Ukukhangwa Ubuqotho BoFakazi BakaJehova

NGO-1978 uChristine E. King wavakashela ihhovisi legatsha loFakazi BakaJehova eLondon, eNgilandi. Wayefuna ukwaziswa ngokuhlangenwe nakho koFakazi eJalimane phakathi nempi yezwe yesibili ngokuphathelene nethesis (indaba elotshwa umfundi ozothola iziqu) ayeyilungiselelela iziqu zakhe zobudokotela. Lapho eqoqa indaba yakhe, wahlatshwa umxhwele isimo sokuqina soFakazi BakaJehova eJalimane lobuNazi kangangokuba wanquma ukulungiselela nokwazisa ithesis yakhe ukuze ikhishwe njengencwadi. Ngemva kokwamukela iziqu zakhe zobudokotela wabhalela ihhovisi legatsha incwadi: “Ngiye ngathola umsebenzi wami ngoFakazi BakaJehova ubeka inselele kakhulu futhi ngiye ngagcina ngithatheke kakhulu ngokusabela okwenziwa oFakazi baseJalimane kumaNazi; ngiyethemba ukuthi incwadi yami izokubonisa lokhu.” Isihloko sencwadi kaDr. King sithi The Nazi State and the New Religions: Five Case Studies in Non-Conformity.

Okuvelele kakhulu phakathi kokwatholwa uDr. King amanani oFakazi BakaJehova abafa nababoshwa. Lokhu kubonisa ukuthi amanani akhishwa oFakazi ngaphambili ayengaphansi kakhulu. Umthombo kaDr. King walamanani wawuwumqulua owakhishwa uMichael Kater, eMunich, eJalimane. “Ukufundisisa kwami imibhalo yeNkantolo neyamaGestapo,” esho, “ngokuqinisekile kungawasekela lamanani aphakeme.”

Imaphi lamanani? “Abangaba izi-10 000 baboshwa, futhi bebonke bathola isigwebo esenza ingqikithi yeminyaka eyizi-20 000. Ingxenye yoFakazi baseJalimane yaboshwa, abayingxenye yesine balahlekelwa ukuphila kwabo.

Waqhubeka: “Phezu kwabo bonke ubunzima, oFakazi emakamu bahlangana futhi bakhuleka ndawonye, bakhiqiza izincwadi futhi baphendula abanye. Beqiniswa ubuzalwane babo, futhi, ngokungafani nezinye iziboshwa eziningi, beziqaphela kahle izizathu zokuba khona kwezindawo ezinjalo nokuthi kungani kumelwe bahlupheke kanjalo, oFakazi babeyiqembu leziboshwa elincane kepha elikhumbulekayo, eliphawulwa ngonxantathu oluhlaza nelaziwa ngesibindi salo nezinkolelo zalo.”

UDr. King wenza lokhu kulinganisa okuqhubekayo: “Izimiso ezingokwenkolo zazilandelwa; oFakazi bahlala ‘bengathathi-hlangothi,’ babeqotho futhi bethembeke ngokuphelele futhi njengabanjalo, ngokuhlekisayo, ngokuvamile babezithola besetshenziswa njengezisebenzi zama-S.S. [inhlangano eyayiphatha amakamu okuhlushwa]. Esinye isikhulu sama-S.S. sathi uFakazi KaJehova kuphela ongathenjwa ngokugunda inkosi yakhe ngensingo ngaphandle kokuyisika.”

Ngemva kokukhulumela ukuthi umbuso wobuNazi wawanqoba amanye amahlelo ngokuwalahlisa ukholo lwawo, uDr. King wathi: “Kungokumelene noFakazi kuphela lapho uhulumehi engaphumelelanga khona, ngoba nakuba ayebulele izinkulungwane, umsebenzi [wokushumayela ngoMbuso kaJehova] waqhubeka futhi ngoMay 1945 inhlangano yoFakazi BakaJehova yayisaphila, kanti iNational Socialism yayingasekho. Amanani oFakazi ayandile futhi kwakungekho kulahla ukholo okwakwenziwe. Lenhlangano yayizuze abafel’ ukholo futhi yayilwe ngokuphumelelayo enye impi empini kaJehova uNkulunkulu.”

[Umbhalo waphansi]