Isahluko 53
Umbusi Ofiswayo Ongaphezu Komuntu
LAPHO uJesu esuthisa ngokuyisimangaliso izinkulungwane, abantu bayamangala. “Impela lo ungumProfethi ozayo ezweni,” besho. Abaphethi nje kuphela ngokuthi uJesu kumelwe ukuba uyilowomprofethi omkhulu kunoMose kodwa nangokuthi angaba umbusi ofiseleka kakhulu. Ngakho baceba ukumbamba bambeke inkosi.
Nokho, uJesu uyakuqaphela lokho abantu abakucebayo. Ngakho uyahamba ngokushesha ukuze agweme ukuba bamkhethe ngenkani. Uhambisa isixuku aphoqelele abafundi bakhe ukuba bangene esikebheni sabo baphindele eKapernawume. Khona-ke umonyukela entabeni ukuze athandaze. Ngalobobusuku uJesu ulapho yedwa vó.
Ngokushesha ngaphambi kokuntwela kokusa uJesu uyaqalaza esendaweni ephezulu futhi ubona amagagasi ebhenguziswa umoya onamandla olwandle. Ekukhanyeni kwenyanga ecishe iphelele, njengoba sekusondele iPhasika, uJesu ubona isikebhe esinabafundi bakhe sihluleka ukudabula amagagasi. Lamadoda agwedla ngawo wonke amandla awo.
Ebona lokhu, uJesu uyehla entabeni aqale ukuhamba aye esikebheni enqamula amagagasi. Lesikebhe sesihambe cishe amakhilomitha ayisihlanu noma ayisithupha lapho uJesu efika kuso. Nokho, uyaqhubeka njengokungathi uzodlula. Lapho abafundi bembona, bayamemeza: “Yisithunzi.”
UJesu uphendula ngendlela eduduzayo: “Yimina, ningesabi.”
Kodwa uPetru uthi: “Nkosi, uma kunguwe, yisho ukuba ngize kuwe phezu kwamanzi.”
“Woza,” kuphendula uJesu.
Ngakho-ke, uPetru, ehla esikebheni, uhamba phezu kwamanzi uya kuJesu. Kodwa lapho ebheka isivunguvungu, uPetru ufikelwa ukwesaba, futhi lapho eqala ukucwila, uyakhala: “Nkosi, ngisindise!”
Elula isandla sakhe ngokushesha, uJesu uyambamba, ethi: “Awu, wena onokukholwa okuncinyane, ungabazeleni na?”
Ngemva kokuba uPetru noJesu bangene emkhunjini, umoya uyanqamuka, futhi abafundi bamangele. Kodwa ingabe kumelwe bamangale? Ukuba babethole ‘incazelo yezinkwa’ ngokwazisa isimangaliso esikhulu sikaJesu asenze emahoreni ambalwa ngaphambili lapho esuthisa izinkulungwane ngezinkwa ezinhlanu kuphela nangezinhlanzana ezimbili, khona-ke bekungamelwe kubonakale kumangaza kangaka ukuthi angakwazi ukuhamba phezu kwamanzi futhi athulise isivunguvungu. Nokho, manje abafundi bakhothamela uJesu bese bethi: “Ngempela uyiNdodana kaNkulunkulu.”
Ngesikhashana, bafika eGenesaretha, ithafa elihle, elithelayo elingaseKapernawume. Lapho bamisa umkhumbi ngehange. Kodwa lapho beya ogwini, abantu babona uJesu futhi bangena emzini oseduze, befuna labo abagulayo. Lapho laba belethwa ngezinhlaka zabo futhi bethinta nje umphetho wengubo kaJesu, baphulukiswa ngokuphelele.
Ngakolunye uhlangothi, isixuku esibone ukusuthiswa okuyisimangaliso kwezinkulungwane sithola ukuthi uJesu usehambile. Ngakho lapho izikejana ezivela eTiberiya zifika, sigibela kuzo futhi siya eKapernawume ukuyofuna uJesu. Lapho simthola, sithi: “Rabi, ufiké nini lapha na?” UJesu uyabathethisa, njengoba sizobona ngokushesha. Johane 6:14-25; Mathewu 14:22-36; Marku 6:45-56.
▪ Ngemva kokuba uJesu esuthise ngokuyisimangaliso izinkulungwane, yini abantu abafuna ukuyenza kuye?
▪ Yini uJesu ayibonayo lapho esentabeni aye wamonyukela kuyo, khona-ke wenzani?
▪ Kungani abafundi kungamelwe bamangazwe kangaka yilezinto?
▪ Kwenzekani ngemva kokuba befike ogwini?