Isifundo 33

Ukubonisa Ukushiseka Nokufudumala

1. Yini eyoqhubezela ukushiseka na?

¹ Ukushiseka ukuphila kwenkulumo. Uma ungakushisekeli lokho okukhulumayo, izilaleli zakho azinakukushisekela ngempela. Uma kungakushukumisi, akunakuzishukumisa. Kepha njengesikhulumi ukuze ubonise ukushiseka koqobo, umelwe ukholiseke ngokuqinile ukuthi izilaleli zakho zidinga ukukuzwa lokho onokukusho. Lokho kusho ukuthi uzicabangele lapho ulungiselela inkulumo, ukhetha amaphuzu abeyozisiza kakhulu futhi uwabumbela ukuba izilaleli zakho zilwazise masinyane usizo lwawo. Uma ukwenzile lokhu, uyozizwa usunduzelekile ukukhuluma ngokushiseka, nezilaleli zakho ziyosabela.

2-5. Ukunikela okushisayo kukubonisa kanjani ukushiseka na?

² Ukushiseka kuboniswe ngokunikela okushisayo. Ukushiseka kuboniswa ngokukhanyayo kakhulu wukushisiswa kokunikela kwakho. Awukwazi ukungakhathali noma ukuba-yisinothongo ngesimo. Umelwe uphile ngempela ebusweni bakho, ngezwi lakho nangendlela yakho yokukhuluma. Lokho kusho ukuthi umelwe ukhulume ngamandla nangomdlandla. Umelwe uzwakale ukholisekile nakuba kungekhona ukungaphikiswa. Lapho ufanele ushiseke, awufanele nanini ushoshozele. Ukulahlekelwa wukuzibamba kusho ukulahlekelwa yizilaleli zakho.

³ Ukushiseka kuyathathelwana. Uma uyishisekela inkulumo yakho, izilaleli zakho ziyokuthatha lokhokushiseka. Ngokulandelana, ngokubheka izilaleli okuhle, kuyobuyiselwa kuwe futhi kugcine ukushiseka kwakho kuphila. Ngenye indlela, uma ufile, izilaleli zakho ziyokufa nawe.

⁴ UPawulu uthi sifanele sivuthe ngomoya kaNkulunkulu. Uma unjalo, ukunikela kwakho okushisayo kuyobangela umoya kaNkulunkulu ugelezele ezilalelini futhi ushukumisele izilaleli zakho esenzweni. UApholo wabonisa umoya onjalo ekukhulumeni kwakhe, futhi ubizwa ngokuthi uyiqaphuqaphu.—Roma 12:11; IzE. 18:25; Jobe 32:18-20; Jer. 20:9.

⁵ Ukushisekela inkulumo umelwe ukholiseke ukuthi unokuthile okufanele kunikezwe. Sebenza indaba oyoyinikela uze uzwe ukuthi unokuthile okuyoqhubezela wena kuqala njengesikhulumi. Akudingeki kube-yindaba entsha, kepha ukusondela kwakho endabeni kungabakusha. Uma ucabanga ukuthi uziphathele okuthile izilaleli zakho okuyoziqinisa ekukhulekeleni kwazo, okuyozenza izikhonzi ezingcono noma amaKristu angcono, ngakho-ke unezizathu eziphelele zokuyishisekela inkulumo yakho, nangokungangabazeki uyoba-njalo.

6-9. Iphathelene kanjani indaba enkulumweni yomuntu nokushiseka ekunikeleni na?

⁶ Ukushiseka kufanele indaba. Ngenxa yokwahlukahluka enkulumweni yakho nokuzuzisa izilaleli zakho, awumelwe uphakamisele ukushiseka kwakho endaweni ephakeme kakhulu kuyo yonke inkulumo yakho. Uma wenza njalo, ziyokhathala ngisho ngaphambi kokwenza okuthile. Lokhu kugcizelela futhi indingeko yokulungiselela indaba yokwahlukahluka okwanele ukuvumela ukwahlukahluka ekunikeleni kwakho. Kusho ukuthi amanye amaphuzu owaxoxa ngokwemvelo abizela ukunikela okushisekayo ngaphezu kwamanye, futhi afanele aphithane ngokunekhono kuyo yonke inkulumo yakho.

⁷ Amaphuzu amakhulu ikakhulu afanele anikelwe ngokushiseka. Kumelwe kube-nezihloko enkulumweni yakho, imivuthondaba owakhela kuyo. Njengoba lena ingamaphuzu aphakeme enkulumo yakho, ngokuvamile ayakuba ngamaphuzu ahloselwe ukushukumisa izilaleli zakho, ukungenisisa emqondweni ukusebenza kwempikiswano yakho, izizathu zakho noma iseluleko sakho. Usuzikholisile izilaleli zakho, manje udinga ukuzishukumisa, ukubonisa izinzuzo zezinqumo zakho, izinjabulo namalungelo ukulandela lokhukukholiseka okuyozilethela khona. Lokhu kubizela ukunikela kokushiseka.

⁸ Phezu kwalokhu, nokho, awufanele ushelele uwele ekungakhathalini ekunikeleni kwakho ngezinye izikhathi. Awufanele ulahlekelwe nanini ukuzwa kwakho okunamandla ngenxa yendaba yakho noma ubonise noma yikuphi ukulahlekelwa yisithakazelo. Zifanekisele engqondweni yakho inyamazane enezimpondo ezingamagatshagatsha eyaluka ngokuthula ebuhlahlweni obuncane. Nakuba ibukeka ithambile, kunamandla asalele emilenzeni yayo ecuthene angayimukisa ngokweqa okukhulu kakhulu ngokuthi khasha kwengozi. Yenabile kepha iqaphile njalo. Ungaba-njalo, ngisho lapho ungakhulumi ngakho konke ukushiseka kwakho.

⁹ Kusho ukuthini-ke konke lokhu na? Ukuthi ukunikela okushisayo akuphoqelelwa nanini. Kufanele kube-nesizathu nendaba yakho imelwe ikunikeze lesosizathu. Umeluleki wakho uyokhathazeka ngokuthi ukushiseka kwakho bekuyifanele yini indaba yakho. Ingabe bekukuningi ngokweqile, kukuncane ngokweqile noma kungalungile na? Phela, uyocabangela ubuntu bakho wedwa, kepha uyokukhuthaza uma unamahloni futhi uyisithuli futhi uyokweluleka uma ubukeka ujabule ngokweqile ngakho konke okushoyo. Njalo linganisa ukushiseka kwakho endabeni yakho futhi uguqule indaba yakho ukuze ukunikela kwakho okunokushiseka kulinganiswe kuso sonke isikhathi.

**********

10-12. Kuqondweni ngokufudumala nokuzwela na?

¹⁰ Ukushiseka kuhlangene kakhulu nokufudumala nokuzwela. Nokho, ukuvezwa kwakho kusunduzwa yimizwelo eyahlukene futhi kunikeza imiphumela eyahlukene ezilalelini zakho. Njengesikhulumi, uvame ukushiseka ngenxa yendaba yakho, kepha ufudumele lapho ucabanga ngezilaleli zakho ngesifiso sokuzisiza. “Ukufudumala, ukuzwela,” kufakwe ohidini epheshaneni Leseluleko Senkulumo, kudinga ukucatshangelisiswa.

¹¹ Uma ubonisa ukufudumala nokuzwela, izilaleli zakho ziyobona ukuthi ungumuntu obonisa uthando, umusa nesisa. Ziyokhangwa nguwe njengomlilo ngobusuku obubandayo. Ukunikela okushisayo kuyaqhubezelana, kepha nesihe siyadingeka. Akwanele njalo ukukholisa ingqondo; umelwe ushukumise inhliziyo.

¹² Ngokwesibonelo, bekuyoba-ngokufanele yini ukufunda kwabaseGalathiya 5:22, 23 maqondana nothando, ukubekezela, ububele nobumnene ngaphandle kokubonisa lezozimfanelo esimweni sakho na? Qaphela nesisa esishiwo emazwini kaPawulu kweyo-1 kwabaseThesalonika 2:7, 8. Lezi yizinkulumo ezibizela ukufudumala nokuzwela. Kufanele kuboniswe kanjani na?

13, 14. Ukufudumala kungaboniswa kanjani ebusweni na?

¹³ Ukufudumala kubonakala ebusweni. Uma uzifudumalele izilaleli zakho, kufanele kubonakale ebusweni bakho. Uma kungabonakali, izilaleli zakho zingahle zingakholiseki ukuthi uzifudumalele ngempela. Kepha kumelwe kube-ngokoqobo. Akukwazi ukufakwa njengesivuvu. Akufanele ukufudumala nokuzwela kuphambaniswe nozwela nomumo wokuphangazela. Ubuso obunomusa buyobonisa ubuqotho nokuliqiniso.

¹⁴ Kaningi uyokhuluma nezilaleli ezinobuhlobo. Ngakho-ke, uma uzibheka ngempela izilaleli zakho uyozifudumalela. Uyozizwa uphumulile futhi unobuhlobo. Khetha abanye ezilalelini abanobuso obunobuhlobo kakhulu. Xoxa nalowo ngokomuntu uqobo isikhashana. Khetha omunye bese uxoxa nalowo. Lokhu akunakukunika kuphela ukubheka izilaleli okuhle, kepha uyozifumana ukhangwa yizilaleli, nobuso bakho obufudumele ngokusabela buyokwenza izilaleli zikhangwe nguwe.

15-19. Shono lokho okuyobangela ukufudumala nokuzwela kubonakale ezwini lesikhulumi.

¹⁵ Ukudumala nokuzwela kubonakala ngezwi. Kuqiniswe kakhulu ukuthi ngisho izilwane ziyakwazi ukuchachisa imizwelo yakho kuya ebangeni elithile ngezwi lakho. Izilaleli ziyosabela kakhulu kangakanani-ke, ezwini eliveza ukufudumala nokuzwela ngaso kanye isimo salo.

¹⁶ Uma uzwa ngempela wahlukene nezilaleli zakho, uma ucabanga kakhulu ngamazwi owashoyo kunangendlela izilaleli zakho eziyosabela ngayo kuwo, kuyoba-nzima ukukufihlela izilaleli eziqaphile. Kepha uma isithakazelo sakho ngeqiniso sinomongo kulabo okhuluma nabo futhi unesifiso sokuzimisela sokubanikeza imicabango yakho ukuze bacabange njengawe, ukuzwela kwakho kuyobonakala kukho konke ukuguquka kwezwi lakho.

¹⁷ Kusobala, nakuba, lokhu kumelwe kube-yisithakazelo seqiniso. Ukufudumala koqobo akukwazi ukumbuluzwa njengoba kunjalo nangokushiseka. Isikhulumi asifanele nanini sikhangise ngobumnandi bobuzenzisi. Ukufudumala nokuzwela akufanele kuphambaniswe nozwela noma elokuzicabangela, izwi elivevezelayo lothatheka kalula ngomhawu.

¹⁸ Uma unezwi elinokhahlo, elihoshozayo, kuyokuba-nzima ukubonisa ukufudumala enkulumweni yakho. Ufanele uzame ngokucubungula nangokukhuthala ukunqoba noma iyiphi inkinga enjalo. Yindaba yemfanelo yezwi futhi iyodinga isikhathi, kepha ukunakekela okufanele nomzamo kungenza okukhulu ukuthuthukisa ukufudumala kwezwi lakho.

¹⁹ Enye into ebingahle ikusize esimweni sokubheka sokuzenzela nje wukukhumbula ukuthi onkamisa abafushane, abanqanyuliwe benza inkulumo ibe-nokhahlo. Funda ukunweba onkamisa. Lokhu kuyobathambisa nangokuzenzekelayo kwenze inkulumo yakho ifudumale kakhulu ngenkulumo yezwi.

20, 21. Indaba enkulumweni ikuthinta kanjani ukufudumala nokuzwela ekunikeleni na?

²⁰ Ukufudumala nokuzwela kufanele indaba. Njengasendabeni yokushiseka, ukufudumala nokuzwela okufaka enkulumweni yakho kwencike ikakhulu kulokho okushoyo. Isibonelo salokhu yindaba yokusola kukaJesu ababhali nabaFarisi ngokukaMathewu 23. Asikwazi ukuzifanekisela uJesu esho lawomazwi ahlabayo okusola ngendlela eduma nefile. Kepha phakathi kwalenkulumo yokuthukuthela nolaka kukhona umshwana ogcwele ukufudumala nesisa, oveza isihawu sikaJesu ngalamazwi: “—kukangaki ngithanda ukubuthela ndawonye abantwana bakho njengesikhukukazi sibuthela amazinyane aso phansi kwamaphiko aso, kepha anivumanga.” Lapha isisa siboniswe ngokusobala, kepha inkulumo elandelayo: “Bhekani, indlu yenu isisala nani,” ayiwuqukethe umzwelo ofanayo. Izwi ngelokulahla, lokwenyanya.

²¹ Kukuphi-ke, lapho ukufudumala nokuzwela bekuyokuba-ngokufanele khona na? Eziningi izinto obuyozisho enkonzweni yasensimini noma enkulumweni yomfundi beziyofanelana nalenkulumo kepha ikakhulu lapho uzindla, ukhuthaza, uyala, uzwelana, njalonjalo. Ekukhumbuleni ukufudumala, ungakhohlwa ukushiseka lapho kufanele. Yiba-ngolinganisiwe kuzo zonke izinto, kepha veza ngokugcwele ngangokunokwenzeka konke okushoyo.