Imibuzo Evela Kubafundi
▪ AmaKristu ngamanye nebandla kumelwe asibheke kanjani iseluleko seBhayibheli sokushada ‘eNkosini kuphela’?
Maqondana nowesifazane ofelwe yindoda, umphostoli uPawulu uyeluleka: “Ukhululekile, angendela nakubani ngokubona kwakhe, kuphela ukuba kube seNkosini.” (1 Korinte 7:39) Leso akusona nje iseluleko somuntu siqu esivela kumuntu. UPawulu wasiloba ngaphansi kokuphefumlelwa; ngakho lesiseluleko sothando nesihlakaniphile sivela kuNkulunkulu. Ngakho-ke, amaKristu kumelwe asibheke njengesingathi sína, hhayi okuthile okumelwe kunganakwa noma kuthathwe kalula. Umbhalo ongokomlando eBhayibhelini uyakugcizelela lokhu.
Lapho uAbrahama ekhethela uIsaka umfazi, akazange amkhethele umfazi phakathi kwabantu benkolo yamanga, amaKhanani ayebazungezile. Kunalokho, wangena enkathazweni yokufuna, ezweni elikude, umfazi phakathi kwezihlobo ezaziqaphela uNkulunkulu weqiniso. Ngokufanayo, ulsaka watshela uJakobe: “Awuyikuthatha umfazi kuwo amadodakazi aseKhanani.” (Genesise 28:1; 24:1-67) UAbrahama noIsaka baqaphela ukuthi umshado wawungeyona nje indaba yokuthatheka. Ukuzinikezela kuJehova kwakuhilelekile, ngoba ukushada nongakholwa kwakungaletha izinkinga ezingathi sína futhi kwakungase ngisho kuholele umuntu ekuhlubukeni ekukhulekeleni okumsulwa.
Nokho akuwona wonke amaHeberu azahlukanisa ngokuqinile nalabo ababengamkhulekeli uJehova. Ngokwesibonelo, uDina wajwayelana nabantu abasha ababengomakhelwane ababengamkhonzi uNkulunkulu weqiniso. Umphumela waba yini? Enye yezinsizwa yamkhanukela futhi yamona. Kubonakala sengathi isikhathi esithile uJuda washiya umkhaya wakubo futhi wazithathela umfazi ongumKhanani. Kwasebenza kanjani lokho? Nokho, amadodana amathathu, aba umphumela walowomshado wabantu abangafani, kodwa uJehova wabhubhlsa amabili awo ngenxa yobubi bawo. USimeyoni naye wathola indodana kumKhananikazi. Lokhu ngokusobala kwabhekwa njengokubi noma okungathandeki kakhulu kangangokuba kwaqashelwa ohlwini lwezizukulwane zikaJakobe.—Genesise 34:1, 2; 38:1-10; 46:8-10.
Lapho uNkulunkulu enikeza imithetho yokuqondisa uIsrayeli, waxwayisa ngokwenza izivumelwano zomshado nabantu abangamkhonzi uJehova. (Duteronomi 7:2-4) Ukuhlakanipha kwalokhu kwagcizelelwa yinhlekelele eyehlela uSolomoni. Kungenzeka ukuthi waba nomuzwa wokuthi, ngenxa yokuthi wayehlakaniphe ngokukhethekile, wayengabhekana nanoma iyiphi inkinga noma uvivinyo olubangelwa ukushada nowesifazane owayengamkhonzi uJehova. Kodwa lapho engasinaki iseluleko sikaNkulunkulu, ngisho noSolomoni wathola usizi.—1 AmaKhosi 11:1-6.
Ekugcineni, emiBhalweni yamaKristu yesiGreki uNkulunkulu wasiphinda lesiseluleko: Ungashadi nomuntu ongayikhonzi iNkosi. Iseluleko esiphefumlelwe sasingekhona ukuthi, uma uthola umuntu omsulwa, oziphethe kahle, kwamukelekile ukumqomisa nokumshada ngethemba lokuthi ekugcineni angase abe umKristu. Kunalokho, iZwi likaNkulunkulu ngokusobala lithi: “Maningaboshelwa ejokeni linye nabangakholwayo.” (2 Korinte 6:14) Ukushada umKristu othile ongakabhapathizwa kungaba ukusibukela phansi lesiseluleko esingathi sína.
Ngenxa yokuthi oFakazi BakaJehova babheka lesiseluleko njengesihlakaniphile nesingathi sína, abafuni ukusekela noma ikuphi ukuseqa komuntu. Ngokwesibonelo, uma ngenxa yobuthakathaka bomzalwane ngokomoya noma udade eqalisa ukuqomisana noma ukuphola nomuntu ongeyena uFakazi kaJehova, abanye ebandleni abanakukukhuthaza lokho ngokudlelana nalowomuntu ongakholwa. Bavumelana neBhayibheli lapho lithi ongeyena umKristu akayena umngane omuhle. (1 Korinte 15:33) Kodwa kumelwe baqhubeke bebonisa isithakazelo kumzalwane wabo noma udade. Bangase bakwazi ukunikeza iseluleko esikhuthazayo nangokuhlakanipha ukuze basize umKristu ophambukayo ukuba agweme indlela embi eyalandelwa uSolomoni.—Qhathanisa 2 Thesalonika 3:14, 15.
Kodwa kuthiwani uma uFakazi eceba ukubukela phansi iseluleko sikaNkulunkulu futhi eshada nothile owayengeyena uFakazi obhapathiziwe? Ngaphandle kokuba kwakukhona isizathu esikhethekile, abazalwane ebandleni abanakuthanda ukuhlanganyela kulowomshado wabantu abangafani. Ngisho neHholo LoMbuso alinakuvulelwa umshado onjalo. Livulekele imishado yamaKristu abhapathiziwe ashada ‘eNkosini kuphela.’ Noma ngezinye izikhathi lingasetshenziswa abantu ababili abamkhonza njalo uNkulunkulu njengengxenye yebandla nabazobhapathizwa ngokushesha. Ukungavumeli iHholo LoMbuso lisetshenziswe uFakazi oceba ‘ukuboshelwa ejokeni linye nongakholwayo,’ abadala bebandla bangagcizelela ukungathi sína kweseluleko sikaNkulunkulu sokushada ‘eNkosini kuphela.’