Imibuzo Evela Kubafundi
◼ Ingabe iziprofetho “zokuvuselela” zikaIsaya nabanye abaprofethi bakudala zinokugcwaliseka kwazo kokugcina epharadesi elingokomoya labantu bakaNkulunkulu banamuhla, noma ingabe futhi zinokugcwaliseka okungokoqobo ePharadesi “lomhlaba omusha” wesikhathi esizayo?
Incwadi ethi “Man’s Salvation out of World Distress at Hand,” eyakhishwa ngo-1975 iWatch Tower Society, yathi ngokuphathelene noIsaya 35: “Kwakungemuva kokubuya kwamaJuda athunjiwe eBabiloni ngo537 B.C.E. ukuthi isiprofetho sokulungisa ‘ihlane,’ ‘ugwadule’ kanye ‘noqwathule’ lwaseJudiya saba nokugcwaliseka okuncane. Ukugcwaliseka okukhudlwana nokokugcina, ukugcwaliseka okungokomoya, kwaqalisa ensalini yamaIsrayeli angokomoya ngemva kokubuya ekuthunjweni emseni kaNkulunkulu eBabiloni Elikhulu ngonyaka ka-1919 C.E.” Ingabe lokhu kusho ukuthi azikho ezinye izici zaleziziprofetho zokuvuselela eziyogcwaliseka ePharadesi elingokoqobo emhlabeni phakathi nokuBusa kukaKristu Iminyaka Eyinkulungwane? Lutho neze!
Amazwi asencwadini i“Man’s Salvation” kumelwe abhekwe ngokuqondile ngokwalokho akushoyo. Isiprofetho sikaIsaya saba nokugcwaliseka okuncane lapho amaIsrayeli ebuyiswa ekuthunjweni eBabiloni, kodwa ukugcwaliseka okukhulu kwaqala ngo-1919 C.E. ngokukhululwa kukaIsrayeli ongokomoya ekuthunjweni eBabiloni Elikhulu. Ukuvuselelwa “ezweni” lawo, iPharadesi lawo elingokomoya, ngalesikhathi kwakungokokugcina futhi kuphelele, ngoba ngeke baphinde futhi bawele ebugqilini banoma iyiphi ingxenye yombuso wezwe kaSathane wenkolo yamanga.
Nokho, lezi nezinye iziprofetho zokuvuselela zihlanganisa izici eziyogcwaliseka ngokoqobo ePharadesi lasemhlabeni. Ngokwesibonelo, kunezici kuIsaya 35:1-7, ezifana nokuphilisa izimpumputhe, izithulu kanye nezinyonga ezingazange zigcwaliseke ngokoqobo ngokubuyiswa eBabiloni lasendulo; futhi ezingazange zigcwaliseke ePharadesi elibuyiselwe elingokomoya namuhla. Kodwa oFakazi BakaJehova babheka phambili ngokulangazela okukhulu ekuboneni lezizithembiso emhlabeni oliPharadesi. Akukho kungabaza ukuthi kungani iNgoma ye-119 eculweni lethu esilisebenzisayo ithandeka kangaka kithi sonke!
Ibhekisele kwezinye iziprofetho zokuvuselela, incwadi yeNhlangano i“God’s Kingdom of a Thousand Years Has Approached” (1973) yathi: “Bekuyoba okuphambene ngoNkulunkulu ukuba aphefumlele isiprofetho esinjalo esifana nesikaIsaya 11:6-9, noHezekiya 34:25 noHoseya 2:18 ukuba zibe nencazelo engokomfanekiso noma engokomoya kuphela futhi zingabi nakho ukufana kwangempela kwalezi zinto ekuphileni okungokoqobo, njengokungathi ukugcwaliseka okungokoqobo kwakuyinto engenakwenzeka.”
Kungokuthakazelisayo ukuthi ababhali abaphefumlelwe bemiBhalo yamaKristu yesiGreki baye basebenzisa lezizici zeziprofetho zokuvuselela ‘emhlabeni omusha,’ ngisho nakuba ukugcwaliseka kwazo okukhulu namuhla kusePharadesi elingokomoya. Ngokwesibonelo, umprofethi uIsaya wakhuluma ngezibusiso ezizoba ‘semazulwini amasha nomhlaba omusha.’ (Isaya 65:17-25) Kamuva, umpostoli uPetru wachaza ukufika kosuku lukaJehova, lapho “amazulu” amanje “nomhlaba” kuyochithwa, futhi wenezela: “Kepha siyalindela ngesithembiso sakhe (ngoIsaya) amazulu amasha nomhlaba omusha okukhona kuwo ukulunga.” (2 Petru 3:10-13) Khona-ke uPetru wabonisa ukuthi izici zesiprofetho sikaIsaya ziyoba ezingokoqobo ‘emhlabeni omusha.’ Injabulo yeqiniso, ukuphila okude, amakhaya alondekile, inala yokudla, umsebenzi owanelisayo, ukuthula phakathi kwabantu nezilwane—zonke lezizibusiso ziyoba khona nakanjani ‘ngokwesithembiso sikaNkulunkulu.’
Ngokwengeziwe, ekhuluma ‘ngedili labantu bonke,’ uIsaya 25:6-8 unezela lamazwi: “Nakuba ukugcwaliseka okukhulu kusePharadesi elingokomoya (kanye ‘nesixuku esikhulu’ sihlanganyela lapho), umphostoli uJohane ubonisa ukuthi lesisici sesiprofetho sikaIsaya sinokugcwaliseka kwangempela esintwini ‘emhlabeni omusha.’ (IsAmbulo 7:9, 16, 17; 21:1-4) Khona-ke iPharadesi lasemhlabeni liyokwakhiwa futhi ngendlela yePharadesi lase-Edeni.—Genesise 2:18; Mathewu 19:28.
Abantu bakaJehova manje bayajabula ekuvuselelweni okuphelele kwepharadesi labo elingokomoya. Futhi ukujabula kwabo akunakuba namkhawuko ePharadesi elingokwenyama, “ngokuba umhlaba uyakugcwala ukumazi uJehova njengamanzi asibekela ulwandle.”—Isaya 11:9; 51:3.