Inkolo Ingakunciphisa Kanjani Ukukhungatheka?

UKUCINDEZELA, indlala, ukuwohloka kwezindinganiso zokuziphatha, ukusetshenziswa kabi kwemilaliso, ukusongela kwempi yenyukliya​—lezi ezinye zezimpikiswano ezisezinkulumweni zokushisekela ezombangazwe zabanye abefundisi abamisiwe benkolo. Ngokukhanyayo, onke amaKristu ayathinteka ngezindaba ezinjena. Kodwa ingabe ukuhileleka kwezombangazwe kuyindlela engcono yokunciphisa ukukhungatheka kwezwe?

Abaholi benkolo bahileleka kwezombangazwe ngoba bafuna ukubeka “isimo esiqotho” noma ukuxwayisa ohulumeni uma bethatha “indlela engalungile.” Nokho, kuthiwani uma bona ngokwabo bethatha indlela engalungile? Ngokwesibonelo, muva nje esehlakalweni sokushisekela ubuzwe eSerbia, umpristi waseSerbia wadubula ngebhomu umuzi wenxusa laseYugoslav eUnited States. Ngokuqinisekile, isenzo esinjalo sobushokobezi sibi, ikakhulukazi uma senziwa umpristi! Kungakhathaliseki ukuthi ziyini izisusa zakhe, umpristi uthi umelele uNkulunkulu. Kodwa iZwi likaNkulunkulu lixwayisa ngokusobala bonke abakholelwa kuYe: “Ningaziphindiseleli . . . ngokuba kulotshiwe ukuthi: Ngokwami ukuphindisela, ngiyakubuyisela mina, isho iNkosi.” (Roma 12:19) Izenzo ezinjengalesi sompristi zenza buthakathaka ukuhola okuqotho ezinye izinkolo ezizama ukukwenza.

Ngokungaphezulu, ngisho naseSontweni lamaKatolika, abaningi banokungabaza okukhulu ngokuhileleka kwabapristi nezindelakazi ekugumbuqelweni kwemibuso. Owenhlangano yabefundisi baseRoma eColombia wathi: “Abantu bokuqala abahluphekayo ekuvukeleni umbuso ngezikhali abantu abampofu, akusibo abefundisi noma ababhishobhi. Singasisekela kanjani isimo esinjalo?” Upapa ngokwakhe uye wazama ukunciphisa ukushisekela okuthile kwezombangazwe, ethi umsebenzi wompristi noma izindelakazi ukuba zikhonze izidingo ezingokomoya zomhlambi, kunokuba ziwuhlelele ukuvukela umbuso.

Iminikelo yoMkhandlu Wezwe Wamasonto emaqenjini avukela umbuso ngokufanayo yavusa ukuphikisana, ikakhulukazi lapho kubonakala ukuthi amanye amaqembu athola leminikelo anemibiko yokushushisa izithunywa! IMpi Yosindiso yasula njengelungu kuloMkhandlu ngenxa yalempikiswano.

Ngisho namaqembu acindezelayo obuProstestani eUnited States aye agxekwa. Umhleli kamagazini waphawula: “Emisebenzini yelungelo lobuKristu, osekusele nje kukaJesu igama lakhe.” Ngokusobala umhleli waba nomuzwa wokuthi ngokuhileleka kwezombangazwe, abantu abanjalo babenza ngokufanayo kakhulu nabashikeleli bezombangazwe abangenanembeza kunokuba benze njengabefundisi benkolo. Lokhu kusikhumbuza iseluleko sombhali weBhayibheli uJakobe, sokuthi umKristu weqiniso kumelwe azigcine ‘engenabala kokwezwe.’—Jakobe 1:27.

Ngakho-ke, ukushiseka okungokwenkolo kuphakamisa imibuzo enzima ezingqondweni zabantu abacabangayo. Kodwa kuthiwani uma abaholi benkolo bezinqumela ukuba banikeze iseluleko “esiqondile” kuphela emithethweni ethile kahulumeni? Ngisho nalokho kubangela izinkinga, njengoba abaholi banikeza izeluleko eziphikisanayo. Azenzi lutho lokunciphisa ukukhungatheka.

Ngokwesibonelo, eUnited States, abanye benkolo bakhuthaza ukulahlwa kwezikhali. Nokho, abanye bafuna ukuba izwe lakubo libe ne“mpi eqine kakhulu kusukela kulokhu kwaDalwa.” IMoral Majority isebenzela “ukusinda kweMelika,” kanye nehlelo layo lokuqongelela izimali. Nokho, isikhulu soMkhandlu Wezwe Wamasonto sabhala: “Ukuvukela umbuso okukulo lonke izwe kudingekile ukuze kukhululwe isintu ekubhujisweni, ekonakaleni, ekuxhashazweni, nasekucindezelweni, lokho ihlelo lokuqongelela izimali eselukuqalisile.” Saqhubeka satusa ukuphawula kweCuba ngalokhu “kuvukela imibuso okusezweni lonke.”

Ngisho nasezindabeni zokuziphatha ngokobulili, abaholi benkolo banikeza imibono ehlukene. Ngakho-ke umuntu oseceleni angazi kanjani ukuthi iyiphi indinganiso “eqotho” okumelwe ayigcine nokuthi iyiphi “indlela engalungile” okumelwe ayigweme? Ingabe “kulungile” noma “kubi” ukuncika esizweni umuntu azalelwe kuso, eqenjini lezombangazwe akulo, ibala lesikhumba sakhe noma ukuma kwakhe kwezomnotho? Noma ingabe uNkulunkulu ubeke indinganiso esebenza kuwo wonke umuntu yonke indawo?

Ngezindlela eziningi, ukuhileleka kwenkolo kwezombangazwe kuye kwabangela ukudideka kunokuba kulethe isimo so“kwesaba uNkulunkulu” ezindabeni zezwe. Ingabe lokhu kusho ukuthi inkolo ayinayo indima engayifeza? Ingabe akukho engakwenza ekunciphiseni ukukhungatheka ezweni?

Indlela Enhle Kakhulu Yokusiza

Ileli iqiniso, inkolo yeqiniso ingenza okukhulu. Kodwa ukuze sibone ukuthi kuyini lokho, kumelwe siqonde amaqiniso athile ayisisekelo.

Okokuqala, ukuze ibe lusizo, inkolo kumelwe ikhulume ngephimbo likaNkulunkulu, kungabi elabantu. Ingakwenza kanjani lokhu? IBhayibheli lithi: “Yonke imibhalo iphefumlelwe nguNkulunkulu ilungele ukufundisa, nokusola, nokuqondisa, nokuyala ekulungeni, ukuze umuntu kaNkulunkulu aphelele, apheleliselwe yonke imisebenzi emihle.” (2 Thimothewu 3:16, 17) Uma umfundisi wenkolo ekhuluma umbono wakhe, ngisho noma ephethe iBhayibheli ngesandla sakhe, lowombono awuwudluli umbono womunye umuntu. Nokho, uma akushoyo ngempela kuyilokho okuseBhayibhelini, noma ‘emiBhalweni,’ kumelela imicabango kaNkulunkulu.

Okwesibili, uJesu wathi: “Umbuso wami awusiwo owalelizwe.” (Johane 18:36) Ngakho-ke, inkolo yeqiniso, esekelwe eBhayibheli, ayithathihlangothi kwezombangazwe zezwe. Futhi ayimelene nanoma isiphi isizwe, uhlanga, isimiso sezombangazwe noma ilungiselelo lezomnotho. AmaKristu aphakamisa umbuso kaNkulunkulu, hhayi “umbuso” othile walelizwe. UmKristu akumelwe athathe uhlangothi ezimpikiswaneni zezombangazwe zalelizwe njengoba noJesu engathathangahlangothi ekuvuseni umbango phakathi kwamaJuda namaRoma osuku lwakhe.—Marku 12:17.

NjengamaKristu namuhla, uJesu wanikeza usizo olungokwenyama kwabagulayo nakwabasweleyo lapho ayengase akwenze khona. Kodwa akazange ahileleke kwezombangazwe. Umsebenzi wakhe oyinhloko wawuwukushumayela “ivangeli lombuso.” (Mathewu 9:35) Ukushumayela leli“vangeli” elifanayo kuyindlela enhle kakhulu umKristu angasiza ngayo umakhelwane wakhe ngokombono wezimo zezwe ezinzima zanamuhla.

Kungani lokhu kungcono kunokungena kwezombangazwe? Kungoba, njengoba noma ubani okholelwa akubonayo kumelwe avume, ukuthi izinkinga zesintu azinakuxazululeka ngokugcwele ngesenzo sezombangazwe, naphezu kwemizamo enenkuthalo futhi eqotho yabanye bezombangazwe. Kuyofuna igunya namandla angaphezu kwawomuntu azophelisa ubumpofu, ukugula, ukonakala, kanye nabo bonke obunye ubuthakathaka bethu. Futhi iBhayibheli liyachaza ukuthi okunjalo kuyokwenziwa uNkulunkulu kuphela ngombuso wakhe, uhulumeni wakhe wasezulwini ngoJesu Kristu njengenkosi.—Jeremiya 10:23; Daniyeli 2:44.

Ngakho-ke, umsebenzi uJesu awunikeza abalandeli bakhe wawungekhona ukuzama ukuthonya abezombangazwe zezwe, kodwa ukwenza abafundi lokhu abakwenza namuhla ngokushumayela “ivangeli lombuso” kubo bonke abakhileyo emhlabeni. (Mathewu 24:14) Kufanele bazise isintu ukuthi kungani lowombuso uyoqeda ukukhungatheka nokuthi sazi kanjani ukuthi useduze manje. Umsebenzi wabo uwukutshela abanye ngezibusiso ezizogeleza zivela kulowombuso kokubili manje nasesikhathini esizayo, futhi kufanele basize abantu ukuba babe abafundi bakaJesu, okuyobasiza ukuba bahlanganyele kulezozibusiso.​—Mathewu 28:19, 20; 1 Thimothewu 4:8; IsAmbulo 21:3, 4.

Lesigijimi silusizo olukhulu kwabasamukelayo. Siphendula imibuzo yabo exake kakhulu, sisusa ukungabaza kwabo, sibasiza ukuba babhekane nokukhungatheka okubahaqile manje, futhi ngakho-ke, sibonisa indlela yokuthola “ukuthula kukaNkulunkulu okudlula ukuqonda konke.”—Filipi 4:6, 7.

Ingabe Lokhu Kwanele?

Abanye babonakala benomuzwa wokuthi lokhu akwanele. Umfundisi wenkolo oshisekela ezombangazwe ezweni laseNtshonalanga eligcwele ukungayinaki inkolo nokuziphatha okubi wathi: “Kuzoba nesimo sokushisekela ubuzwe esiqine kakhulu ngakumaKristu . . . noma siphele.” Kodwa ingabe ubuKristu buyonqotshwa uma amaKristu aqinisekile engabi abashisekeli bezombangazwe?

Ezinye izithunywa emazweni ampofu nazo zaba nomuzwa wokuthi ukushumayela “ivangeli” akwanele. Zakholelwa ukuthi abantu badinga usizo manje. Ngakho-ke, zathatha uhlangothi emizamweni yokuvukela umbuso. Kodwa ngokuqinisekile noma imiphi imizamo yokuketula ohulumeni abamisiwe iphambene neseluleko seBhayibheli: “Akube yilowo nalowo azithobe phansi kwamandla ombuso.” (Roma 13:1) Futhi kungokuphambene kakhulu nokuziphatha kukaJesu nabalandeli bakhe bangalesosikhathi, ababe“ngesibo abezwe.” (Johane 17:16) Imane nje ikhulisa ukukhungatheka.

UJesu wathembisa abalandeli bakhe beqiniso: “Bhekani, mina nginani izinsuku zonke kuze kube sekupheleni kwezwe.” (Mathewu 28:20) Phakathi nekhulu lokuqala emva kokufa kukaJesu, amaKristu aqinile asikholelwa lesosithembiso. Azigcina ehlukile kwezombangazwe. Futhi, nakuba ashushiswa futhi ezungezwe ukungakholwa, ukholo lobuKristu lwasinda.

Namuhla, uJesu usenabalandeli bakhe. Usakwazi ukulondoloza ubuKristu beqiniso ngaphandle kokuba amaKristu ahileleke kwezombangazwe. Futhi uzofeza injongo kaNkulunkulu yokushintsha umhlaba ube yipharadesi eligcwele abantu abajabulayo, abakhululekile ekukhungathekeni, naphezu kweqiniso lokuthi abantu abaningi namuhla banomuzwa wokuthi yibona abangashintsha lelizwe.—Daniyeli 2:44; IsAmbulo 21:4.

Kodwa ingabe “ivangeli” lanele kubantu abampofu ezweni? Omunye woFakazi BakaJehova owayeyisithunywa eminyakeni eminingana eMpumalanga Ekude wathi:

“Kuyiqiniso ukuthi sasidatshukiswa njalo ubumpofu esasibubona. Kodwa kwakuyosiza ngani ukuba sasikhuthaze abantu abampofu ukuba bavukele umbuso? Ubani owayengaqinisekisa ukuthi uhulumeni olandelayo wawuyokwenza okungcono?

“Ngakho sadonsela ukunakekela kuhulumeni esasazi ukuthi uyokwenza oku ngcono, umbuso kaNkulunkulu. Futhi lapho abantu abampofu bemukela izindaba ezinhle ngombuso, bezwa ubuhlobo obusha noNkulunkulu. Baba nomuzwa wokuthi ngempela uyabanakekela futhi babona indlela abasiza ngayo ebunzimeni bokuphila kwabo. Lokho kwabanikeza umuzwa wesikhundla esiphakemeyo nokuthembela esikhathini esizayo.”

Omunye woFakazi BakaJehova, owachitha iminyaka eminingi eshumayela “ivangeli lombuso” eMelika ePhakathi, wavuma. Wanezela: “Abantu abampofu abamukela ‘ivangeli’ bashiya izinkolelo zabo zakuqala eziyize nemikhuba yabo emibi, njengokubhema, ukugembula, ukudakwa nokuhlafuna ibetel nut; futhi izimo zabo ezingokwenyama ngokuvamile zaba ngcono ngoba base beyisebenzisa kahle imali yabo. Futhi njengoba base bebeka izinto ezingokomoya kuqala ekuphileni kwabo, ubumpofu babo ngokwenyama baba umthwalo omncane kubo. Babengasenamhawu wokunotha, ngoba baqaphela ukuthi babenokuthile abantu abanothile abangenakho.”

Yebo, kungokwemvelo ukukhathazeka ngokungakholwa kuNkulunkulu okwandile, ukucindezela okwandile nendlala nokunye ukugula kwalesisimiso sezinto. Ubukhona obuqhubekayo balezinkinga bubonisa isidingo esiphuthumayo esintwini sombuso kaNkulunkulu. Leli ithemba okuwukuphela kwalo wonke umuntu analo lokubona isikhathi esizayo esijabulisayo, futhi ukuphela kwenkolo yeqiniso, esekelwe ngokweBhayibheli yamaKristu esiza abantu ngokuqinisekile ukuba babe nokholo kulo. Ngokwenza kanjalo, inikeza usizo oluhle kakhulu okungenzeka lunciphise ukukhungatheka kwanamuhla.

[Amazwi acashunwe esihlokweni ekhasini 6]

Abanye benkolo bafuna ukubona izwe lakubo line“mpi eqine kakhulu kusukela kulokhu kwaDalwa”

[Amazwi acashunwe esihlokweni ekhasini 9]

“Sadonsela ukunakekela kuhulumeni esasazi ukuthi uyokwenza okungcono, umbuso kaNkulunkulu”—ISITHUNYWA

[Isithombe ekhasini 7]

UJesu wafundisa abalandeli bakhe ukuba benze abafundi, hhayi ukuba abashisekeli bezombangazwe

[Isithombe ekhasini 8]

Isigijimi seBhayibheli sisiza abantu ukuba babhekane nobunzima ekuphileni kwabo