Isahluko 36
Ukholo Olukhulu Lwenduna Yempi
LAPHO uJesu enikeza iNtshumayelo yakhe yaseNtabeni, usehlanganise cishe isigamu sesikhathi senkonzo yakhe yasobala. Lokhu kusho ukuthi usesalelwe kuphela cishe unyaka nezinyanga eziyisishiyagalolunye ukuba aqede umsebenzi wakhe emhlabeni.
UJesu manje ungena emzini waseKapernawume, osufana nendawo asukela kuyo lapho eya emsebenzini wokushumayela. Lapha kufika kuye amadoda amadala amaJuda nesicelo. Athunywe induna engoweZizwe yebutho lamaRoma, okuyindoda yohlanga oluhlukile kumaJuda.
Inceku ethandekayo yalenduna yempi isocansini lokufa ngenxa yokugula okungathi sína, futhi induna ifuna ukuba uJesu aphulukise inceku yayo. AmaJuda ayincengela ngobuqotho lenduna. “Ifanele ukuba uyenzele lokho,” esho, “ngokuba ithanda isizwe sakithi; yiyo esakhele isinagoge.”
Ngaphandle kokungabaza, uJesu uhamba nalamadoda. Nokho, lapho besondela, induna yempi ithumela kuye abangane ukuba bathi: “Nkosi, ungazihluphi, ngokuba angifanele ukuba ungene phansi kophahla lwami. Ngakho angizibonanga ukuthi ngifanele ukuza kuwe.”
Yeka amazwi okuthobeka ngenduna ejwayele ukushayela abanye umthetho! Kodwa futhi cishe icabanga ngoJesu, iqaphela ukuthi umthetho wenqabela umJuda ukuba angabi nobudlelwano nabangemaJuda. Ngisho noPetru wathi: “Niyazi ukuthi akuvunyelwe ukuba umuntu ongumJuda ahlangane, ahambelane nowesinye isizwe.”
Mhlawumbe ngenxa yokuba ingafuni ukuba uJesu ahlupheke ngokwephula lomthetho, lenduna ithumela abangane bayo ukuba bayicelele: “Yisho izwi, khona inceku yami iyakusinda. Ngokuba nami ngingumuntu ophansi kwamakhosi, nginamabutho phansi kwami; ngithi kwelinye: Hamba, lihambe; nakwelinye: Woza, lize; nasencekwini yami: Yenza lokhu, ikwenze.”
Nokho, lapho uJesu ezwa lokhu, uyamangala. “Ngiqinisile ngithi kini,” esho, “angizange ngifumane kwaIsrayeli ukukholwa okungaka kumuntu.” Ngemva kokuphulukisa inceku yalenduna, uJesu usebenzisa lesenzakalo ukuze alandise ngendlela abangemaJuda abakholwayo abayoboniswa ngayo umusa ngokuthola izibusiso ezenqatshwa amaJuda angenalukholo.
“Abaningi,” uJesu uthi, “bayakuza bevela empumalanga nasentshonalanga, bahlale ekudleni noAbrahama noIsaka noJakobe embusweni wezulu, kodwa abantwana bombuso bayakukhishelwa ebumnyameni obungaphandle; lapho kuyakuba-khona ukukhala nokugedla amazinyo.”
‘Abantwana bombuso abakhishelwa ebumnyameni obungaphandle’ bangamaJuda emvelo angalemukeli ithuba alinikezwa kuqala lokuba ababusi noKristu. UAbrahama, uIsaka, noJakobe bamelela ilungiselelo loMbuso kaNkulunkulu. Ngaleyondlela uJesu ulandisa indlela abeZizwe abayokwamukelwa ngayo ukuba bahlale etafuleni elingokwasezulwini, ngomqondo ongokomfanekiso, “embusweni wezulu.” Luka 7:1-10; Mathewu 8:5-13; IzEnzo 10:28.
▪ Kungani amaJuda ancengela induna yempi engoweZizwe?
▪ Kungenzeka ukuthi sasiyini isizathu sokuba lenduna ingamemeli uJesu ukuba angene endlini yayo?
▪ Usho ukuthini uJesu ngamazwi akhe okuphetha?