Izifo—Isibonakaliso Sezinsuku Zokugcina?
OSOSAYENSI benza intuthuko esheshayo ekufundeni ama-genes omuntu. Abanye bakholelwa ukuthi sebeseduze nokuthola ukuxhumana phakathi kokuzwela ezifweni nokwakheka kwama-genes akho. Kuthiwa ngokushesha nje esikhathini esizayo kuyoba nokwenzeka ukwelapha izifo ezithile ngokuguqula ama-genes akho.
“Uma senikwazi ukufaka ama-genes ukuze nelaphe izifo, kungenzeka futhi ukusebenzisa ama-genes emithini yokuzimonyonga,” kusho uDr. W. French Anderson weNational Institutes of Health. Uyanezela: “Kuyoba okunokwenzeka ukuqala ukudlala ngobuntu bethu.” Yeka ukuzisikela kwelinonile. Ingabe kusho ukuthi isayensi iye yanqoba ekulweni nokugula nezifo?
Ngokuthakazelisayo, eminyakeni engaphezu kwe-1 900 edlule, uJesu Kristu wabonisa ukuthi ukwanda kokugula nezifo kwakuyoba yingxenye ye“sibonakaliso” esiphawula “izinsuku zokugcina,” isikhathi senkathi ayibiza ngokuthi “ukuphela kwezwe.” UJesu wathi: “Kuyakuba-khona . . . nobici . . . izindawo ngezindawo.” Lezi “ziyizifo ezidlangile,” ngokomfundi weBhayibheli uAlbert Barnes.—Mathewu 24:3-7; 2 Thimothewu 3:1; Luka 21:10, 11.
Ungase uthi, ‘Kodwa belulokhu lukhona ubhememe lwezifo.’ Lokho kuyiqiniso. Kodwa, kunezinto ezimbili eziphawulekayo ngokubikezela kukaJesu.
Okokuqala, uJesu akazange asho ukuthi ukugula noma izifo ngokwazo zaziyokwenza “isibonakaliso.” Kunalokho, wanikeza isibonakaliso esiyinhlanganisela, esibala izinto eziningi. Zifundele isiprofetho sakhe esiningiliziwe njengoba sibhalwe kuMathewu 24 no-25, Marku 13 noLuka 21. Ngakho “isibonakaliso” singafaniswa nomdlalo wokuhlanganisa izingxenye ezisikwe ngendlela ethile. Ingxenye eyodwa ayenzi umfanekiso ophelele. Ngokufanayo, isenzakalo esisodwa asakhi “isibonakaliso.” Esikhundleni salokho, “isibonakaliso” sasiyobonakala lapho zonke izinto uJesu azibikezela zenzeka esizukulwaneni esisodwa.—Mathewu 24:32-34.
Okwesibili, kungabonakala kungokungahlangani ngamazwi kaJesu mayelana nobhici noma izifo, ukuba abe yiqiniso namuhla. Ngani? Ngoba intuthuko yezesayensi ayizange ibe nkulu kangaka. Izindawo zokwelapha azikaze zibe zinhle kangaka. Ulwazi lwezokwelapha alukaze lube olusakazeke kangaka.
Ngakho, amaqiniso abonisani? Ingabe amazwi kaJesu ayagcwaliseka ngempela? Kubalulekile ukuba sazi, ngoba ukugcwaliseka kwesiprofetho sikaJesu kuyobonisa ukuthi siphila esikhathini esibucayi kakhulu somlando wesintu.