Ezobuchwepheshe Zinamuphi Umthelela Ezinganeni Zakho?
Kulula ukuba izingane zisebenzise ezobuchwepheshe kangangokuthi zingase zibizwe ngokuthi “isizukulwane sezobuchwepheshe” kodwa kungase kube nzima kubantu abadala ukufunda ukuzisebenzisa. Yingakho bengase babizwe ngokuthi “izimfundamakhwela zezobuchwepheshe.”
Ngesikhathi esifanayo, abanye baye baphawula ukuthi intsha echitha isikhathi esiningi kwezobuchwepheshe igcina . . .
isiyimilutha yemishini yayo yezobuchwepheshe.
isihlukumeza abanye nge-inthanethi.
isibukela izithombe zocansi, ihlosile noma ingahlosile.
OKUFANELE UKWAZI
UKUNGAKWAZI UKUPHILA NGAPHANDLE KWEZOBUCHWEPHESHE
Ezinye izinto ezenziwa ku-inthanethi—ngokwesibonelo, imidlalo—kwenziwe ngendlela yokuba kube nzima ukukuyeka. Incwadi ethi Reclaiming Conversation ithi: “Ama-app asemafonini ethu ahlelwe ngendlela yokuthi asigcine sisemafonini.” Uma sichitha isikhathi esiningi sigqolozele ama-app abakhangisi benza imali.
ONGACABANGA NGAKHO: Ingabe izingane zakho ziwasebenzisa kakhulu amaselfoni namathebhlethi azo? Ungazisiza kanjani zisisebenzise kahle isikhathi sazo?—EFESU 5:15, 16.
UKUHLUKUNYEZWA KU-INTHANETHI
Ku-inthanethi abanye abantu baba nodlame, bathuke inhlamba futhi bangayicabangeli imizwa yabanye. Lokho kungase kuholele ekuhlukumezeni abanye.
Abanye abantu bayadelela futhi baziphatha ngendlela engafanele ku-inthanethi ngenxa yokuthi bafuna ukunakwa futhi bafuna ukuduma. Noma, uma umuntu ethola ukuthi akamenywa ezintweni ezithile—ngokwesibonelo, uma ebona ukuthi akamenywanga ephathini ethile—lokho kungamenza aphatheke kabi futhi azizwe engathandwa.
ONGACABANGA NGAKHO: Ingabe izingane zakho zidelela abanye ku-inthanethi? (Efesu 4:31) Zisabela kanjani lapho zingamenywanga ezintweni ezithile?
IZITHOMBE ZOCANSI
Izithombe zocansi sezitholakala kalula ku-inthanethi. Nakuba ezobuchwepheshe zinendlela yokuba abazali balawule lokho okwenziwa yizingane zabo ku-inthanethi, lokhu akusona isivikelo ngaso sonke isikhathi ngoba izingane zingakwazi ukubona izinto ezingcolile.
Ukuthumelelana imiyalezo nezithombe zocansi ngefoni—kungenza umuntu athathelwe izinyathelo ezingokomthetho. Kwezinye izimo, abantu abathumelelana imiyalezo yocansi bangabekwa icala lokusakaza izithombe zocansi zezingane, kuye ngemithetho yendawo neminyaka yalabo abathintekayo.
ONGACABANGA NGAKHO: Ungazisiza kanjani izingane zakho zigweme isifiso sokubuka nokuthumela izithombe zocansi ku-inthanethi?—EFESU 5:3, 4.
ONGAKWENZA
QEQESHA IZINGANE ZAKHO
Nakuba lesi “sizukulwane sezobuchwepheshe” singazisebenzisa kalula ezobuchwepheshe, sisasidinga isiqondiso. Incwadi ethi Indistractable ithi ukunikeza izingane ifoni noma omunye umshini wezobuchwephe ngaphambi kokuba zikwazi ukuwusebenzisa kahle kuwukwenza “ngokungacabangi okufana nokuvumela ingane ukuba igxumele edamini lokubhukuda ibe ingakwazi ukubhukuda.”
ISIMISO SEBHAYIBHELI: “Qeqesha ingane ngendlela okufanele ihambe ngayo; ngisho nalapho ikhula ngeke isuke kuyo.”—IZAGA 22:6.
Khetha kulokhu okungezansi ongase uthande ukukuzama noma ubhale phansi okunye okucabangayo.
Ngizoxoxa nengane yami ngendlela okufanele iziphathe ngayo lapho ixoxa nabanye ku-inthanethi
Ngizosiza ingane yami ibhekane nomuzwa wokukhishwa inyumbazane
Ngizokwenza konke engingakwenza ukuze ngivikele ingane yami ukuba ingaziboni izinto ezingalungile ku-inthanethi
Ngezikhathi ezithile, ngizohlola ifoni yengane yami ukuthi iyisebenzisa kanjani
Ngizobekela izingane zami isikhathi ezingasisebenzisa kwezobuchwepheshe usuku ngalunye
Ngeke ngiyivumele ingane yami ukuba isebenzise ifoni yayo ngesikhathi okufanele ngabe ilele ngaso
Ngizobeka umthetho wokuthi akekho okufanele asebenzise ifoni ngesikhathi sokudla