INgxenye 11
Isisekelo Sezwe Elisha Esakhiwayo Manje
1, 2. Ekugcwalisekeni kwesiprofetho seBhayibheli, yini esiyibona yenzeka?
OKUNYE futhi okumangalisayo iqiniso lokuthi isisekelo sezwe elisha likaNkulunkulu siyakhiwa njengamanje, njengoba nje nezwe elidala likaSathane liwohloka. Sibona, uNkulunkulu eqoqa abantu kuzo zonke izizwe futhi ebenza babe isisekelo somphakathi omusha wasemhlabeni lowo ngokushesha ozothatha indawo yezwe lanamuhla elingenabo ubunye. EBhayibhelini, kweyesi-2 Petru 3:13, lomphakathi omusha ubizwa ngokuthi ‘umhlaba omusha.’
2 Isiprofetho seBhayibheli sithi futhi: “Kuyakuthi engxenyeni yokugcina yezinsuku [esikhathini esiphila kuso manje] . . . , abantu abaningi ngokuqinisekile bayakuhamba futhi bathi: ‘Wozani, nina bantu, sikhuphukele entabeni kaJehova [ukukhulekelwa kwakhe kweqiniso], . . . futhi uyosifundisa izindlela zakhe, futhi siyohamba emikhondweni yakhe.’—Isaya 2:2, 3, NW.
3. (a) Isiprofetho sikaIsaya sigcwaliseka phakathi kobani? (b) Ithini incwadi yokugcina yeBhayibheli ngalokhu?
3 Lesosiprofetho manje siyagcwaliseka phakathi kwalabo abazithoba ‘ezindleleni zikaNkulunkulu nabahamba emikhondweni yakhe.’ Incwadi yokugcina yeBhayibheli ithi lomphakathi wabantu wezizwe zonke ‘uyisixuku esikhulu . . . esivela kuzo zonke izizwe, nemindeni, nabantu, nezilimi,’ ubuzalwane bembulunga yonke ngempela bukhonza uNkulunkulu ngobunye. Futhi iBhayibheli lithi: “Laba yibo abaphuma osizini olukhulu.” Okungukuthi, bayosinda ekupheleni kwalesimiso esibi sezinto.—IsAmbulo 7:9, 14; Mathewu 24:3.
Ubuzalwane Bangempela Bomhlaba Wonke
4, 5. Kungani ubuzalwane bomhlaba wonke boFakazi BakaJehova buyinto enokwenzeka?
4 Izigidi zoFakazi BakaJehova zizama ngobuqotho ukuphila ngokuvumelana neziyalezo kanye nezindlela zikaNkulunkulu. Ithemba lazo lokuphila phakade lisekelwe ezweni elisha likaNkulunkulu. Ngokuziphatha kwabo kwansuku zonke kokulalela imithetho kaNkulunkulu, bambonisa ukuthi bazimisele ukuthobela indlela yakhe yokubusa kokubili manje nasezweni elisha. Yonke indawo, kungakhathaliseki ubuzwe noma uhlanga lwabo, balalela izindinganiso ezifanayo—ezibekwe uNkulunkulu eZwini lakhe. Yingakho bewubuzalwane bangempela bezizwe zonke, umphakathi wezwe elisha owenziwe uNkulunkulu.—Isaya 54:13; Mathewu 22:37, 38; Johane 15:9, 14.
5 OFakazi BakaJehova abazithatheli udumo ngokuba kwabo ubuzalwane bembulunga yonke obuyingqayizivele. Bayazi ukuthi lokhu kuwumphumela womoya onamandla kaNkulunkulu osebenza kubantu abathobela imithetho yakhe. (IzEnzo 5:29, 32; Galathiya 5:22, 23) Kuwumsebenzi kaNkulunkulu. Njengoba uJesu asho, “okungenzeki kubantu kungenzeka kuNkulunkulu.” (Luka 18:27) Ngakho uNkulunkulu owenza kwaba khona indawo yonke eyohlala ikhona uyena futhi owenza kube nomphakathi wezwe elisha oyohlala ukhona.
6. Kungani ubuzalwane boFakazi BakaJehova bungase bubizwe ngokuthi isimangaliso sanamuhla?
6 Kanjalo, indlela kaJehova yokubusa ezweni elisha iyabonakala kakade kulokho akuvezayo esisekelweni sezwe elisha esakhiwayo njengamanje. Futhi lokho aye wakwenza ngoFakazi bakhe, ngomqondo othile, kuyisimangaliso sanamuhla. Ngani? Ngenxa yokuthi uye wenza oFakazi BakaJehova baba ubuzalwane bangempela bomhlaba wonke, obungeke buhlukaniswe izithakazelo ezihlukanisayo zobuzwe, ubuhlanga, noma inkolo. Nakuba oFakazi bebalelwa ezigidini futhi behlala emazweni angaphezu kuka-200, bahlanganiswa ndawonye ngesibopho esingagqabuki. Lobuzalwane bomhlaba wonke, obuyingqayizivele kuwo wonke umlando, ngempela buyisimangaliso sanamuhla—umsebenzi kaNkulunkulu.—Isaya 43:10, 11, 21; IzEnzo 10:34, 35; Galathiya 3:28.
Ukubona Abantu BakaNkulunkulu
7. UJesu wathi abalandeli bakhe beqiniso babeyobonakala ngani?
7 Kungabonakala kanjani ngokuqhubekayo ukuthi yibaphi abantu uNkulunkulu abasebenzisa njengesisekelo sezwe lakhe elisha? Nokho, obani abagcwalisa amazwi kaJesu akuJohane 13:34, 35? Wathi: “Ngininika umyalo omusha wokuba nithandane; njengalokho nginithandile, nani nithandane. Ngalokho bonke bayakukwazi ukuthi ningabafundi bami, uma nithandana.” OFakazi BakaJehova bayawakholelwa lamazwi kaJesu futhi benza ngokuvumelana nawo. Njengoba iZwi likaNkulunkulu liyala, ‘banothando olujulile ngomunye nomunye.’ (1 Petru 4:8, NW) “[Bembatha] uthando oluyisibopho sokuphelela.” (Kolose 3:14) Ngakho uthando lobuzalwane “luyinhlaka” ebahlanganisayo emhlabeni wonke.
8. Eyoku-1 Johane 3:10-12 ibaphawula kanjani ngokuqhubekayo abantu bakaNkulunkulu?
8 Futhi, eyoku-1 Johane 3:10-12 ithi: “Ngalokho kubonakala abantwana bakaNkulunkulu nabantwana bakaSathane; lowo ongenzi ukulunga akasiye okaNkulunkulu, naye ongamthandi umzalwane wakhe. Nanti izwi enalizwayo kwasekuqaleni lokuba sithandane, kungabi-njengoKayini owaba-ngowomubi, wabulala umfowabo.” Kanjalo, abantu bakaNkulunkulu bawubuzalwane obungenabudlova, bembulunga yonke.
Esinye Isici Esibaphawulayo
9, 10. (a) Abantu bakaNkulunkulu babeyobonakala ngamuphi umsebenzi ezinsukwini zokugcina? (b) OFakazi BakaJehova baye bawugcwalisa kanjani umbhalo kaMathewu 24:14?
9 Kunenye indlela yokubona izinceku zikaNkulunkulu. Esiprofethweni sakhe esiphathelene nokuphela kwezwe, uJesu wakhuluma ngezinto eziningi ezaziyophawula lenkathi yesikhathi njengezinsuku zokugcina. (Bheka iNgxenye 9.) Isici esiyisisekelo salesiprofetho sishiwo emazwini akhe akuMathewu 24:14: “Lelivangeli lombuso liyakushunyayelwa ezweni lonke, kube-ngubufakazi ezizweni zonke, andukuba kufike ukuphela.”
10 Ingabe sisibonile lesosiprofetho sigcwaliseka? Yebo. Kusukela izinsuku zokugcina zaqala ngo-1914, oFakazi BakaJehova baye bashumayela izindaba ezinhle zoMbuso kaNkulunkulu kuwo wonke umhlaba ngendlela uJesu ayala ukuba kwenziwe ngayo, okungukuthi, emakhaya abantu. (Mathewu 10:7, 12; IzEnzo 20:20) Izigidi zoFakazi zihambela abantu bazo zonke izizwe ukuze zikhulume nabo ngezwe elisha. Lokhu kuye kwaholela ekubeni uthole lencwajana, njengoba umsebenzi woFakazi BakaJehova uhlanganisa ukunyathelisa kanye nokusakaza izigidi zezincwadi ezikhuluma ngoMbuso kaNkulunkulu. Ingabe bakhona abanye obaziyo abashumayela ngoMbuso kaNkulunkulu ezindlini ngezindlu kulo lonke izwe? Futhi uMarku 13:10 ubonisa ukuthi lomsebenzi wokushumayela nokufundisa kufanele wenziwe “kuqala,” ngaphambi kokuba kufike ukuphela.
Ukuphendula Impikiswano Enkulu Yesibili
11. Yikuphi okunye oFakazi BakaJehova abakufezayo ngokuzithoba ekubuseni kukaNkulunkulu?
11 Ngokuzithoba emithethweni nasezimisweni zikaNkulunkulu, oFakazi BakaJehova bafeza okunye futhi. Babonisa ukuthi uSathane wayenamanga lapho ethi abantu babengeke bathembeke kuNkulunkulu lapho bengaphansi kovivinyo, ngaleyondlela baphendula impikiswano enkulu yesibili, ehilela ubuqotho babantu. (Jobe 2:1-5) Njengoba bewumphakathi wabantu abayizigidi abavela kuzo zonke izizwe, oFakazi babonisa, njengendikimba eyodwa, ukuthembeka ekubuseni kukaNkulunkulu. Nakuba bengabantu abangaphelele, basekela uhlangothi lukaNkulunkulu empikiswaneni yobukhosi bendawo yonke, naphezu kokucindezela kukaSathane.
12. Ngokholo lwabo, oFakazi balingisa bani?
12 Namuhla, lezigidi zoFakazi BakaJehova zenezela ubufakazi bazo ohlwini olude lwabanye ofakazi ezikhathini ezedlule ababonisa ukwethembeka kuNkulunkulu. Abanye balabo babengoAbela, uNowa, uJobe, uAbrahama, uSara, uIsaka, uJakobe, uDebora, uRuthe, uDavide, noDaniyeli, uma sibala nje abambalwa. (Heberu, isahluko 11) Njengoba iBhayibheli lisho, ‘bayifu elikhulu lofakazi abathembekile.’ (Heberu 12:1, NW) Laba kanye nabanye kuhlanganise nabafundi bakaJesu babulondoloza ubuqotho kuNkulunkulu. Futhi uJesu ngokwakhe wabeka isibonelo esikhulu kunazo zonke ngokulondoloza ubuqotho obuphelele.
13. Yimaphi amazwi uJesu awasho ngoSathane aye aba iqiniso?
13 Lokhu kufakazela ukuthi kuyiqiniso lokho uJesu akusho ngoSathane kubaholi benkolo: “Kodwa kalokhu nifuna ukungibulala mina-muntu onitshelé iqiniso, engilizwé kuNkulunkulu; . . . Nina ningabakayihlo uSathane, nithanda ukwenza izinkanuko zikayihlo. Yena wayengumbulali wabantu kwasekuqaleni, akemi eqinisweni, ngokuba iqiniso lingekho kuye. Nxa ekhuluma amanga, ukhuluma okungokwakhe, lokhu engumqambimanga noyise wawo.”—Johane 8:40, 44.
Yikuphi Okukhethayo?
14. Yini eyenzekayo manje esisekelweni sezwe elisha?
14 Isisekelo sezwe elisha uNkulunkulu asakhayo manje emphakathini wezizwe zonke woFakazi BakaJehova siya siqina ngokwengeziwe. Unyaka ngamunye amakhulu ezinkulungwane zabantu asebenzisa inkululeko yawo yokuzinqumela, esekelwe olwazini oluqondile, ukuze amukele ukubusa kukaNkulunkulu. Aba ingxenye yomphakathi wezwe elisha, asekele uhlangothi lukaNkulunkulu lwempikiswano yobukhosi bendawo yonke, futhi abonise uSathane enamanga.
15. Yimuphi umsebenzi wokuhlukanisa uJesu awenzayo osukwini lwethu?
15 Ngokukhetha ukubusa kukaNkulunkulu, afanelekela ukuba ‘ngakwesokunene’ sikaKristu njengoba ehlukanisa “izimvu nezimbuzi.” Esiprofethweni sakhe esiphathelene nezinsuku zokugcina, uJesu wabikezela: “Kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi, imise izimvu ngakwesokunene sayo kepha izimbuzi ngakwesokhohlo.” Izimvu zingabantu abathobekile abahlanganyela nabafowabo bakaKristu futhi babasekele, bezithoba ekubuseni kukaNkulunkulu. Izimbuzi zingabantu abanenkani ababenqabayo abafowabo bakaKristu futhi abangenzi lutho ukuze basekele ukubusa kukaNkulunkulu. Kuba namiphi imiphumela? UJesu wathi: “Laba [izimbuzi] bayakumuka, baye ekujezisweni okuphakade, kodwa abalungileyo [izimvu] baye ekuphileni okuphakade.”—Mathewu 25:31-46.
16. Yini okumelwe uyenze uma ufuna ukuphila ePharadesi elizayo?
16 Ngempela, uNkulunkulu uyasikhathalela! Maduzane uzolungiselela ipharadesi elijabulisayo lasemhlabeni. Ingabe uyafuna ukuphila kuleloPharadesi? Uma kunjalo, bonisa ukwazisa onakho ngamalungiselelo kaJehova ngokufunda ngaye nangokwenza ngokuvumelana nalokho okufundayo. “Mfuneni uJehova esenokutholwa, nimbize eseseduze. Omubi makashiye indlela yakhe, nomuntu owenza okubi imicabango yakhe, abuyele kuJehova, uyakuba-nomusa kuye.”—Isaya 55:6, 7.
17. Kungani singekho isikhathi sokuchithwa ekukhetheni ukuthi uzokhonza bani?
17 Asikho isikhathi sokuchithwa. Ukuphela kwalesimiso esidala kuseduze kakhulu. IZwi likaNkulunkulu liyeluleka: “Ningathandi izwe nezinto ezisezweni. Uma umuntu ethanda izwe, uthando lukaYise alukho kuye, . . . Izwe liyadlula kanye nenkanuko yalo; kepha owenza intando kaNkulunkulu uhlala kuze kube-phakade.”—1 Johane 2:15-17.
18. Iyiphi inkambo eyokwenza ukwazi ukubheka phambili ngokuqiniseka ekuphileni ezweni elisha elihle likaNkulunkulu?
18 Abantu bakaNkulunkulu manje baqeqeshelwa ukuphila phakade ezweni elisha. Bafunda amakhono angokomoya kanye namanye adingekayo ekwenzeni ipharadesi. Sikunxusa ukuba ukhethe uNkulunkulu njengoMbusi futhi usekele umsebenzi osindisa ukuphila enza ukuba wenziwe emhlabeni wonke namuhla. Tadisha iBhayibheli noFakazi BakaJehova, futhi ufinyelele ekwazini uNkulunkulu okukhathalela ngempela futhi ozoqeda ukuhlupheka. Ngalendlela nawe ungaba ingxenye yesisekelo sezwe elisha. Khona-ke ungabheka phambili ngokuqiniseka ekuzuzeni umusa kaNkulunkulu nasekuphileni phakade kulelozwe elisha elimangalisayo.
[Isithombe ekhasini 31]
OFakazi BakaJehova bawubuzalwane bangempela bezizwe zonke
[Isithombe ekhasini 32]
Isisekelo sezwe elisha likaNkulunkulu siyakhiwa manje