Qaphela Ukugabadela!

NGUBANI ongafuni ukugwema ukwenza amaphutha? Angadumaza ngempela, ngokuvamile ngokulimazayo nangokudabukisa kakhulu! Ingabe siyafuna ukugwema amaphutha adabukisayo? Khona-ke kumelwe sigweme inkambo eholela kalula kuwo. Kumelwe siqaphele ukugabadela!

Kuyini ukugabadela? “Kuwukuzithathela igunya, ilungelo, noma imvume ngaphandle kokukufanelekela”; “ukweqa imincele efanele”; “ukulungela ukuzenzela ngokuziphatha noma ngomcabango.” Ngempela, ukugabadela kwenza ukuba umuntu ahambe ngemicabango yakhe futhi kumenze amelane neseluleko noma isiqondiso.

Kodwa obani abagabadelayo? Ingabe ababi ngokusobala? Obani ngempela abadinga ukuqaphela ukugabadela?

Abashushisi Abagabadelayo

Abavelele phakathi kwabagabadelayo esintwini abashushisi babantu bakaNkulunkulu. Baphikelela ngokuthi, kumelwe kulalelwe bona kunoJehova. Ingabe noma isiphi isenzo sokugabadela singadlula lokho?

Umbuso wezwe wasendulo waseBabiloni wawunecala lokugabadela okunjalo. Ngakho, ngabaprofethi bakhe, uNkulunkulu wamemezela ukubhujiswa kweBabiloni. “Ngiyakulijezisa izwe ngobubi balo, nababi ngezono zabo, ngenze ukuba kuphele ukuzidla kwabaziqhenyayo,” kwamemezela uNkulunkulu. Futhi siyafunda: “Bheka, ngimelene nawe ozikhukhumezileyo, isho iNkosi uJehova-Sebawoti, ngokuba usuku lwakho lufikile, isikhathi sokuhanjelwa kwakho.”—Isaya 13:11; Jeremiya 50:31.

Ezikhathini zanamuhla, abaningi abagabadela ngokufanayo baye bashushisa oFakazi BakaJehova. Kodwa labashushisi abaqhoshayo abazange baphumelele. Baphi abashushisi abanjalo abagabadelayo njengoAdolf Hitler wobuNazi noDuplessis onodumo olubi waseCanada?

Izixwayiso Ezivela Esikhathini Esidlule

Nokho, abanye ngaphandle kwabashushisi babantu bakaNkulunkulu baye bawela ogibeni lokugabadela. Yeka ukuthi lokhu kuyiqiniso kanjani endabeni kaSawule, inkosi yokuqala engumuntu phezu kwezizwe eziyi-12 zikaIsrayeli wasendulo! Lapho ekhethwa okokuqala, wayeyindoda ezothile. Eqinisweni, lapho ayezomiswa kubo njengenkosi yabo, wazifihla. (1 Samuweli 10:17-24) Nokho, ngokuhamba kwesikhathi, loludumo oluphawulekayo lwabangela ukuba uSawule azazise kakhulu. Waba yini umphumela? Wabanecala lesenzo esilandelwa esinye sokugabadela.

Isenzo sokuqala sasiphakathi nempi namaFilisti. Umprofethi uSamuweli wayehlele ukuhlangana noSawule ngesikhathi esithile ukuze enze umnikelo kuJehova. Kodwa njengoba isimo sasibonakala sibanzima, futhi uSamuweli engafiki esigcwawini, uSawule ngokugabadela wanikela umhlatshelo ngokwakhe. Yaba yini imiphumela? Ingani watshelwa ukuthi isenzo sakhe sokugabadela sasizomlahlekisela ubukhosi!—1 Samuweli 13:5-14.

Esikhathini esithile ngemva kwalokho, uJehova wayala uSawule ukuba aphindisele ukuhlasela kobugwala ama-Amaleki ayekwenzile kumaIsrayeli phakathi nohambo lwawo lwasehlane. USawule kwakumelwe awabhuqe ama-Amaleki, kodwa ngokuhaha wasindisa izimvu nezinkomo zama-Amaleki ezinhle kakhulu, ngaphezu kwalokho ethi lezizilwane zaziye zagcinelwa izinjongo zomhlatshelo. Wasindisa futhi inkosi yama-Amaleki uAgagi. Ngenxa yalenkambo yokugabadela, uSamuweli watshela uSawule: “Ngokuba [ngokugabadela] ulilahlile izwi likaJehova, naye ukulahlile wena ukuba ungabe usaba-yinkosi.” (1 Samuweli 15:1-23) Yeka ukulahlekelwa ngenxa yokugabadela!

Esinye isibonelo esixwayisayo yileso seNkosi u-Uziya, noma uAzariya ogabadelayo. Ngokungafanele wazama ukunikela impepho ethempelini likaJehova. Kwaba namuphi umphumela? Ingani ngesenzo sakhe sokugabadela, u-Uziya washaywa ngochoko olwesabekayo! Yebo, “uJehova wayishaya inkosi, yaba-ngonochoko kwaze kwafika usuku lokufa kwayo.” (2 AmaKhosi 15:5; 2 IziKronike 26:16-23) Yeka isixwayiso sokuqaphela ukugabadela!

Lalela Iziqondiso EzingokomBhalo

Abashushisi babantu bakaNkulunkulu, futhi ngisho nabanye abantu abazinikezele kuNkulunkulu, ngesikhathi esidlule baye bahlulwa ugibe lokugabadela. Kodwa kuthiwani ngathi namuhla? Ingozi yokugabadela isekhona. Ngenxa yokuthambekela okunesono okuzuzwe njengefa, izilingo zalelizwe elibi ‘namacebo’ kaSathane uDeveli, sonke sidinga ukuzilinda ekwenzeni ngokugabadela.—2 Korinte 2:11; IHubo 51:5; 1 Johane 2:15-17.

NgeZwi lakhe, uJehova uNkulunkulu ngothando uyasixwayisa ngokumelene nokugabadela. Ngokwesibonelo, siyafunda: “Lapho kufika [ukugabadela], kufika nehlazo; kepha kwabathobekileyo kukhona ukuhlakanipha.” (IzAga 11:2) Lapho iqonda indlela ukugabadela okubi ngayo ngempela, iNkosi uDavide ngokuhlakanipha yathandaza: “Yilonde inceku yakho nasezonweni [zokugabadela]; mazingabusi phezu kwami. Yikhona . . . ngingabe ngisaba-necala eziphambekweni ezinkulu.”—IHubo 19:13; qhathanisa neNW.

Ukuzidla Kukhulisa Ukugabadela

Nokho uma sifuna ukugwema ukugabadela, kumelwe sigweme ukuzidla. Ungase ukhumbule ukuthi uSawule waqala ezothile lapho ekhethwa njengenkosi yakwaIsrayeli. Kodwa lokho akuyona indlela agcina ngayo. Iqiniso, wenza ngokugabadela ezimweni ezihlukahlukene. Nokho, okungenani esimweni esisodwa kwakuwukuzidla okwamholela esenzweni sokugabadela nesibi.

Ngesinye isikhathi uSawule wezwa abesifazane bakwaIsrayeli behlabelela: “USawule ubulele izinkulungwane zakhe, kepha uDavide izinkulungwane zakhe eziyishumi.” Lokhu kwalimaza ukuzidla kukaSawule kangangokuthi wabheka uDavide ngokusola nangenzondo. Eqinisweni, uSawule waqala ukuzingela uDavide, ezimisele ukumbhubhisa. Ngokuzidla nangentukuthelo, uSawule washanela ngisho abapristi namadoda abesifazane nabantwana abangama-85 baseNobi—bonke ngenxa yokuthi oyedwa wesibalo sabo wenza ubungane noDavide.—1 Samuweli 18:6-9; 21:1-10; 22:16-19.

Eqhubeka ngenkambo yakhe yokuzidla, neyokugabadela, ekugcineni uSawule wazibulala. ( 1Samuweli 31:4) Yeka isiphetho esidabukisayo ngomuntu owake wazotha!

Sengathi singagwema inkambo yokugabadela kaSawule noUziya. Kunalokho, asilalele iseluleko esingokomBhalo futhi sizuze ezibonelweni ezixwayisayo ezitholakala eZwini likaNkulunkulu. (Roma 15:4) Ngaphezu kwalokho, asihlakulele imfanelo yesizotha, okuzoxoxwa ngayo ezihlokweni ezilandelayo. Lesisici sokwesaba uNkulunkulu siyosisiza ukuba sigweme ukugabadela kokuzidla, nokwesono.