INgxenye 7
Obani Abaqhuba Inkolo Yeqiniso?
1. Yini okumelwe siyenze ukuze sithokozise uNkulunkulu?
UKUZE sibe nobuhlobo obunemfudumalo nobunothando noNkulunkulu kumelwe singazihlanganisi nhlobo nenkolo yamanga. Kumelwe siqhube inkolo yeqiniso. Namuhla izigidi zabantu emhlabeni wonke ziyakwenza lokho.
2. Bangatholakalaphi oFakazi BakaJehova, futhi uyini umsebenzi wabo?
2 Njengoba iBhayibheli labikezela, abakhulekeli beqiniso bakha “isixuku esikhulu” esiphume “kuzo zonke izizwe nezinhlanga nabantu nezilimi.” (IsAmbulo 7:9) Emazweni angu-235 oFakazi BakaJehova abayizigidi bamatasa ekusizeni abanye bafunde ngezindlela nezimfuneko zikaJehova zothando.
Ukubona Abakhulekeli Beqiniso
3. OFakazi bakhulekela bani, futhi yiziphi izinhlobo zokukhulekela abazigwemayo?
3 OFakazi bayaqaphela ukuthi nguJehova kuphela ofanelwe ukukhulekelwa. Bayenqaba ukukhothamela izithombe noma imifanekiso yenkolo. (1 Johane 5:21) Ababahloniphi abafileyo ngokuya emilindelweni noma kweminye imisebenzi ekhuthaza izinkolelo zenkolo yamanga “nezimfundiso zamademoni.” (1 Thimothewu 4:1) Nokho, abashonelwe bona bayabaduduza ngokubachazela isithembiso sikaNkulunkulu sokuthi abafileyo bayovuselwa emhlabeni oyipharadesi.—Johane 5:28, 29; IzEnzo 24:15.
4. Uyini umbono wabantu bakaNkulunkulu ngomlingo?
4 OFakazi abayenzi imilingo, abaloyi futhi abathakathi, ngoba bayazi ukuthi lezi zinto zivela kuDeveli. Abathembeli ekuvikelweni imilingo—bathembela kuJehova.—IzAga 18:10.
5. Kungayiphi indlela oFakazi BakaJehova ‘bengeyona ingxenye yezwe’?
5 UJesu wathi abafundi bakhe ‘babengeke babe ingxenye yezwe.’ (Johane 17:16) Kwayena uJesu wenqaba ukuhlanganyela kwezombangazwe zosuku lwakhe. (Johane 6:15) OFakazi nabo abahlanganyeli kwezombangazwe, kwezobuzwe, nasekubangeni izikhundla kuleli zwe. Kodwa izintela zona bayazikhokha futhi bayayilalela imithetho yezwe abahlala kulo.—Johane 15:19; Roma 13:1, 7.
6. Yiziphi iziqondiso ezilandelwa izinceku zikaNkulunkulu ngomshado nesehlukaniso?
6 Ngenxa yokuthi bayasilalela isiqondiso sikahulumeni, oFakazi bayaqikelela ukuthi imishado yabo ibhaliswe ngokomthetho. (Thithu 3:1) Balalela isiqondiso sikaNkulunkulu futhi ngenxa yalokho abasithathi isithembu. (1 Thimothewu 3:2) Ngaphezu kwalokho, akuvamile ukuba imishado yezinceku zikaNkulunkulu iqedwe isehlukaniso ngoba zisebenzisa izimiso zeBhayibheli ekuphileni kwazo.
7. OFakazi balubonisana kanjani uthando?
7 OFakazi bayathandana. Lokhu kuthandana, kanye nokuthanda kwabo uNkulunkulu, kuyababopha bakhe ubuzalwane beqiniso nakuba bevela ezizweni eziningi ezincane nezinkulu. Lapho kuvela izinhlekelele noma kuphakama izikhathi zokuswela, oFakazi basukumela phezulu basizane. OFakazi babonisa uthando ngendlela abaphila ngayo.—Johane 13:35.
8. Yimiphi imikhuba emibi abantu bakaNkulunkulu abayigwemayo?
8 Abantu bakaJehova bayazikhandla ukuze baphile ngokwethembeka nangobuqotho. Bayakugwema ukweba, ukuqamba amanga, ukuziphatha okubi, ukudakwa nemikhuba yokungathembeki ebhizinisini. Amadoda awabashayi omkawo. Ngesikhathi bengakabi oFakazi, abanye babezenza lezi zinto kodwa ngosizo lukaJehova baziyeka. ‘Bagezwa bahlanzeka’ kuNkulunkulu.—1 Korinte 6:9-11.
Abenzi Bentando KaNkulunkulu
9. Incwadi ethile yathini ngamasonto omoya ase-Afrika?
9 Izinkolo eziningi zithi zineqiniso. Lokhu ezikushoyo zingase zikusekele ngokukhomba imisebenzi emikhulu. Ngokwesibonelo, mayelana namasonto okuthiwa awomoya e-Afrika, incwadi ethile ithi: “Umsebenzi womenzi wemilingo noma inyanga usuthathwe [amaqembu amasha amaKristu]. . . . Athi anikeza izibikezelo enze nezimangaliso. Abaprofethi bawo babona imibono bachaze namaphupho. Basebenzisa iziwasho, amafutha angcwele, umlotha, amakhandlela nempepho ukuze belaphe futhi bagomele izifo.”
10, 11. Kungani lokho okuthiwa izimangaliso namuhla kungabonisi ukuthi inkolo ethile ivela kuNkulunkulu?
10 Amalungu alezi zinkolo athi izimangaliso zifakazela ukuthi uNkulunkulu uyayibusisa inkolo yawo. Kodwa lokho okuthiwa kuyizimangaliso akufakazeli ukuthi uJehova uyayamukela inkolo ethile. USathane unika abakhulekeli bamanga abathile amandla okwenza “imisebenzi yamandla.” (2 Thesalonika 2:9) Ngaphezu kwalokho, iBhayibheli labikezela ukuthi izipho ezivela kuNkulunkulu zokwenza izimangaliso, njengokuprofetha, ukukhuluma ngezilimi nolwazi olukhethekile, ‘zaziyoqedwa.’—1 Korinte 13:8.
11 UJesu waxwayisa: “Akuyena wonke umuntu othi kimi, ‘Nkosi, Nkosi,’ oyongena embusweni wamazulu, kodwa lowo owenza intando kaBaba osemazulwini uyongena. Abaningi bayokuthi kimi ngalolo suku, ‘Nkosi, Nkosi, asiprofethanga yini egameni lakho, saxosha amademoni egameni lakho, senza nemisebenzi eminingi yamandla egameni lakho?’ Kodwa nokho ngiyovuma kubo ngaleso sikhathi ngithi: Angikaze nginazi! Sukani kimi, nina benzi bokungemthetho.”—Mathewu 7:21-23.
12. Obani abayongena eMbusweni wamazulu?
12 Obani-ke abayongena eMbusweni wamazulu? Yilabo abenza intando kaJehova.
Abashumayeli BoMbuso KaNkulunkulu
13. Imuphi umsebenzi uNkulunkulu ayala abantu bakhe ukuba bawenze namuhla, futhi obani abawenzayo?
13 Iyini intando kaNkulunkulu ngabantu bakhe namuhla? UJesu wathi: “Lezi zindaba ezinhle zombuso ziyoshunyayelwa emhlabeni wonke owakhiwe ngenjongo yobufakazi ezizweni zonke.” (Mathewu 24:14) Lona umsebenzi oFakazi BakaJehova abawenza ngentshiseko.
14. Uyini uMbuso kaNkulunkulu, futhi obani abayobusa kulo Mbuso?
14 Kuwo ‘wonke umhlaba owakhiwe,’ oFakazi BakaJehova bamemezela ukuthi uMbuso kaNkulunkulu uwuhulumeni wasezulwini oyobusa umhlaba wonke ngokulunga. Bafundisa ukuthi uJehova umise uKristu Jesu njengeNkosi yalowo Mbuso, kanye nayobusa nabo abangu-144 000 abakhethwe kubantu.—Daniyeli 7:14, 18; IsAmbulo 14:1, 4.
15. Uyobhubhisani uMbuso?
15 Besebenzisa iBhayibheli, oFakazi babonisa abantu ukuthi uMbuso kaNkulunkulu uyobhubhisa sonke isimiso sikaSathane. Iyobe ingasekho inkolo yamanga nezimfundiso zayo ezihlazisa uNkulunkulu zikhazimulise uDeveli! (IsAmbulo 18:8) Bayobe bengasekho nabo bonke ohulumeni babantu abamelene noNkulunkulu!—Daniyeli 2:44.
16. Obani abayoba izikhonzi zikaKristu Jesu, futhi bayohlalaphi?
16 Ngaphezu kwalokho, oFakazi BakaJehova benza kwaziwe ukuthi uKristu Jesu uyobalethela izinzuzo ezinhle kakhulu bonke abenza lokho uNkulunkulu akufunayo. Bayoba izikhonzi zakhe emhlabeni. IBhayibheli liyathembisa: ‘Uyokhulula ompofu okhalela usizo, nohluphekile nanoma ubani ongenamsizi. Uyohawukela ophansi nompofu, imiphefumulo yabampofu uyoyisindisa.’—IHubo 72:12, 13.
17. Obani abawukuphela kwabantu abamemezela uMbuso kaNkulunkulu?
17 Alikho elinye iqembu labantu elenza intando kaNkulunkulu ngokushumayela izindaba ezinhle zoMbuso. OFakazi BakaJehova kuphela abazisa abanye ngoMbuso kaNkulunkulu kuwo wonke umhlaba.
[Izithombe ekhasini 23]
OFakazi BakaJehova banobunye ebuzalwaneni bomhlaba wonke