Chapter 15
Ukuhlukaniswa Kwabantu Ngempikiswano YoMbuso
1. Kungani ukuhlukaniswa ngempikiswano yoMbuso kuyindaba engathi sína kumuntu ngamunye wethu?
NGAMUNYE wethu ubhekene nesinqumo esingathi sína. Okuyikhona okuyimpikiswano isimo sethu ngaseMbusweni kaJehova wobuMesiya osezandleni zikaJesu Kristu. Ngalempikiswano kwenziwa ukwehlukaniswa kwabantu bazo zonke izizwe. Ngesisekelo senkambo yomuntu ngamunye yesenzo ubekwa kwelinye lamaqembu amabili. Elilodwa kuphela lalamaqembu eliyosinda embubhisweni yezwe ezayo.—Mathewu 24:40, 41.
2. (a) LoMbuso wobuMesiya uhlobene kanjani nempikiswano yobukhosi bukaJehova? (b) UMbuso ngokushesha uzoba yini, futhi yini okumelwe sicabange ngayo ngokungathi sína?
2 Kakade uJehova usebeke iNdodana yakhe egcotshiwe, uMesiya wakhe, esihlalweni sobukhosi ezulwini. Ekupheleni ‘kwezikhathi ezimisiwe zabezizwe’ ngo-1914, uNkulunkulu wanikeza uJesu Kristu izizwe njengefa lakhe—umhlaba wonke njengemfuyo yakhe. (IHubo 2:6, 8) Uhulumeni wobuMesiya, oneNkosi egcotshiwe kaJehova esihlalweni sobukhosi, uyindlela kaNkulunkulu yokufeza injongo yakhe ehlakaniphile neyothando ngokuphathelene nomhlaba. Ngakho-ke, isimo sakho ngakuloMbuso, sibonisa indlela ozizwa ngayo ngobukhosi bukaJehova bendawo yonke. Ngokushesha lowoMbuso wobuMesiya “uyakuchoboza, uqede” sonke isimiso sezombangazwe esibusa izindaba zesintu manje futhi ube uhulumeni owodwa phezu kwawo wonke umhlaba. (Daniyeli 2:44; IsAmbulo 19:11-21) Lapho uqhubekela ekuguquleni lomhlaba ube yiPharadesi, uyobe ukuphi wena? Ingabe uyoba phakathi kwalabo abaqondiswa yiwo ukuba bajabulele ukuphila okuphelele? UJesu waphawula isisekelo abantu abaphila manje abangahlanganyela ngaso ethembeni elinjalo.
INKOSI ‘NABAFOWABO’
3. KuMathewu 25:31-33, yini uJesu ayichaza?
3 Lapho etshela abaphostoli bakhe ‘ngokuphela kwesimiso sezinto,’ uJesu wasebenzisa imizekeliso, noma imifanekiso eminingana. Kowokugcina wathi: “Kepha nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo; kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi, imise izimvu ngakwesokunene sayo kepha izimbuzi ngakwesokhohlo.”—Mathewu 24:3; 25:31-33.
4. (a) Lomfanekiso uhlobene kanjani noDaniyeli 7:13, 14? (b) Imiphi imibuzo esingase sizibuze yona ngokunenzuzo?
4 Phawula ukuthi uJesu lapha ukhuluma ngaye ngokuthi ‘iNdodana yomuntu,’ njengoba ayesenzile kakade ngokuphindaphindiwe ngaphambili kulesiprofetho. (Mathewu 24:27, 30, 37, 39, 44) Ukusebenzisa kwakhe lamazwi kwakuyisikhumbuzo sombono ongokwesiprofetho owanikezwa uDaniyeli cishe emakhulwini ayisithupha eminyaka ngaphambili, lowo umprofethi abhala ngawo: “Ngabona emibonweni ebusuku; bheka, kwafika namafu ezulu onjengendodana yomuntu [uJesu Kristu]; yafika komdala wezinsuku [uJehova uNkulunkulu], yasondezwa phambi kwakhe. Yanikwa ukubusa, nobukhosi, nombuso, ukuze bonke abantu, nezizwe, nezilimi bayikhonze; ukubusa kwayo kungukubusa okuphakade okungayikudlula, nombuso wayo yiwo ongayikuchithwa.” (Daniyeli 7:13, 14; Heberu 2:5-8) Lelogunya lokubusa selinikeziwe kakade kuJesu Kristu. Kusukela ngo-1914 ubusa esesihlalweni sobukhosi sasezulwini. Wena ngokwakho uye wasabela kanjani ekubuseni kwakhe? Ingabe indlela yakho yokuphila inikeza ubufakazi benhlonipho efanele ngaLona uNkulunkulu ngokwakhe aye wamenza umbusi womhlaba wonke?
5. UKristu ubunquma kanjani ubuqiniso bokusho komuntu ukuthi uzinikele kuye njengeNkosi?
5 Amazwi nje ewodwa awanele. Kulula ngomuntu ukuba athi uyakholelwa eMbusweni kaNkulunkulu nokuthi uyamthanda uJesu Kristu. Kodwa emfanekisweni wakhe wezimvu nezimbuzi uJesu wabonisa ukuthi, njengoba eyobe engabonakali ezulwini, isici esiyinhloko ayosicabangela ekunqumeni ubuqiniso balokho umuntu akushoyo kuyoba ukuphatha kwakhe labo abamelela uKristu emhlabeni, “abafowabo.”—Mathewu 25:40, 45.
6. Bangobani ‘labafowabo’ bakaKristu?
6 Bangobani? Yilabo uNkulunkulu aye wabakhetha phakathi kwesintu ukuba babe yizindlalifa zoMbuso wasezulwini kanye noKristu. Laba bayizi-144 000, futhi kunensali kuphela yabo esesemhlabeni. (IsAmbulo 14:1, 4) Ngenxa yokuthi baye ‘bazalwa ngokusha’ ngokusebenza komoya kaNkulunkulu, bangabantwana bakaNkulunkulu, futhi ngenxa yalesisizathu bakhulunyelwa emiBhalweni ‘njengabafowabo’ bakaJesu Kristu. (Johane 3:3; Heberu 2:10, 11) UJesu ubheka lokho abantu abakwenzayo ‘kulabafowabo,’ ngisho ‘komncinyane’ wabo, njengokwenziwa kuye.
7. Kungani ‘abafowabo’ bakaKristu bengewona amalungu amasonto eLobukholwa?
7 Bakuphi ‘labafowabo’ bakaKristu osukwini lwethu? Ingabe uyobathola phakathi kwabantu abasontayo beLobukholwa? Nokho, uJesu wathini ngabalandeli bakhe beqiniso? “Abasibo abezwe, njengalokhu nami angisiye owezwe.” (Johane 17:16) Ingabe lokho kungashiwo ngempela ngamasonto eLobukholwa namalungu awo? Ngezinga elikhulu, isimo sawo nokuziphatha simane sibonisa leso esivamé engxenyeni yezwe atholakala kuyo. Ukuhileleka kwamasonto kwezombangazwe kwaziwa kahle. Lapho iNkambiso yeNhlangano yeZizwe imiswa ngo-1945, amanxusa amaProthestani, awamaKatolika nawamaJuda ayekhona njengabeluleki. Eminyakeni yamuva, opapa baseRoma baye badumisa iNhlangano yeZizwe ‘njengethemba lokugcina lokuvumelana nokuthula’ ‘nanjengenkundla ephakeme yokuthula nokugcina ukulunga.’ UMkhandlu Wezwe WamaSonto, onamalungu amaqembu enkolo angama-300, uye walungiselela ngisho nezimali ezisetshenziselwa izinhlangano zezombangazwe ezivukelayo. Kodwa, uJesu Kristu wathi kumbusi wamaRoma uPilatu: “Umbuso wami awusiwo owalelizwe.”—Johane 18:36.
8. (a) Yini eye yakusiza ukuba ubone “abafowabo” bakaKristu? (b) Ubaluleke kangakanani kubona umsebenzi wokushumayela ngoMbuso?
8 Amaqiniso abonisa ukuthi iqembu elilodwa kuphela eliye lawumelela ngokuqinile uMbuso, lenza umzamo wenkuthalo wokuwumemezela emhlabeni wonke, ngesikhathi esifanayo ligwema ukuhileleka nganoma iluphi uhlobo ezindabeni zezwe zezombangazwe. Leliqembu lingoFakazi BakaJehova. Phakathi kwabo kutholakala abasasele “babafowabo” bakaKristu. Ekulingiseni iNkosi yabo nabaphostoli bayo, baye bazinikela ekuhambeni imizi ngemizi nezindlu ngezindlu, betshela abantu ngezindaba ezinhle zoMbuso kaNkulunkulu. (Luka 8:1; IzEnzo 8:12; 19:8; 20:20, 25) Ngo-1919, emhlanganweni woFakazi BakaJehova (ngalesosikhathi ababaziwa njengeInternational Bible Students) eCedar Point, eOhio, ababesemhlanganweni bakhunjuzwa ukuthi “umsebenzi wabo kwakuwukumemezela umbuso okhazimulayo kaMesiya.” Emhlanganweni ofanayo ngo-1922 lokhu kwaphinde kwagcizelelwa, futhi bakhuthazwa ngokuthi: “Memezelani, memezelani, memezelani, iNkosi nombuso wayo.” Ngokusebenzisa zonke izindlela abangazisebenzisa, baye baqhubeka benza lokho emhlabeni wonke kuze kube namuhla. (Mathewu 24:14) Ngenxa yomsebenzi wabo, impikiswano yoMbuso iye yalethwa kuwena. Yini oyenzayo-ke ngayo?
‘NIKWENZILE KOMUNYE WALABAFOWETHU’
9. (a) Izimo ezichazwé kuMathewu 25:35-40 zihlobene kanjani nenkonzo yoMbuso? (b) Ngaleyondlela abantu yonke indawo babhekene nakuphi ukuvivinywa?
9 ‘Abafowabo’ bakaKristu abagcotshwe ngomoya baye baba ngaphansi kokuvivinywa okunzima ngenxa yokushumayela ngoMbuso kaNkulunkulu ngesibindi, ngesikhathi esifanayo bezigcina behlukile ezweni. (Johane 15:19, 21) Abanye baye babhekana nendlala, ukoma nokuntula okokugqoka. Abaningi baye bashiya amakhaya abo ukuze bakhonze ezindaweni lapho bengaziwa khona. Ngesikhathi beqhuba inkonzo yabo, baye bagula futhi baboshwa, bafa nokufa ezandleni zabashushisi babo. Lokhu okuhlangenwe nakho ‘kwabafowabo’ bakaKristu kuye kwabangela abantu bazo zonke izizwe ukuba babhekane nokuvivinywa. Ingabe uthando ngoNkulunkulu nangoKristu luyobabangela ukuba basize lamanxusa oMbuso wasezulwini? (Mathewu 25:35-40; qhathanisa neyesi-2 Korinte 5:20.) Akuwona ngokuyinhloko umusa wobuntu kodwa usizo olunikezwa ngenxa yokuba bengabakaKristu iNkosi ilubheka njengolwenziwa kuyo uqobo.—Marku 9:41; Mathewu 10:42.
10. (a) Kungani ukuzikhalela okwenziwa “izimbuzi” kungenasisekelo? (b) Ngokuphambene, isiphi isimo esiye sathathwa “izimvu”?
10 Labo abanikeza usizo olunjalo uJesu ubafanisa nezimvu. Abantu abahlulekayo ukusiza ‘abafowabo’ emfanekisweni kaJesu kubhekiselwa kubo njengezimbuzi. “Izimbuzi” zingase ziphikise ngokuthi azizange zimbone uJesu Kristu. Kodwa uye wathumela izinceku zakhe kuzo, nalezi ziye zazichaza ngokusobala. Zonke “izimbuzi” zingase zingabashushisi ‘abafowabo’ bakaKristu, kodwa futhi azishukunyiswa uthando ngeNkosi yasezulwini ukuba zisize abameleli bayo. (Mathewu 25:41-45) Zinamathela ezweni elinombusi ongabonakali uSathane uDeveli. “Izimvu” nazo azinakumbona ngokoqobo uKristu. Kodwa, ngokuphambene ‘nezimbuzi,’ zona zizibonakalisa njengezingesabi ukuzihlanganisa ‘nabafowabo’ bakaKristu, zisekela labamemezeli boMbuso kaNkulunkulu. “Izimvu” ziyazi ukuthi zenzani, futhi zenza ukukhetha okuqinile ngokuvumelana noMbuso kaNkulunkulu ngoJesu Kristu. Kungakho isenzo sazo sibalulekile emehlweni eNkosi.
11. (a) Njengoba abantu abaningi bengakaze bathintane nomunye ‘wabafowabo’ bakaKristu, bangahlulelwa kanjani-ke ngesisekelo esichazwe lapha? (b) Yini eqinisekisa ukuphumelela kwalomsebenzi?
11 Nokho, kungenzeka kanjani ukuba abantu bezizwe zonke bahlulelwe ngalesisekelo? Akazange yini uJesu asho ukuthi ‘abafowabo,’ labo uYise ayeyobanika uMbuso wasezulwini, babeyoba nje “umhlambi omncane”? (Luka 12:32) Abantu abaningi abathintani ngokomuntu siqu nomunye wabo. Kuyiqiniso, kodwa ‘abafowabo’ bakaKristu bangumongo wenhlangano yomhlaba wonke yoFakazi BakaJehova. Ngalabantu abahlelekile, impikiswano ebalulekile yoMbuso iyiswa kubantu yonke indawo. Konke lokhu kuqondiswa uKristu ngokwakhe esihlalweni sakhe sobukhosi sasezulwini nangosizo lwezingelosi. Emazweni angaba ama-200 neziqhingi embulungeni yonke—ngisho nalapho ukushunyayelwa koMbuso kaNkulunkulu kungaphansi kokuvinjelwa ohulumeni—umsebenzi wokwehlukanisa uqhubekela phambili ngokungenakuvinjelwa, futhi isixuku esikhulu sabantu sizibeka ngasohlangothini loMbuso kaNkulunkulu.
12. (a) “Izimvu” zilwenza kanjani lukhanye uhlangothi eziye zaluthatha? (b) Kungani zikwenza?
12 Bakubonisa kanjani lokhu? Ngokusebenza ndawonye nabagcotshiweyo ekumemezeleni ngentshiseko ukuthi uMbuso uyabusa nokuthi ngokushesha uzoletha isimiso sezwe ekupheleni kwaso. Ngaleyondlela bazibonakalisa ngokusobala njengabaye bathatha uhlangothi ngaseMbusweni kaJehova wobuMesiya futhi ngothando bakhuthaza abanye ukuba benze okufanayo. Labantu abanezinhliziyo ezilungile bashukunyiswa okungaphezu nje kwesifiso sokusinda. Bamthanda ngempela uJehova nezindlela zakhe. Ilungiselelo loMbuso wakhe noKristu njengeNkosi ligcwalisa izinhliziyo zabo ngokubonga, futhi bafuna nabanye ukuba bazuze kulo. Ngakho-ke bahlanganyela ngezinga eligcwele ngangokunokwenzeka ekunikezeni ubufakazi boMbuso. Njengoba uJesu ayala abafundi bakhe, ‘bafuna umbuso kuqala,’ abavumeli ukukhathazeka ngezidingo zezinto ezibonakalayo ukuba kuwubeke ngemuva. Ngalendlela baba sendleleni yesibusiso esihle.—Mathewu 6:31-33.
INGABE ‘UYOLIDLA IFA LOMBUSO’?
13. (a) UJehova wawucabangela kusukela nini umvuzo walaba abanjengezimvu? (b) Kusho ukuthini ngabo ‘ukudla ifa lombuso’?
13 Okugcinelwe labo abazibonakalisa ‘beyizimvu’ zomfanekiso kaJesu kuhle ngempela. Esesihlalweni sakhe sobukhosi, uthi kubo: “Zanini nina enibusisiwe nguBaba, nidle ifa lombuso eniwulungiselweyo selokhu kwasekelwa umhlaba.” (Mathewu 25:34) “Selokhu kwasekelwa umhlaba,” ngesikhathi lapho uAdamu noEva beveza abantwana ababengazuza elungiselelweni likaNkulunkulu lokuhlenga isintu, ngokukaGenesise 3:15, 16, uJehova wayecabanga ngomvuzo ‘walezizimvu.’ (Qhathanisa noLuka 11:50, 51.) Ithuba abanalo lingelokujabulela ukuphila okuphelele kobuntu okwakulahlwe uAdamu ePharadesi elibuyiselwe. Ukudla kwabo “ifa lombuso” akusho ukuthi bayokuya ezulwini, ngoba lomfanekiso ubonisa ukuthi “izimvu” azifani ‘nabafowabo’ beNkosi, abayizindlalifa zoMbuso wasezulwini. Ngakho “izimvu” kumelwe zibe izikhonzi zasemhlabeni zalowohulumeni wasezulwini. IGreek-English Lexicon kaLiddell noScott iphawula ukuthi igama lesiGreki elithi basileiʹa, elihunyushwe lapha ngokuthi “umbuso,” lingase liqondakale ngengqondo kamenziwa, okusho ‘ukubuswa komuntu inkosi.’ Ngokusobala ilomqondo osebenza lapha.
14. Isahlulelo esinikezwa “izimbuzi” siphambana kanjani nefa ‘lezimvu’?
14 Uma “izimbuzi” ziya “ekujezisweni okuphakade,” ekubhujisweni okuphelele njengokungathi ngomlilo, “izimvu” ziyolondolozwa iNkosi yobuMesiya. (Mathewu 25:41, 46; qhathanisa nesAmbulo 21:8.) Ngaphandle kwesidingo sokuba zife, ziyolondolozwa phakathi nosizi olukhulu zingene “emhlabeni omusha” okhazimulayo oyokhululeka emathonyeni amabi kaSathane nesimiso sakhe esibi sezinto. Ziyothola lesosibusiso ngoba zenza isinqumo esihle empikiswaneni yoMbuso manje.
15. (a) Sazi kanjani ukuthi lomfanekiso usebenza manje? (b) Ngakho yimuphi umsebenzi obaluleke kakhulu?
15 Kungaba iphutha elingathi sína ukucabanga ukuthi, ngenxa yokuthi ukubhujiswa ‘kwezimbuzi’ kungokwaphakade, lomfanekiso awunakusebenza kuze kube kamuva, mhlawumbe phakathi nokuBusa kukaKristu Kweminyaka Eyinkulungwane. Ngokuphambene, uJesu wanikeza lomfanekiso njengengxenye yesibonakaliso “sokuphela kwezwe.” (Mathewu 24:3) Akuchazayo kwenzeka ngemva kokuba esebekwé esihlalweni sobukhosi kodwa futhi nalapho ‘abafowabo’ besesenyameni bebhekene nobunzima akhuluma ngabo. Siphila kuleso sikhathi, futhi siphela ngokushesha. Ngakho-ke, yeka ukuthi kubaluleke kangakanani ukuba singathembeli ngokugcwele kuphela eMbusweni kodwa futhi sisize abanye ukuba babone ukubaluleka kokwenza kanjalo manje.