Isahluko 89
Uhambo Lomusa Oluya EJudiya
EMASONTWENI ambalwa ngaphambili, phakathi noMkhosi Wokuhlanjululwa Kwethempeli eJerusalema, amaJuda azama ukubulala uJesu. Ngakho waya ngasenyakatho, ngokusobala endaweni eyayingekude noLwandle LwaseGalile.
Muva nje, ubelibangise eningizimu futhi eqondé eJerusalema, eshumayela endleleni emizaneni yasePhereya, isigodi esingasempumalanga yoMfula iJordani. Ngemva kokulandisa umfanekiso ngesicebi noLazaru, uyaqhubeka efundisa abafundi bakhe izinto ayezifundise ngaphambili lapho eseGalile.
Ngokwesibonelo, uthi kungcono kakhulu ngomuntu “ukuba itshe lokusila ligaxwe entanyeni yakhe, alahlwe elwandle” kunokuba akhubekise omunye ‘wabancinyane’ bakaNkulunkulu. Futhi ugcizelela isidingo sokuthethelela, echaza: “Noma [umfowenu] ekonela kasikhombisa ngosuku, abuyele kuwe kasikhombisa, ethi: Ngiyaphenduka, womthethelela.”
Lapho abafundi becela, “Yandisa ukukholwa kwethu,” uJesu uyaphendula: “Uma beninokukholwa okungangenhlamvu yesinaphi, beningasho kulomthombe: Simbuka, utshaleke elwandle, ubuyakunilalela.” Ngakho ngisho nokholo oluncane lungafeza izinto ezinkulu.
Ngokulandelayo, uJesu ulandisa ngesimo esenzeka ngempela esifanekisela isimo sengqondo esifanele ngenceku kaNkulunkulu umninimandla onke. “[Yi]muphi kini onenceku elimayo nokuba eyalusayo,” kuphawula uJesu, “athi kuyo ibuya endle: Sondela masinyane, uhlale phansi, udle? Kodwa akayikusho kuyo ukuthi: Lungisa engizakukudla, uzibophe, ungiphakele, ngize ngidle, ngiphuze, andukuba udle, uphuze wena, na? Uyayibonga yini inceku, ngokuba yenzile ekuyaliweyo na? Kunjalo nani, nxa nikwenzile konke enikuyaliweyo, anothi: Asizinceku zalutho; sikwenzile nje ebesifanele ukukwenza.” Ngakho-ke, izinceku zikaNkulunkulu akumelwe neze zibe nomuzwa wokuthi zenzela uNkulunkulu umusa ngokumkhonza. Kunalokho, kufanele ngaso sonke isikhathi zikhumbule ilungelo ezinalo lokumkhonza njengamalungu athenjwayo endlu yakhe.
Ngokusobala kungokushesha ngemva kokuba uJesu enikeze lomfanekiso lapho kufika isithunywa. Sasithunywe uMariya noMarta, odadewabo bakaLazaru, abahlala eBethaniya laseJudiya. “Nkosi, bheka, lo omthandayo uyagula,” kulandisa isithunywa.
UJesu uyaphendula: “Lokhukugula akusikho okokufa, kodwa kungenxa yenkazimulo kaNkulunkulu ukuba iNdodana kaNkulunkulu ikhazimuliswe ngakho.” Ngemva kokuhlala izinsuku ezimbili lapho ekhona, uJesu uthi kubafundi bakhe: “Asibuye, siye eJudiya.” Nokho, bayamkhumbuza: “Rabi, abaJuda basand’ ukufuna ukukukhanda ngamatshe; usaya futhi khona na?”
“Awakho yini amahora ayishumi nambili emini na?” kubuza uJesu ebaphendula. “Uma umuntu ehamba emini, akakhubeki, ngokuba ubona ukukhanya kwalelizwe. Kodwa uma umuntu ehamba ebusuku, uyakhubeka, ngokuba kungekho ukukhanya kuye.”
Lokho uJesu akushoyo ngokusobala ukuthi ‘amahora emini,’ noma isikhathi uNkulunkulu asimisele inkonzo kaJesu yasemhlabeni, awakapheli futhi akekho ongamlimaza uma nje engakapheli. Kudingeka asisebenzise ngokugcwele lesikhashana ‘semini’ esimsalele, njengoba kamuva kuzofika ‘ubusuku’ lapho izitha zakhe sezimbulele.
UJesu uyanezela: “ULazaru umhlobo wethu ulele, kepha ngiyahamba ukuba ngimvuse ebuthongweni.”
Ngokusobala becabanga ukuthi uLazaru uphumule ebuthongweni nokuthi lokhu kuwuphawu oluqinisekile lokuthi uzolulama, abafundi bayasabela: “Nkosi, uma elele, uyakusinda.”
Khona-ke uJesu ubatshela ngokungagwegwesi: “ULazaru ufile; ngiyathokoza ngenxa yenu ukuthi bengingekho, ukuze nikholwe; kepha asiye kuye.”
Eqaphela ukuthi uJesu angase abulawe eJudiya, kodwa efisa ukumsekela, uTomase ukhuthaza abafundi abakanye naye: “Asihambe nathi, ukuze sife kanye naye.” Ngakho befaka ukuphila kwabo engozini, abafundi baphelezela uJesu kuloluhambo lomusa oluya eJudiya. Luka 13:22; 17:1-10; Johane 10:22, 31, 40-42; 11:1-16.
▪ UJesu ubeshumayelaphi muva nje?
▪ Yikuphi ukufundisa uJesu akuphindayo, futhi isiphi isimo esenzeka ngempela asichazayo ukuze afanekisele liphi iphuzu?
▪ Iziphi izindaba uJesu azitholayo, futhi usho ukuthini ‘ngemini’ ‘nangobusuku’?
▪ Usho ukuthini uTomase uma ethi, ‘Asihambe ukuze sife kanye naye’?