinemingcele engokoqobo esasiyinikwe uNkulunkulu kanti futhi sasizungezwe omakhelwane ababevame ukuba nobutha. Ngakho-ke, uNkulunkulu wayala abantu bakhe ukuba bavikele izwe labo, aze abasize nokubasiza banqobe izitha zabo. (AbaHluleli 11:32, 33) Ngakolunye uhlangothi, ibandla lobuKristu alinayo imingcele engokoqobo kanti amalungu alo atholakala kuwo wonke amazwe. Khona-ke, ukube abalandeli bakaKristu kwelinye izwe bebengahileleka empini yokulwa nelinye izwe, bebeyobe belwa namakholwa abakanye nawo—abafowabo nodadewabo abangokomoya—abayalwa ukuba babathande futhi baze ngisho babafele.—Mathewu 5:44; Johane 15:12, 13.

2. U-Israyeli wasendulo wayenenkosi engumuntu esihlalo sayo sobukhosi sasiseJerusalema. Nokho, amaKristu eqiniso abuswa uJesu Kristu manje oyisidalwa somoya esinamandla, osihlalo sakhe sobukhosi sisezulwini. (Daniyeli 7:13, 14) UJesu ngokwakhe wathi: “Umbuso wami awuyona ingxenye yaleli zwe. Ukube umbuso wami ubuyingxenye yaleli zwe, izikhonzi zami ngabe zilwile ukuze nginganikelwa kumaJuda. Kodwa, njengoba kunjalo, umbuso wami awuveli kulo mthombo.” (Johane 18:36) Ngakho akukho mbuso wezombangazwe noma ubukhosi emhlabeni obungathi bumelela uKristu. Lokhu kusho ukuthini ‘ezikhonzini’ noma kubalandeli bakaJesu? Iphuzu lesithathu liyachaza.

3. U-Israyeli wasendulo, njengezinye izizwe, wayevame ukuthumela izithunywa noma lokho namuhla esikubiza ngokuthi amanxusa. (2 AmaKhosi 18:13-15; Luka 19:12-14) NoKristu wenze okufanayo, kodwa kunezinto ezimbili ezihluke kakhulu. Okokuqala, bonke abalandeli bakhe bangamanxusa. Khona-ke, umphostoli uPawulu wayengabhala ngokuqondene namaKristu ayekanye nawo: “Ngakho-ke thina singamanxusa abambele uKristu.” (2 Korinte 5:20) Njengamanxusa okuthula, abazange bazithathe izikhali. Okwesibili, abalandeli bakaJesu bakhuluma nawo wonke umuntu olalela isigijimi sabo. UJesu wathi: “Lezi zindaba ezinhle zombuso ziyoshunyayelwa emhlabeni wonke owakhiwe ngenjongo yobufakazi ezizweni zonke.” (Mathewu 24:14) Wathi futhi: “Ngakho-ke hambani niyokwenza abantu bazo zonke izizwe babe abafundi,  . . . nibafundise ukugcina konke enginiyale ngakho.”—Mathewu 28:19, 20.

Ngokudabukisayo, izikhonzi zikaKristu azamukelwa kahle ngaso sonke isikhathi. Ngenxa yalokho uPawulu walobela umvangeli ongumKristu uThimothewu: “Njengesosha elihle likaKristu Jesu, hlanganyela ekukhuthazeleni ngaphansi kokubi.” (2 Thimothewu 2:3) Yiqiniso ukuthi izikhali zikaThimothewu kwakungezomoya futhi zazihlanganisa iZwi likaNkulunkulu elilotshiwe elibizwa ngokuthi ‘inkemba yomoya.’—Efesu 6:11-17.

Kungani UNkulunkulu Ashiya U-Israyeli Waphendukela Ebandleni LobuKristu?

Kwaphela iminyaka engu-1 500 isizwe sakwa-Israyeli sijabulela ubuhlobo obukhethekile noNkulunkulu, ubuhlobo obabusekelwe esivumelwaneni. (Eksodusi 19:5) Leso sivumelwano, uMose ayengumlamuleli kuso, sasihlanganisa neMiyalo Eyishumi neminye imithetho, yonke eyayithuthukisa ukukhulekela kweqiniso nezindinganiso eziphakeme zokuziphatha. (Eksodusi 19:3, 7, 9; 20:1-17) Nokho, ngokudabukisayo, u-Israyeli njengesizwe akazange athembeke kuNkulunkulu, waze wabulala ngisho nabaprofethi bakhe.—2 IziKronike 36:15, 16; Luka 11:47, 48.

Ekugcineni uJehova wathumela iNdodana yakhe uJesu Kristu, owazalwa njengomJuda. Kunokuba simamukele njengoMesiya, sonke isizwe samaJuda samenqaba. Ngenxa yalokho, uNkulunkulu wasinqamula isivumelwano sakhe esase sithathe iminyaka no-Israyeli, futhi udonga olungokomfanekiso olwaluhlukanisa amaJuda kwababengewona amaJuda lwawa.a (Efesu 2:13-18; Kolose 2:14) Ngaso leso sikhathi, uNkulunkulu wasungula ibandla lobuKristu, wamisa uJesu njengeNhloko yalo. Ngaphezu kwalokho, lingakapheli ikhulu lokuqala, lelo bandla lase lakhiwa izizwe eziningi. “Ezizweni zonke umuntu omesabayo futhi enze ukulunga uyamukeleka kuye,” kwasho umphostoli ongumJuda uPetru.—IzEnzo 10:35.

OFakazi BakaJehova balandela isibonelo samaKristu okuqala. Ngakho, oFakazi baziwa ngenkonzo yabo yasobala nokungathathi hlangothi kwabo kwezombangazwe nasezimpini ezingokoqobo. (Mathewu 26:52; IzEnzo 5:42) Yebo, abavumeli lutho lubaphazamise ekumemezeleni izindaba ezinhle zoMbuso kaNkulunkulu, owukuphela kukahulumeni ozosusa ububi ulethe ukuthula okuhlala njalo emhlabeni. Ecabanga ngalelo themba, umphostoli uPawulu wabhala: “Njengababambele uKristu siyancenga: ‘Buyisanani noNkulunkulu.’” (2 Korinte 5:20) Lawo mazwi kufanele asenze sibe nomuzwa wokuphuthuma nakakhulu namuhla, ngoba sesisondele ekupheleni ‘kwezinsuku zokugcina’ zaleli zwe lamanje elibi.—2 Thimothewu 3:1-5.

[Umbhalo waphansi]

INGABE WAKE WAZIBUZA?

● Iyiphi imfanelo evelele okufanele amaKristu abonisane yona?—Johane 13:34, 35.

● Siyini “isikhali” esiyinhloko somKristu weqiniso?—Efesu 6:17.

● Abameleli bakaKristu bamemezela siphi isigijimi esibalulekile?—Mathewu 24:14; 2 Korinte 5:20.

[Isithombe ekhasini 23]

OFakazi BakaJehova bakha ubuzalwane bomhlaba wonke futhi abathathi hlangothi ezimpini zezizwe