Ubunye Ekukhulekeleni Ngaphansi KweNkosi Yethu EnguMalusi
“Isho kanje iNkosi uJehova, ithi: Bheka, ngiyakuthabatha abantwana bakwaIsrayeli . . . , kube-yinkosi inye kubo bonke.”—HEZEKELI 37:21, 22.
1, 2. (a) Izinduku ezimbili zikaHezekeli 37:16 zimelelani? (b) Yini eyenzeka ‘kulezizinduku’ ezimbili?
SITHI ubunye boMbuso. Futhi lokhu kuvumelana kahle nengxenye yokugcina yesiprofetho sikaHezekeli isahluko 37. Lapho, Hez 37 evesini le-16, uJehova utshela uHezekeli ukuba athathe izinduku ezimbili. Kwenye kumelwe abhale ukuthi, “EkaJuda neyabantwana bakwaIsrayeli, abangane bakhe.” Kwenye kumelwe abhale ukuthi, “EkaJosefa, induku kaEfrayimi neyendlu yonke yakwaIsrayeli, abangane bakhe.” Lezizinduku zimelelani?
2 Zimelela izingxenye ezimbili zombuso wakwaIsrayeli, owahlukana kwaba uJuda ngaseningizimu noEfrayimi ngasenyakatho. Ngamunye ngokulandelana wathunjwa—umbuso wasenyakatho ngo-740 B.C.E. nombuso waseningizimu ngo-607 B.C.E. Kodwa ngo-537 B.C.E. insali yazo zonke lezozizwe zakwaIsrayeli eziyishumi nambili yabuyela eJerusalema, ukuba imise kabusha ukukhulekelwa kukaJehova ngobunye. Lokhu kuboniswe kanjani esiprofethweni sikaHezekeli?
3. Njengoba kuboniswe kuHezekeli 37:19, yini okumelwe ichume phakathi kwabantu bakaNkulunkulu ababuyiselwe?
3 Lalela amazwi kaJehova kuHezekeli, evesini le-19:
“Khuluma kubo uthi: Isho kanje iNkosi uJehova, ithi: Bheka, ngiyakuyithatha induku kaJosefa esesandleni sikaEfrayimi nezizwe zakwaIsrayeli, abangane bakhe, ngiyibeke endukwini kaJuda ngizenze zibe-yinduku inye, babe-munye esandleni sami.”
Ah, ubunye kumelwe buchume phakathi kwabantu bakaJehova ababuyiselwe!
Ubunye Ekukhulekeleni
4. UHezekeli 37:21 wagcwaliseka kanjani (a) ngo-537 B.C.E.? (b) ezikhathini zanamuhla?
4 Abantu bakaNkulunkulu babengasenakuhlukana babe yizizwe ezimbili, ubuqotho babo buhlukaniselwe embusweni wasenyakatho nowaseningizimu, kodwa eqinisweni babeyoba “isizwe sinye ezweni.” UHezekeli ukhuluma amazwi enduduzo kubo, njengoba eyalwa uJehova:
“Khuluma kubo, uthi: Isho kanje iNkosi uJehova, ithi: Bheka, ngiyakuthabatha abantwana bakwaIsrayeli ezizweni lapho baya khona, ngibabuthe nxazonke, ngibayise ezweni lakubo, . . . kube-yinkosi inye kubo bonke. (Hezekeli 37:21, 22)
Njengoba lamazwi agcwaliseka ensalini enobunye kaIsrayeli njengoba yayibuya ekuthunjweni ngo-537 B.C.E., ngakho insali ebuyiselwe yoFakazi abagcotshiwe bezikhathi zanamuhla iye yaba nenjabulo yokuhlanganiswa ezweni layo eliyipharadesi lokuchuma okungokomoya.—Bheka futhi uHezekeli 36:33-36.
5. Abantu bakaNkulunkulu baye bahlanzwa kanjani ekungcoleni?
5 Ngesikhathi esifanayo, abantu bakaNkulunkulu baye bahlanzwa kukho konke ukungcola okungokomoya okubangelwa umbuso wezwe kaSathane wenkolo yamanga, “iBabiloni elikhulu.” (IsAmbulo 17:5; 18:2, 4) Ukukhululwa kwabo ezimfundisweni zamanga zenkolo nasemikhubeni yayo kuwukugcwaliseka okukhulu kwanamuhla kwesiprofetho esasebenza ngendlela encane kuIsrayeli wakudala ekubuyiselweni kwakhe esuka ekuthunjweni eBabiloni elingokoqobo:
“Abasayikuzingcolisa ngezithombe zabo, nangokuzondekayo kwabo, nangesisodwa seziphambeko zabo, kepha ngiyakubasindisa kukho konke ukuhlehla kwabo aboné ngakho, ngibahlambulule, baze babe-ngabantu bami, mina ngibe nguNkulunkulu wabo.”—Hezekeli 37:23.
6. (a) Kungani uIsrayeli ongokomoya manje ejabulela ubuhlobo obuseduze noNkulunkulu wakhe? (b) Ibuphi ubunye okumelwe sibulondoloze, ngisho noma othile ehlubuka eqinisweni?
6 Abantu bakaJehova ababuyiselwe baye bashiya ukukhulekelwa kwezithombe okunyanyekayo kwezinkolo zeLobukholwa nezobuqaba. Abasakhonzi izidalwa njengezithixo noma balandele amasiko enkolo yezwe, njengokugcina “amaholide” anyelisa uNkulunkulu. Ukukhulekela kwabo akuhlukaniselwa konkulunkulu abathathu emunye, unkulunkulu kaZiqu-zintathu oyimfihlakalo, kodwa banobunye njengabantu abamunye abakhulekela uNkulunkulu oyedwa, uJehova. Ngobunye badumisa iNkosi yamakhosi yendawo yonke, futhi lokhu kuyabahlanganisa ndawonye ebunyeni obungekho kunoma ibaphi abanye abantu emhlabeni! (Isaya 52:8) Ngisho noma ohlanganyela nabo eba nonembeza omubi, esuka endikimbeni yeqiniso elilungiselelwe uJehova, sihlala simunye nenhlangano kaNkulunkulu emsebenzini wayo nasebuhlotsheni obuyigugu noNkulunkulu wethu.—IzAga 3:32; Heberu 10:22, 23.
Ukuqaphela INkosi
7. Ngaphezu kokukhulekela kweqiniso, iliphi elinye ithonya elihlanganisayo elithenjiswe abantu bakaNkulunkulu?
7 Lapho uIsrayeli wasendulo ebuyiselwa ‘ezweni’ lakhe, ukukhulekela kweqiniso kwaba amandla ahlanganisayo phakathi kwabo. Kodwa umbuso wawungakabuyiselwa. Pho, kungani uJehova kuHezekeli isahluko 37, amavesi 22 no-24, ekhuluma ‘ngenkosi’ phezu kwabo? Hez 37 Amavesi 24 no-25 afundeka kanje:
“Inceku yami uDavide iyakuba-yinkosi phezu kwabo, kube-ngumalusi munye kubo bonke; bayakuhamba ezahlulelweni zami, bagcine izimiso zami, bazenze. Bayakuhlala ezweni engilinike inceku yami uJakobe, ababehlala kulo oyihlo; bayakuhlala kulo, bona nabantwana babo, nabantwana babantwana babo kuze kube-phakade, uDavide inceku yami abe-yisikhulu sabo kuze kube-phakade.”
8. (a) Kungani lamavesi kumelwe asebenze kuIsrayeli ongokomoya? (b) Sisibonisa kanjani isikhathi sokugcwaliseka?
8 Leyongxenye yesiprofetho ayizange igcwaliseke kuIsrayeli wenyama, futhi ngeke ize igcwaliseke. Ngakho-ke ukusebenza kwayo kumelwe kube kuIsrayeli ongokomoya. Kodwa nini? Nokho, kunini lapho iNkosi ‘emfanelo ingeyayo’ iye yahlala futhi esihlalweni sikaDavide? Lokhu kwenzeka ekupheleni ‘kweZikhathi zabeZizwe’ ngonyaka wanamuhla ka-1914. Njengoba izikhathi zabezizwe zaziphela, ‘umbuso wezwe waba oweNkosi yethu, uJehova, oyobusa kuze kube-phakade naphakade,’ nokaKristu wayo, lowo owafanekiselwa uDavide.—Hezekeli 21:26, 27; Luka 21:24; IsAmbulo 11:15.
9. Iziphi izinto ezimbili ezingokoqobo ezisihlanganisayo namuhla?
9 Ngakho-ke, namuhla, akukhona ukuthi thina boFakazi BakaJehova sihlanganiswa ukukhulekela kweqiniso kuphela—nakuba lokho kukhulekela kubalulekile—kodwa futhi simunye ekubuthaneni ngaphansi kweNkosi yethu ebusayo! Kokubili ukukhulekela kwethu noMbuso kungokoqobo kithi. Futhi kokubili kusebenzela ukusihlanganisa ebuzalwaneni bethu bomhlaba wonke.
10. (a) Siyibheka kanjani iNkosi yethu enguMalusi? (b) Sizigcina kanjani ‘izinqumo zokwahlulela’ zikaJehova?
10 Yeka ukuthi siyithanda kangakanani iNkosi yethu! Kithi sonke ‘ingumalusi oyedwa’—uMalusi onomusa osiholela emanzini okuphila okuphakade. Usazi ngabanye ngamagama futhi unesithakazelo ekusibizeni nasekusiholeleni emadlelweni aluhlaza angokomoya. Kodwa njengezimvu zomhlambi, kumelwe sihlale simunye, ‘sihamba ngezinqumo zikaJehova zokwahlulela.’ Kumelwe sihlale sihlukile ezingxenyeni ezintathu ezilandelayo zenhlangano kaSathane: ezombangazwe zayo ezonakele, ezentengiselwane zayo ezihahayo nenkolo yayo ekhonza izithombe. Ebunyeni obunjengalobo bukaJesu nabafundi bakhe bakuqala, sibonisa ukuthi ‘asisibo abezwe.’ Futhi lokhu kuhlanganisa nokugwema ukuziphatha kabi kwezwe. (Johane 17:14, 16, 20, 21; 18:36) Akumelwe kube khona ukwehlukana phakathi kwethu, njengoba sigcina izimiso zikaJehova futhi ‘sizifeza ngokuqinisekile.’
11. Indlela yethu yokuphila ihluke kanjani kweyabenkolo yezwe?
11 Yeka ukuthi ihluke kanjani lendlela yokuphila kuleyo yabenkolo yezwe! Kubo, ngokuvamile yonke into ivumelekile. Bavumela umphakathi oyekelelayo nokungcola kwawo kokuziphatha. Ngokuvamile banezindinganiso ezihlukene ezingxenyeni ezihlukene zomhlaba. Ngokwesibonelo, emazweni anothile, bacishe babambelele elungiselelweni lendoda eyodwa—nomfazi oyedwa; kwezinye izingxenye bamukela njengamalungu labo abajwayele ukuba nabafazi abaningi futhi abasaqhubeka benabo. (Qhathanisa noMathewu 19:4-6; 1 Thimothewu 3:2, 12.) Kodwa thina esimunye ngaphansi kukaKristu, iNkosi enguMalusi, silandela izimiso zeBhayibheli kuzo zonke izingxenye zomhlaba. Futhi lapho izizwe ziya empini, siyenqaba ukubulala abazalwane bethu bakwesinye isizwe, ngoba emazwini kaIsaya kuthiwa ngathi: “Zingabe zisafunda ukulwa.”—Isaya 2:3, 4.
12. Sikubonisa kanjani ukuthi sisebunyeni, “njengomhlambi esibayeni’’?
12 Lobubunye bensali yamaIsrayeli angokomoya bubikezelwe kahle futhi, embhalweni kaMika 2:12, lapho uJehova ethi khona: “Ngiyakukubutha, . . . njengomhlambi phakathi kwedlelo lawo, kwenziwe ukukhamuluka okuvela kubantu.” Lokhu sikubona emihlanganweni yabantu bakaJehova: Izinkulungwane ezilalele ngokunakekela, ngokuthula, zilangazelela ukubamba izwi ngalinye njengoba ziklabile ngaphansi kokwalusa kukaJehova neNkosi yakhe enguMalusi. Abasempumalanga, abansundu, abamhlophe—insali egcotshiwe “nezinye izimvu”—bonke bamunye kulomhlambi. Imihlangano yethu emikhulu, imihlangano yethu yesifunda, imihlangano yethu yebandla, iwubufakazi obungenakuphikwa bokuthi ubunye boMbuso bungokoqobo ngempela namuhla embulungeni yonke!
13. Umhlambi uye ‘wakhamuluka’ kanjani?
13 Nokho, kuthiwani ngamazwi kaMika, “kwenziwe ukukhamuluka okuvela kubantu”? Yini esiyibonayo ngaphambi nangemva kwemihlangano yethu nemihlangano emikhulu? Phela, umsindo wokujabula kokubonana, njengoba ezingxoxweni ezimnandi sihlanganyela injabulo yokuhlangana kwethu kobuKristu futhi sikhuluma ngenkonzo yethu kuNkulunkulu wethu. Futhi ibandla lomhlaba liba ‘nokukhamuluka,’ futhi, ngenxa yokuthi liyaqhubeka landa; njengoba amabandla amasha eqhubeka ebunjwa, iculo elinokuvumelana lokudumisa uJehova liyaqina ngobukhulu kuwo wonke umhlaba.—IHubo 96:1-3.
14. Bonisa indlela izwe eliqaphela ngayo ubunye bethu.
14 Lobubunye obujabulisayo, njengobomhlambi osesibayeni, buyaqashelwa nayizwe. Ngokwesibonelo, ngesikhathi seMihlangano Yesigodi yoFakazi BakaJenova Yobunye BoMbuso” ka-1983, umnyango wamaphoyisa eTaegu, eKorea, wathumela amaphoyisa angama-30 ehholo lomhlangano ngosuku lokuqala, kodwa ngokubona ukuhleleka okuhle nendlela oFakazi ababeqondisa ngayo izimoto ngaphandle, wathumela amaphoyisa amabili kuphela ezinsukwini ezintathu ezazisasele. ETaejǒn, umphathi wehholo wathi: “Kubonakala ukuthi nina bantu niye naphefumlelwa ezulwini—lokhu kuyamangalisa.” Amazwi okweqisa, kodwa walibonisa iphuzu lakhe! ERangoon, eBurma, omunye wekomiti yeHholo likaGhandhi wathi: “Uma nje umhlaba wonke ubungaba nomphakathi onjengowenu, bekungenakuba nezinkinga emhlabeni.”
“Isivumelwano Sokuthula” SikaJehova
15. Ikuphi ukuthula okufiselekayo okuchazwe kuHezekeli 37:26?
15 Ukuthula kweqiniso kungokwalabo iNkosi yethu enguMalusi, uKristu Jesu, ebaholela edlelweni. Kuwukuthula okuza ngobunye, futhi lobobunye ngempela buwukuba ngokoqobo koMbuso phakathi koFakazi BakaJehova kuwo wonke umhlaba namuhla. UJehova uchaza lokhu ngokumangalisayo emazwini akhe kuHezekeli isahluko 37 ivesi 26:
“Ngiyakwenza isivumelwano sokuthula nabo, sibe-yisivumelwano esiphakade nabo; ngiyakubamisa, ngibandise, ngibeke indlu yami engcwele phakathi kwabo kuze kube-phakade.”
Yeka ukuthula noNkulunkulu! Ukuthula okungaba okwaphakade, siyawubonga umhlatshelo wothando lowo iNkosi yethu enguMalusi eyawenza lapho ilapha emhlabeni!
16. Yini eye yaholela ekwandeni ‘kwezimvu’?
16 Njengoba manje uIsrayeli ongokomoya eye wandiswa wafinyelela inani eligcwele lezi-144 000, isixuku esikhulu ‘sezinye izimvu’ sihlanganyela naye enkonzweni engcwele endaweni engcwele kaJehova. Akukho ukunqamuka kokwanda ‘kwezimvu’—kakade esezifinyelele izigidi! Ngobunye kuwo wonke umhlaba, labamemezeli boMbuso bangena indlu ngendlu. Lokhu kukhulekela phambi kwabantu bonke kungokoqobo futhi kungokwenjongo kithi, kusibonakalisa njengokuphela kwabantu kuwo wonke umhlaba abanesithakazelo sokudumisa igama likaJehova nokumemezela uMbuso wakhe wokuthula! Yeka injabulo esinayo ngokuhlanganyela esivumelwaneni sakhe sokuthula!
17. (a) Isiphi isikhuthazo uJehova asinikezayo kuHezekeli 37:27, 28? (b) Sazi kanjani ukuthi ukunakekela kukaJehova akulinganiselwe kuIsrayeli ongokomoya?
17 KuHezekeli 37, amavesi 27 no-28 sifunda amazwi kaJehova okuphetha ayisikhuthazo emhlanjini wakhe onobunye:
“Itabernakele lami liyakuba-phezu kwabo; ngiyakuba-nguNkulunkulu wabo, bona babe-ngabantu bami. Izizwe ziyakwazi ukuthi mina-Jehova ngiyangcwelisa uIsrayeli, lapho indlu yami engcwele ikhona phakathi kwabo kuze kube-phakade.”
Yeka injabulo esinayo ngokuthi isivikelo sikaJehova sibekwe phezu kwabantu bakhe njengetende! Futhi lokhukunakekela kothando akulinganiselwe kuIsrayeli ongokomoya, ngoba siyafunda ngokuqondene “nesixuku esikhulu” ukuthi “nohleli esihlalweni sobukhosi uyakumisa itabernakele phezu kwabo.” Ukushisa kolaka lukaJehova akusayikubashisa.—IsAmbulo 7:9-17.
18. (a) UJehova ‘umngcwelisa kanjani uIsrayeli’? (b) “Isixuku esikhulu” kwenzeka kanjani ukuba sibe nokuma okuhle phambi kukaNkulunkulu?
18 Yeka ukuthi sijabula kanjani futhi ngokuthi uJehova uhlala phakathi kukaIsrayeli ongokomoya, emisa indawo yakhe engcwele phakathi kwabo ‘kuze kube-phakade’! Njengoba lendawo eyinhloko yokukhulekelwa kwakhe ingcwele, khona-ke labo abazokhuleka lapho kumelwe babe ngcwele, bangcwelise, bahlukaniselwe inkonzo kaNkulunkulu wabo. AmaKristu agcotshiwe kukhulunywa ngawo ‘njengasahlanzwa, angcweliswa, alungisiswa ngegama leNkosi uJesu Kristu nangoMoya kaNkulunkulu wethu.’ (1 Korinte 6:11) Futhi njengoba umbhalo okhonjwe ngenhla wesAmbulo 7:9-17 ubonisa, “isixuku esikhulu” esinamathemba asemhlabeni siye ‘sahlanza izingubo zaso, sazenza zaba-mhlophe egazini leWundlu,’ ukuze sinikele kuNkulunkulu ‘inkonzo engcwele imini nobusuku ethempelini lakhe.’ Yeka ubufakazi obumangalisayo obuvezwa ilenkonzo ehlangene yembulunga yonke!
19. (a) Ziyophoqelelwa kanjani izizwe ukuba zivume amazwi kaHezekeli 38:23? (b) Kuze kube yilesosikhathi, kumelwe sizimisele ukwenzani?
19 Nokho, injabulo yethu enkulu kakhulu, njengoba siqhubekela phambili ngobunye boMbuso, iyoba ukufinyelela osukwini lwempindiselo kaJehova. Khona-ke igama lakhe elikhazimulayo liyongcweliswa—lihlanjululwe kuzo zonke izihlamba eziye zanqwatshelaniswa kulo. Izizwe ziyophoqelelwa ukuba zibone ukukhululwa kwabantu begama likaJehova. Kodwa okubaluleke ngokwengeziwe, njengoba iNkosi yethu ngokwayo isho: ‘Ziyokwazi ukuthi nginguJehova.’ (Hezekeli 38:23) Kwangathi singabambelela ebunyeni bethu boMbuso, obukhona ngempela manje, kuze kube yilapho igama likaJehova elikhazimulayo lingcweliswa ngempela kuyo yonke indawo!
UHezekeli 37:15-28 uye wagcwaliseka kanjani maqondana:
□ Nokwenza abantu bakaJehova ‘induku eyodwa’?
□ Nokumisa ‘inkosi eyodwa nomalusi’?
□ ‘Nesivumelwano sokuthula’ sikaNkulunkulu nabantu bakhe?
□ Netabernakele likaNkulunkulu “phezu kwabo”?
[Isithombe ekhasini 25]
“Isivumelwano sokuthula” sikaJehova sikubantu bakhe abamunye manje futhi siqinisekisa ukuchuma emhlabeni oyiPharadesi