Khuluma IZwi LikaNkulunkulu Ngokungesabi Enkathini Yenyukliya
‘Khuluma izwi likaNkulunkulu ngokungesabi.’—FILIPI 1:14.
1. UMdali weathomu nomongo ophakathi kuyo yini aye wenza ukuba ikhulunywe ngokungesabi phakathi neminyaka engama-49 edlule?
SISENKATHINI yenyukliya. Izwe lonke manje lisongelwa yimpi yenyukliya! UMninimandla onke onguMdali weathomu kanye nomongo ophakathi kuyo ukwazi kahle lokho. Liyini iZwi lakhe losuku lwethu elidinga ukushunyayelwa emhlabeni kabanzi? Esikhathini sethu ‘kunendoda engokomfanekiso eyembethe ilineni, enophondo lukayinki womlobi ngasokhalweni lwayo,’ yenza umsebenzi wokubeka uphawu.
2. Imuphi umsebenzi wokubeka uphawu oye waqhubeka, futhi ngayiphi injongo?
2 ‘Lendoda’ ibibeka uphawu emabunzini abantu abakhala bebubula ngezinto zonke eziyisinengiso ezenziwayo, ikakhulukazi kweLobukholwa, elithi likhulekela uNkulunkulu. (Hezekeli, isahluko 9) Uma becabanga ngenkambo yokuziphatha yabefundisi beLobukholwa ngeMpi Yezwe I neye-II, labantu bayadabuka ngalokho abanesizathu sokukukholelwa ukuthi labobaholi benkolo bayokwenza empini yenyukliya enokwenzeka ezweni lonke. Belindele izinto ezinhle ngalabo okuthiwa abaholi bobuKristu, baphazamiseka ngokujulile ngalokho abefundisi manje abakuvumelayo kulelizwe elonakele kakhulu ngokuziphatha, nelinobudlova nelihlukene phakathi ngokwenkolo. Esimisweni sezinto esilahlelwe ukubhujiswa ngokushesha, labantu abanenhliziyo elungileyo babekwa uphawu ukuze balondolozwe bangene esimisweni sezinto esisha sokulunga.
3. Ukuba lusizi ngani okubaluleke ngaphezu kokuba lusizi ngembubhiso enkulu ecatshangelwayo, futhi yini edingeka kulomsebenzi wokubeka uphawu?
3 Akukho ntuthuko ezintweni zezwe enokulindelwa. Kubantu abaningi abanezinhliziyo ezilungileyo ngaphakathi nangaphandle kweLobukholwa, yini eyoqeda ukwesaba kwabo kokuqothulwa ngobudlova kanye kanye masinyane? Nokho, bangase babe lusizi ngesimo sezinto. Kodwa, okubaluleke kakhulu, ingabe balusizi ngoba igama likaNkulunkulu weBhayibheli eliNgcwele lihilelekile futhi liyahlaziswa ngenxa yezenzo zalabo abathi bangabantu bakhe? Nokho, iwubani ‘indoda eyembethe ilineni’ engokomfanekiso ebeka uphawu abengeziwe balabantu abalusizi, futhi ikwenza kanjani lokhu? Lomsebenzi wokubeka uphawu awuthandwa abefundisi beLobukholwa futhi baye bawuphikisa ngamandla. Ngakho kuye kwadingeka isibindi esikhulu ukuze kwenziwe lomsebenzi wokubeka uphawu.
4. Umuntu owenza umsebenzi wokubeka uphawu wafanekiselwa ubani, futhi iziphi izimfanelo ezidingekayo kulabo abenza umsebenzi wokubeka uphawu namuhla?
4 Kodwa uye waqhubeka ngamandla amakhulu kusukela ngo-1935. Uye wenziwa isigaba samaKristu azinikezele kuJehova uNkulunkulu ngoJesu Kristu, futhi afanekiselwa umprofethi uHezekeli, umpristi wakwaIsrayeli wasendulo. Nguye owabona umbono ‘wendoda eyembethe ilineni enophondo lukayinki womlobi okhalweni lwayo.’ Bazinikezele kuNkulunkulu ofanayo njengoHezekeli, futhi njengaye, bangofakazi bakaJehova. UHezekeli wanamuhla ka-1984 uyisigaba sobupristi, sikaIsrayeli ongokomoya, umphostoli uPetru asibhalela lamazwi atholakala ku-1 Petru 2:9: “Kepha nina niluhlanga olukhethiweyo, ubupristi obobukhosi, isizwe esingcwele, abantu abazuziweyo, ukuze nishumayele ubukhosi balowo owanibiza niphume ebumnyameni, ningene ekukhanyeni kwakhe okumangalisayo.”
5. Bangaki abapristi abangaphansi kwalowo uJehova ambeka ngesifungo ebupristini obukhulu?
5 Ngakho-ke, siyasiqaphela isigaba sikaHezekeli namuhla ukuthi senziwa yilabo abakhonza ngendlela engokomoya njengabapristi abancane, ngaphansi komPristi Omkhulu, uJesu Kristu, uJehova uNkulunkulu ambeka ngesifungo ebupristini “ngokokuma kukaMelkisedeki” owayeyinkosi yaseSalema lasendulo futhi ‘owayengumpristi kaNkulunkulu oPhezukonke.’ (IHubo 110:4; Genesise 14:18; Heberu 5:10; 6:20; 7:10, 11, 15-17) Kusukela ekhulwini lokuqala, umphostoli uPetru abhala kulo incwadi yakhe, uJehova uNkulunkulu uye wakhetha amalungu ‘obupristi bobukhosi,’ ekugcineni ayoba yinani labayizi-144 000 ngaphansi komPristi Omkhulu, uJesu Kristu.—IsAmbulo 7:1-8; 14:1-4.
6. Bangaki ‘abobupristi bobukhosi’ abasesenyameni emhlabeni, futhi bakhonza njengamuphi umuntu ongokomfanekiso?
6 Namuhla kunensali encane nje yamalungu ‘obupristi bobukhosi’ esesenyameni emhlabeni, ngokombiko wezwe lonke wokugujwa kweSidlo SeNkosi Sakusihlwa ngoMarch 29, 1983. Laba bakhonza ndawonye njengendoda engokomfanekiso eyembethe ilineni, ebeka uphawu kulabo abafanele emabunzini abo.
7. Yini leyo labo namuhla abafanekiselwa indoda eyembethe ilineni enophondo lukayinki okumelwe bathembele kuJehova ukuba abenzele yona?
7 UHezekeli umprofethi wasendulo kwakumelwe ame isibindi esikhulu ukuze angabesabi abaphikisi abangamaIsrayeli bosuku lwakhe. Kodwa uNkulunkulu uMninimandla onke wenza isithembiso esasizokwenza ubuso bukaHezekeli buqine njengobuso babaphikisi bakhe, yebo, ngisho nangaphezulu. Ngakho-ke kwakumelwe angabesabi abaphikisi bakhe abangabantu nje. (Hezekeli 2:4; 3:8; Isaya 51:12) Ngokufanayo, insali yamaKristu agcotshwe ngokomoya eyenza isigaba esafanekiselwa indoda eyembethe ilineni inophondo lukayinki okhalweni lwayo idinga ukuthembela kuNkulunkulu kaHezekeli ukuba aqinise ubuso bayo ukuba ibhekane ngokungahlehli nobuso obuqinile babaphikisi ngaphakathi nangaphandle kweLobukholwa.
8. Iziphi iziyalezo ezifanelekayo namuhla uJesu azinikeza?
8 Emakhulwini eminyaka ayishumi nesishiyagalolunye adlule iSithunywa Esikhulu sikaJehova, uJesu Kristu, sathuma abafundi baso emsebenzini wokukhuluma iZwi likaNkulunkulu ngokungesabi ezweni lakubo siqu. Ngaphambi kokubahambisa, sathi: “Ningabesabi ababulala umzimba bengenamandla okubulala umphefumulo, kepha kakhulu mesabeni onamandla okubhubhisa nomphefumulo nomzimba [eGehena].” (Mathewu 10:28) Ngaphezu kwalokho, encwadini yokugcina yeBhayibheli sitshela insali egcotshiwe yesikhathi sethu: “Ungesabi lokho ozakuhlupheka ngakho. Bheka, uSathane uzakuphonsa abanye kini etilongweni ukuba nilingwe, futhi niyakuhlupheka izinsuku eziyishumi. Thembeka kuze kube-sekufeni, ngokunika umqhele wokuphila.” (IsAmbulo 2:10) Yeka ukuthi akhuthaza kanjani lawomazwi!
9. (a) Ukuboshwa koFakazi BakaJehova abaningi namuhla kubonisa ukuthi balalela ziphi iziyalezo ezinikezwe ngenhla? (b) Imuphi umphumela ophambene oboniswa endabeni kaPawulu?
9 Uma sikhumbula ukuthi namuhla kunoFakazi BakaJehova emazweni angaphezu kwama-40 lapho umsebenzi wabo uvinjelwe khona noma ubekelwe imincele engokomthetho—ngokungangabazeki kunamaKristu amaningi manje kunenani elaliboshwe ekhulwini lokuqala nelesibili—oFakazi BakaJehova namuhla abazesabi izinto abangase babhekane nazo, kuhlanganise nokuboshwa. Ukuboshwa kwamaKristu kungase kube nomphumela ophambene kwamanye amaKristu kunalokho isitha esikuhlosile. Umphostoli uPawulu owayeboshiwe wabhala ekuboshweni kwakhe: “Iningi labazalwane eNkosini betholile ithemba ngezibopho zami bazuzile kakhulu isibindi sokukhuluma izwi likaNkulunkulu ngokungesabi.”—Filipi 1:14.
10. (a) OFakazi BakaJehova namuhla bamiselwe ukuba bamemezele isigijimi esivela kumuphi umthombo? (b) Isiphi isimo esifana nesabaphostoli emakhulwini ayi-19 adlule okumelwe basithathe?
10 Namuhla, njengasosukwini lukaPawulu, akusona isigijimi sabantu oFakazi BakaJehova abasimemezela ngokungesabi. Kuyisigijimi esingesikhathi esitholakala eBhayibhelini eliNgcwele, iZwi eliphefumlelwe likaNkulunkulu oPhezukonke, uJehova. Kulelozwi utshela abantu bakhe abazinikezele babhapathizwa ukuthi kumelwe babe oFakazi bakhe, bafakazele ubuNkulunkulu bakhe nobuKhosi bakhe. (Isaya 43:10, 12) Njengoba ebatshela ukuba bamemezele iZwi lakhe elingenaphutha, isiphi isidalwa, esiphakeme noma esiphansi, esinelungelo noma igunya lokuyaleza noma lokubaphoqelela ukuba bayeke ukukhuluma ngalo? Kumelwe kuthathwe isimo sabaphostoli abangamaKristu eminyakeni eyi-1 900 edlule, lapho bethi ezikhulwini: “Simelwe ukulalela uNkulunkulu kunabantu.”—IzEnzo 5:29.
11. Ingabe abantu bazenze onkulunkulu ngokusungula ibhomu yenyukliya, futhi kuthiwani ngegunya labo lokumelana nokumenyezelwa kwesigijimi soMbuso?
11 Abantu abazenzanga onkulunkulu ngokusungula ibhomu yenyukliya, futhi kumelwe balandise kuNkulunkulu oPhezukonke ngendlela abayisebenzisa ngayo. (Bheka iHubo 82:6, 7.) Ngokuveza ibhomu yenyukliya njengesithikamezo, ohulumeni bafuna ukuqhubekisa ukubusa kwabo emhlabeni, kunokuthuthukisa izithakazelo zoMbuso kaNkulunkulu ngoJesu Kristu. Bayakwenqaba futhi bayakuphazamisa ukumenyezelwa kwalowoMbuso ngabalandeli beqiniso nabalalelayo bakaJesu Kristu namuhla. Lenkathi yenyukliya ayiwenzanga amazwi esiprofetho kaKristu aphelelwe yisikhathi noma angabi usizo: “Lokhu kungukuqala kwemihelo. Kepha ziqapheleni nina. Bayakunikhaphela emiphakathini; niyakushaywa emasinagogeni; niyakumiswa phambi kwababusi namakhosi ngenxa yami, kube-ngubufakazi kubo. Kepha ivangeli limelwe ukushunyayelwa kuqala ezizweni zonke. Uma beniqhuba, benikhaphela, ningakhathaleli ngaphambili eniyakukukhuluma, kodwa lokho eniyakunikwa [ukuba nikukhulume] ngalesosikhathi, kukhulumeni; ngokuba kakunina enikukhulumayo kodwa nguMoya oNgcwele.”—Marku 13:8-11.
12. Naphezu kokuphikiswa ngamandla, yini eyayizoshunyayelwa kuqala, futhi lokhu kwakuyoba uphawu oluvelele lwani?
12 Imihelo yezwe yaqala ngo-1914. Ukushushiswa okwabikezelwa kwabalandeli abathembekile nabalalelayo bakaJesu Kristu kwalandela futhi kuyaqhubeka kuze kube namuhla. Bonke ubufakazi bubonisa ukuthi siphila ‘ekupheleni kwalesisimiso sezinto,’ yebo, siseduze nomvuthwandaba waso kulenkathi yenyukliya. (Mathewu 24:3; Marku 13:3, 4) Kodwa ngaphambi kokuba ukuphela okuphelele kufike, “ivangeli” kumelwe ‘lishunyayelwe kuqala.’ Ngakho lokhu ‘kukhuluma izwi likaNkulunkulu ngokungesabi’ emhlabeni kabanzi ngenxa yoMbuso kungobunye bobufakazi obuvelele bokuthi siphila ‘ekupheleni kwezwe.’—Mathewu 24:14.
Ukudla IZwi LikaNkulunkulu Nokulimemezela Emhlabeni Wonke
13. Ikuphi okuhlangenwe nakho okufana nalokho okuchazwe kusAmbulo isahluko 10 insali egcotshiwe eyaba nakho ngemva kweMpi Yezwe I, futhi ngemva kokuqabuleka, imuphi umyalo owanikezwa?
13 UJohane, owokugcina wabafundi ababesele owakhethwa uJesu njengomphostoli, waqeda inkambo yakhe yasemhlabeni ngasekupheleni kwekhulu lokuqala. Phakathi ‘nalokho kuphela kwezwe’ kusukela ngo-1914 kuye kwaba khona insali yamaKristu azinikezele nabhapathiziwe agcotshwe ngomoya kaJehova. Lensali yafanekiselwa uJohane, umbhali wencwadi yokugcina yezincwadi eziphefumlelwe zeBhayibheli, isAmbulo. Onyakeni wokuqala ongemva kwempi ka-1919 lensali yaba nokuhlangenwe nakho okufana nalokho uJohane akuchaza ngokuqondene naye esAmbulweni isahluko 10. Lokhu kwakuzokwenzeka eduze nesikhathi lapho “imfihlakalo kaNkulunkulu,” noma ‘imfihlakalo yakhe engcwele,’ yayiyobe isifeziwe. (IsAmbulo 10:7, IBhayibheli LesiZulu, NW) Ngemva kokuthola ukuqabuleka okungokomoya, njengokungathi babedla “incwadi encane” emnandi ababeyinikezwa, abenza lesisigaba sanamuhla esafanekiselwa uJohane batshelwa: “Kumelwe ukuba uphinde uprofethe ngabantu abaningi, nezizwe, nezilimi, namakhosi.”—IsAmbulo 10:10, 11.
14. Ukuthunywa okwakubhekiselwe kumphostoli uJohane ePhatmose kugcwaliswa obani?
14 Ukuthi umphostoli uJohane esiqhingini sasePhatmose wakwazi ukufeza isabelo sakhe senkonzo esikhulu kangako esemdala, asinawo umbhalo ophefumlelwe ngalokho. Kodwa kuthiwani ngalabo abagcotshiwe namuhla uJohane abafanekisela? Lesisigaba yiso esigcwalisa indima yakhe engokwesiprofetho futhi siqaphela ukuba ukuthunywa kwakhe kugcwaliswe. Amazwi athi, “kumelwe ukuba uphinde uprofethe,” abonisa ukuthi ukuqhubeka ngokukhululeka nomsebenzi wakhe wokufakaza kwakuphazanyiswe ukudingiselwa kwakhe ePhatmose. Kusobala ukuthi okwashiwo kuye lapho ngempela kwakubhekisele kwayebafanekisela namuhla. Njengoba kunjalo, simelwe ukubuza: Mangaki amazwe nezilimi oFakazi BakaJehova abakhuluma kuwo iZwi likaNkulunkulu ngokungesabi njengoba bezimisele ukushumayela “lelivangeli lombuso . . . ezweni lonke, kubengubufakazi”?—Mathewu 24:14.
15. Ukushunyayelwa kwenziwa ngezinga elingakanani manje?
15 IYearbook of Jehovah’s Witnesses ka-1983 ibika amazwe angama-205, nezincwadi zeBhayibheli ezinyatheliswe ngezilimi eziyi-190. Lawomazwe ahlanganisa abantu abamnyama, abamhlophe, abaphuzi, ababomvu nabansundu, nabezizwe ezihlukene, izizwana namahlelo nezilimi ezincane. Kusukela ngeMpi Yezwe I inani ‘lamakhosi’ asesihlalweni sobukhosi liye lancipha kakhulu, kodwa kunezinye izinhlobo eziningi zababusi bezombangazwe abasesikhundleni manje. Kungakhathaliseki isikhundla sabo sokuphatha noma isikhundla sabo kwezombangazwe, isigijimi soFakazi BakaJehova namuhla sihilela futhi sisebenza kubo bonke. Ukuvinjelwa koFakazi BakaJehova emazweni amaningi kangaka kunikeza ubufakazi baleliqiniso.
16. Ngakho-ke ikuphi ukumemezela okuye kwaqhubeka ngokungenakuvinjelwa, naphezu kwamiphi imithandazo yenkolo yabaholi bezwe?
16 Ngakho-ke naphezu kweNhlangano yeZizwe nomlandeli wayo, iZizwe Ezihlangene ezamiswa njengendlela yokuthuthukisa nokulondoloza izwe elinobunye, ukumemezela ngokungesabi uMbuso kaNkulunkulu ngoKristu njengokuphela kwethemba lesintu kuye kwaqhubeka ngokungenakuvinjelwa. “Lelivangeli lombuso” alibonakalanga ‘lilihle’ kubaholi bezwe, njengoba lihluka kakhulu kulokho abacabanga ukuthi kuhle, yebo, okuhle kakhulu, ngesintu esikhathazekile. Banomuzwa wokuthi bangazinakekela izindaba zezwe njengezindaba zabo siqu. Uma benomuzwa wesidingo sosizo lwamandla angaphezu kwawomuntu, empeleni ‘kunkulunkulu walelizwe’ lapho imithandazo yabo yenkolo iye yaya khona futhi yangadlula. UMsunguli waphezulu ‘walelivangeli lombuso’ akalisekeli “lelizwe,” uSathane uDeveli awunkulunkulu walo.—2 Korinte 4:4.
17. (a) Kungani iZwi elilotshiwe likaNkulunkulu lihlula abaphikisi ukuba baliqede? (b) Obani abaye benza iZwi lazwakala kusukela ngo-1919?
17 IBhayibheli elingokwesiprofetho limemezela ngesibindi ukuthi izwi likaNkulunkulu alinasiphelo nokuthi liyohlala phakade. (1 Petru 1:23-25) Kuze kube namuhla lawomazwi ayiqiniso. IBhayibheli, iZwi likaNkulunkulu eliphefumlelwe futhi elilotshiwe, alizange lisulwe, naphezu kwayo yonke imizamo yomuntu yokuliqeda ngokuvinjelwa okungokwenkolo nangomlilo. Ngakho-ke ukushunyayelwa kwaleloZwi likaNkulunkulu elilotshiwe kwadinga othile ozolenza likhulunywe futhi lizwiwe. Ukukhuluma ngokungesabi ngaleloZwi likaNkulunkulu kuye kwaqhutshwa ngokuphikelelayo oFakazi BakaJehova kusukela ngonyaka ongemva kwempi ka-1919 inani elikhulayo lemilomo, naphezu kwemizamo yabaphikisi abathukuthele yokuthulisa izikhulumi ezingesabi.
18. UJehova uyoqhubeka eqinisa amabunzi abanjalo kuze kube nini?
18 Ingabe kungaba khona ukungabaza ngokuthi uMniki Wasezulwini waleliZwi uyoqhubeka eqinisa njengedayimane amabunzi esigaba sakhe sanamuhla sikaHezekeli nabangane baso abanesibindi ukuba babhekane nabaphikisi abanamakhanda alukhuni kuze kube yilapho imbubhiso ivimbela ukuphikisa kwabo? Lutho neze! Uye wenza indlela yofakazi bakhe iphumelele kuze kube manje. Uyoqhubeka enza indlela yabo ichume kuze kube yilapho ‘ukuprofetha futhi ngokuqondene nabantu nezizwe nezilimi namakhosi’ kuye kwafezwa ngokungesabi. Lokhu kungalindelwa ukuba akwenze, kube udumo kuye futhi kulwelwe ubukhosi bakhe bendawo yonke.
Ungakhumbula?
□ Osukwini lwethu yini eyafanekiselwa ‘yindoda eyembethe ilineni enophondo lukayinki womlobi,’ futhi imuphi umsebenzi ewenzayo manje?
□ Kungani kufuneka ukungesabi koFakazi BakaJehova?
□ Lapho umphostoli uJohane edla “incwadi encane,” kwakumelwe enzeni ngalesosikhathi, futhi ikuphi okufana nakho ezikhathini zanamuhla?
[Isithombe ekhasini 11]
Kulenkathi yenyukliya indoda engokomfanekiso eyembethe ilineni yenza umsebenzi ofuna isibindi. Ingabe uhilelekile kulowomsebenzi?
[Isithombe ekhasini 13]
Njengoba uJohane amukela incwadi engokomfanekiso nomyalo wokuba ‘aphinde aprofethe,’ khona-ke amaKristu namuhla amemezela isigijimi sikaNkulunkulu ngokungesabi