Isahluko 11

Indlela Okwenzeka Ngayo Ukuba Saziwe Ngokuthi SingoFakazi BakaJehova

PHAKATHI namashumi eminyaka okuqala omlando wabo wosuku lwanamuhla, ngokuvamile babebizwa nje ngokuthi abaFundi BeBhayibheli. Lapho abanye bebabuza igama lenhlangano, abafowethu ngokuvamile babephendula ngokuthi, “SingamaKristu.” UMfoweth’ uRussell waphendula umbuzo onjalo, ku-Nqabayokulinda (yesiNgisi), ngokuthi: “Asizahlukanisi kwamanye amaKristu ngokuzi­biza nganoma iliphi igama elihlukanisayo noma elikhethekile. Sanelisekile ngegama elithi, amaKristu, abangcwele bokuqala ababaziwa ngalo.”—Eka-September 1888.

Khona-ke, kwenzeka kanjani ukuba namuhla saziwe ngokuthi singoFakazi BakaJehova?

Igama Elithi AmaKristu

Abalandeli bakaJesu Kristu beqiniso, ekhulwini lokuqala nasezikhathini zanamuhla, baye bazibiza bona kanye nabakholwa kanye nabo ngokuthi “abazalwane,” “abahlobo,” nangokuthi “ibandla likaNkulunkulu.” (IzE. 11:29; 3Joh. 15; 1 Kor. 1:2) Futhi babebiza uKristu ngokuthi “iNkosi” kanti bona babezibiza ngokuthi “izinceku zikaKristu Jesu” nangokuthi ‘izinceku zikaNkulunkulu.’ (Kol. 3:24; Fil. 1:1; 1 Pet. 2:16) Amagama anjalo aye asetshenziswa ngenkululeko ebandleni, futhi aqondwa kahle.

Ekhulwini lokuqala, indlela yokuphila esekelwe ekukholelweni kuJesu Kristu (futhi, ngomqondo oweluliwe, ibandla ngokwalo) yayibizwa ngokuthi ‘iNdlela.’ (IzE. 9:2; 19:9) Izindlela eziningi izEnzo 18:25 ezihunyushwe ngazo zibonisa ukuthi yayibizwa nangokuthi “indlela [kaJehova, NW].”a Ngakolunye uhlangothi, abanye ababengaphandle kwebandla ngokugcona babethi ‘iyihlelo lamaNazaretha.’—IzE. 24:5.

Ngo-44 C.E. noma ngokushesha ngemva kwalokho, abalandeli abathembekile bakaJesu Kristu baqala ukwaziwa ngokuthi amaKristu. Abanye bathi abantu bangaphandle ababaqamba ngokuthi amaKristu, bekwenza ngendlela yokubalulaza. Nokho, abalobi bezichazamazwi zeBhayibheli kanye nabahlaziyi balo bathi isenzo esisetshenziswe kuzEnzo 11:26 sisikisela ukuqondisa kwaphezulu noma isambulo. Ngakho, kuyi-New World Translation, lowombhalo ufundeka kanje: “Kwaqala e-Antiyokiya ukuba abafundi ngesiqondiso saphezulu babizwe ngokuthi amaKristu.” (Ukuhumusha okufanayo kuyatholakala kuyi-Literal Translation of the Holy Bible kaRobert Young, uHlelo Olubukeziwe, luka-1898; The Simple English Bible, ka-1981; nakuyi-New Testament kaHugo McCord, ka-1988.) Cishe ngo-58 C.E., igama elithi amaKristu lalaziwa kahle ngisho nayizikhulu zamaRoma.—IzE. 26:28.

Ngesikhathi abaphostoli bakaKristu besaphila, igama elithi umKristu lalingelihlukanisayo futhi licacile. (1 Pet. 4:16) Bonke ababethi bangamaKristu kodwa abazinkolelo zabo nokuziphatha kwakuphikisana nokusho kwabo babexoshwa emphakathini wamaKristu. Nokho, njengoba uJesu ayebikezele, ngemva kokufa kwabaphostoli uSathane watshala imbewu eyakhiqiza amaKristu-mbumbulu. LamaKristu-mbumbulu nawo athi angamaKristu. (Math. 13:24, 25, 37-39) Lapho ubuKristu bezihlubuki buphendukela ekuguquleni abantu ngempoqo, abanye babethi bangamaKristu ukuze nje bagweme ukushushiswa. Ngokuhamba kwesikhathi, noma imuphi umuntu waseYurophu owayengazibizi ngokuthi ungumJuda, umMuslim, noma owayengaphiki ukuthi uNkulunkulu ukhona ngokuvamile wayebhekwa njengomKristu, kungakhathaliseki ukuthi ziyini izinkolelo zakhe noma ukuthi uziphethe kanjani

Amagama Ayizifekethiso Okugcona

Kusukela ekhulwini le-16 kuqhubeke, lesisimo sababangela inkinga abaGqugquzeli Bezinguquko. Njengoba igama elithi umKristu lalisetshenziswa ngokukhululeke kangako, babezozihlukanisa kanjani kwabanye ababethi bangamaKristu?

Ngokuvamile babemane bakwamukele buthule ukusetshenziswa kwegama eliyisifekethiso lokugcona ababeliqanjwe izitha zabo. Ngakho abaphikisi bezimfundiso zenkolo zikaMartin Luther, eJalimane, yibona abaqala ukusebenzisa igama lakhe kubalandeli bakhe, bebabiza ngokuthi amaLuthela. Labo ababehlanganyela noJohn Wesley, eNgilandi, babizwa ngokuthi ama-Methodist (amaWeseli) ngoba babeqikelela ngokungavamile futhi benza izinto ngokuhleleka ekufezeni imisebenzi yabo engokwenkolo. Ama-Baptist ekuqaleni ayengalifuni igama eliyisifekethiso elithi Anabaptist (elisho, “Obhapathiza Kabusha”) kodwa kancane kancane ayekethisa ngandlela-thile alamukela igama elithi Baptist.

Kuthiwani ngabaFundi BeBhayibheli? Baqanjwa ngokuthi aBalandeli BakaRussell nangokuthi aBalandeli BakaRutherford. Kodwa ukwamukela igama elinjalo kwakuyobangela umoya wamahlelo. Kwakuyoba okungavumelani nokusola umphostoli uPawulu akunikeza amaKristu okuqala, ebhala: “Nxa omunye ethi: Mina ngingokaPawulu, omunye: Mina ngingoka-Apholo, anisibo abenyama na? [okusho ukuthi, ukuba nombono ongokwenyama esikhundleni songokomoya]?” (1 Kor. 3:4) Abanye abantu bababiza ngokuthi “Ama-Millennial Dawnist”; kodwa ukuBusa KukaKristu Kweminyaka Eyinkulungwane kwakumane kungenye yezimfundiso zabo. Abanye bababiza ngokuthi “Ama-Watch Tower”; kodwa nalokho kwakungafanelekile, ngoba i-Watch Tower yayimane ingenye yezincwadi ababezisebenzisela ukusakaza iqiniso leBhayibheli.

Isidingo Segama Elihlukanisayo

Ngokuhamba kwesikhathi, kwaba sobala ngokwandayo ukuthi ngaphezu kwesiqu esithi amaKristu, ibandla lezinceku zikaJehova ngempela lalilidinga igama elihlukanisayo. Incazelo yegama elithi umKristu yase ihlanekezelwe ezingqondweni zomphakathi ngoba abantu ababethi bangamaKristu ngokuvamile babenombono ongacacile uma benawo ngokuqondene nokuthi uJesu Kristu wayengubani, yini ayifundisa, nokuthi yini okwakufanele bayenze uma ngempela bengabalandeli bakhe. Ngaphezu kwalokho, njengoba abafowethu babethuthuka ekuqondeni kwabo iZwi likaNkulunkulu, basibona ngokucacile isidingo sokuba ngabahlukile kulezozimiso ezingokwenkolo ezazizisholo ngokukhohlisa ukuthi zingezobuKristu.

Kuyiqiniso ukuthi abafowethu ngokuvamile babezibiza ngokuthi abaFundi BeBhayibheli, futhi kusukela ngo-1910, babesebenzisa igama elithi International Bible Students’ Association uma bebhekisela emihlanganweni yabo. Ngo-1914, ukuze bagweme ukudideka ngenhlangano yabo engokomthetho eyayisanda kumiswa okwakuthiwa i-International Bible Students Association, bamukela igama elithi Associated Bible Students ukuze babize ngalo amaqembu abo ezindawo. Kodwa ukukhulekela kwabo kwakuhilela okungaphezu kokutadisha iBhayibheli. Ngaphezu kwalokho, kwakunabanye ababelihlola iBhayibheli—abanye, ngobuqotho; abanye, njengabacusumbuli, futhi abaningi, njengabantu ababelithatha njengencwadi enhle. Khona-ke, ngemva kokufa kukaMfoweth’ uRussell, abanye ababengabangane bakhe benqaba ukubambisana ne-Watch Tower Society kanye ne-International Bible Students Association, baze baphikisa ngisho nomsebenzi walezinhlangano. Amaqembu anjalo ayeqembukile ayesebenzisa amagama ahlukahlukene, amanye awo abambelela egameni elithi Associated Bible Students. Lokhu kwabangela ukudideka okwengeziwe.

Kodwa-ke, ngo-1931, samukela igama elihlukanisa ngempela elithi oFakazi BakaJehova. Umbhali uChandler W. Sterling ubiza lokhu ngokuthi “ubuhlakani obukhulu” bukaJ. F. Rutherford, owayengumongameli we-Watch Tower Society. Njengoba lowombhali abheka lendaba, lesi kwakuyisinyathelo sokuhlakanipha esingazange nje sinikeze leloqembu igama eliqashelwayo kodwa esakwenza kwaba lula ukuba lichaze zonke izindawo eziseBhayibhelini ezikhuluma ‘ngofakazi’ ‘nangokufakaza’ njengezisebenza ngokukhethekile koFakazi BakaJehova. Ngokuphambene, u-A. H. Macmillan, owayebambisene nabongameli abathathu be-Watch Tower Society, ekhuluma ngalesosaziso esenziwa uMfoweth’ uRutherford waphawula: “Akukho kungabaza engqondweni yami—manje nangalesosikhathi—ukuthi iNkosi yamqondisa kulokho, nokuthi lelo igama uJehova afuna sibizwe ngalo, futhi sijabula kakhulu futhi sithokoza kakhulu ngokuba nalo.”Yimuphi umbono amaqiniso awusekelayo? Ingabe leligama ‘laliwubuhlakani’ boMfoweth’ uRutherford, noma ingabe laliwumphumela wokuqondisa kwaphezulu?

Izenzakalo Ezakhomba Kuleligama

Kwakusekhulwini lesishiyagalombili B.C.E. lapho uJehova ebangela u-Isaya ukuba abhale: “Ningofakazi bami, usho uJehova, nenceku yami engiyikhethileyo ukuba nazi, ningethembe, niqonde ukuthi nginguye; ngaphambi kwami akwenziwanga uNkulunkulu, nangasemva kwami akayikuba-khona. . . . Ningofakazi bami, usho uJehova, mina nginguNkulunkulu.” (Isaya 43:10, 12) Njengoba kubonisiwe emiBhalweni YamaKristu YesiGreki, iziprofetho eziningi ezalotshwa u-Isaya zihlobene nebandla lobuKristu. (Qhathanisa u-Isaya 8:18 namaHeberu 2:10-13; u-Isaya 66:22 nesAmbulo 21:1, 2.) Nokho, u-Isaya 43:10, 12 wayengakaze akhulunyelwe ngokuningiliziwe ku-Nqabayokulinda phakathi neminyaka engu-40 yokuqala yokunyatheliswa kwayo.

Nokho, ngemva kwalokho ukuhlola imiBhalo kwadonsela ukunakekela kwezinceku zikaJehova ezenzakalweni ezibalulekile ezintsha. UMbuso kaNkulunkulu ngoJesu njengeNkosi yobuMesiya wawuzelwe emazulwini ngo-1914. Ngo-1925, unyaka lokhu okwacaciswa ngawo ku-Nqabayokulinda (yesiNgisi), umyalo ongokwesiprofetho, oku-Isaya isahluko 43, wokuba ngoFakazi BakaJehova wanikezwa ukunakekela komagazini abangu-11 abahlukene.

Ku-Nqabayokulinda (yesiNgisi) ka-January 1, 1926, isihloko esikhulu sasinombuzo obeka inselele: “Ubani Oyodumisa UJehova?” Phakathi neminyaka emihlanu eyalandela, INqabayokulinda yakhuluma ngengxenye ethile ka-Isaya 43:10-12 komagazini abangu-46 abahlukene futhi isikhathi ngasinye yayisetshenziswa kumaKristu eqiniso.b Ngo-1929 kwavezwa ukuthi impikiswano evelele ebhekene nayo yonke indalo ehlakaniphile ihilela ukudunyiswa kwegama likaJehova. Futhi ngokuqondene nomthwalo wemfanelo izinceku zikaJehova ezinawo ngokuqondene nalempikiswano, u-Isaya 43:10-12 wacatshangelwa ngokuphindaphindiwe.

Ngakho amaqiniso abonisa ukuthi ngenxa yokuhlola iBhayibheli, ngokuphindaphindiwe ukunakekela kwakubhekiselwa esibophweni abanaso sokuba ofakazi bakaJehova. Kwakungakhulunywa ngegama leqembu elithile kodwa ngomsebenzi okwakumelwe bawenze.

Kodwa yiliphi igama labofakazi okwakufanele baziwe ngalo? Yiliphi elaliyofaneleka uma kucatshangelwa umsebenzi ababewenza? Yisiphi isiphetho iZwi likaNkulunkulu elakhomba kuso? Lendaba kwaxoxwa ngayo emhlanganweni eColumbus, e-Ohio, e-U.S.A., ngo-July 24-30, 1931.

Igama Elisha

Izinhlamvu ezinkulu ezithi J W zazibonakala ngokugqamile ngaphambili esembozweni sesimiso somhlangano. Zazimeleleni? Kwaze kwaba ngeSonto ngo-July 26, lapho kwachazwa khona lokho ezazikumelele. Ngalolosuku uMfoweth’ uRutherford wabeka inkulumo yeningi ethi “UMbuso, Ithemba Lomhlaba.” Kuleyonkulumo, lapho sichaza labo ababengabamemezeli boMbuso kaNkulunkulu, isikhulumi sabhekisela ngokukhethekile egameni elithi Jehovah’s Witnesses (oFakazi BakaJehova).

Kamuva ngalolosuku uMfoweth’ uRutherford walandelisa lenkulumo ngenye,phakathi nayo akhuluma ngezizathu zokuthi kungani kwakudingeka igama elihlukanisayo.c ImiBhalo ngokwayo yayikhomba kuliphi? Isikhulumi sacaphuna izEnzo 15:14 (NW), ezidonsela ukunakekela enjongweni kaNkulunkulu yokuthatha phakathi kwezizwe “abantu begama lakhe.” Enkulumweni yaso saqokomisa iphuzu lokuthi njengoba kushiwo kusAmbulo 3:14, uJesu Kristu ‘ungufakazi othembekileyo noqinisileyo.’ Sabhekisela kuJohane 18:37, lapho uJesu athi: “Ngafikela lokho ezweni ukuba ngifakazele iqiniso.” Sadonsela ukunakekela kweyoku-1 Petru 2:9, 10, ethi izinceku zikaNkulunkulu kumelwe ‘zishumayele ubukhosi balowo owazibiza ukuba ziphume ebumnyameni, zingene ekukhanyeni kwakhe okumangalisayo.’ Sakhuluma ngamavesi amaningi aku-Isaya, okungewona wonke ayeqondwa ngokucacile ngalesosikhathi, kodwa-ke senza inkulumo yaso yafinyelela umvuthwandaba ngo-Isaya 43:8-12, ohlanganisa ukuthunywa kwaphezulu: “Ningofakazi bami, usho uJehova, mina nginguNkulunkulu,” Khona-ke, iZwi likaJehova ngokwakhe lalibaqondisa kusiphi isiphetho? Yiliphi igama elaliyovumelana nendlela empeleni uNkulunkulu ayebasebenzisa ngayo?

Impendulo esobala yayisezwini lesinqumo elamukelwa ngentshiseko kulesosenzakalo.d Lelozwi lesinqumo, ngokwengxenye, lalithi:

“Ukuze senze isimo sethu sangempela saziwe, futhi sikholelwa ukuthi lokhu kuyavumelana nentando kaNkulunkulu, njengoba ivezwe eZwini lakhe, MASAMUKELENI LELIZWI LESINQUMO elilandelayo:

“LOKUTHI siyamthanda kakhulu uMfoweth’ uCharles T. Russell, ngenxa yomsebenzi wakhe, futhi sivuma ngenjabulo ukuthi iNkosi yamsebenzisa kakhulu futhi yabusisa umsebenzi wakhe, nokho ngokuvumelana neZwi likaNkulunkulu asinakuvuma ukubizwa ngegama elithi ‘Abalandeli BakaRussell’; i-Watch Tower Bible and Tract Society ne-International Bible Students Association kanye ne-Peoples Pulpit Association kumane kungamagama ezinhlangano thina njengeqembu labantu abangamaKristu esinazo, esiziqondisayo nesizisebenzisayo ekwenzeni umsebenzi wethu silalela imiyalo kaNkulunkulu, nokho alikho kulamagama elifanelana nathi noma elisebenza kahle kithi njengendikimba yamaKristu alandela ezinyathelweni zeNkosi yethu noMphathi, uKristu Jesu; singabafundi beBhayibheli, kodwa, njengendikimba yamaKristu akha inhlangano, siyahoxa ekwamukeleni igama elithi ‘AbaFundi BeBhayibheli’ noma ekubizweni ngalo noma ngamagama afanayo njengendlela yokuchaza isimo sethu esifanele phambi kweNkosi; siyenqaba ukuba nalo noma ukubizwa ngegama lanoma imuphi umuntu;

“LOKUTHI, njengoba sithengwe ngegazi eliyigugu likaJesu Kristu iNkosi yethu noMhlengi, othiwe ulungile futhi wazalwa nguJehova uNkulunkulu futhi wabizelwa embusweni wakhe, sikusho ngokunganqikazi ukuthi siyothembeka ngokuphelele futhi sizinikele kuJehova uNkulunkulu nombuso wakhe; siyizinceku zikaJehova uNkulunkulu ezithunywe ukuba zenze umsebenzi ngegama lakhe, futhi, zilalele umyalo wakhe, wokuba zikhulume ngobufakazi obuphathelene noJesu Kristu, nokwazisa abantu ukuthi uJehova unguNkulunkulu weqiniso onguMninimandla onke; ngakho-ke silamukela ngenjabulo igama eliye laqanjwa yiNkosi uNkulunkulu uqobo, futhi sifisa ukwaziwa futhi sibizwe ngegama, elithi, ofakazi BakaJehova.—Isaya 43:10-12.”e

Ngemva kokudluliswa kwezwi lesinqumo eliphelele, ihlombe elikhulu nelashaywa isikhathi eside labonisa ukuvumelana ngokugcwele kwezilaleli nalokho okwakusanda kushiwo.

Ukwamukela Umthwalo Wemfanelo

Yeka ilungelo okuyilo ukubizwa ngegama lowukuphela kukaNkulunkulu weqiniso, uMbusi wendawo yonke! Kodwa lelogama lihambisana nomthwalo wemfanelo. Umthwalo wemfanelo amanye amaqembu angokwenkolo angawufuni. Njengoba uMfoweth’ uRutherford asho enkulumweni yakhe: “Bayajabula labo abalamukelayo igama elingafunwa muntu emhlabeni ngaphandle kwalabo abazinikele ngokuphelele nangokungazigodli kuJehova.” Nokho, yeka indlela okufaneleka ngayo ukuba izinceku zikaJehova ziphathe igama likaNkulunkulu siqu, ukuba zazise abanye ngalo, nokuba lihlanganiswe ngokuyinhloko nokumenyezelwa kwezinjongo zakhe!

Noma yiliphi iqembu noma abantu abakhuluma ngegama likaJehova bazibeka ngaphansi kwesibopho sokudlulisela izwi lakhe ngobuqotho. (Jer. 23:26-28) Akumelwe bagcine ngokwazisa abanye ngamalungiselelo kaJehova okubusisa labo abathanda ukulunga kodwa kumelwe babazise nangezahlulelo zakhe kulabo abenza ukungalungi. Njengoba uJehova ayala abaprofethi bakhe ezikhathini ezidlule, ngokufanayo nanamuhla, ofakazi bakhe akumelwe basuse noma yini ezwini likaNkulunkulu ngokuhluleka ukwazisa abantu ngayo. (Jer. 1:17; 26:2; Hez. 3:1-11) Kumelwe bamemezele kokubili ‘unyaka womusa kaJehova nosuku lokuphindisela lukaNkulunkulu wethu.’ (Isaya 61:1, 2) Labo abalemukela lelizwi lesinqumo elingenhla bawuqaphela lowomthwalo wemfanelo, futhi engxenyeni yakamuva yezwi lesinqumo, bathi:

“NjengoFakazi BakaJehova okuwukuphela kwenjongo esinayo iwukuyilalela ngokuphelele imiyalo yakhe; ukwenza kwaziwe ukuthi ungowukuphela kukaNkulunkulu weqiniso nonguMninimandla onke; ukuthi iZwi lakhe liyiqiniso nokuthi igama lakhe lifanelwe yilo lonke udumo nenkazimulo; ukuthi umbuso wakhe usuzofika, nokuthi njengoba silalela imiyalo yeNkosi manje kumelwe simemezele lezindaba ezinhle njengobufakazi ezizweni futhi sazise ababusi kanye nabantu ngenhlangano kaSathane enonya necindezelayo, ikakhulukazi ‘eLobukholwa’, eliyingxenye embi kakhulu yaleyonhlangano ebonakalayo, nangenjongo kaNkulunkulu yokuyibhubhisa ngokushesha lenhlangano kaSathane, okuyisenzakalo esikhulu esiyolandelwa ukuba uKristu iNkosi ilethele abantu abalalelayo abasemhlabeni ukuthula nokuchuma, inkululeko nempilo, injabulo nokuphila okuphakade; ukuthi umbuso kaNkulunkulu uyithemba lomhlaba, nokuthi alikho elinye, kanye nokuthi lesigijimi kumelwe sinikezwe yilabo ababizwa ngokuthi oFakazi BakaJehova.

“Ngokuzithoba simema bonke abantu abazinikele ngokuphelele kuJehova nasembusweni wakhe ukuba bahlanganyele ekumemezeleni lezindaba ezinhle kwabanye, ukuze indinganiso yokulunga yeNkosi iphakanyiswe, ukuze abantu emhlabeni bazi ukuthi bangalitholaphi iqiniso nethemba lempumuzo; futhi, ngaphezu kwakho konke, ukuze igama elikhulu nelingcwele likaJehova uNkulunkulu lilwelwe futhi liphakanyiswe.”

Akubanga seColumbus, e-Ohio, eMelika, kuphela lapho izilaleli zashaya khona ihlombe lapho zizwa kumenyezelwa lelogama elisha kodwa nasezindaweni ezikude njengase-Australia. EJapane, ngemva kwamahora amaningi kuzanywa, ingxenye emfushane nje yesimiso yazwakala emsakazweni we-shortwave phakathi nobusuku. Yahunyushwa ngokushesha. Ngakho iqembu elincane elalilapho lalizwa izwi lesinqumo nehlombe elaliduma. UMatsue Ishii wayekhona lapho, futhi njengoba kamuva abhala, ‘bamemeza kakhulu ngenjabulo ngokuvumelana nabafowabo ababeseMelika.’ Ngemva komhlangano eColumbus, bonke oFakazi BakaJehova ababesemihlanganweni nasemabandleni kuwo wonke amazwe ababefeza kuwo inkonzo yabo bazwakalisa ukuvumelana kwabo ngokugcwele nalelozwi lesinqumo. Ngokwesibonelo, umbiko ovela eNorway wathi: “Emhlanganweni wethu wonyaka . . . e-Oslo sasukuma sonke futhi samemeza ngentshiseko enkulu sathi ‘Ja,’ lapho samukela igama lethu elisha elithi ‘oFakazi BakaJehova’.”

Lingaphezu Nje Kokuba Igama

Ingabe lonke izwe lalizoqaphela ukuthi abafowethu babemukele lelogama elisha? Yebo, kwaba njalo! Inkulumo okwenziwa kuyo kuqala isimemezelo salelogama yasakazwa eziteshini zomsakazo eziningi kunezazike zasetshenziswa kuze kube yilesosikhathi. Ngaphezu kwalokho, izwi lesinqumo elalichaza ngalelogama elisha lafakwa encwajaneni ethi Umubuso Itemba Lomhlaba. Ngemva komhlangano, oFakazi BakaJehova basakaza izigidi zamakhophi aleyoncwajana ngezilimi eziningi eNyakatho naseNingizimu Melika, eYurophu, e-Afrika, e-Asia, naseziqhingini zolwandle. Ngaphezu kokuhambisa lamakhophi endlini ngendlu, benza umzamo okhethekile wokwenza lamakhophi afinyelele ezandleni zezikhulu zikahulumeni, osomabhizinisi abavelele, kanye nabefundisi. Abanye ababesaphila ngo-1992 babekukhumbula kahle ukuhlanganyela kwabo kulowomkhankaso obalulekile.

Akubona bonke abayamukela kahle lencwajana. U-Eva Abbott ukhumbula ukuthi njengoba ayephuma ekhaya lomfundisi othile e-United States, lencwajana yadlula kuye indiza yayoqathakela phansi. Akazange afune ukuyishiya lapho, ngakho wayicosha; kodwa inja enkulu eyayilapho yabhavumula, yayihlwitha esandleni sakhe, yayiyisa kumniniyo, umfundisi. U-Eva wathi: “Engingakwazanga ukukudlulisela, inja ikudlulisele!”

UMartin Poetzinger, kamuva owakhonza njengelungu leNdikimba Ebusayo yoFakazi BakaJehova, wakhumbula: “Abantu abamangele babebonakala kuzo zonke izindlu lapho sizethula ngamazwi athi: ‘Namuhla ngikuhambele njengomunye woFakazi BakaJehova.’ Abantu babenikina amakhanda noma babuze: ‘Nisengabafundi beBhayibheli, akunjalo? Noma ingabe senizihlanganise nehlelo elithile elisha?’” Kancane kancane lesosimo sashintsha. Emashumini athile eminyaka ngemva kokuba beqale ukusebenzisa igama labo elibahlukanisayo, uMfoweth’ uPoetzinger wabhala: “Yeka ushintsho! Ngaphambi kokuba ngikhulume abantu baye bathi: ‘Kumelwe ukuthi ungomunye woFakazi BakaJehova.’” Yebo, sebeyalazi lelogama manje.

Lelogama lingaphezu nje kokuba yigama. Kungakhathaliseki ukuthi bancane noma badala, bangabesilisa noma abesifazane, bonke oFakazi BakaJehova bahlanganyela emsebenzini wokufakaza ngoJehova nangenjongo yakhe enhle kakhulu. Ngenxa yalokho, uC. S. Braden, uprofesa womlando wezenkolo, uyabhala: “OFakazi BakaJehova bawuhlanganise ngokoqobo umhlaba ngokufakaza kwabo.”—These Also Believe.

Nakuba ukufakaza okwenziwa abafowethu ngaphambi kokuba bamukele igama elithi oFakazi BakaJehova kwakumboza imbulunga yonke, uma kucatshangelwa isikhathi esidlule kubonakala sengathi uJehova wayebalungiselela umsebenzi omkhulu ngisho nangaphezulu—ukubuthwa kwesixuku esikhulu esasiyolondolozwa phakathi ne-Armagedoni, sinethuba lokuphila okuphakade epharadesi emhlabeni.

[Imibhalo yaphansi]

[Amazwi acashunwe esihlokweni ekhasini 149]

‘Ngesiqondiso saphezulu abafundi babizwa ngokuthi amaKristu’

[Amazwi acashunwe esihlokweni ekhasini 150]

Igama elithi umKristu lahlanekezelwa ezingqondweni zabantu

[Amazwi acashunwe esihlokweni ekhasini 151]

Babengaphezu kokuba abaFundi BeBhayibheli

[Amazwi acashunwe esihlokweni ekhasini 157]

“Ningofakazi bami, usho uJehova, mina nginguNkulunkulu”

[Ibhokisi ekhasini 151]

Igama Elithi OFakazi BakaJehova Emazweni AseMelika

Arabic ش‍هود ‍ي‍هوه‍

Armenian Եհովայի Վկաներ

Chinese 耶和華見證人

English Jehovah’s Witnesses

French Témoins de Jéhovah

Greek Μάρτυρες του Ιεχωβά

Greenlandic Jehovap Nalunaajaasui

Italian Testimoni di Geova

Japanese エホバの証人

Korean 여호와의 증인

Papiamento Testigonan di Jehova

Polish Świadkowie Jehowy

Portuguese Testemunhas de Jeová

Samoan Molimau a Ieova

Spanish Testigos de Jehová

Sranantongo Jehovah Kotoigi

Tagalog Mga Saksi ni Jehova

Vietnamese Nhân-chứng Giê-hô-va

[Ibhokisi ekhasini 152]

Abanye Bakubona

Kwakungeyona “INqabayokulinda” kuphela eyaveza ngokusuka eBhayibhelini ukuthi uJehova wayeyoba nofakazi emhlabeni. Ngokwesibonelo, uH. A. Ironside, encwadini ethi “Lectures on Daniel the Prophet” (eyanyatheliswa okokuqala ngo-1911), wabhekisela kulabo ezaziyogcwaliseka kubo izithembiso eziyigugu eziku-Isaya 43 futhi wathi: “Laba bayoba ofakazi bakaJehova, abafakazela amandla nenkazimulo yowukuphela kukaNkulunkulu oyedwa weqiniso, lapho eLobukholwa eliyisihlubuki liyobe linikelwe ekukhohlisweni okunamandla ukuba likholelwe amanga oMphikukristu.”

[Ibhokisi ekhasini 153]

Igama Elithi OFakazi BakaJehova Emazweni AseMpumalanga

NaseziQhingini ZasePacific

Bengali যিহোবার সাক্ষিরা

Bislama Ol Wetnes blong Jeova

Chinese 耶和華見證人

English Jehovah’s Witnesses

Fijian Vakadinadina i Jiova

Gujarati યહોવાહના સાક્ષીઓ

Hindi यहोवा के साक्षी

Hiri Motu Iehova ena Witness Taudia

Iloko Dagiti Saksi ni Jehova

Indonesian Saksi-Saksi Yehuwa

Japanese エホバの証人

Kannada ಯೆಹೋವನ ಸಾಕ್ಷಿಗಳು

Korean 여호와의 증인

Malayalam യഹോവയുടെ സാക്ഷികൾ

Marathi यहोवाचे साक्षीदार

Marshallese Dri Kennan ro an Jeova

Myanmar ယေဟောဝါသက်သေမျာ

Nepali यहोवाका साक्षीहरू

New Guinea Pidgin Ol Witnes Bilong Jehova

Niuean Tau Fakamoli a Iehova

Palauan reSioning er a Jehovah

Pangasinan Saray Tasi nen Jehova

Ponapean Sounkadehde kan en Siohwa

Rarotongan Au Kite o Iehova

Russian Свидетели Иеговы

Samoan, Tuvaluan Molimau a Ieova

Sinhalese යෙහෝවාගේ සාක්ෂිකරුවෝ

Solomon Islands Pidgin all’gether Jehovah’s Witness

Tahitian Ite no Iehova

Tamil யெகோவாவின் சாட்சிகள்

Telugu యెహోవాసాక్షులు

Thai พยาน​พระ​ยะโฮวา

Tongan Fakamo‘oni ‘a Sihova

Trukese Ekkewe Chon Pwarata Jiowa

Urdu

Vietnamese Nhân-chứng Giê-hô-va

Yapese Pi Mich Rok Jehovah

[Ibhokisi ekhasini 154]

Igama Elithi OFakazi BakaJehova E-Afrika

Afrikaans Jehovah se Getuies

Amharic የይሖዋ ምሥክሮች

Arabic ش‍هود ‍ي‍هوه‍

Chicheŵa Mboni za Yehova

Cibemba Inte sha kwa Yehova

Efịk Mme Ntiense Jehovah

English Jehovah’s Witnesses

Ewe Yehowa Ðasefowo

French Témoins de Jéhovah

Ga Yehowa Odasefoi

Gun Kunnudetọ Jehovah tọn lẹ

Hausa Shaidun Jehovah

Igbo Ndịàmà Jehova

Kiluba Ba Tumoni twa Yehova

Kinyarwanda Abahamya ba Yehova

Kirundi Ivyabona vya Yehova

Kisi Seiyaa Jɛhowaa

Kwanyama Eendombwedi daJehova

Lingala Batemwe ya Jéhovah

Luganda Abajulirwa ba Yakuwa

Malagasy Vavolombelon’i Jehovah

Moore A Zeova Kaset rãmba

Ndonga Oonzapo dhaJehova

Portuguese Testemunhas de Jeová

Sango A-Témoin ti Jéhovah

Sepedi Dihlatse tša Jehofa

Sesotho Lipaki tsa Jehova

Shona Zvapupu zvaJehovha

Silozi Lipaki za Jehova

Swahili Mashahidi wa Yehova

Tigrinya ናይ የሆዋ መሰኻኽር

Tshiluba Bantemu ba Yehowa

Tsonga Timbhoni ta Yehova

Tswana Basupi ba ga Jehofa

Twi Yehowa Adansefo

Venda Ṱhanzi dza Yehova

Xhosa amaNgqina kaYehova

Yoruba Ẹlẹ́rìí Jehofa

Zulu oFakazi BakaJehova

[Ibhokisi ekhasini 154]

Igama Elithi OFakazi BakaJehova EYurophu Nase-Mpumalanga Ephakathi

Albanian Dëshmitarët e Jehovait

Arabic ش‍هود ‍ي‍هوه‍

Armenian Եհովայի Վկաներ

Bulgarian Свидетелите на Йехова

Croatian Jehovini svjedoci

Czech svĕdkové Jehovovi

Danish Jehovas Vidner

Dutch Jehovah’s Getuigen

English Jehovah’s Witnesses

Estonian Jehoova tunnistajad

Finnish Jehovan todistajat

French Témoins de Jéhovah

German Jehovas Zeugen

Greek Μάρτυρες του Ιεχωβά

Hebrew עדי־יהוה

Hungarian Jehova Tanúi

Icelandic Vottar Jehóva

Italian Testimoni di Geova

Macedonian, Serbian Јеховини сведоци

Maltese Xhieda ta’ Jehovah

Norwegian Jehovas vitner

Polish Świadkowie Jehowy

Portuguese Testemunhas de Jeová

Romanian Martorii lui Iehova

Russian Свидетели Иеговы

Slovak Jehovovi svedkovia

Slovenian Jehovove priče

Spanish Testigos de Jehová

Swedish Jehovas vittnen

Turkish Yehova’nın Şahitleri

Ukrainian Свідки Єгови

[Izithombe ekhasini 155]

Izinhlamvu ezithi J W (ezazingachaziwe) zazigqamile emhlanganweni ka-1931. Incazelo yazo yembulwa enkulumweni eyayivusa amadlingozi eyayiphathelene negama elisha

[Isithombe ekhasini 156]

Babeziqhayisa ngokutshela abanye ukuthi babengoFakazi BakaJehova