ISIFUNDO 1

Isethulo Esiphumelelayo

IzEnzo 17:22

OKUFANELE UKWENZE: Isethulo sakho kufanele senze izilaleli zilangazelele ukuzwa okwengeziwe, zazi ukuthi yini okuzokhulunywa ngayo, nokuthi kungani kubalulekile kuzo lokho ozoxoxa ngakho.

INDLELA ONGAKWENZA NGAYO:

Yenza izilaleli zilangazelele ukuzwa ozoxoxa ngakho. Khetha umbuzo, umusho, indaba eyenzeka ngempela noma izindaba ezisematheni, okuzokwenza izilaleli zifune ukuzwa okwengeziwe.

Njengoba ulungiselela, cabangisisa ngezinto izilaleli zakho ezizithandayo nezinto ezizikhathazayo, bese ukhetha isethulo esifanelekayo.
Veza ukuthi inkulumo yakho imayelana nani. Qiniseka ukuthi isethulo sakho senza kucace ezilalelini ukuthi inkulumo yakho imayelana nani, nokuthi yini ofisa ukuyifeza ngayo.
Bonisa ukuthi kungani indaba oxoxa ngayo ibalulekile. Okushoyo kufanele kuvumelane nezidingo zezilaleli zakho. Kufanele kucace kuzo ukuthi indaba oxoxa ngayo izozisiza kanjani.

Lapho ulungiselela inkulumo, zibuze: ‘Yiziphi izimo abafowethu nodadewethu ebandleni ababhekene nazo?’ Yibe sewenza isethulo sakho sivumelane nezidingo zabo.