INGXENYE 5

Buyelani “Kumalusi Nombonisi Wemiphefumulo Yenu”

Ikhona yini inselele oke wabhekana nayo kulezi esesixoxe ngazo kule ncwajana? Uma kunjalo, qiniseka ngokuthi uzoluthola usizo. Izinceku zikaNkulunkulu eziningi ezithembekile—kokubili ezasendulo ngezikhathi zeBhayibheli nezanamuhla—ziye zabhekana nezinselele ezifanayo. Njengoba ziye zathola usizo kuJehova ukuze zibhekane nalezo zinselele, nawe ungaluthola usizo.

UJehova uyokusekela njengoba ubuyela kuye

QINISEKA ngokuthi uJehova uyokusekela njengoba ubuyela kuye. Uyokusiza ubhekane nokukhathazeka, uqede imizwa ebuhlungu futhi uthole ukuthula kwengqondo nenhliziyo ezolile okubangelwa ukuba nonembeza ohlanzekile. Ngemva kwalokho ungase ushukumiseleke ukuba uphinde ukhonze uJehova kanye nabanye abakhulekeli bakhe. Isimo sakho siyofana nesamanye amaKristu angekhulu lokuqala umphostoli uPetru awabhalela la mazwi: “Ngoba naninjengezimvu, niduka; kodwa manje senibuyele kumalusi nombonisi wemiphefumulo yenu.”—1 Petru 2:25.

Ukubuyela kuJehova kuyinto engcono kakhulu ongayenza. Kungani? Uyokwenza inhliziyo kaJehova ijabule. (IzAga 27:11) Njengoba wazi, uJehova unemizwa ngakho izinto esizenzayo ziyamthinta. Kuyiqiniso ukuthi uJehova akasiphoqi ukuba simthande nokuba simkhonze. (Duteronomi 30:19, 20) Esinye isazi seBhayibheli sikubeka ngale ndlela: “Akekho ongavula inhliziyo yakho. Kumelwe uyivule ngokwakho.” Ngokukhulekela uJehova ngenhliziyo enothando, singakhetha ukuwuvula umnyango wenhliziyo yethu. Uma senza kanjalo, siyobe simupha isipho esiyigugu—ubuqotho bethu—futhi simenze ajabule kakhulu. Ngempela, ayikho into engaqhathaniswa nenjabulo esiyithola ngokukhonza uJehova ngendlela emfanele.—IzEnzo 20:35; IsAmbulo 4:11.

Udade ongumKristu opholile wamukelwa ngemfudumalo ebandleni

Ngaphezu kwalokho, lapho uphinde ukhonza uNkulunkulu, isidingo sakho esingokomoya siyokwaneliseka. (Mathewu 5:3) Ngayiphi indlela? Abantu emhlabeni bayazibuza, ‘Kungani silapha?’ Bafuna ukuthola izimpendulo zemibuzo ephathelene nenjongo yokuphila. Abantu banaleso sidingo ngenxa yokuthi uJehova wabadala benaso. Wasidala sinesidingo sokuthola ukwaneliseka ekumkhonzeni. Akukho ukwaneliseka okudlula lokho okubangelwa ukwazi ukuthi sikhonza uJehova ngothando.—IHubo 63:1-5.

Sicela wazi ukuthi uJehova ufuna ubuyele kuye. Ungaqiniseka kanjani ngalokho? Cabanga ngalokhu: Le ncwajana iye yabhalwa ngokucophelela ngosizo lwemithandazo ejulile. Kungenzeka ukuthi uyinikwe umdala ongumKristu noma omunye okholwa naye. Lapho usuyitholile uye washukumiseleka ukuba uyifunde futhi wenze lokho ekushoyo. Konke lokhu kuwubufakazi bokuthi uJehova akakukhohliwe. Kunalokho, ngesineke ukudonsela kuye.—Johane 6:44.

Ukwazi ukuthi uJehova akazikhohlwa izinceku zakhe ezidukile kungasiduduza. Yilokho udade ogama lakhe linguDonna akuqaphela. Wathi: “Njengoba isikhathi siqhubeka ngayeka ukukhonza uNkulunkulu, kodwa ngangivame ukucabanga ngeHubo 139:23, 24 elithi: ‘O Nkulunkulu ngihlolisise, wazi inhliziyo yami. Ngihlole, wazi imicabango yami engincisha ukuthula, Ubone ukuthi ikhona yini indlela ebangela ubuhlungu kimi, Ungihole ngendlela yaphakade.’ Ngangazi ukuthi angiyona ingxenye yezwe—ngangizizwa ngilahlekile—futhi ngangazi ukuthi kwakufanele ngibe senhlanganweni kaJehova. Ngaqala ukubona ukuthi uJehova akakaze angilahle; kwakudingeka ngibuyele kuye. Manje ngijabula kakhulu ngokuthi ngabuyela kuye!”

“Ngaqala ukubona ukuthi uJehova akakaze angilahle; kwakudingeka ngibuyele kuye”

Sithandaza ngobuqotho ukuba nawe uphinde uyithole “injabulo kaJehova.” (Nehemiya 8:10) Ngeke uzisole ngokubuyela kuJehova.

Izimpendulo Zemibuzo Ephathelene Nokubuyela KuJehova

YINI OKUMELWE NGIYENZE?

Umuntu obegula kungadingeka abuyele endleleni yakhe evamile yokuphila, lokho ekwenza kancane kancane. Ngokufanayo, nawe ungathola amandla njengomKristu ngokuzama ukuzondla okungenani ngokudla okuncane okungokomoya njalo ngosuku. Ungabi nomuzwa wokuthi kumelwe wenze konke ngesikhathi esisodwa. Mhlawumbe ungafunda iBhayibheli noma ulilalele imizuzwana embalwa, ufunde enye yezincwadi zethu noma ungene engosini ethi jw.org/zu. Zama nokuya emihlanganweni yebandla ngokushesha ngangokunokwenzeka. Ngaphezu kwakho konke, thandaza kuJehova ucele ukuba akusize. “Kuyilapho niphonsa zonke izinkathazo zenu phezu kwakhe, ngoba uyanikhathalela.”—1 Petru 5:7.

“Ngemva kokuyeka ukukhonza uJehova, lapho ngicabanga ukuthandaza ngangivele ngibe namahloni. Ekugcineni ngaba naso isibindi sokuthandaza futhi umdala wasebandleni weza wazongibona. Wangisiza ngabona ukuthi uJehova akangikhohliwe. Lo mdala wasikisela ukuba ngiqale ngokufunda iBhayibheli nsuku zonke. Lapho ngikwenza lokho, ngathola amandla okuphinde ngiye emihlanganweni yebandla. Ngokuhamba kwesikhathi, ngaphinde ngaya ensimini. Ngiyajabula ukuthi uJehova akazange angikhohlwe.”—U-Eeva.

IBANDLA LIYONGAMUKELA KANJANI?

Ungaqiniseka ukuthi amalungu ebandla ayokwamukela ngemfudumalo. Kunokuba akugxeke noma akwahlulele ayokubonisa ngezenzo ukuthi ayakuthanda futhi enze konke okusemandleni ukuba akukhuthaze.—Hebheru 10:24, 25.

“Nganginamahloni okuya eHholo LoMbuso. Ngangizibuza ukuthi abangane babeyongiphatha kanjani. Omunye udade osekhulile owayekulelo bandla eminyakeni engu-30 edlule wathi kimi: ‘Siyakwamukela ekhaya Ndodana!’ Lokho kwangithinta inhliziyo. Ngazizwa ngisekhaya ngempela.”—UJavier.

“Ngaya eHholo LoMbuso futhi ngahlala emuva ukuze ngingabonwa. Nokho abaningi engangihlanganyela nabo ngiseyingane bangibona. Bangamukela futhi banganga ngendlela enothando kangangokuthi ngazizwa nginokuthula okukhulu. Ngazizwa ngisekhaya.”—UMarco.

ABADALA BAZONGISIZA KANJANI?

Abadala bayokuphatha ngomusa. Bayokuncoma ngesifiso sakho sokuvuselela “uthando owawunalo ekuqaleni.” (IsAmbulo 2:4) Ngesihe bayokusiza ukuba ulungise noma yimaphi amaphutha oye wawenza, bekwenza lokho “ngomoya wobumnene.” (Galathiya 6:1; IzAga 28:13) Abadala bangase bahlele ukuba othile akufundele, mhlawumbe esebenzisa incwadi ethi Sondela KuJehova noma ethi “Zigcineni Othandweni LukaNkulunkulu.” Qiniseka ngokuthi abadala bayokududuza futhi bakusekele uze uqine ngokomoya.—Isaya 32:1, 2.

“Phakathi neminyaka engu-8 ngipholile, abadala babelokhu bezama ukungisiza. Ngolunye usuku, omunye umdala wangibonisa izithombe engangizithathe naye. Zabuyisa izinkumbulo eziningi ezimnandi okwangenza ngafisa ukuphinde ngithole injabulo enganginayo ngisakhonza uJehova. Ngothando abadala bangisiza ngathuthuka ngokomoya.”—UVictor.

“Uyonenza Nibe Namandla”

Iculo lethu elithi Hubelani UJehova linezingoma eziningana ezingakududuza futhi zikukhuthaze njengoba uzivuselela ngokomoya. Ngokwesibonelo, cabanga ngamazwi engoma 60. Le ngoma isekelwe emazwini atholaka kweyoku-1 Petru 5:10, inesihloko esithi “Uyonenza Nibe Namandla.”

UJah waninik’ iqiniso ngenjongo

Wanibizela ekukhanyeni.

Ngezinhliziyo nanilangazelela

Ukumfuna nokwenza okuhle.

Ngomthandazo nathi n’yomlalela;

Wanisiza, usazonisiza.
UJah wayidela iNdodana yakhe;

Ngoba efuna nizuz’uk’phila.

Uma engay’godlang’ iNdodana yakhe,

Khonake uyonipha amandla.

Ngeke al’khohlwe ukholo lwenu;

Uyonakekela bonk’ abakhe.

(CHORUS)

NgoKristu wanithenga, seningabeNkosi.

Uyonenza nibe namandla, niqine.

Usazoqhubek’ elokhu enivikela.

Uyonenza nibe namandla, niqine.

Ukuze ulalele le ngoma nezinye izingoma zoMbuso, bheka ngaphansi kwesithi IZINCWADI > UMCULO.