Isahluko 2

UJesu Kristu, Ufakazi Othembekile

IMINYAKA ecishe ibe ngu-4 000, uhide lofakazi bangaphambi kobuKristu lwalunikeze ubufakazi balo. Kodwa izimpikiswano ezihilela ubukhosi bukaNkulunkulu nobuqotho bezinceku zakhe zazingakaxazululeki kwanhlobo. Manje safika isikhathi sokuba “imbewu” yasebukhosini ethenjisiwe, uMesiya, ibonakale emhlabeni.—Gen. 3:15, NW.

Phakathi kwawo wonke amadodana akhe omoya ayizigidigidi, ubani uJehova amkhethela lesisabelo? Wonke ayekubonile okwenzeka e-Edene futhi ngokungangabazeki ayezazi izimpikiswano zendawo yonke ezaphakanyiswa. Kodwa ubani owayekulangazelela kakhulu ukuhlanza igama likaJehova nokulwela ubukhosi bakhe? Ubani owayenganikeza impendulo ewujuqu enseleleni kaSathane yokuthi akekho umuntu owayeyogcina ubuqotho ebukhosini bukaNkulunkulu ngaphansi kovivinyo? Lowo uJehova amkhetha kwakuyiZibulo lakhe, iNdodana yakhe ezelwe yodwa, uJesu.—Joh. 3:16; Kol. 1:15.

UJesu wasamukela ngentshiseko nangokuzithoba lesisabelo, nakuba kwakusho ukushiya ikhaya lasezulwini ayesehlale kulo noYise isikhathi eside ngaphezu kwanoma ubani omunye. (Joh. 8:23, 58; Fil. 2:5-8) Sasiyini isisusa sakhe? Uthando olujulile ngoJehova nesifiso sentshiseko sokubona igama laKhe lihlanzwa kunoma isiphi isihlamba. (Joh. 14:31) Futhi uJesu wenza lokhu ngenxa yothando ngesintu. (IzAga 8:30, 31; qhathanisa noJohane 15:13.) Ukuzalwa kwakhe emhlabeni, ekuqaleni kwekwindla yonyaka ka-2 B.C.E., kwenziwa kwaba nokwenzeka ngomoya ongcwele—uJehova adlulisela ngawo ukuphila kukaJesu kusuka ezulwini kuya esibelethweni sentombi engumJuda uMariya. (Math. 1:18; Luka 1:26-38) Kanjalo uJesu wazalelwa esizweni sama-Israyeli.—Gal. 4:4.

Ngaphezu kwanoma yimuphi omunye umIsrayeli, uJesu wayazi ukuthi kwakumelwe abe ufakazi kaJehova. Ngani? Wayeyilungu lesizwe uJehova ayethe kuso ngomprofethi u-Isaya: “Ningofakazi bami.” (Isaya 43:10) Ngaphezu kwalokho, lapho uJesu ebhapathizwa eMfuleni iJordani ngo-29 C.E., uJehova wamgcoba ngomoya ongcwele. (Math. 3:16) Kanjalo uJesu wanikezwa amandla, njengoba akufakazela kamuva, okuba ‘amemezele unyaka womusa kaJehova.’—Isaya 61:1, 2; Luka 4:16-19.

UJesu wasifeza ngokwethembeka isabelo sakhe futhi waba ufakazi kaJehova omkhulu kunabo bonke abake baba khona emhlabeni. Khona-ke, ngokufaneleke kakhulu, umphostoli uJohane, owama eduze noJesu ngesikhathi sokufa kwakhe, ubiza uJesu ngokuthi “ufakazi othembe[kileyo].” (IsAm. 1:5) Futhi encwadini yesAmbulo 3:14, uJesu okhazinyulisiwe uzibiza ngokuthi “uAmen” nangokuthi “ufakazi othembe[kile] noqinisileyo.” Yibuphi ubufakazi ‘lofakazi othembekileyo’ abunikeza?

‘Ukufakazela Iqiniso’

Lapho equla icala phambi kombusi waseRoma uPilatu, uJesu wathi: “Ngizalelwe lokho, ngafikela lokho ezweni ukuba ngifakazele iqiniso. Bonke abeqiniso bayalizwa izwi lami.” (Joh. 18:37) Yiliphi iqiniso uJesu alifakazela? Kwakuyiqiniso likaNkulunkulu, isambulo sezinjongo zikaJehova zaphakade.—Joh. 18:33-36.

Nokho, uJesu walifakazela kanjani leliqiniso? Isenzo sesiGreki esisho ukuthi “fakazela” sisho futhi ukuthi “memezela, qinisekisa, khulumela kahle, vumela.” Kuma-papyrus, asendulo esiGreki olunye uhlobo lwesenzo esithi (mar·ty·roʹ) lwaluvame ukuvela ngemva kwesignesha, njengasezivumelwaneni zamabhizinisi. Khona-ke, ngenkonzo yakhe uJesu kwakumelwe aqinisekise iqiniso likaNkulunkulu. Lokhu ngokuqinisekile kwakudinga ukuba amemezele, noma ashumayele, leloqiniso kwabanye. Nokho, kwakudingeka okungaphezu nje kokukhuluma.

“Mina . . . [ngiyi]qiniso,” kusho uJesu. (Joh. 14:6) Yebo, waphila ngendlela eyayizomenza agcwalise iqiniso likaNkulunkulu. Injongo kaNkulunkulu ngokuqondene noMbuso kanye noMbusi wawo wobuMesiya yayicacisiwe esiprofethweni. UJesu, ngayo yonke inkambo yakhe yokuphila kwasemhlabeni, eyafinyelela umvuthwandaba ekufeni kwakhe okuwumhlatshelo, wagcwalisa zonke izinto ezaziprofethwe ngaye. Kanjalo waliqinisekisa iqiniso lezwi likaJehova elingokwesiprofetho. Ngenxa yalesisizathu umphostoli uPawulu wayengase athi: “Noma izithembiso zikaNkulunkulu ziziningi kangakanani, kuyena zinguyebo, ngakho-ke ngaye zinguAmen [okusho ukuthi, “makube njalo,” noma “ngokuqinisekile”] futhi, kudunyiswe uNkulunkulu ngathi.” (2 Kor. 1:20) Yebo, uJesu nguyena okugcwaliseka kuye izithembiso zikaNkulunkulu.—IsAm. 3:14.

Ukufakazela Igama LikaNkulunkulu

UJesu wafundisa abalandeli bakhe ukuba bathandaze: “Baba wethu osezulwini, malingcweliswe [noma, “libhekwe njengelingcwele; liphathwe njengelingcwele”] igama lakho.” (Math. 6:9, umbh. waph. weNW) Ngobusuku bokugcina bokuphila kwakhe kwasemhlabeni, ethandaza kuYise wasezulwini, uJesu wabuye wathi: “Ngibonakalisile igama lakho kubantu ongiphé bona kwabasezweni; babengabakho, wangipha bona; baligcinile izwi lakho. Ngibazisile igama lakho, ngizakubazisa lona ukuba uthando ongithandé ngalo lube-kubo, nami ngibe-kubo.” (Joh. 17:6, 26) Eqinisweni, lokhu kwakuyinjongo eyinhloko uJesu ayeyizele emhlabeni. Yini eyayihilelekile ekwenzeni kwakhe ukuba igama likaNkulunkulu laziwe?

Abalandeli bakaJesu kakade base belazi futhi belisebenzisa igama likaNkulunkulu. Babelibona futhi belifunda emiqulwini yeBhayibheli yesiHeberu eyayitholakala emasinagogeni abo. Babuye balibona futhi balifunda kuyi-Septuagint—inguqulo yesiGreki yemiBhalo YesiHeberu, ababeyisebenzisa ekufundiseni nasekubhaleni. Uma base belazi igama laphezulu, kungamuphi umqondo uJesu alibonakalisa, noma walazisa kubo?

Ngezikhathi zeBhayibheli amagama ayengezona izimpawu nje. I-Greek-English Lexicon of the New Testament, kaJ. H. Thayer ithi: “Igama likaNkulunkulu eT[estamenteni] E[lisha] lisetshenziselwa zonke lezozimfanelo kubakhulekeli bakhe ezihlanganisiwe kulelogama, futhi lelo uNkulunkulu azazisa ngalo kubantu.” UJesu wenza igama likaNkulunkulu laziwa hhayi nje ngokulisebenzisa kodwa nangokwambula uMuntu obizwa ngalo—izinjongo zakhe, imisebenzi, nezimfanelo. Njengomuntu ‘oweyesesifubeni sikaYise’ uJesu wayengachaza uYise ngendlela okungekho muntu owayengamchaza ngayo. (Joh. 1:18) Ngaphezu kwalokho, uJesu wambonakalisa ngokuphelele uYise kangangokuba abafundi bakaJesu ‘babengambona’ uYise eNdodaneni. (Joh. 14:9) Ngalokho akusho nakwenza, uJesu wafakazela igama likaNkulunkulu.

Wafakaza NgoMbuso KaNkulunkulu

‘Njengofakazi othembekile,’ uJesu wayengummemezeli woMbuso kaNkulunkulu ngendlela evelele. Ngokugcizelela, wathi: “Ngimelwe ukushumayela ivangeli lombuso kaNkulunkulu, ngokuba ngithunyelwe lokho.” (Luka 4:43) Wawumemezela lowoMbuso wasezulwini kulo lonke elasePalestine, ehamba amakhilomitha amaningi kakhulu ngezinyawo. Washumayela nomaphi lapho kwakunabantu ababengalalela khona: ezingwini zamachibi, emagqumeni, emadolobheni amakhulu namancane, emasinagogeni nasethempelini, ezindaweni zokuthengisa, nasemakhaya abantu. Kodwa uJesu wayazi ukuthi indawo ayengayihlanganisa kanye nenani labantu ayengafakaza kubo kwakulinganiselwe. (Qhathanisa noJohane 14:12.) Ngakho ehlose ukuhlanganisa insimu yomhlaba wonke, uJesu waqeqesha futhi wathuma abafundi bakhe ukuba babe abamemezeli boMbuso.—Math. 10:5-7; 13:38; Luka 10:1, 8, 9.

UJesu wayewufakazi okhuthele noshisekayo, futhi akazange azivumele aphambukiswe. Nakuba abonisa isithakazelo somuntu siqu ezidingweni zabantu, akazange abe matasa kakhulu ekwenzeni izinto ezaziyoletha impumuzo yesikhashana kangangokuba adebesele isabelo ayesinikezwe uNkulunkulu sokuqondisa abantu ekhambini elihlala njalo lezinkinga zabo—uMbuso kaNkulunkulu. Kwesinye isenzakalo, ngemva kokuba esuthise ngokuyisimangaliso amadoda angu-5 000 (mhlawumbe abantu abangaphezu kwabangu-10 000 uma kubalwa nabesifazane nabantwana), iqembu lamaJuda lafuna ukumbamba limenze inkosi yasemhlabeni. Yini uJesu ayenza? “Wamonyukela futhi entabeni yena yedwa.” (Joh. 6:1-15; qhathanisa noLuka 19:11, 12; IzEnzo 1:6-9.) Nakuba enza izimangaliso eziningi zokuphulukisa, uJesu wayengaziwa neze ngokuyinhloko ngokuthi unguMenzi Wezimangaliso, kodwa, kunalokho, kokubili abakholwayo nabangakholwa babembheka ‘njengoMfundisi.’—Math. 8:19; 9:11; 12:38; 19:16; 22:16, 24, 36; Joh. 3:2.

Ngokusobala, ukufakazela uMbuso kaNkulunkulu kwakuwumsebenzi obaluleke kakhulu uJesu ayengawenza. Kuyintando kaJehova ukuba wonke umuntu azi lokho uMbuso waKhe oyikho nendlela oyozifeza ngayo izinjongo zaKhe. Uwuthanda kakhulu, ngoba uyolingcwelisa ngawo igama laKhe, elihlanza kunoma isiphi isihlamba. UJesu wayekwazi lokho, ngakho wenza lowoMbuso waba isihloko sokushumayela kwakhe. (Math. 4:17) Ngokuhlanganyela ngomphefumulo wonke ekuwumemezeleni, uJesu wasekela ubukhosi bukaNkulunkulu obufanele.

Ufakazi Owathembeka Kwaze Kwaba Ngisho Nasekufeni

Akekho umuntu ongathanda uJehova nobukhosi baKhe ngaphezu kokuba uJesu enza. ‘Njengezibulo lezidalwa zonke,’ uJesu ‘wayemazi kahle’ uYise ngenxa yokuthi wayenobuhlobo obuseduze naye njengesidalwa somoya emazulwini. (Kol. 1:15; Math. 11:27, qhathanisa neNW.) Wayezithobe ngokuzithandela ebukhosini bukaNkulunkulu phakathi nesikhathi esiyiminyaka engenakubalwa ngaphambi kokudalwa kwendoda nowesifazane bokuqala. (Qhathanisa noJohane 8:29, 58.) Yeka indlela okumelwe ukuba wazizwa edabuke kakhulu ngayo lapho u-Adamu no-Eva benqaba ubukhosi bukaNkulunkulu! Nokho, walinda ngokubekezela emazulwini iminyaka ecishe ibe ngu-4 000, khona-ke, ekugcineni, safika isikhathi sokuba akhonze njengofakazi kaJehova omkhulu kunabo bonke abake baba khona emhlabeni!

UJesu wayazi kahle ukuthi izimpikiswano zendawo yonke zazihilela yena ngokuqondile. Kungenzeka kwakubonakala sengathi uJehova wayemvikele. (Qhathanisa noJobe 1:9-11.) Yiqiniso, wayebonise ukwethembeka kwakhe nokuzinikela ngesikhathi esemazulwini, kodwa ingabe wayeyobulondoloza ubuqotho bakhe njengomuntu emhlabeni ngaphansi kwanoma yiluphi uhlobo lovivinyo? Ingabe wayengamelana noSathane esimweni okwakubonakala kuso sengathi isitha sakhe sizomnqoba?

ISitha esinjengenyoka asizange sipholise maseko. Ngokushesha ngemva kokubhaphathizwa nokugcotshwa kukaJesu, uSathane wamlinga ukuba abonise ubugovu, aziphakamise, futhi, ekugcineni, anqabe ubukhosi bukaYise. Kodwa inkulumo engagunci uJesu ayisho kuSathane ethi, “Wokhuleka eNkosini uNkulunkulu wakho, umkhonze yena yedwa,” yabonisa ukuthi wayemi kuphi kulezimpikiswano. Yeka indlela ayehluke ngayo ku-Adamu!—Math. 4:1-10.

Inkambo uJesu ayemiselwe yona yasho ukuhlupheka nokufa, futhi uJesu wayekwazi kahle lokhu. (Luka 12:50; Heb. 5:7-9) Nokho, “wathi efunyenwe enjengomuntu ngesimilo, wazithobisa, elalela kwaze kwaba-sekufeni, yebo, ekufeni [esigxotsheni sokuhlushwa, NW].” (Fil. 2:7, 8) Ngalokho uJesu wabonakalisa uSathane engumqambimanga omkhulu, ewuphendula ngokuphelele umbuzo othi, Ingabe ukhona umuntu oyolondoloza ubuqotho ebukhosini bukaNkulunkulu uma uSathane evunyelwa ukuba amvivinye? Kodwa ukufa kukaJesu kwafeza okuningi nangaphezulu.

Ngokufa kwakhe esigxotsheni sokuhlushwa, uJesu wanikela ‘ngokuphila kwakhe kwaba isihlengo sabaningi.’ (Math. 20:28; Marku 10:45) Ukuphila kwakhe okuphelele kobuntu kwakunenani lomhlatshelo. Ukudela kukaJesu ukuphila kwakhe akuzange nje kwenze kube nokwenzeka ngathi ukuba sithole ukuthethelelwa kwezono kodwa futhi kusivulela ithuba lokuba sithole ukuphila okuphakade epharadesi emhlabeni, ngokuvumelana nenjongo kaNkulunkulu yokuqala.—Luka 23:43; IzE. 13:38, 39; Heb. 9:13, 14; IsAm. 21:3, 4.

UJehova wabonisa uthando lwakhe nokwamukela kwakhe uJesu ‘njengofakazi othembekileyo’ ngokumvusa kwabafileyo ngosuku lwesithathu. Lokhu kwaqinisekisa ukuthi babuyiqiniso ubufakazi uJesu ayebunikezile ngokuqondene noMbuso. (IzE. 2:31-36; 4:10; 10:36-43; 17:31) Ngemva kokuqhubeka esemhlabeni izinsuku ezingu-40, okwathi phakathi nalesosikhathi wabonakala kubaphostoli bakhe izikhathi eziningi, uJesu wakhuphukela ezulwini.—IzE. 1:1-3, 9.

UJesu wayebonisile ukuthi ukumiswa koMbuso kaNkulunkulu wobuMesiya kwakuyokwenzeka esikhathini esizayo esikude. (Luka 19:11-27) Lesosenzakalo sasiyophawula futhi ukuqala ‘kokuba khona’ kukaJesu ‘nokwesiphelo sesimiso sezinto.’ (Math. 24:3, qhathanisa neNW.) Kodwa abalandeli bakhe emhlabeni babeyobona ngani lapho lezizinto sezizokwenzeka? UJesu wabanikeza “isibonakaliso”—isibonakaliso esihlanganisa izici eziningi esasakhiwa ubufakazi obuningi, obuhlanganisa izimpi, ukuzamazama komhlaba, ukuntuleka kokudla, izifo ezingumshaya-bhuqe, kanye nokwanda kokungabi-namthetho. Ingxenye ebalulekile yalesosibonakaliso yayiyoba ukuthi futhi izindaba ezinhle zoMbuso ziyoshunyayelwa kuwo wonke umhlaba owakhiwe kube ubufakazi ezizweni zonke. Zonke izici zalesosibonakaliso esiphawulekayo ziyabonakala osukwini lwethu, okubonisa ukuthi siphila esikhathini sokuba khona kukaJesu njengeNkosi yasezulwini nesesiphelo sesimiso sezinto.a—Math. 24:3-14.

Nokho, kuthiwani ngabalandeli bakaJesu? Phakathi nalesikhathi sokuba khona kukaJesu, abantu abangabalandeli bamasonto amaningi ahlukene bathi balandela uKristu. (Math. 7:22) Nokho, iBhayibheli lithi “yinye inkolo.” (Efe. 4:5) Ngakho ungalibona kanjani ibandla lobuKristu leqiniso, elivunyelwa futhi liqondiswe uNkulunkulu? Lokho ungakwenza ngokuhlola lokho imiBhalo ekushoyo ngebandla lobuKristu lekhulu lokuqala bese ubheka ukuthi obani namuhla abalandela leyonkambo efanayo.

[Imibhalo yaphansi]

[Amazwi acashunwe esihlokweni ekhasini 20]

‘Wayezalelwe ukufakazela iqiniso’

[Amazwi acashunwe esihlokweni ekhasini 21]

UJesu wenza uMbuso KaNkulunkulu waba isihloko sokushumayela kwakhe

[Amazwi acashunwe esihlokweni ekhasini 22]

UJesu Kristu wayewufakazi kaJehova omkhulu kunabo bonke abake baba khona emhlabeni

[Isithombe esigcwele ikhasi 23]